تابعونا

البوم صور

مكاتب الشغل .. تصميمات معمارية حتخليك تقول وه.

ألبوم الصور ده هو شوية تصميمات لمكاتب لشركات تصميم معماري عالمية تخليك فعلاً مبهور من الشغل .. لو إنت مهندس ديكور Interior Design أو مهندس معماري شغال في التصميم و شغل الريندر فإنت محتاج تبص للتصميمات دي يمكن يعجبك منها حاجة و تستفيد من الأفكار بتاعتها.

15 مارس، 2021 1.8 ألف

كنا إتكلمنا قبل كده عن إزاي المهندسين المعماريين حيبقي مطلوب منهم ينسوا منهج كيف تصمم مكاتب شغل بتاعة شركة اللي إتكتبت من زمان لإن في زمن الكورونا كل ده حيترمي في الزبالة .. ألبوم الصور ده هو شوية تصميمات لمكاتب لشركات تصميم معماري عالمية تخليك فعلاً مبهور من الشغل .. لو إنت مهندس ديكور Interior Design أو مهندس معماري شغال في التصميم و شغل الريندر فإنت محتاج تبص للتصميمات دي يمكن يعجبك منها حاجة و تستفيد من الأفكار بتاعتها .. مهم تبقي عارف إن المكاتب دي إتصممت قبل مأساة كورونا بس كلها تصميمات واخدة جايزة A+ لسنة 2020.

ده مكتب منظمة خيرية غير هادفة للربح إسمها Memphis Teacher Residency و اللي صممه هو مكتب Archimania في مدينة ممفيس الأميريكية .. الكلاينت في حالتنا هنا هو منظمة خيرية عايزة تعمل مكان عشان تدي كورسات تدريبية للمدرسين .. بس خلي بالك .. المبني مش كله مملوك للكلاينت .. الكلاينت مأجر حتة من مبني كبير عاملاه الحكومة كأنه مول كبير بس للشركات و المكاتب .. فأنت كمهندس معماري مش في إيدك الحرية إنك تعمل اللي إنت عايزه .. إنت عايز تصميم يخلي المكان مميز بس مش شارخ أوي عن الشكل العام للمبني.
مبني البورصة في الشارع رقم 100 في مدينة بوسطن من تصميم مكتب Perkins & Will .. هنا الكلاينت كان عايز مبني وظيفته يبقي مبني إجتماعات و مبني إجتماعي و مزار للسياح في قلب الحي المالي في المدينة.
من غير ما تفكر كتير مبني فيه كيرفات كتير يبقي من تصميم مكتب (زها حديد) .. ده برج Leeza SOHO في العاصمة الصينية بكين من أكثر من 45 دور علي مساحة 172,800 متر مربع.
تخيل ده يبقي مكان شغلك .. المصمم هو شركة هولندية إسمها Studio Piet Boon وكان مطلوب منها تصمم مقر بسيط و عملي لشركة زراعية وسط أرض زراعية وده السبب إن التصميم يخليك تحس إنه حظيرة مواشي بس نظيفة حبتين.
ده مقر مصنع إنتاج بن إسمه ميما Meama في العاصمة الجيورجية تيبليسي ومن تصميم شركة إسمها Khmaladze Architects وعلي رأي (عادل إمام) و ماذا أقول وأي قول يقال بعد ما قيل؟
صورة تانية من مقر مصنع إنتاج بن إسمه ميما Meama في العاصمة الجيورجية تيبليسي ومن تصميم شركة إسمها Khmaladze Architects وزي ما بتقول الأغنية أكاد من فرط الجمال أذوب.
عشان بس تعرف إن الأمريكان دول ناس صيع .. المبني ده إسمه Solar Carve و صممته شركة أمريكاني إسمها ستوديو العصابة Studio Gang .. المبني ده مبني تجاري لمكاتب و زيه زي اللي صمموه عايشين في مدينة نيويورك الأميريكية .. المبني متصمم عشان يستفيد قدر الإمكان من الشمس من حيث الإضاءة و توفير الطاقة.
ده مول تجاري إسمه Krause Gateway Center في مدينة دي موينس بولاية إنديانا الأميريكية و إشتغل عليه شركتين اللي هم OPN Architects و Renzo Piano Building Workshop.
درس في إستغلال المساحات بتوريهولنا شركة DWA: Johan De Wachter Architects الهولندية .. المبني ده هم مسميينه The Attic ودي تبقي الدور العلوي من فيلا مكنش حد بيستخدمه و إتحول لمكاتب زي ما انت شايف.
المبني ده مثال لما يكون المهندس المعماري فاهم دماغ الكلاينت كويس أوي .. المبني ده إسمه OLZ ودي كلمة تركي إختصار Aerospace Specialized Organized Industrial Zone ودي يبقي المبني اللي بيتقابل فيها الناس بتوع مختلف الشركات التركية اللي شغاله في مجال تصنيع الطيارات .. اللي صمم المبني ده شركة تركي إسمها Yazgan Design Architecture وموجود في العاصمة التركية أنقرة.

المصدر:

مقالة بعنوان These Are the World’s Best Office Designs نشرت علي موقع Architizer و ده لينك المقالة الأصلية:
https://architizer.com/blog/inspiration/collections/worlds-best-offices-2020/

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!