الطيارات بدون طيار التركية .. كل الأحجام وكل الأشكال بأسعار تنافسية.

عمرك مشيت في سوق ولقيت واحد فارش علي الأرض وبيبيع هدوم وعمال يزعق بشكل يخليك تقول لنفسك هو إزاي الرجل ده مش في الكونسرفاتوار أو في دار الأوبرا إن معاه كل المقاسات وكل الألوان .. أهو ده حالياً اللي بتعمله تركيا .. الأتراك الحق يتقال يعني عملوا صناعة طيارات بدون طيار Drones محلية محترمة جداً بس زي أي بياع لما ربنا بيكرمه وبتمشي معاه بيقرر يفتح فرع تاني وتالت فبرده هم عايزين يعرضوا منتجات أكتر تناسب أذواق مختلفة .. أنا عارف إني زي ما أكون بتكلم عن سلسلة مطاعم مش صناعة معقدة زي Drones بس هي الفكرة إن ده بيزنس وزي أي بيزنس بتمشي عليه نفس القواعد اللي بتحكم سواء اللي بيصنع Drones أو اللي بيصنع جبنة براميلي.

أهم طيارتين بدون طيار في الترسانة العسكرية التركية هم أنكا إس Anka-S وبيرقدار Bayraktar TB-2 .. زي أي بلد بتصنع سلاح ولازم تجربه وتستعرضه عشان الزباين تتلم عليه فالأتراك إخترعوا أسباب تخليهم يتدخلوا عسكرياً في سوريا والعراق وليبيا ده طبعاً جنب السبب الرئيسي اللي هو خدمة مصالحهم بس تجربة واستعراض السلاح اللي هم بيصنعوه سبب مهم ورا التدخل العسكري في الدول دي والحق يتقال برده إن الطيارتين دول بالذات دخلوا دماغ ناس كتير وفيه دول كتير راحت إشترتها من الأتراك وده حيخليني أتكلم النهاردة عن الأصناف الجديدة اللي حتنزل في المينيو عشان تناسب أذواق ناس أكتر.

الطيارة أكسنجور Aksungur:

زيها زي Anka-S و TB-2 فهي من تصنيع شركة الصناعات الجوية التركية Turkish Aerospace Industries اللي هي TAI إختصاراً وفي شهر سبتمبر 2020 الطيارة دي نفذت طلعة تجريبية فضلت طايرة فيها 28 ساعة متواصلة .. يبقي السؤال .. ليه الأتراك عملوا الطيارة دي؟ .. دي حضرتك زي العروض اللي بتعملها المطاعم السورية في مصر للأكيلة .. الطيارة دي بتقدر تشيل 12 صاروخ MAM-L ودي صواريخ تصنيع محلي تركية وزي ما إنت متوقع 12 صاروخ دي حمولة خزعبلية أكتر بكتير من اللي Anka-S أو TB-2 تقدر تشيلها .. بالمرة يعني بما إننا جبنا سيرة صواريخ MAM-L فدي صواريخ وزن الواحد فيهم حوالي 22 كيلوجرام وبمدي طيران بيوصل 14 كيلومتر وتقدر تركبله كذا نوع من الرؤوس المتفجرة يعني ممكن يبقي قنبلة عادية وممكن يبقي رأس متفجر خارق لدروع الدبابات .. أرجع لحكاية إن تركيا زيها زي أي بلد بتصنع سلاح بتحب تجرب سلاحها وتستعرضه قدام الناس في حروبها فخلال الفترة من فبراير لمارس 2020 الطيارات بدون طيار التركية من طرازي TB-2 و Anka-S قدروا يصدوا هجوم بالدبابات عملته القوات المسلحة السورية ضد محافظة إدلب بإن الصواريخ دي قدرت تدمر عدد محترم من الدبابات والمدرعات السورية.

الطيارة بدون طيار التركية الصنع أكسنجور Aksungur اللي هي من تصميم وتصنيع شركة الصناعات الجوية التركية TAI والصورة دي إتصورت يوم 17 سبتمبر 2020 وهي في طلعة تجريبية فضلت طايرة فيها 28 ساعة متواصلة شايلة 12 صاروخ MAM-L علي إرتفاع بيوصل 6000 متر فوق سطح البحر.

صواريخ MAM-L فدي صواريخ وزن الواحد فيهم حوالي 22 كيلوجرام وبمدي طيران بيوصل 14 كيلومتر وتقدر تركبله كذا نوع من الرؤوس المتفجرة يعني ممكن يبقي قنبلة عادية وممكن يبقي رأس متفجر خارق لدروع الدبابات.

الطيارة بيرقدار أقنجي Bayraktar Akinci:

دي برده طيارة بدون طيار بقت متاحة في المينيو الجديدة ودي زيها زي أكسنجور طيارة كبيرة برده .. زيها زي أكسنجور بتقدر تشيل صواريخ MAM-L بس كمان بتقدر تشيل قنابل تقليدية اللي بتشيلها أي طيارة مقاتلة في سلاح الجو التركي زي Mark 82 وكمان بتقدر تشيل صواريخ كروز طويلة المدي تصنيع محلي تركي برده اسمها Roketsan SOM .. المتوقع إن خلال العشر سنين الجايين الأتراك حيبطلوا يعتمدوا علي النموذج القديم من TB-2 عشان تحل محله Akinci وتبقي هي العمود الفقري لأسطول Drones التركي .. الطيارة دي حتبقي مسئولة عن حاجتين:

عمليات جمع المعلومات والإستطلاع وتحديد الأهداف اللي هي بالإنجليزي Intelligence, Surveillance & Target Acquisition اللي هم ISTAR عشان لو شفت الاسم المختصر ده بعد كده تبقي عارف معناه إيه.
شبكة التحكم والإتصالات مع القيادة العامة للقوات المسلحة ودي بالانجليزي Command, Control & Communications اللي هم C3 عشان برده لو صادفت المصطلح ده تبقي عارفه.

الطيارة بيرقدار أقنجي Bayraktar Akinci وهي معروضة في معرض الطيران والتكنولوجيا التركي TEKNOFEST في مطار أتاتورك في مدينة إسطنبول يوم 17 سبتمبر 2019.

الطيارة كارجو إثتين Kargu-2:

الطيارة دي فعلاً فيلم رعب .. تخيل معايا طيارة نونو صغيرة بأربع مراوح عشان كده بيتقال عليها كوادكوبتر Quad-Copter وزنها يدوبك 9 كيلوجرام بس هي مش بتطير لوحدها .. هي بتطير ضمن سرب من 20 طيارة بيتلموا كلهم علي الهدف بتاعهم عشان يدمروه .. الطيارات دي ينفع تطير لوحدها من غير أي تدخل خارجي بإن حضرتك بتكتب برنامج كومبيوتر Algorithm تشرحلها فيه هي مطلوب منها إيه بالضبط عشان إما تقولها روحي دمري بطارية الدفاع الجوي دي أو حتي إغتالي البني أدم ده واللي ححطلك صورته في الميموري بتاعتك وعن طريق برنامج تعرف علي الوشوش Facial Recognition Software تقدري تفضلي تصوري في وشوش الناس اللي ماشية في الشارع لحد ما تلاقيه .. الطيارات دي بتقدر تفضل طايرة في الجو لمدة نص ساعة وبتقدر تطير بسرعة بتوصل 144 كيلومتر في الساعة.

النوع ده من الطيارات بيتحط تحت تصنيف اسمه الطيارات الإنتحارية Kamikaze Drones واتسمت كده علي اسم الطيارين الكاميكازي اللي هم الطيارين اليابانيين في الحرب العالمية الثانية اللي كانوا بينتحروا بإنهم بيرموا نفسهم بطياراتهم علي السفن الأميريكية عشان يفرقعوها .. الأتراك بيفكروا يشتروا أسطول من 500 طيارة وفي ناس كتير بتقول إنها حتستخدم بشكل أساسي في عمليات الإغتيال ضد قيادات حزب العمال الكردستاني .. مع Kargu-2 الأتراك حيدخلوا للخدمة Drone صغيرة اسمها أبلاجو Aplagu ودي حتبقي تحت مع عسكري من ضمن عساكر المشاة الأتراك ويقدر يستخدمها للإستطلاع أو تدمير النقاط الحصينة والطيارة دي المفروض إنها دخلت الخدمة في القوات المسلحة التركية في ديسمبر 2020.