تابعونا

البوم صور

مخلة العساكر .. من الحروب الصليبية لحد دلوقتي.

فيه مصور فوتوغرافي بريطاني إسمه (توم أتكينسون Thom Atkinson) عمل مشروع حلو أوي إنه بدأ يورينا هم العساكر علي مدي التاريخ كانوا بياخدوا معاهم إيه وهم رايحين الجبهة .. المخلة اللي بيشيلها العسكري في رأيي تعتبر معيار كبير أوي تقيس عليه مدي قوة الجيش اللي بينتمي ليه العسكري .. في الألبوم ده حنتفرج شوية أمثلة من تاريخ البشر عشان نفهم هي مخلة العسكري كانت بتتكون من إيه؟

3 مايو، 2021 3.1 ألف

فيه مصور فوتوغرافي بريطاني إسمه (توم أتكينسون Thom Atkinson) عمل مشروع حلو أوي إنه بدأ يورينا هم العساكر علي مدي التاريخ كانوا بياخدوا معاهم إيه وهم رايحين الجبهة .. المخلة اللي بيشيلها العسكري في رأيي تعتبر معيار كبير أوي تقيس عليه مدي قوة الجيش اللي بينتمي ليه العسكري .. في الألبوم ده حنتفرج شوية أمثلة من تاريخ البشر عشان نفهم هي مخلة العسكري كانت بتتكون من إيه؟

معركة حطين و حصار القدس بعدها سنة 1244 كانت من الأيام النظيفة في تاريخ المسلمين .. اللي في الصورة دي تبقي الحاجات اللي في مخلة أي عسكري صليبي شارك سواء في معركة حطين أو حصار القدس بعدها .. زي ما حضرتك شايف هم لو كانوا بينقلوا عفش عروسة مكانوش حيشيلوا كل العدة دي بس يمكن عشان كده جزء مهم من خطة (صلاح الدين الأيوبي) الله يرحمه كانت إنه يلعب علي فكرة إن الصليبيين وهم شايلين المعدات دي كلها لو بعدوا عن مصادر المياه يبقي هو كده كسب الحرب.
في مقالة الفايكينج إتكلمنا عن إزاي مملكة الفايكينج في إنجلترا وقعت علي إيد واحد من الفايكينج برده .. حكينا إزاي إن الفرنساويين عرضوا علي واحد إسمه (رولو) إنه يعيش هو و رجالته في حته في شمال فرنسا إتعرفت بعد كده بإسم إقليم نورماندي و الرجل ده أسس مملكة للفايكينج في شمال فرنسا لحد ما واحد من أحفاده إسمه (وليام) قرر يغزو بريطانيا .. أهم معركة في غزو (وليام) لبريطانيا كان إسمها معركة هيستينجز Hastings واللي في الصورة ده تبقي المخلة بتاعة عسكري من عساكر (وليام) اللي إتعرف في التاريخ بإسم (وليام الغازي William the Conqueror).
فيه ناس وانا منهم شايفين إن سبب إنهيار حضارة الهنود الحمر في أميركا هي ضعف مستواهم التكنولوجي مقارنة بالأوروبيين .. بص لمخلة فارس منهم من قبيلة الرجل السودا Blackfoot مثلاً وانت تفهم .. بذمتك دي شكل مخلة واحد رايح يحارب؟ .. ده رايح رحلة مش رايح الحرب .. أرجع و أقولك إن مخلة العسكري هي اللي بتوريك هو الجيش اللي بينتمي له العسكري قادر إنه يكسب حرب أو لا.
حرب الإستقلال الأميريكية عن التاج البريطاني تعتبر من أكتر الحروب اللي رسمت شكل العالم دلوقتي لإن من غير الحرب دي مش حيبقي عندك أميركا القوة العظمي الأولي في العالم دلوقتي .. عشان تفهم الصورة دي أكتر أنصحك تتفرج علي فيلم The Patriot واحد من أحلي الأفلام اللي عملها (ميل جيبسون) .. دي تبقي مخلة عسكري بريطاني شارك في معركة بروكلين سنة 1776.
دي مخلة عسكري أمريكاني من القوات الإتحادية اللي هي الولايات الشمالية اللي كانت ضد العبودية في الحرب الأهلية الأميريكية .. المخلة دي كانت لرقيب ثاني في الجيش من ضمن اللي شاركوا في معركة جيتيسبيرج Gettysburg سنة 1863 واللي تعتبر من أهم و أشرس معارك الحرب الأهلية الأميريكية.
دي مخلة العسكري البريطاني اللي شارك في معركة سوم واحدة من أهم و أشرس معارك الحرب العالمية الأولي و اللي حصلت سنة 1916 بين الألمان ضد الفرنساويين و الإنجليز .. أنصحكوا تتفرجوا علي فيلم 1917 لإنك حتشوف فيه بنفسك إزاي العسكري الإنجليزي كان بيطلع عينه عشان يشيل كل المعدات دي كلها وهو بيحارب.
الصورة دي من الحاجات اللي بتؤكد جوايا فكرة إن الفرنساويين ملهمش في الحروب .. هم يعملوا كرواسون .. ياكلوا ضفادع .. شاطرين في الطبيخ .. لكن حروب دي مش بتاعتهم .. دي مخلة عسكري فرنساوي شارك في معركة فيردان اللي هي برده واحده من أشرس معارك الحرب العالمية الأولي .. معركة فيردان حصلت سنة 1916 في نفس السنة اللي حصلت فيها معركة سوم بس قارن بين الصورة دي و الصورة اللي قبلها .. شوف مخلة العسكري البريطاني و قارن بينها و بين مخلة العسكري الفرنساوي.
حط الصورة دي قصاد الصورتين اللي فاتوا .. دي مخلة عسكري ألماني شارك في معركة سوم برده وبمجرد بصة سريعة حتلاقي نفسك بتقول هي دي العقلية الألمانية يا (إبراهيم) .. الكفاءة في أروع صورها.
الصورة دي و الصورة اللي وراها بتوريك إزاي ممكن إتنين عساكر بيخدموا في نفس الجيش وشاركوا في نفس الحرب بس عشان هم في سلاحين مختلفين فتلاقي المخلة بتاعتهم غير بعض .. دي مخلة عسكري أمريكاني في وحدة المظلات اللي إترمت خلف خطوط العدود في بلجيكا وقت الحرب العالمية الثانية سنة 1944 في عملية إتسمت ماركت جاردن Market Garden .. الناس اللي لعبت Call of Duty أو إتفرجت علي مسلسل Band of Brothers عارفه كويس العملية دي .. زي ما انت شايف عشان انت كعسكري مظلات حتترمي خلف خطوط العدو يعني مش حيجيلك أي إمدادات فانت تقريباً بتروح الحرب واخد معاك سوبرماركت.
دي علي الناحية الثانية مخلة عسكري من وحدة الجوالة Rangers واللي بتتصنف علي إنها من القوات الخاصة الأميريكية اللي شاركت في عملية الإنزال البري في نورماندي سنة 1944 .. شايف طبعاً إن المخلة أخف بكتير من مخلة عسكري المظلات ويمكن ده سببه إن عسكري الجوالة سهل توصله إمداداته و أكله و ذخيرته لكن بتاع المظلات بيترمي خلف خطوط العدو.
حرب فيتنام غيرت حاجات كتير في مفهوم مش بس الأمريكان إنما العالم كله عن إزاي نكسب حروب و بالتالي الإجابة عن سؤال هي مخلة العسكري يتحط فيها إيه بدأت تختلف .. دي مخلة عسكري امريكاني علي مدفع رشاش من قوات مشاة البحرية US Marine Corps شارك في معركة مدينة هو  سنة 1968 .. دي كانت بداية إن العالم يفهم إن مخلة الحرب العالمية الثانية مبقتش تنفع تستخدمها هي هي في معارك العصر الحديث.
إذا كانت حرب فيتنام هي اللي أقنعت الأمريكان بإن فكرهم عن المخلة لازم يتغير فحرب فوكلاند عملت نفس التأثير للبريطانيين .. زي ما انت شايف المخلة دي واللي تحسسك إنها كانت جزء من دولاب العدة بتاع (جون ويك John Wick) تبقي المخلة اللي كان بيشيلها فرد الكوماندوز البريطاني في حرب جزر فوكلاند ضد الأرجنتين سنة 1982.
التطور الطبيعي للمخلة .. كتير بس خفيفة .. فيها كل اللي العسكري محتاجه بس متبقاش تقيلة .. دي مخلة فرد قوات خاصة بريطاني من ضمن اللي شاركوا في حرب أفغانستان.

المصدر:

مقالة بعنوان Photographer Documents Everything a Soldier Had to Carry from the Year 1066 to Modern Day نشرت في موقع Core77 وده لينك المقالة الأصلية:
https://www.core77.com/posts/102957/Photographer-Documents-Everything-a-Soldier-Had-to-Carry-From-the-Year-1066-to-Modern-Day

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!