شايف القمر؟ إنت ملاحظ إنك بتشوف نص واحد منه بس؟ .. فيه نص تاني إنت مبتشوفوش و النص ده بيسموه Dark Side of The Moon أو الجانب المظلم من القمر و فيه ناس تانية بتسميه Virgin Territory أو المنطقة العذراء .. أياً كان إسمها إيه فالمميز في الجزء ده من القمر إن سطحه غني بحاجة إسمها Helium-3 و الهليوم تلاتة ده واحد من النظائر Isotope بتاعة الهليوم بحيث إن مفيش منه كتير علي الأرض بس موجود بوفرة علي القمر و الهليوم تلاتة ده يقدر (و أنا مش ببالغ و دي مش غلطة مطبعية) إنه يوفر إحتياجات الكرة الأرضية كلها من الطاقة لمدة 250 سنة.
سبب إن الهليوم-3 ده مش موجود علي سطح الأرض هو إن الأرض محمية بمجال مغناطيسي و غلاف جوي عكس القمر اللي الرياح الشمسية عماله تضربه بالهليوم تلاتة ده لحد ما إتعمي .. أول ناس أثبتت إن القمر عليه Helium-3 من الأساس كانت المهمة أبولو-17 و اللي إكتشفه كان رائد فضاء أميريكي إسمه (هاريسون شميت Harrison Schmitt) و ده كان عالم جيولوجيا مشي علي سطح القمر في ديسمبر 1972 و هو من أكتر الناس اللي بتسعي إن البشر يطلعوا القمر ينقبوا عن Helium-3 عشان يستخدموه في المفاعلات النووية اللي بتشتغل بتكنولوجيا Fusion أو الإندماج النووي و دي تكنولوجيا معقدة أوي و صعبة بشكل مستفز لكن Helium-3 حيبقي مثالي و حيبقي هو الحتة اللي ناقصة في الPuzzle عشان تكنولوجيا Nuclear Fusion تشتغل خصوصاً إنه صحيح وقود نووي و صحيح إنه من نظائر الهليوم بس هو مش مشع و مش بينتج عنه مخلفات نووية ضارة بالبيئة.
اللي عايزين نتكلم عنه النهاردة هو إزاي الهند و هنا إحنا بنتكلم عن منظمة أبحاث الفضاء الهندية اللي هي Indian Space Research Organization و إختصاراً بتتسمي ISRO و إنت تقدر تعتبرها النسخة الهندي من NASA عايزة تروح هناك في الجانب المظلم من القمر اللي تحس إن إسمه ده يبقي رواية رعب من بتوع الكاتب (احمد خالد توفيق) الله يرحمه و الهنود ناويين إن إن شاء الله علي شهر أكتوبر 2018 يبعتوا مركبة فضاء سموها تشاندرايان-2 أو Chandrayaan-2 حتفضل تلف حول القمر و المركبة دي حترمي مسمبار Probe و ده عبارة عن علبة بتمشي علي ست عجلات و بيشتغل بالطاقة الشمسية زي عربية الأطفال اللي إنت بتحط فيها العيل الصغير و تجرها قدامك بس متركب عليها أجهزة علمية كتير عشان تاخد عينات من التراب بتاع القمر و تحللها عشان تتأكد فعلاً هل فيه نسبة كبيرة من Helium-3 أو لا بحيث إن الProbe دي حتفضل شغالة 14 يوم و حتغطي مساحة 400 متر مربع من سطح القمر .. بعد كده الProbe حياخد صور و يبعتها للمركبة اللي حتكون لسه بتلف حول القمر و المركبة تبعت الصور دي للناس بتوع ISRO عشان يحللوها.
فيه منكوا ناس لاحظت إن المهمة دي إسمها Chandrayaan-2 فهل معني كده إن كان فيه Chandrayaan-1؟ .. الإجابة هي اه .. في أكتوبر 2008 الهنود بعتوا مركبة فضاء إسمها Chandrayaan-1 لفت 3400 لفة حول القمر و قدرت تبعت Probe صغير قدر يهبط علي سطح القمر و قدر يثبت إن تراب القمر بيحتوي علي نسبة مياه و دي كانت أول مرة البشر يثبتوا ده.
مجرد إنك تبعت Probe للقمر مش هو ده أقصي طموحات ISRO .. الناس دي ناوية إنها تحط محطة فضاء تدور حول القمر و بعد كده يبعتوا رواد فضاء هنود للقمر .. صحيح لسه متحطش جدول زمني لإمتي و إزاي ده حيحصل بس الفكرة إن الطموح نفسه موجود .. لحد دلوقتي الدولة الوحيدة اللي حطت Probe علي القمر هي الصين و الكلام ده كان سنة 2013 ضمن مهمة سموها تشانجي-3 أو Chang’e-3 و الصينيين ناويين إنهم علي أخر 2018 حيبعتوا Probe تاني برده لDark Side of The Moon و الرحلة حتتسمي تشانجي-4 أو Chang’e-4 .. الأمريكان هم كمان مش ساكتين و (دونالد ترامب) وقع علي أمر رئاسي بيقول إن لازم NASA تبعت رواد فضاء تاني للقمر و هم فعلاً ناويين علي سنة 2020 إنهم يبعتوا مركبة فضاء تدور حول القمر.
اللي يخليك تستغرب هو إنك تلاقي NASA حاطة لنفسها ميزانية بتعدي 19 مليار دولار لمجرد إنهم يبعتوا رواد فضاء للقمر في حين إن الهنود حاطين لنفسهم ميزانية معدتش 1.7 مليار دولار .. ده سببه إن تنظيم رحلات الفضاء للقمر برخص التراب بقت صنعة الهنود و بقوا بيعرفوا يعملوها كويس .. عندك مثلاً المهمة الجاية لISRO إنهم يبعتوا Probe للقمر حتكلفهم 125 مليون دولار بس .. بيعملوها ‘زاي رخيصة كده محدش عارف بس هم بيعرفوا يعملوها.
القمر عليه حوالي مليون طن من الهليوم-3 بس فعلياً انت ممكن تجيب 25% من الكمية دي بس للأرض لكن حتي ده كفاية أوي إنه يلبي كل إحتياجات العالم من الطاقة لعلي الأقل قرنين من الزمن و إحتمال حتي لمدة 5 قرون و صدقني دي مش مبالغة ولا أخطاء إملائية .. عشان كده هيليوم-3 يعتبر من أغلي الحاجات اللي ممكن تشتريها في حياتك و ثمنه بيوصل 5 مليار دولار للطن يعني ال250,000 طن اللي ينفع نجيبهم الأرض من القمر تمنهم حيوصل ترليونات الدولارات .. طبعاً محدش قال إن بكره الصبح إحنا حنقدر نستفيد بالهليوم-3 ده لإن فيه مشاكل كتير لازم تتحل زي انت حتنقب عنه إزاي علي القمر؟ و إزاي حتنقله للأرض؟ و إزاي حتبني مفاعلات نووية شغالة بFusion Technology؟ و كل دي تكاليف حتخليك تصرف فلوس بالهبل .. فوق ده كله انت عندك مشكلة قانونية و هي إن مفيش إلا أميركا و لوكسمبورج بس هما الدولتين اللي فيهم قوانين بتنظم إزاي شركات التنقيب و التعدين تقدر تنقب في الفضاء .. حاول تفكر في الموضوع علي إنه زي صيد السمك في المياه الدولية فأي حد يقدر يصطاد و لو مركب ما إصطادت سمك فيه فالسمك ده بقي ملك المركب دي.
علي الناحية الثانية فيه ناس مش موافقة علي الفكرة دي إنك تحول القمر لمنطقة تعدين تجيب فلوس و من الناس دي واحد زي (راكيش شارما Rakesh Sharma) و ده كان رائد فضاء هندي قضي 8 أيام علي متن محطة الفضاء الروسية مير سنة 1984 و حتلاقي صورته عندك و هو في رأيه إنك لو ناوي تنقب عن معادن أو تبعت بشر للفضاء فانت لازم تبعد خالص عن الأرض و تفكر تروح المريخ مثلاً لإنك فعلياً مينفعش تروح القمر و ترسم خريطة ترسيم حدود عشان تحدد أنهي حتة تبع شركة مين أو تبع دولة مين؟
المصدر:
مقالة نشرت في مجلة Bloomberg إسمها The Quest to Find a Trillion Dollar Nuclear Fuel on The Moon يعني رحلة البحث عن وقود نووي علي القمر ثمنه ترليون دولار و ده لينك المقالة الأصلية:
https://www.bloomberg.com/news/articles/2018-06-26/the-quest-to-find-a-trillion-dollar-nuclear-fuel-on-the-moon
