من ضمن المعجزات الحقيقة اللي حصلت في الدنيا في السنين الأخيرة هي التطور الفشيخ اللي عاشته القوات البحرية الصينية .. انا شخصياً بحب جداً إني أتكلم بالأرقام عشان ميبقاش اللي بقوله كلام عام .. سنة 1979 البحرية الصينية كانت لا تحتكم إلا علي شوية سفن خردة اللي هم 140 لانش صواريخ و 53 سفينة كورفيت و 12 فرقاطة و 75 غواصة و 15 سفينة برمائية .. بقدرة قادر سنة 2020 البحرية الصينية بقي تحت إيدها 86 لانش صواريخ و 49 سفينة كورفيت و 53 فرقاطة و 32 مدمرة و 52 غواصة ما بين تقليدية ونووية و 4 غواصات بتقدر تشيل صواريخ نووية عابرة للقارات و 58 سفينة برمائية و حاملتي طائرات والثالثة جاية في السكة .. بسم الله ما شاء الله تطور رهيب قدرت الصين توصله خلال 41 سنة بس.
إزاي ده حصل؟ .. خلال ال30 سنة اللي فاتوا الإقتصاد الصيني كان بينموا بشكل خزعبلي وده كان معناه إن الميزانية العامة للدولة بقت بتزيد وعشان كده رغم إن الميزانية العسكرية فضلت شبه ثابتة إلا إن عشان الميزانية العامة للدولة زادت فحجم الإنفاق العسكري الصيني زاد .. خلال ال60 سنة اللي فاتوا حجم الإنفاق العسكري الصيني إتضاعف 6 مرات .. ده السبب إن الصين تحولت من بلد عقيدتها العسكرية هي إننا نستني العدو لما يجيلنا ونفشخه في حرب مدن لبلد عندها واحدة من أفضل القوات المسلحة علي مستوي العالم.
الحقيقة إن فورمة الساحل اللي عايشاها القوات البحرية الصينية أكتر ناس قلقانة منها هم الأمريكان وده منطقي .. بناء علي تقرير طلع من وزارة الدفاع الأميريكية فالبحرية الصينية بتملك حالياً 350 قطعة بحرية قصاد 293 قطعة بحرية تحت إيد الأمريكان .. وعلي فكرة مش بس العدد وخلاص اللي الأمريكان قلقانين منه لإن القطع البحرية اللي تحت إيد الصين أولاً تصنيع محلي صيني وثانياً مستواها مش بطال .. يعني مثلاً .. الصينيين بيصنعوا فرقاطة اسمها Type 054A Jiangkai II مستواها ميفرقش كتير عن أي فرقاطة بتصنعها ألمانيا أو فرنسا .. سنة 2012 الصين دخلت للخدمة أول حاملة طائرات ليها اللي هي لياونينج Liaoning ودلوقتي هي خلاص بنت حاملة الطائرات الثانية وحالياً في مرحلة الاختبارات ومش بس كده دول كمان في مرحلة التصنيع لحاملة الطائرات الثالثة.
هل معني كده إن خلاص نقول إن القوات البحرية الصينية تفوقت علي الأميريكية لمجرد إن عدد القطع البحرية اللي عند الصين أكتر من اللي تحت إيد أميركا؟ .. الحقيقة إن فيه معيارين تخلي بالك منهم لو حتقارن بين القوات البحرية لأي دولتين .. أول معيار هو Overall Tonnage يعني نجيب ميزان ونوزن كل القطع البحرية اللي تحت إيدك نشوفهم كام طن .. ثاني معيار هو بما إنك بتتكلم عن قوات بحرية لدول عظمي يبقي تعالي نمسك الديناصور بتاع القوات البحرية اللي هو حاملة الطائرات ونشوف أنهي بلد عندها حاملات طائرات أكبر وأكتر من الثانية؟
لو جيت تبص علي المعيار الأول فحتلاقي إن Overall Tonnage بتاع القوات البحرية الصينية ما بين 1.2-2 مليون طن وده رقم خزعبلي .. طب الرقم ده جه منين؟ .. عشان الصين بلد متحاطة بدول معادية أو علي الأقل مش حليفة زي الهند وتايوان و كوريا الجنوبية واليابان فالبحرية الصينية بتعتمد بشكل كبير علي لانشات الصواريخ اللي دورها حماية السواحل .. البحرية الصينية تحت إيدها 140 لانش صواريخ واللانشات دي لما بتجمع أوزانها جنب بعض بتبقي عاملة زي الخروف اللي بيبيعه تاجر معندوش ضمير وبيخليه يشرب مياه كتير قبل ما يتحط علي الميزان عشان يوزن كيلوجرامات زيادة .. الأمريكان معندهمش نفس حالة الصين ومش حوليهم دول معادية وبالتالي البحرية الأميريكية عمرها ما إحتاجت يبقي عندها لانشات صواريخ .. علي المعيار ده لوحدة البحرية الصينية تقدر تقف الند بالند للبحرية الأميريكية.
بالنسبة للمعيار الثاني فمش بس الأمريكان عندهم 11 حاملة طائرات قصاد إن الصين معندهاش حالياً غير حاملتي طائرات إنما كمان حاملة الطائرات الأمريكاني الواحدة وزنها بيعدي 100,000 طن قصاد إن حاملة الطائرات الصينية وزنها ممكن يوصل 60,000 طن بس .. صحيح ولازم المعلومة دي تتحط قدامك إن الصين حالياً بتبني حاملة الطائرات الثالثة ليها وبتخطط يبقي عندها أسطول حاملات طائرات ما بين 6-8 حاملات .. معلومة تانية لازم تتحط قدامك برده إن الصين بتبني سفن حربية بنفس المعدل اللي والدتك كانت بتعمل بيه بيتزا وقت الحظر بتاع فيروس كورونا .. حقيقي لو انت من الناس اللي شايفه إن الخناقة الكبيرة الجاية حتكون بين الصين وأميركا فانت غالباً عندك حق.
المصدر:
- مقالة بعنوان Yes, China’s Navy is the Largest in the World-But There’s a Catch نشرت في موقع Popular Mechanics وده لينك المقالة الأصلية:
https://www.popularmechanics.com/military/weapons/a33901432/china-navy-size/
