فيه نقطة مهم تبقي فاهمها كويس لإن كل كلامي في المقالة دي حيعتمد عليها و هي إن أي حد شغال في Show Business يعني في مجال الأفلام و المسلسلات و البرامج التليفيزيونية هم بشكل أو بأخر Attention Whores أو خليني مبقاش قاسي أوي و أقول إنهم عايشين علي الإهتمام .. إنت لو بتقول علي نفسك فنان فإنت عايز الناس تشوف فنك .. إنت أساساً متقدرش تعيش من غير ما الناس تبقي مهتمة باللي إنت بتعمله .. لو إنت فنان حقيقي بتقدم محتوي بيخلي الناس تفكر و تشغل مخها فدي حاجة زي الفل و علي عيني و علي راسي بس في كتير من الأحيان إنت بتبقي بني أدم فاضي من جواك فمش بتلاقي حاجة تحطها في المحتوي بتاعك غير الجنس .. ليه؟ .. عشان إحنا كبني أدمين طبيعتنا إننا بنفكر بنصنا التحتاني و دي أكتر حاجة تخلينا نهتم بالهباب اللي إنت عامله و بتسميه فن و بنروح نشمشم وراه و نهتم بيه و نعلق عليه و نتخانق مع بعض بسببه و حضرتك فرحان و سعيد ولا الفيل اللي بيلعب في الطين .. النقطة دي بالذات مهم تبقي في دماغك طول ما إنت بتقرأ.
مشكلة التغيير البطيء إنك مش بتحس بيه أوي .. مش عارف إنت سمعت قبل كده عن تجربة الضفدع و المياه المغلية ولا لا .. الفكرة إنك لو جبت حلة مياه و سخنتها لحد ما بقت بتغلي و جيت رميت فيها ضفدع فالضفدع حينط بسرعة بره الحلة عشان ميتحرقش .. لكن .. لو حطيت الضفدع في المياه و هي باردة و سخنتها براحة حتكتشف إن الضفدع مش حياخد باله إن المياه بتسخن لحد ما بتلاقيه مات .. التغيير البطيء محدش بيحس بيه لحد ما بيبقي فعلياً فات الأوان .. سنة 1995 هيئة الإذاعة البريطانية BBC اللي غير إنها النسخة البريطانية من ماسبيرو إلا إنها كمان بتنتج مسلسلات و في السنة دي أنتجت مسلسل إسمه Pride and Prejudice مبني علي الرواية بنفس الإسم اللي كتبتها (جاين أوستن) .. المهم .. في المسلسل ده المخرج قرر يغير حاجة بسيطة أوي عن الرواية إنه خلي البطل اللي إسمه مستر (دارسي) و جسده في المسلسل الممثل (كولين فيرث) ينط في المياه بتاعة البحيرة و يطلع منها لابس قميصه و بنطلونه يعني مكنش عريان بس عشان قميصه مبلول فإنت فعلياً شايفه صدره .. لقطة عادية جداً .. تخيل إن اللقطة العادية دي كانت السبب إن نسبة المشاهدة بتاعة المسلسل نطت 10 مليون بني أدم (أغليهم كانوا ستات) و بقت لحظة محورية في تاريخ الفن إتسمت ظاهرة دارسي Darcy Phenomenon و هي بتقول بمنتهي البساطة مش مهم إنت بتقدم محتوي عامل إزاي .. مش مهم قد إيه الحبكة الدرامية قوية .. لازم تجيب رجل المشاهد بإنك تحط شوية جنس وسط توابل العمل الفني.
سنة 2016 إتعرض مسلسل تاني إسمه Poldark عن جندي بريطاني راح يحارب في حرب الإستقلال الأميريكية ضد المستعمرات الأميريكية و بعد كده رجع بلده تاني .. مسلسل تاريخي بيحكي عن فترة مهمة في تاريخ مش بس بريطانيا إنما أميركا كمان بس تتخيل إيه أكتر مشهد في المسلسل شد الناس؟ .. مشهد لما البطل و جسده الممثل (أدريان تيرنر) قلع هدومه عشان ياخد حمام و اللي مش بس كان المشهد الأهم في المسلسل ده إنما المشهد ده بالذات أختير أهم مشهد في التليفيزيون وسط كل المسلسلات اللي إتعرضت سنة 2016 كلها .. إنت متخيل يا مان؟ .. شوية و طلعلنا مسلسل The Night Manager اللي أنا شخصياً شايفه من أحلي مسلسلات الجاسوسية في تاريخ التليفيزيون و مليان حبكات و مشاهد أكشن و حاجة في منتهي الجمال بس إذ تكتشف إن أهم مشهد في المسلسل من وجهة نظر المشاهدين هو مشهد جنس مخدش كام ثانية البطلة فيه مكنتش عريانة بالمناسبة و اللي كان عريان كان البطل اللي جسده الممثل (توم هيديلستون) و المشهد ده عمل قلبان علي السوشيال ميديا .. سنة 2018 نفس الموقف بيتكرر هو هو مع مسلسل The Bodyguard من إنتاج BBC برده .. مسلسل عبقري في تفاصيله و بسببه الممثل (ريتشارد مادين) اللي إنت يمكن عارفه من أداءه لشخصية (روب ستارك) في مسلسل Game of Thrones خد جايزة الجولدن جلوب كأحسن ممثل درامي و الحلقة الأخيرة فيه حقيقي تتدرس و لازم أي مخرج صغير يتفرج عليها و يتعلم منها بس برده تكتشف إن سر شهرة المسلسل و اللي خلي متابعيه يوصلوا 11 مليون بني أدم جوه بريطانيا بس هو مشهد الجنس بين (ريتشارد مادين) و الممثلة (كييلي هاويس) .. لا تخرج قبل أن تقول سبحان الله. مينفعش أجي دلوقتي بعد العمر ده كله أتصدم إن الناس عايزة تتفرج علي جنس في المسلسلات و الأفلام .. جملة Sex Sells أو اللي بتعادلها هو الفيلم ده قصة ولا مناظر كلنا عارفينها كويس بس هي الفكرة في حاجة تانية خالص .. إنت ممكن تبقي مخرج أو منتج بتعمل عمل فني محترم جداً زي مثلاً مسلسل The Night Manager أو حتي Poldark و بتناقش قضية و أداء الممثلين فيه علي أعلي مستوي بس برده متوصلش للإهتمام اللي إنت حتموت عليه .. برجعك للمقدمة .. هي الفكرة إن الطريقة اللي الأفلام و المسلسلات بتجيب رجلك بدأت تختلف بالتدريج و بشكل إنت مش واخد بالك منه.
سنة 2000 قناة HBO جابت صدمة لجمهورها لما عرضت مسلسل Sex and the City .. ده مسلسل أستغفر الله العظيم كله مشاهد أستغفر الله العظيم بشكل أحياناً بيكون مش منطقي الحقيقية .. شوية و HBO قامت معلية الغيار و عملت مسلسل Rome و The Tudors .. المشترك بين مشاهد الجنس في كل المسلسلات دي هو إن الستات فيها كانت زي ما تكون حرفياً سلعة تباع و تشتري .. كل ده كوم و مسلسل Game of Thrones كوم تاني بس وسط عرض المسلسل بدأت فكرة Me Too تطلع .. فجأة بقي من حق ممثلة زي (سارة جيسيكا باركر) بطلة مسلسل Sex and the City تقول لقناة HBO إن في الأفلام اللي كملت القصة بعد المسلسل وهي بتمضي العقد أنا مش حعمل مشاهد جنس تاني .. ممثلة زي (إيميليا كلارك) عملت نفس الموضوع و عقدها في المواسم الأخيرة مع القناة خلي من حقها ترفض تعمل مشاهد جنس بس هي غيرت رأيها في الموسم الأخير .. المنتجين دلوقتي بقوا بيبصوا لبعض و يقولوا لنفسهم طب حنعمل في المصيبة دي .. هي كل ممثلة تلاقي نفسها ليها تقلها في السوق تقولك أنا حمضي عقد يخليني معملش مشاهد جنس .. طب و الحل؟ .. الحل كان إن فيه حاجتين إنت بدأت تشوفهم دلوقتي:
- أول حاجة هي إن بقي العريان في المشاهد مش الست إنما الرجل ودي حاجة علي قلب الممثل الرجل زي العسل.
- ثاني حاجة هي الموضة الجديدة في الإعتماد علي ممثلات لسه صغيرين و عايزين يكبروا و يتشهروا و بالتالي معندهمش مشكلة نقلع قدام الكاميرا و لما نكبر و نتشهر نقول مش عايزين نعمل مشاهد جنس تاني.
إحنا في عصر جسم الرجل بقي سيكسي زي جسم الست:
و الأهم إن الرجاله معندهمش مشكلة يطلعوا عريانين في الأفلام .. الممثل الرجل دلوقتي بقي مطلوب منه يقضيله كام شهر في الجيم و يعمل فورمة الساحل و يطلع السكس باكس و يصور مشهد عريان و ده كفيل إنه يقلب السوشيال ميديا و العمل الفني اللي هو بيعمله سواء مسلسل أو فيلم يبقي علي كل لسان .. (ريتشارد مادين) طلع قال إن معندوش أي مشكلة إنه يطلع عريان في مشهد و حتي (توم هيديلستون) اللي يمكن إنت عارفه من أداء شخصية (لوكي) في أفلام مارفل اللي علق علي إن الرقابة في أميركا حذفت مشهد هو فيه عريان في مسلسل The Night Manager إن المسلسل بيناقش قضايا أعقد و أخطر و فيها إتهام واضح للفساد جوه المؤسسات الأميريكية عشان في الأخر كل اللي يفكروا فيه إن جسمه العريان لا يصح إنه يتعرض قدام الناس .. أه بالمناسبة الإتنين ممثلين سواء (ريتشارد مادين) أو (توم هيديلستون) بعد مواقفهم دي بقوا من ضمن المرشحين بقوة إنهم يكملوا تجسد شخصية (جيمس بوند) .. الموقف ده حصل هو هو في فيلم Outlaw King اللي أنتجته Netlix من بطولة (كريس باين) و اللي بيحكي عن قصة (روبيرت دي بروس) اللي كمل رحلة إستقلال أسكتلندا عن إنجلترا بعد إعدام (وليام والاس) .. الفيلم عمل مشاكل علي السوشيال ميديا مش عشان الدقة التاريخية و مش عشان مشاهد الدم و القتل الصعبة اللي فيه ولا عشان فيه مشاهد جنس بين (كريس باين) و الممثلة (فلورينس بيو) إنما عشان (كريس باين) في مشهد من الفيلم كان بيستحمي في بحيرة و طلع منها عريان خالص في مشهد برده مستمرش كام ثانية بس كان كفيل إنه يقلب الدنيا.
الممثلين الرجاله بره بقوا بيبصوا للموضوع بالعكس .. لو أنا عملت فورمة الساحل و عملت فيلم طلعت فيه في مشهد عريان و عجب الستات اللي بتتفرج فده معناه إن حيجيلي شغل تاني .. ليه؟ .. دلوقتي الغالبية العظمي من منتجي الأفلام و المسلسلات في هوليوود رجاله مش ستات و عشان كده هم بيحاولوا يسألوا نفسهم هو يا تري الستات عايزه إيه؟ .. تفكيرهم هداهم إن الستات عايزه تشوف مشهد رجل عريان أمور بعضلات فالممثل الرجل اللي معندوش مشكلة يعمل مشاهد زي دي هو اللي نجيبه بعد كده.
الممثلات الصغيرات بتعمل مشاهد جنس عادي يعني مش لازم ممثلة معروفة:
اليومين دول فيه حنفية مسلسلات بتتكلم عن حياة المراهقين و مليانة مشاهد جنس و إتكسرت و غرقت الدنيا .. من Sex Education و Bridgerton من إنتاج شركة Netflix لEuphoria من إنتاج شركة HBO .. و أخص بالذكر المسلسل إبن التيييييت اللي إسمه Bridgerton ده .. تخيل يا مؤمن ده كان المسلسل رقم واحد علي منصة Netflix في 76 دولة .. مش لإنه مسلسل أداء الممثلين فيه فوق الوصف و مش لإنه مسلسل المؤثرات البصرية و الجرافيكس فيه تستحق الأوسكار .. لا خالص .. ده مسلسل من كتر مشاهد الجنس اللي فيه و فجاجتها أحيانا مشاهده بقت بتتعرض علي المواقع الإباحية بإعتبارها مشاهد بورن .. ده حقيقي .. ده مش مسلسل ده فيلم بورن مصروف عليه شوية من حيث المكياج و الأزياء و الإضاءة.
الفكرة إن المنتج أو شركة الإنتاج ككل بتبقي بتفكر في إنهم عايزين نسب المشاهدة تزيد مع العلم إن كتير من المسلسلات اللي بتتعرض بتقدم محتوي درامي إلي حد كبير قوي فإيه اللي يخلي المشاهد يروح يتفرج علي المسلسل بتاعي؟ .. الجنس .. يحكي أن (نييل مارشال) و ده واحد من المخرجين اللي إشتغلوا علي مسلسل Game of Thrones طلع قال في إنترفيو إن المنتجين بتوع المسلسل أجبروه في حلقة من الحلقات اللي أخرجها إن يتحط فيها مشهد جنس مع إن درامياً مكنش فيه أي داعي ليه .. و دايماً حتلاقي إن الممثلة اللي بتطلع عريانة مش مشهورة .. صحيح حلوة .. صحيح جسمها ينفع يخليها موديل .. بس مش مشهورة .. ده حتلاقيه في كتير من المسلسلات اللي فيها مشاهد جنس كتير.
يمكن الظاهرة دي حتشوفها كتير في المسلسلات مقارنة بالأفلام يمكن لإن أستوديوهات الأفلام دلوقتي بقت بتركز علي السلاسل أكتر من أي حاجة تانية و هم عايزين فلوس فمش عايزين مشاكل .. أديك شفت فيلم Doctor Strange and the Multiverse of Madness إتمنع من العرض في دول كتير و كان ممكن يجيب فلوس كتير بسبب وجود شخصية مثلية الجنس فيه .. الفلوس دي شركة الإنتاج كانت أولي بيها .. دي نقطة .. نقطة تانية هي إن معدل إنتاج المسلسلات دلوقتي بقي أكبر بكتير من معدل إنتاج الأفلام .. مفيش حد عنده وقت يتفرج علي كم المسلسلات اللي بتتعرض دي كلها و عشان كده كل مسلسل بيحاول يحط في أحداثه الصدمة اللي تخليك تقول أنا لازم أتفرج عليه .. قانوناً لو بتسأل فعلي رأي مقدم البرامج (حسن منهاج) لما قال Porn is Undefeated .. سنة 1964 إترفعت قضية قدام المحكمة الدستورية العليا في أميركا ضد رجل عنده سينما إسمه (نيكو ياكوبيليس) إتقدم للمحاكمة بتهمة إن السينما بتاعته عرضت فيلم The Lovers من إخراج (لويس مال) فيه مشاهد جنس بس المحكمة برأته بحجة إن الأفلام الإباحية هي نوع من أنوع حرية التعبير و من ساعتها محدش بقي يقدر يقول إن قانونا مينفعش إن عمل سينمائي أو تليفيزيوني يحتوي علي مشاهد جنس .. تاني أرجع للمقدمة .. هي الفكرة كلها في الإهتمام.
أنا بس حابب أختم بنقطة إنت ممكن متكونش خدت بالك منها و هو تأثير جرعة مشاهد الجنس في الأفلام و المسلسلات عليك كمشاهد .. يحكي أن فيه فيلم كوميدي حلو جداً إسمه Bridesmaids و في الفيلم ده فيه مشهد يهلك من الضحك بس بطريقة تجيبلك إكتئاب بين الممثلة (كريستين ويج) و الممثل (جون هام) .. هو مشهد جنسي بس غريب جداً .. في المشهد (جون هام) زيه زي أي رجل في موقفه في الحقيقة بيكون مستعجل و رغبته هي اللي بتحركه .. (كريستين ويج) زي أي ست يمكن بتحتاج وقت أطول شوية عشان تخش في المود .. جميل جداً .. طب أنا كمخرج عشان أعمل مشهد جنسي بيعبر عن الواقع و عن اللي بيحصل فعلاً بين أي إتنين متجوزين حبقي محتاج مشهد مدته مش حتقل عن 10 دقايق .. هل ده ينفع في عرف السينما؟ .. بالتأكيد لا .. اللي بيحصل إن مخرجي السينما و المسلسلات بيمسكوا العصاية من النص و بيعملوا Skip للمرحلة اللي الست محتاجة فيها إنها تخش في المود و دي المرحلة اللي إنت كمشاهد مش بتشوفها .. ده السبب في رأيي حتي ورا معدلات الطلاق الخزعبلية اللي بنعاني منها كلنا سواء في مصر أو بره مصر .. حرفياً إحنا كرجالة و ستات في مجتمع مش بيتكلم مع بعضه عن فرق السرعات سيدي الرئيس زي ما قال (هاني رمزي) في فيلم محامي خلع و بتبقي إنت كرجل محرج تتكلم عن إحساس الرفض اللي إنت بتحسه بسبب إنك صدقت الصورة اللي إتصورت ليك من وقت ما إنت كنت صغير .. محدش قال إن المسلسلات و الأفلام هي المسئول رقم واحد عن الوضع اللي زي الزقت اللي إحنا فيه بس علي الأقل هم ليهم دور مينفعش نتجاهله.
المصادر:
- مقالة بعنوان ‘Sex sells’: The new age of explicit TV نشرت في موقع هيئة الإذاعة البريطانية BBC و ده لينك المقالة الأصلية:
https://www.bbc.com/culture/article/20190226-sex-sells-the-new-age-of-explicit-tv - مقالة بعنوان Naked Lie نشرت في موقع Slate و ده لينك المقالة الأصلية:
https://slate.com/culture/2022/04/bridgerton-normal-people-netflix-hbo-sex-controversey-caitlin-stasey-chloe-cherry.html - مقالة بعنوان Why I’m sick and tired of seeing naked women on HBO نشرت في مجلة The Week و ده لينك المقالة الأصلية:
https://theweek.com/articles/449596/why-im-sick-tired-seeing-naked-women-hbo
