لسنين و سنين الصين كانت مقلب الزبالة بتاع العالم .. الموضوع بدأ في التسعينات إن الدول الغنية بقت بتبعت زبالتها البلاستيك للصين اللي كانت متقدمة أوي في موضوع إعادة التدوير أو Recycling بحيث إن الكل كان مبسوط و سعيد .. الصين بتاخد بلاستك الغرب تعيد تدويره للإستهلاك المحلي و الغرب مبيوجعش دماغه عشان يلاقي حل لمشكلة الزبالة بتاعته .. جري الشريط لحد نوفمبر 2017 و الصين قررت إنها مش حتعمل كده تاني خلاص .. الصينيين قالوا للعالم إحنا بقالنا 28 سنة بنلم زبالتكوا لحد ما وصل الحال إننا في سنة 2016 بقينا بنعمل Recycling لزبالة 44 دولة بما فيها زبالتنا مع العلم إن الدول الغنية لوحدها مسئولة عن أكتر من 90% من إجمالي الزبالة البلاستيك اللي العالم بيرميها من سنة 1988 و أكتر حد بيرمي زبالة بلاستيك في العالم هو الإتحاد الأوروبي يجي وراه أميركا و وراهم اليابان.
القرار الصيني خلي اللي عنده زبالة بلاستيك عايز يخلص منها ممكن يبعتها لكوريا الجنوبية أو فيتنام أو ثايلاند .. هي المشكلة إن الدول الثلاثة معندهاش Infrastructure أو البنية التحتية من مصانع و مكن اللي يؤهلها إنها تشيل الليلة و تحل محل الصين و بالتالي إحنا بقالنا حوالي سنة من ساعة ما الصين قررت تبطل تاخد زبالة الناس و الزبالة عماله تتراكم و تتجمع .. عشان بس أحطك في الصورة .. إنت بتتكلم إن من دلوقتي لحد 2030 حيبقي عندك 111 مليون طن زبالة بلاستك عبارة بقي عن شاليموهات و أزايز بلاستيك و كياس بلاستيك مش عارفين نوديها فين.
يا تري زبالة العالم من البلاستيك حتروح فين بعد ما الصين بطلت تاخدها؟
بس إنت متقدرش تلوم الصينيين .. الناس دي طلع عين اللي خلفوها بقالهم 28 سنة ..خليني أديلك مثال بسيط عن حجم المأساة اللي كانت بتعيشها الصين .. أي حد بيشرب إزازه بيبسي بلاستيك بيسيب شوية بيبسي في قعر الإزازة بيبقوا حبة صغيرين أوي ميجوش بق حتي بس لما حضرتك ترمي الإزازة و فيها البق اللي متشربش ده و تحط الإزازة في مكن الRecycling فإنت ممكن تسد المكن و تبوظه .. جم الصينيين قالوا مش مشكلة حنجيب ناس تصنف الزبالة قبل ما تخش المصنع عشان نحمي المكن فإكتشفوا إن كتير من العمال دول بيجيلهم أمراض بسبب تعرضهم لملوثات في الزبالة و فيه منهم بيتعوروا عشان الزبالة الإزاز اللي بتبقي مرميه وسط البلاستيك .. جم الصينيين من زهقهم قرروا سنة 2013 يعملوا حاجة إسمها السور الأخضر Green Fence إنهم مش حياخدوا زبالة حد إلا لما يتأكدوا إن نسبة الملوثات فيها أقل من حد معين لحد ما في نوفمبر 2017 قرروا يمنعوا دخول الزبالة البلاستيك خالص لبلدهم .. لكن .. و حط تحت لكن دي مليون خط .. فيه ثغرة في القرار بتقول إن الإستثناء الوحيد إن الزبالة اللي جايه تكون نسبة الملوثات فيها أقل من 0.5%.
اللي حصل إن عندك ولاية زي سان فرانسيسكو في أميركا عملت حركة صايعة أوي .. الناس دي بتسعي إن مدينتهم يتقال عليها حققت الهدف بتاع Zero Waste يعني إن مدينتهم مترميش زبالة خالص و هم عشان يوصلوا للهدف ده مستحيل ميلجأوش إنهم يصدروا زبالتهم لحد تاني اللي هو الصين .. قامت جت شركة Recology و دي الشركة اللي بتلم الزبالة من شوارع سان فرانسيسكو عينت ناس عشان تفرز الزبالة بحيث يقللوا نسبة الملوثات في الزبالة من ال5% اللي كان الحد الأقصي ل1% خلال الكام شهر اللي فاتو و دلوقتي قدروا يوصلوها ل0.5% عشان يعدوا من الثغرة اللي في القرار الصيني .. بس دي ولاية جوه بلد و حجم الزبالة اللي هم بيرموها إلي حد ما ميجيش حاجة جنب زبالة دولة زي بريطانيا مثلاً .. و ده حيودينا للكلام عننا كبشر .. أوسخ كائن حي خلقه ربنا و خليني أفهمك ليه انا بقول كده.
أسهل حل البشر كانوا بيروحوله عشان يخصلوا من البلاستيك الزبالة إنهم يرموه في المياه لحد ما بقينا بسم الله ما شاء الله فيه حوالي 150 مليون طن زبالة بلاستيك في مياه المحيطات دلوقتي .. مش نتهد بقي و نشوف المصيبة اللي إحنا عملناها .. لا إحنا كل سنة بنرمي 8 مليون طن زبالة بلاستيك في المياه .. عشان بس أحطك في الصورة .. ده معناه إننا كبشر بنجيب عربية زبالة مليانة علي أخرها زبالة بلاستيك بنرميها في المياه كل دقيقة كل يوم لمدة سنة .. إحنا لو كملنا علي كده بناء علي كلام المنتدي الإقتصادي العالمي فلما تيجي سنة 2050 إن شاء الله المحيطات حيبقي فيها بلاستيك أكتر من السمك.
فيه ناس بتسأل طب و إيه المشكلة يعني لما نرمي زبالة بلاستيك في المحيطات ما المياه كتير و ربنا يباركلنا يعني .. هي المشكلة سعادتك إن المخلوقات البحرية اللي ربنا خلقها عايشة في المياه مبتاكلش بلاستيك و لما بالغلط بتاكله بيموتها .. فيه مؤسسة علمية إسمها The Ocean Conservancy موجودة عشان تحمي الحياة البحرية في العالم بتقول إن 60% من إجمالي الطيور البحرية في العالم زي النورس مثلاً أكلت بلاستيك ده غير إن 100% من السلاحف البحرية في كل محيطات الأرض جسمها فيه بقايا بلاستيك أكلته .. مش عارف إنت شفت الخبر ده ولا لا بس من كام إسبوع طلع خبر إن فيه حوت مات و الموج طلعه علي ساحل إسبانيا لما جم يشرحوه لقوا في معدته 29 كيلوجرام بلاستيك .. فيه دراسة إتعملت جابتلي أنا شخصياً صدمة إن فيه 10 أنهار علي مستوي العالم من ضمنهم نهر النيل هم السبب في إنهم بينقلوا أكتر من 95% من الزبالة البلاستيك اللي موجودة في المحيطات .. حضرتك ترمي زبالة في نهر النيل و اللي بيصب في البحر المتوسط و التيارات البحرية تاخد الزبالة دي لحد المحيط الأطلنطي .. زبالتك بتسافر و إنت قاعد مكانك يا بائس.
أكتر أنواع زبالة بنلاقيها لما بننضف الشواطيء علي مستوي العالم.
جزء كبير من المشكلة 3 حاجات:
- أول حاجة إننا كبشر بننتج كميات عبيطة من البلاستيك .. إحنا كل سنة بننتج حوالي 300 مليون طن بلاستيك و الرقم عمال يزيد سنة عن سنة.
- ثاني مشكلة إن 50% من الكميات العبيطة من البلاستيك اللي إحنا بنتسخدمها بتتصمم علي إنها تستخدم مرة واحدة و تترمي .. مجرد بصة سريعة علي الصورة اللي فوق عندك فيها أنواع و كميات الزبالة اللي بتترمي في المحيطات حتلاقيها أعقاب سجاير و أزايز و غطيان بلاستيك بتاعة الحاجة الساقعة و كياس الأكل و الشاليموهات.
- ثالث مشكلة و يمكن أخطرهم إن كتير مننا كبشر مش نظاف و مبنعرفش ننظف ورانا .. بإختصار إحنا كبشر ناس كتير مننا وسخين .. الكلام ده كبني أدمين و حكومات .. روح إنت البحر في الصيف و إتفرج علي كم الزبالة اللي إحنا بنسيبها علي الشط .. و حتي الحكومات عندك في مصر الحكومة مكبره دماغها خالص عن فكرة إنها تراقب هو مين بيرمي زبالة و مخلفات إزاي في النيل أو في البحر.
هنا يجي دور الRecycling أو إعادة التدوير .. للأسف إحنا وصلنا لمرحلة إن Recycling معادش حيجيب نتيجة و إن الحل اللي لازم نروحله هو إننا نلاقي طريقة نقلل بيها من كمية البلاستيك اللي إحنا بننتجها كل سنة .. الفكرة إن الRecycling مش بيميز أنواع البلاستيك المختلفة و بالتالي كفاءة العملية كلها بتقل .. خليني أديلك مثال .. عشان تعمل Recycling لإزازه مياه بلاستيك فإنت لازم خط الإنتاج يخشله بس أزايز مياه بلاستيك بس ده مبيحصلش .. اللي بيحصل إن ممكن خط الإنتاج يبقي أزايز مياه و حاجة ساقعة و بالتالي المنتج النهائي اللي بيطلع مش زي ما انت عايز و عشان كده شركات المياه و الحاجة الساقعة بتضطر إنها تشتري أزاير بلاستيك إضافية و بنفضل ننتج بلاستيك.
المصادر:
- مقالة نشرت في موقع Wired.com بعنوان China won’t solve the world’s plastics problem any more يعني الصين مش حتحل مشكلة البلاستيك بتاعة العالم تاني خلاص و ده لينك المقالة الأصلية:
https://www.wired.com/story/china-wont-solve-the-worlds-plastics-problem-any-more/ - مقالة بعنوان Why Recycling is not the Answer for Fighting the Plastic Pollution Problem يعني ليه إعادة التدوير مش هو الحل لمشكلة التلوث بتاعة البلاستيك .. نشرت علي موقع Euronews و ده لينك المقالة الأصلية:
https://www.euronews.com/2018/04/19/why-recycling-is-not-the-answer-for-fighting-the-plastic-pollution-problem
