لينك التسجيل الصوتي علي ساوند كلاود:
https://on.soundcloud.com/WeKir
النهاردة أنا مش جاي أتكلم عن قد إيه المهندسين الأمريكان دول جاحدين ولا إزاي التكنولوجيا العسكرية الأميريكية دي جامدة زحليقة .. النهاردة أنا جاي أعمل العكس تماماً .. أنا جاي أوريك إن أي حد يقدر يصنع نفس السلاح الجاحد اللي الأمريكان بيصنعوه .. درة تاج التفوق العسكري الأميريكي هي سلاح الجو .. و أهم جزء من الترسانة الجوية الأميريكية هي أسطول طيارات الجيل الخامس اللي ليها القدرة علي التخفي من الرادار أو زي ما بتتسمي Stealth .. وقت ما حضرتك بتقرالي المقالة دي فأميركا عندها أكبر أسطول من طيارات الجيل الخامس في العالم سواء بتتكلم عن طيارات F-22 Raptor أو F-35 Lightening II بس هي مش الوحيدة .. الصينيين عندهم الطيارة Chengdu J-20 Mighty Dragon و الروس عندهم الطيارة Sukhoi Su-57 Felon و دول اللي احنا جايين نتكلم عنهم النهاردة .. مقالة النهاردة طويلة و عشان كده خليني أقول من دلوقتي أنا جاي اتكلم عن إيه .. النهاردة حنحاول نجاوب علي كذا سؤال:
- إيه هو التطور الطبيعي لتكنولوجيا Stealth؟
- ليه مينفعش يتقال علي طيارة إنها جيل خامس من غير أنظمة Avionics جاحدة؟
- إيه حوار ضعف التسليح اللي بنسمع عنه في طيارات الجيل الخامس ده؟
- هل القدرة علي المناورة حاجة مطلوبة في طيارات الجيل الخامس؟
- هم الأمريكان شايفين المنافسة الصيني و الروسي ليهم في مجال Stealth إزاي؟
التطور الطبيعي لتكنولوجيا Stealth:
أول مرة العالم يصحي علي خبر إن فيه حاجة إسمها إن طيارة تطير و الرادار ميلقطهاش لما شركة لوكهييد مارتن Lockheed Martin و دي نفس الشركة اللي بتصنع الطيارة F-35 Lightening II عملت الطيارة F-117 Nighthawk .. الطيارة دي لما إتعملت كانت صدمة للمهندسين اللي شغالين في مجال تصنيع الطيارات زي كده الصدمة اللي جت لستات البيوت في رمضان اللي فات لما شافوا محلات حلويات منزلة كنافة بالريد فيلفيت .. كل ستات البيوت تقريباً قالوا هذا ما لم نسمع به من قبل .. هنا برده نفس الوضع .. في الوقت اللي الطيارة F-117 Nighthawk إتصنعت كان الفكر اللي شركات تصنيع الطيارات الأمريكاني ماشيه بيه هو إننا عشان نضمن إن بطاريات الدفاع الجوي السوفيتية متوقعش طياراتنا فإحنا لازم نصنع طيارات بتطير أسرع و علي إرتفاعات أعلي .. فضلت الشركات تصنع في طيارات أسرع و أعلي في إرتفاعات الطيران بتاعتها لحد ما شركة Lockheed Martin قالت لوزارة الدفاع شوية كمان و نروح نصنع مركبات فضاء أحسن .. إحنا فعلياً فاضلنا كام متر كمان و نطلع بره الغلاف الجوي للأرض.
الحل كان مش إنك تصنع طيارة بتطير أسرع من الموديل اللي قبلها و بتطير علي إرتفاعات أعلي .. الحل إنك تصنع طيارة مش بتتلقط بالرادار .. لسنين فضلت أميركا هي الدولة الوحيدة اللي معاها الوصفة بتاعة تكنولوجيا Stealth اللي تقدر تقول إنها تكنولوجيا وصل الأمريكان لمستوي جاحد في فهمها و تطبيقها لما شركة Lockheed Martin عملت التحفة الهندسية F-22 Raptor أول طيارة جيل خامس تتصنع .. الطيارة دي مكنش فيها غلطة .. طيارة معمولة بدماغ متكلفة .. كان المفروض إن سلاح الجو يستلم 750 طيارة بس بسبب ظروف كتير من ضمنها الأزمة المالية العالمية و تكاليف الحرب في العراق و أفغانستان فالعدد ده إتقص بقي 186 طيارة بس .. بمجرد ما الأمريكان مشيوا في سكة تصنيع الطيارة F-35 فمشروع أو حتي فكرة إنك تصنع طيارات F-22 Raptor جديدة مبقتش قابلة للتنفيذ خلاص.
مهم أوي تبقي فاهم إن كلمة Stealth دي مش حاجة واحدة .. كلمة Stealth معناها كذا تكنولوجيا بيتطبقوا مع بعض .. كلمة Stealth يعني طريقة تصميم مختلفة كتير عن مباديء هندسة الطيران اللي أي مهندس بيتعلمها في الكلية .. كلمة Stealth إنك كمهندس إنتاج شغال في مصنع ترمي كل اللي إنت إتعلمته عن خطوط الإنتاج التقليدية في الكلية في الزبالة لإن اللي بيحصل في خط إنتاج طيارة Stealth ده حمادة و خط إنتاج أي طيارة تانية ده حمادة تاني خالص .. كلمة Stealth يعني إسلوب طيران مختلف خالص عن الطريقة اللي أي طيار بيتعلمها في الكلية الجوية .. كلمة Stealth مش بس معناها الCoating أو الطبقة الخارجية اللي بتتطلي بيها الطيارات عشان تمتص أشعة الرادار لإن فيه طيارات جيل رابع كتير بيتحطلها نفس الCoating ده و مش بتوصل لدرجة Stealth الكاملة .. الأهم إن كلمة Stealth مش معناها إطلاقاً إنك تخلي الطيارة متطلقتش بالرادار و خلاص .. كلمة Stealth معناها إنك بطريقة ما تحافظ علي الطيارة إنها متقعش و محدش يضربها حتي لو كانت جوه معركة إشتباك جوي.
و هي دي المشكلة اللي واجهت الروس في تطوير الطيارة Su-57 .. إنك تصنع طيارة جيل خامس محتاج يبقي عندك مهندسين مش حقول بيفكروا بره الصندوق بس معندهمش مشكلة إنهم يصمموا حاجة علي الشعرة من غير Factor of Safety تقريباً .. طبعا مهندسين ميكانيكا و إنشائي بيسمعوا الكلام ده و بيحطوا إيدهم علي قلبهم لإن بالنسبة ليهم الكلام ده كفر و رجس من عمل الشيطان .. يعني إيه مسيفش نفسي و أنا بشتغل؟ .. إنت عايزني أتسجن؟ .. و هي دي المشكلة اللي فضلت مفرملة قدرة الروس علي إنهم يطوروا من طيارة Stealth .. ده بالنسبة ليك كمهندس تصميم .. كمهندس إنتاج في مصنع فإنك تشتغل علي مشروع طيارة جيل خامس معناه إن مستوي Error اللي إنت بتشتغل بيها تقريباً صفر .. مفيش حاجة إسمها إن Surface Finish مش مضبوط مش حقول بالمليمتر ده بالنانومتر .. مستوي الدقة في التصميم بيحطك قدام واقع إنك محتاج مكن و محتاج مهندسين و محتاج فنيين شغالين بدماغ غير الدماغ اللي صناعة الطيران بقالها سنين شغالة بيها.
لكن .. وخلي بالك بقي من اللي جاي ده .. خط إنتاج الطيارات Su-57 إشتغل علي مرحلتين .. المرحلة الأولي إنهم أنتجوا 11 طيارة بس هم اللي لفوا بيهم علي الدول عشان يفرجوهم عليها .. دي النسخة اللي الناس إتفرجت عليها و طلعت فيها القطط الفطسانة .. دي النسخة اللي طلعت من خط الإنتاج التقليدي من مصنع كومسمولسك أون أمور Komsomolsk-on-Amour .. النسخ الجديدة اللي طلعت بعد تطوير خط الإنتاج بصراحة حاجة لوز العنب.
علي الناحية الثانية الطيارة J-20 الصيني أبقي بضحك عليك لو مقلتش إن في حتة الStealth دي بالذات هي أعلي بكتير من Su-57 بس خلي بالك إن ده كان لما كنا بنقارن بين J-20 وبين ال11 نسخة الأولانيين من Su-57 اللي الروس صنعوهم .. السبب في ده هو إن تصميم J-20 متاخد Copy & Paste من التصميمات المسروقة للطيارة F-22 Raptor بس يمكن باستثناء الجناحين الصغيرين خالص اللي قدام علي جانبي الطيارة .. دول إسمهم Canards و كان زمان أول ما الصينيين ورونا الطيارة J-20 كنا متخيلين إن الCanards دول بيبوظوا علي Profile بتاع الطيارة لحد ما فيه ناس عملوا C.F.D. Modeling و دي إختصار Computational Fluid Dynamics يعني يعملوا دراسة ببرامج كومبيوتر عشان يشوفوا حركة الهواء حول جسم الطيارة و لقوا إن Canards دول بيزودوا أوي من قدرة Stealth بتاعة الطيارة.
أنظمة Avionics .. تسمع عن (تشافي هيرنانديز)؟
كان يا مكان كان فيه لاعيب بيلعب في برشلونة إسمه (تشافي هيرنانديز Xavi) و دلوقتي هو المدير الفني بتاعهم .. اللاعيب ده المعلق الرياضي (عصام الشوالي) كان بيسميه (زرقاء اليمامة) .. ده اللاعيب اللي كان زي ما تقول كده مركب في دماغه رادار عارف بيه زمايله فين و كل واحد فيهم بيتحرك علي فين .. بيرمي ثروهات تخليك إنت و الجون .. ده اللي بتعمله طيارات الجيل الخامس بما فيها F-35 .. هي متصممة عشان الحساسات Sensors بتاعتها تاخد كل الداتا من كل الناس سواء بتتكلم عن طيارات طايرة في الجو أو سفن في البحر أو قوات برية علي الأرض .. الكومبيوتر بياخد الداتا دي كلها يرسم للطيار صورة متكاملة عن مين بيضرب في مين عشان الطيار يرمي ثروهات .. يقول للطيارة F-15E Strike Eagle اللي معاه إضربي طابور الدبابات ده اللي رايح علي العساكر بتاعتنا و إنت يا طيار الF-16 Fighting Falcon غطي ظهر اخوك و هكذا .. الطيارة F-35 و بناء عليه طيارات الجيل الخامس كلها مش متصممة عشان تبقي (ليونيل ميسي Lionel Messi) اللي بياخد الكورة يرقص اللاعيبة اللي قدامه كلها و يجيب جون.
فيه واحد إسمه (ديميتري جريبوف Dmitry Gribov) و ده اللي صمم الطيارة Su-57 و ده مهندس كان مطلوب منه يصمم طيارة عكس كل الطيارات اللي عملها الروس من ساعة ما قالوا يلا نعمل طيارات .. الروس شاطرين جداً في إنهم يعملوا الطيارة ال(ميسي) .. الطيارة اللي قدرتها علي المناورة عالية و تقدر توقع أي طيارة تانية في إشتباك جوي Dogfight بس عمرهم ما صنعوا الطيارة ال(تشافي) قبل كده .. (ديميتري جريبوف) مش بس عمل اللي الروس مجربوش يعملوه قبل كده إنما كمان حط التاتش بتاعته .. الطيارة Su-57 فيها رادار جامد زحليقة إسمه X-Band N036 Byelka و كلمة بييلكا Byelka دي معناها سنجاب بالروسي و الرادار ده بيتحط في مقدمة الطيارة في مناخيرها .. الباشمهندس حطلها رادارين كمان علي جنبين الطيارة عشان وظيفتهم يلقطوا هو مين العدو و الصديق اللي علي يمين و شمال الطيارة .. بكده هو بيدي الطيار رؤية متكاملة 360 درجة حوله.
علي الناحية الثانية حتلاقي إن الصينيين مشيوا مش حقول في سكة مختلفة بس هم عملوا حاجة جديدة سيكا .. عارف كل الSensors اللي بتتحط في أي طيارة جيل خامس؟ .. أهو الصنيين في طيارتهم J-20 جمعوهم كلهم في Sensor واحد إسمه Infrared/Electro-optical Search & Track Sensor .. الSensor الجاحد ده بيتحط في شاسيه الطيارة من تحت عند قمرة الطيار و يقال إن أداء Sensor ده يضاهي الإفتكاسات اللي الأمريكان حاطينها في F-35.
التسليح في طيارات الجيل الخامس .. إفتكر إنك بتتكلم عن (تشافي هيرنانديز):
هل (تشافي) لاعيب سريع؟ .. الإجابة قطعاً لا .. هل هو بينط النطاط الخزعبلية بتاعة (كريستيانو رونالدو Cristiano Ronaldo) عشان يجيب جون براسه؟ .. أكيد برده لا .. هل كان كل ما يشوط فاول يجيبه جون زي (ديفيد بيكهام David Beckham)؟ .. الحق يتقال لا برده .. إذن إنت بتتكلم عن لاعيب شاطر في حتته و هو ده اللي أنا عايزك تفهمه عن طيارات الجيل الخامس و هي إنها شاطرة في حتتها و متطلبش منها تعيش دور مش دورها .. ده معناه إن صحيح المهندسين حاطين نقاط تثبيت علي الجناحين بتوع أي طيارة جيل خامس في حالة إنك عايز تترسها صواريخ و قنابل بس إنت مش مصمم الطيارة دي عشان كده .. إنت مصممها عشان متتلقطش و عشان متتلقطش هي لازم تحط صواريخها و قنابلها في الدولاب بتاعها في بطن الطيارة .. ده معناه إن طيارات الجيل الخامس مش بتشيل تسليح كتير .. هي كده و حتفضل كده و متحاولش تقول علي ده إنه عيب فيها لإن دي Feature مش Disadvantage يعني صفة مش عيب.
الطيارة Su-57 زيها زي F-35 تسليحها نسبياً تعبان .. هي بتقدر تشيل ما بين 4-6 صواريخ جو-جو .. يقال إن تحت الجناحين فيه دولابين عشان يتحط فيهم صواريخ إضافية ولاحظ إني قلت يقال لإن لحد دلوقتي محدش متؤكد بنسبة 100% إن ده حقيقي .. بس فعلياً أقوي سلاح الطيارة تقدر تدافع بيه عن نفسها هو مدفعها الرشاش Gryazev-Shipunov Gsh-30-1 عيار 30 مليمتر .. علي فكرة المدفع ده قديم إتعمل سنة 1980 بس جاحد .. طلقاته خارقة للدروع لو إتضربت علي أي طيارة من مسافة أقل من 800 متر فهو بيقسم الطيارة نصين.
في حتة التسليح دي بالذات الطيارة J-20 ليها ميزة و عيب .. خلينا نبدأ بالميزة .. هم جابوا الدولاب الكبير في بطن الطيارة اللي بتتحط فيه الصواريخ و القنابل و قسموه ل3 حتت .. الحتة الأولانية الكبيرة في بطن الطيارة بالضبط و دي بيترص فيها القنابل و الصواريخ الجو-أرض اللي الطيار بيضرب بيها الأهداف الأرضية .. الحتتين التانيين علي جانبي الطيارة و دول بيترص فيهم الصواريخ الجو – جو في حالة الإشتباكات الجوية .. ده معناه إن ممكن الطيارة تكون بتشتبك مع طيارات تانية و فيه خناقة في الجو و الرادارات الأرضية في اللالاند ولا داريين باللي بيحصل و وسط كل الهري ده الطيار يضرب هدف أرضي عادي جداً .. العيب بقي إن الصينيين كرروا نفس غلطة الطيارة F-4 Phantom الأميريكية لما عملوها من غير مدفع رشاش .. ليه عملوا في نفسهم كده؟ .. صدقني إحتمال تلاقيهم مش عارفين و بيضربوا نفسهم بالجزمة القديمة علي الغلطة دي.
القدرة علي المناورة ما بين هي إكسسوار و ما بين هي ضرورة:
فيه أسئلة وجودية في الحياة ملهاش إجابة واضحة زي مثلاً هو المحشي طعمه بيكون أحلي لما يتعمل بشوبة لحمة ولا بشوربة بطة؟ .. هل طيارات الجيل الخامس محتاجة يبقي ليها قدرة عالية علي المناورة أو لا برده من الأسئلة الوجودية دي .. زي ما قلت من شوية إن الروس شاطرين أوي إنهم يعملوا طيارات ليها قدرة عالية علي المناورة و يمكن عشان كده هم استخسروا يعملوا الطيارة Su-57 و ميبقاش فيها الأوبشن ده .. السر ورا إنك تعمل طيارة بتطير بسرعة و كمان ليها قدرة عالية علي المناورة هي تكنولوجيا بتتسمي 3D Thrust Vectoring Control و دي بمنتهي البساطة إنك تدي للطيار القدرة إنه ياخد غازات العادم اللي بتطلع من الموتور يوجها بمعرفته في أي إتجاه مش شرط يكون في عكس إتجاه حركة الطيارة .. مش فاهم صح؟
دلوقتي لو عربيتك ماشية لقدام يبقي غازات العادم اللي طالعة من الشكمان المنطق يعني إنها تطلع لورا .. نفس الكلام في الطيارات .. لما تيجي حضرتك تطير بطيارتك لقدام بس تخلي مسار العادم و هو طالع يروح لليمين فإنت فعلياً كأنك بتعمل Drifting بالطيارة .. تكنولوجيا 3D Vectoring Control دي الروس هم اللي إخترعوها و حطوها في طياراتهم زي Su-35 .. الأمريكان خدوها حطوها في طيارة F-22 Raptor بس الطيارة J-20 الصيني مفيهاش التكنولوجيا دي و ده بيخلي كقدرة علي المناورة Su-57 أعلي بكتير من J-20 .. بس هل Su-57 حتحتاج الأوبشن ده؟ .. الله أعلم.
قدرة أي طيارة علي المناورة كمان داخل فيها عامل مهم و هو الموتور .. صحيح الطيارة Su-57 فيها موتور AL-41F الروسي و ده مش أحسن حاجة في الدنيا بس هو كافي جداً إن الطيارة توصل أقصي سرعة ليها لماخ 2 يعني ضعف سرعة الصوت و أقصي إرتفاع ممكن توصله 19,800 متر .. لو الطيار داس بنزين و طار لفوق فهو يقدر يطير رأسي بسرعة 354 متر في الثانية .. دي أرقام مرعبة .. حط عليها تكنولوجيا 3D Thrust Vectoring Control و حتلاقي نفسك قصاد طيارة مكانها السيرك .. طيارة لو دست بنزين و طرت بيها Supersonic يعني عديت سرعة الصوت فأنا أقدر أطير بيها 1,440 كيلومتر قبل ما تانك البنزين يفضي .. طيارة مفيهاش Flares اللي الطيار بيضربها في الجو عشان الصواريخ بدل ما تجري ورا حرارة الموتور تجري وراها .. طيارة بتضرب أشعة ليزر بتعمي الحساسات اللي بتتركب في الصواريخ المضادة للطيارات.
كأرقام الطيارة J-20 متفرقش كتير عن بنت عمها Su-57 .. كون إن الصينيين بيركبولها موتور روسي AL-31 فتقريباً الإثنين ليهم نفس مدي الطيران و نفس السرعات و نفس أعلي إرتفاع طيران .. الإثنين فعلياً ولاد عم بس وجود تكنولوجيا 3D Thrust Vectoring Control بيخلي قدرة Su-57 علي المناورة لا تقارن بالJ-20.
الأمريكان شايفين المنافسة الصيني و الروسي ليهم في مجال Stealth إزاي؟
لو أنا جيت قلتلك إن بقي فيه شبه إجماع جوه المؤسسة العسكرية الأميريكية إننا لازم نرمي طوبة الطيارة F-35 فإنت ممكن متصدقنيش بس ده حقيقي .. إنت مش حتسمع الكلام ده رسمي بيتقال كده .. لا خالص .. بس إنت حتسمعه في صورة خبر غريب إن في سبتمبر 2020 القوات الجوية الأميريكية في السر طبعاً مش بس صممت و مش بس صنعت إنما كمان إختبرت نموذج أولي أو زي ما بيتسمي بروتوتايب Prototype لطيارة حتلاقي ليها في السوشيال ميديا كذا اسم .. فيه ناس بتسميها طيارة جيل سادس بس الأمريكان بيسموها NGAD و دي إختصار Next Generation Air Dominance يعني طيارة الجيل الجديد للهيمنة الجوية .. لما طيارة F-35 بعد المليارات اللي إتصرفت عليها و لسه مدخلتهاش الخدمة بشكل كلي تقوم طالع قايلي إنك شغال في تصنيع طيارة أحدث و أقوي منها فإنت ممكن تسمي ده سعي دايم و مستمر للتفوق العسكري الأميريكي بس أنا شايفه بإنك رميت طوبة مشروع F-35.
الحقيقة إن المعلومات المتاحة عن مشروع الطيارة NGAD دي قليلة و فيها هبد كتير بس المعلومة اللي أنا متؤكد منها هي إن التصميم بتاعها إتبني علي أساس إنك تجيب أحسن ما في الطيارة F-15E Strike Eagle و أحسن ما في الطيارة F-22 Raptor و تضربهم في الخلاط عشان تطلعلك طيارة جامدة زحليقة.
المصدر:
- مقالة بعنوان No, The Su-57 Isn’t ‘Junk’: Six Features We Like On Russia’s New Fighter نشرت في موقع The Drive و ده لينك المقالة الأصلية:
https://www.thedrive.com/the-war-zone/20434/no-the-su-57-isnt-junk-six-features-we-like-on-russias-new-fighter - مقالة بعنوان Su-57 Vs. J-20: What the Competition Tells Us About America’s New Fighter نشرت في مجلة Popular Mechanics و ده لينك المقالة الأصلية:
https://www.popularmechanics.com/military/aviation/a34659561/su-57-j-20-ngad-fighter/
