موضوعنا النهاردة اللي حنتكلم عنه هو كاسبرسكي Kaspersky اللي إنت بتنطقها بالغلط كاسبر سكاي .. أيوه هو ده اللي أنا قصدي عليه .. أنا قصدي الAntivirus اللي كتير مننا بيعمله Install علي الكومبيوتر بتاعه .. اللي حنتكلم عنه النهاردة هو قصة إزاي الAntivirus ده بقي محور عملية تجسس شبه قصص رجل المستحيل اللي كنا بنقراها زمان .. القصة دي عبارة عن فيه جواسيس إتجسسوا علي جواسيس وهم بيتجسسوا علي جواسيس .. القصة دي فعلاً مذهلة وحتعلمك حاجات كتير بس خلينا الأول نفهمك الموضوع من أوله وبراحة عشان فيه تفاصيل تقنية كتير.
الموضوع بمنتهي البساطة إن كاسبرسكي Kaspersky دي شركة روسية إسمها بالكامل Kaspersky Lab .. الشركة دي أهم منتج بتبيعه علي مستوي العالم هو Antivirus كلنا عارفينه وفيه كتير مننا بيستخدمه ولو إنت عامله Install عندك فإنت واحد من 400 مليون بني أدم علي الكرة الأرضية يعتبروا زباين الشركة دي ومن ضمن زباين الشركة دي برده ناس شغالين في الحكومة الأميريكية .. بيع الAntivirus ده لوحده بيشكل 60% من أرباح الشركة السنوية .. في السنة بيدخل لشركة Kaspersky Lab حوالي 633 مليون دولار كأرباح منهم 374 مليون دولار بس من بيع البتاع اللي إسمه Kaspersky Antivirus ده .. عايزك تعرف إن Kaspersky Antivirus زيه زي Norton وزي أي Antivirus في السوق بيشتغل عن طريق حاجة إسمها Search Tool أو أداة بحث وظيفتها إنها تعمل Scan علي الHard Drive بتاع الكومبيوتر بتاعك عشان يلاقي أي فيروسات واللي بتتسمي Malware ويا إما يدمرها أو يحجم دورها وبالتالي الAntivirus اللي إنت بتستخدمه عامل بالضبط زي ما إنت تجيب حد ينظفلك شقتك بس إنت مديله المفتاح يدخل الشقة وقت ما يحب وله صلاحية إنه يعرف كل تفاصيل حياتك.
وكالة الأمن القومي الأميريكية NSA ودي إختصار National Security Agency اللي تعتبر درع الحكومة الأميريكية ضد الHackers حاطه قواعد بتمنع إنك تعمل Install لKaspersky Antivirus علي الكومبيوترات بتاعتك اللي إنت بتشتغل بيها جوه مبني الNSA بس ده ميمنعش إن فيه ناس كتير من اللي شغالين في الوكالة بيستخدموه في كومبيوتراتهم الشخصية .. سبب إن الNSA مانعه ضباطها إنهم يستخدموا Kaspersky واضح ومش محتاج شرح .. دي شركة روسي وطبيعي إنك بما إنك شغال في جهاز أمني حساس إنك متستخدمش حاجة عاملها الروس عشان ممكن تكون محطوط فيها أداة تجسس .. زي بالضبط كده من ضمن دواعي الإحتياط إن ضباط المخابرات العامة المصرية ميعملوش Install لأي Software عاملاه شركة إسرائيلية علي كومبيوترات شغلهم جوه مبني المخابرات العامة .. علي الكومبيوتر الشخصي بتاعك اللي بتتفرج عليه علي الأفلام وبتلعب Video Games إعمل اللي إنت عايزه بس علي كومبيوتر الشغل لا لإنك شغال في جهاز حساس.
اللي حصل إن Hackers روس غالباً شغالين لحساب المخابرات العامة الروسية FSB استغلوا إن فيه ناس كتير جوه الحكومة الأميريكية سواء في وزارات الدفاع والخارجية والطاقة والعدل وجوه أجهزة المخابرات الأميريكية عاملين Install لKaspersky علي الكومبيوترات الشخصية بتاعتهم فهم عملوا Hack أو إخترقوا الأجهزة دي عشان يدوروا علي الأسماء السرية Code Names بتاعة برامج التجسس الأميريكية .. الكلام ده من سنة 2014 .. وفعلاً الروس لقوا إن فيه مُبرمج شغال Freelancer لحساب وكالة الأمن القومي الأميريكية NSA بيستخدم Kaspersky علي الكومبيوتر الشخصي بتاعه وسرقوا من كومبيوتر بتاعه معلومات حساسة .. بالصدفة البحتة سنة 2014 فيه Hackers شغالين لحساب الموساد الإسرائيلي ضمن عمليه مخابراتية ليهم حنعرف تفاصيلها بعد شوية إخترقوا الشبكة الرسمية بتاعة شركة Kaspersky Lab وخلال العملية دي خدوا بالهم من إن الHackers الروس مستخدمين Kaspersky Antivirus زي ما يكون Google Search Engine للكومبيوترات الشخصية لكتير من الموظفين الأمريكان .. الإسرائيليين لما عرفوا إن ده بيحصل فبلغوا الأمريكان.
في نص سنة 2015 مهندس في شركة Kaspersky إكتشف بالصدفة وهو بيختبر Detection Tool جديدة إن Hackers إسرائيليين إخترقوا الشبكة بتاعه الشركة .. السؤال دلوقتي هم إزاي الإخوة بتوع Kaspersky عرفوا إن الHackers اللي إخترقوهم إسرائيليين؟ وليه أساساً الموساد الإسرائيلي لقي نفسه محتاج يخترق الشبكة بتاعة شركة Kaspersky؟ .. هنا بقي القصة حتحلو:
لما جم المهندسين الروس بتوع شركة Kaspersky يشوفوا إزاي الإختراق ده حصل لقوا إن Hacking Tool اللي اُستخدمت قريبة أوي من Hacking Tool تانية مشهورة أوي إسمها Duqu أو دوكو .. سبب شهرة دوكو Duqu هو إنها الUpgrade بتاع Hacking Tool سمّعت أوي مع الناس اللي شغالين في المجال لإسمها ستوكس-نيت Stuxnet ودي Hacking Tool إشتغل عليها Hackers إسرائيليين وأميريكيين ونفذوا بيها عملية Hack مشهورة أوي سنة 2010 استهدفت مفاعل ناتانز النووي الإيراني وكانت السبب إن حوالي خمس أجهزة الطرد المركزي الإيرانية يبوظوزوا ويطلعوا بره الخدمة .. في شهر يونيو سنة 2015 شركة Kaspersky طلعت تقرير رسمي لمحت فيه إن الموساد الإسرائيلي هو اللي إخترق شبكتهم لإن التقرير قال إن عملية الإختراق تمت بHacking Tool قريبة أوي من Duqu ويمكن كمان تعتبر Upgrade ليها لدرجة إن الإسم اللي إتقال علي الHacking Tool اللي اُستخدمت ضد شركة Kaspersky بقي Duqu 2.0.
طب السؤال اللي وراه .. هو إيه اللي خلي الموساد أساساً يخترق الشبكة بتاعة Kaspersky؟ حيستفادوا إيه يعني لما يخترقوا شبكة شركة بتصنع Antivirus؟
فاكر الإتفاق النووي الإيراني اللي تم بين الدول دائمة العضوية في مجلس الأمن ومعاهم ألمانيا وبين إيران بخصوص برنامجها النووي؟ .. الإتفاق ده إتوقع أيام فترة حكم الرئيس الأميريكي (باراك أوباما) والإسرائيليين مكانوش عايزين الإتفاق ده يكمل بأي ثمن ويمكن الإتفاق النووي ده كان سبب إن العلاقة بين (أوباما) وبين رئيس الوزراء الإسرائيلي (بنيامين نتنياهو) كانت زي الزفت .. المفاوضات اللي قبل ما الإتفاق ده ما يتوقع محدش عزم إسرائيل إنها تحضرها بس الإسرائيليين كانوا حيموتوا ويعرفوا إيه اللي كان بيحصل في المفاوضات دي .. صادف إن الفنادق اللي كانت بيتعمل فيها المفاوضات في أميركا كتير منها الشبكات بتاعتها بتستخدم Kaspersky Antivirus فالHackers الإسرائيليين دخلوا علي شبكة الشركة عشان يتجسسوا علي الكومبيوترات الخاصة بالفندق عن طريق الAntivirus .. فاكر إنت المشهد بتاع مسرحية العيال كبرت لما شخصية (سلطان) اللي قدمها الممثل الراحل (سعيد صالح) بيقول ايييييييييييييه هو اللي بنعمله في الناس حيطلع علينا ولا إيه .. يعني الحركة اللي الروس عملوها عشان يتجسسوا علي الأمريكان الإسرائيليين عملوها هي هي عشان يتجسسوا علي الروس .. لازم تاخد بالك إني قلتلك إن الفنادق دي أميريكية وده معناه إن عملية Hack دي قامت بيها عناصر تبع الموساد من ورا ظهر المخابرات الأميريكية.
المخابرات الإسرائيلية قعدت مع NSA وأدولهم أدلة أثبتت فعلاً اللي بتعمله شركة Kaspersky وده خلي إن يوم 13 سبتمبر 2017 وزارة الأمن القومي الأميريكية Homeland Security Department طلعت قرار فيدرالي لكل الوزارات والجهات الحكومية إنهم يعملوا Uninstall لKaspersky وإن قدام أي جهة حكومية بتستخدم الAntivirus ده 90 يوم عشان ينفذوا القرار اللي قرروا إنه مفيش أي موظف حكومي أميريكي أو ضابط مخابرات يعمل Install لKaspersky علي الكومبيوتر الشخصي بتاعة.
محدش بالضبط عارف هل (إيوجين كاسبرسكي Eugene V. Kaspersky) مؤسس الشركة كان عارف باللي بيحصل أو لا؟ .. خصوصاً إن نظرياً علي الأقل ممكن الHackers اللي شغالين لحساب المخابرات الروسية يكونوا استغلوا إن منتجات شركة Kaspersky منتشرة في كل حتة في العالم من غير ما يكون أي حد جوه الشركة عارف أو موافق .. بس حتي لو كان (إيوجين كاسبرسكي) عارف فهو ميقدرش يقول لا لحاجة يطلبها منه (فلاديمير بوتين).
فضيحة Kaspersky دي تعتبر حلقة من مسلسل فضايح الHacks اللي بتتعرض ليها أجهزة المخابرات الأميريكية من فترة .. سنة 2016 حصلت تسريبات مدمرة لHacking Tools ودي عبارة عن برامج إختراق طورتها وكالة الأمن القومي الأميريكية NSA عشان الHackers بتوعها يستخدموها فقامت مجموعة Hackers سرية بتسمي نفسها Shadow Brokers أو سماسرة الظل نزلت الHacking Tools دي علي الإنترنت للي عايز يستخدمها .. وقبلها برده مجموعة Hackers بتسمي نفسها Vault7 سرقت مستندات سرية من وكالة المخابرات المركزية الأميريكية CIA ونشروها علي Website اللي إسمه ويكيليكس Wikileaks.
المصدر:
- مقالة بعنوان How Israel Caught Russian Hackers Scouring the World for US Secrets نشرت في جريدة The New York Times الاميريكية وده لينك المقالة الأصلية:
https://www.nytimes.com/2017/10/10/technology/kaspersky-lab-israel-russia-hacking.html
