لينك التسجيل الصوتي علي ساوند كلاود:
https://on.soundcloud.com/sp3Ud
لما الحرب العالمية الأولي قامت سنة 1914 و الفرنسيين صحيوا من النوم لقوا بلدهم في حالة حرب ضد ألمانيا و سمعوا الأخبار إن القوات المسلحة الألمانية بقت زي الطور الهايج في عنبر 9 و محدش عارف يلمها و بتزحف .. لا بتزحف إيه .. دي بتجري ناحية العاصمة باريس فيه ناس كتير فكرت إنها تسيب فرنسا و تجري و فيه ناس فكرت تشيل سلاح عشان تدافع عن بلدها .. وسط كل الهري ده فيه واحدة إسمها (ماري كوري Marie Curie) كانت بتسأل نفسها هو أنا ممكن أعمل إيه؟ .. للي منكوا مسمعش إسمها قبل كده دي كانت واخده جايزة نوبل لإكتشافها النظائر المشعة الراديوم Radium و البولونيوم Polonium .. يعني دي ست قضت حياتها جوه المعامل و عمرها ما شالت سلاح .. دي ست وقتها كانت عندها فوق الخمسين سنة عندها بنت شابة إسمها (إيرين Irene) و عايشين لوحدهم في باريس ..(ماري كوري) أساساً مش فرنسية هي هاجرت من بلدها الأصلية بولندا لفرنسا بس هي حاسة إن فرنسا هي بلدها ومش عارفة في إيدها تعمل إيه؟
أكيد هي مش حتحارب الألمان بحتة راديوم مشع عشان تجيبلهم تسمم يموتهم بعد عشر سنين .. اللي عملته (ماري كوري) إنها الأول لازم تأمن شغلها و مستقبلها .. حطت كل الراديوم اللي في المعمل بتاعها في علبة من الرصاص و ركبت القطر من باريس راحت مدينة بوردو في أقصي غرب فرنسا علي المحيط الأطلنطي .. هناك خدت العلبة و حطتها في بنك و قفلت عليها علي أمل إنها ترجع تاخدها و تكمل شغلها بعد ما الحرب تخلص و تكون فرنسا كسبت .. الخطوة اللي بعد كده إنها بدأت تقرأ عن حاجة هي سمعت عنها قبل كده اللي هي الأشعة السينية أو أشعة إكس أو X-Rays .. (ماري كوري) كانت بتلعب في راسها فكرة ألماظ تستاهل سجارة عنب بس كانت محتاجة شغل كتير.
مهم تكون عارف إن الأشعة السينية مكنتش إختراع جديد وقت (ماري كوري) ما فكرت فيها .. الأشعة السينية إكتشفها واحد إسمه (فيلهلم رونتيجين Wilhelm Roentgen) سنة 1895 وخد عنها جايزة نوبل يعني الأشعة السينية كانت موجودة قبل الحرب العالمية الأولي ماتبدأ بحوالي 20 سنة .. وقتها كانت المستشفيات الكبيرة في كل مدن أوروبا تقريباً فيها مكنة أشعة سينية و كان الدكاترة بيستخدموها عشان يشوفوا هل المريض جسمه جواه جسم غريب زي مثلاً طلقة أو شاظية مدفع .. (ماري كوري) مخترعتش الأشعة السنية عشان بس تكون فاهم .. اللي (ماري كوري) فكرت فيه هو إزاي تنقل مكنة الأشعة السينية اللي بتتحط في أوضة كاملة جوه المستشفي الكبيرة في المدينة للمستشفي الميداني في قلب المعركة اللي العساكر بتتعالج فيها؟ .. الفكرة اللي كانت في دماغ (ماري كوري) هي الRadiological Car أو عربية الأشعة .. ودي عربية حيتحط فيها مكنة أشعة سينية و حيتحط فيها مكنة تحميض صور اللي هي بتتسمي Photographic Darkroom Equipment اللي هي الأوضة الظلما خالص اللي بتشوفها في الأفلام عشان يحمضوا فيها الصور .. العربية دي تقدر تسوقها لميدان القتال عشان الجراحين يعملوا أشعة سينية علي العساكرالمصابة .. شفت سهلة أهي.
لما الست (ماري كوري) جت تشتغل علي فكرتها قابلتها مشكلة كبيرة وهي طب المكنة دي حتشتغل إزاي؟ .. طب مكنة الأشعة السينية في المستشفيات بيبقي ليها فيشة كهربا بتتحط في الكوبس و تشتغل .. طب المكنة اللي في العربية دي حتشتغل إزاي؟ و حنجيب كهربتها منين؟ .. عارف الدينامو Dynamo اللي بيتحط في كل العربيات دلوقتي؟ .. البتاعة اللي بتلف عن طريق سير Belt بياخد حركته من حركة الموتور و بيشغل مولد كهربي عشان يدي كهربا للعربية و يشغل اللمض و أي حاجة بالكهرباء في العربية؟ .. أهو اللي عملته (ماري كوري) إنها جابت إختراع الدينامو ده اللي برده مش هي اللي عاملاه بس جابت الإختراع ده ركبته في العربية عشان يشغل مكنة الأشعة السينية بتاعتها .. ومن ساعتها ومفيش عربية بتتصنع إلا لما يبقي فيها الدينامو ده .. عايزك تفتكر في كل مرة بتتك علي زرار في عربيتك بتشغل أي حاجة بالكهربا إنه بيشتغل بسبب إن فيه واحدة ست هي اللي فكرت في الموضوع ده .. إفتكر ده كويس.
الست (ماري كوري) خدت الورق بتاع التصميمات و راحت لوزارة الدفاع الفرنسية تشرح للضباط الكبار فكرتها و إن إزاي ده حينقذ أرواح عساكر كتير .. كل ما تقعد مع حد يتريق عليها لمجرد إنها واحدة ست .. اللي يقولها لو عايزه تساعدي أطبخي أكل للعساكر .. و اللي يقولها أقعدي في بيتك يا ولية و ربي بنتك .. ولاد الحلال دلوها علي حاجة إسمها إتحاد ستات فرنسا Union of Women of France وده حاجة شبه هوانم جاردن سيتي كده اللي هم كل ستات الطبقة اللي معاها فلوس في فرنسا بيتقابلوا مع بعض يجيبوا في سيرة الناس .. الستات لمولها الفلوس اللي هي عايزاها و(ماري كوري) عملت أول عربية أشعة و راحت بيها لميدان واحدة من أشهر المعارك في الحرب العالمية الأولي اللي هي معركة مارني Battle of Marne واللي إنتصر فيها الحلفاء علي الألمان وسط حالة من إن محدش مصدق اللي (ماري كوري) عملته و حالة من ياريتنا كنا سمعنا كلامك من بدري .. العساكر لما شافوا العربية و شافوا (ماري كوري) طلعوا علي العربية إسم (ليتل كوري Little Curie) يعني (كوري الصغيرة) و الإسم لزق و بقت مشهورة بيه.
قيادة القوات المسلحة الفرنسية إتكلمت مع (ماري كوري) إنهم محتاجين كذا عربية من دول بس هي معندهاش عربيات .. دي كانت سالفه فلوس العربية اللي معاها و الجيش بيقولها إتصرفي .. ملقتش حل غير إنها تروح لهوانم باريس تاني و المرة دي مش إدولها فلوس إنما إدولها 20 عربية أيام ما كانت العربية زمان تعتبر من الأملاك زيها زي القصور كده .. طب دلوقتي الحمد لله (ماري كوري) بقي معاها العربيات .. إكتشفت إنها معندهاش حد يشتغل عليهم .. هي و بنتها اللي بفكرك إن إسمها (إيرين Irene) و اللي بالمناسبة خدت جايزة نوبل بعد كده هي كمان عملوا كورس مكثف مرنوا فيه 20 ست مش راجل علي إزاي يشغلوا مكن الأشعة السينية .. الكورس كان عبارة عن البنت اللي حتشتغل علي المكنة تفهم يعني إيه كهرباء؟ و يعني إيه أشعة سينية؟ و شوية معلومات عن التشريح و إزاي تحمض صور؟ .. لما الحرب خلصت سنة 1918 كانت (ماري كوري) دربت 150 بنت علي إزاي تشغل مكن الأشعة السينية في العربيات الLittle Curie.
الست (ماري كوري) في رحلتها خلال الحرب مش بس عملت العربية Little Curie ومش بس دربت بنات علي إنهم يشتغلوا عليها و مش بس أنقذت أرواح ناس كتير .. دي إتعلمت إزاي تسوق و إتعلمت إزاي تغير عجل العربية و إتعملت صيانة العربيات و إزاي تنظف الكربارتير .. فوق ده كله هي أشرفت علي تركيب أكتر من 200 مكنة أشعة سينية في مستشفيات كبيرة إتبنت في أماكن مختلفة في فرنسا وقت الحرب .. بس كل ده مخلهاش تتفادي إحساس تأنيب الضمير اللي كانت بتحسه مع كل بنت بتدربها بتروح لميادين القتال علي عربية من عربياتها .. هي مكنش في إيدها وقت عشان تشتغل علي إزاي تحمي البنات من مخاطر التعرض للأشعة السينية .. صحيح إن ولا واحدة من البنات ماتوا في الحرب بس كتير منهم إتصابوا بحروق بسبب تعرضهم المباشر للأشعة .. بعد الحرب ما خلصت هي كتبت كتاب عن إزاي تحمي نفسك من الأشعة السينية إسمه La Radiologie et La Guerre و قالت فيه كل خبراتها اللي إتعلمتها من الحرب.
صحيح إنها نجت من الحرب بس بعدها بكام سنة جالها مرض إسمه فقر الدم التشنجي AplasticAnemia وده مرض بيعمل مشاكل في الدم بسبب التعرض المبالغ فيه للإشعاع و ماتت بسببه سنة 1934 .. ناس كتير لما عرفوا إنها تعبت تخيلوا إن السبب في مرضها هو شغلها مع الراديوم اللي هو زي ما قلتلك من النظائر المشعة .. صحيح إن إحنا عارفين إن الراديوم لو دخل جسمك بيموتك بس ده لو دخل جسمك يعني إتحقنت به أو أكلته أو شربته بس (ماري كوري) فضلت لحد ما ماتت مقتنعة بإنها كانت بتحمي نفسها كويس و إن السبب في مرضها هو تعرضها بدون حماية كافية لإشعاع المكن بتاع الأشعة السينية .. سنة 1995 إتعمل تحليل علي عينة من جثتها و العلماء إتاكدوا فعلاً إن جسمها مكنش فيه راديوم وده إلي حد كبير بيؤكد كلامها.
أظن اللي خلاني عايز أكتب عن (ماري كوري) هو إني مش عايز إسمها يتربط في دماغك بدرس الأشعة النووية في منهج فيزياء ثانوية عامة وهي إن الست دي هي اللي إكتشفت الراديوم وخدت نوبل .. عايزك تعرف إن (ماري كوري) دي تبقي (توني ستارك Tony Stark) بحق و حقيقي .. دي عالمة و مهندسة و إنسانة و الأهم إنها ست مسمحتش لرجاله بشنبات إنهم يقللوا من ثقتها بنفسها ولا من قدراتها.
المصدر:
مقالة بعنوان .. From the lab to the battlefield: How Marie Curie became a WWI hero.. من المعمل لميدان القتال: إزاي (ماري كوري) بقت بطلة من أبطال الحرب العالمية الأولي .. نشرت في موقع Inverseوده لينك المقالة الأصلية:
https://www.inverse.com/article/50747-marie-curie-x-ray-machines-world-war-i-wwi
