الحرب علي الدولار .. أمريكا اللي بتعمله في الناس حيطلع عليها ولا إيه؟

مهم تبقي عارف إن أي خناقة في الدنيا لازم يبقي ليها سبب عشان زي ما كلنا عارفين الخناق من غير سبب يبقي قلة أدب .. سواء كانت خناقة بين عيال في الشارع .. خناقة بين رجل و مراته .. أو حتي بين دول و بعضها .. لازم سبب .. السبب ده أهميته إن الحكومة تقف قدام شعبها و تقوله إحنا متخانقين مع الحكومة الفلانية عشان الأسباب دي و إلا الشعب حيقول لحكومته و أنا مالي بخناقاتك و ياريت متدخيلينيش في تفاصيل مشاكلك .. يا رجل ده حتي الغزو الأميريكي للعراق اللي كلنا كنا عارفين إنه غير أخلاقي و غير قانوني كان له مبرر قال إيه إن الرئيس العراقي (صدام حسين) الله يرحمه و يسامحه كان عنده أسلحة دمار شامل .. المبرر بيتحط في وش المعارض قبل المؤيد .. عشان كده موضوعنا النهاردة حيكون علي الخناقة حول الدولار الأميريكي و الموضوع بمنتهي البساطة إن زي ما إحنا كلنا عارفين عشان قيمة أي عملة في الدنيا خلاص مبقتش معتمدة علي إحتياطي الذهب بتاع البلد و اللي كان بيتسمي زمان Gold Standard و دلوقتي بقت قيمة أي عملة سواء بتتكلم عن الجنيه المصري أو الدولار الزيمبابوي بيحكم سعره في السوق هو إحتياطي البلد سواء كنت بتتكلم عن مصر أو حتي زيمبابوي من الدولار اللي بيسمي الإحتياطي النقدي الأجنبي .. بقالنا فترة فيه ناس صوتهم عمال يعلي اسمهم دول بريكس BRICS و دول يبقوا البرازيل و روسيا و الهند و الصين و جنوب أفريقيا بحيث الحروف بتاعة BRICS هي الحرف الأول من كل بلد و الناس دول شايفين إن جه الوقت إن ده يتغير و العالم يبدأ واحدة واحدة يبطل يبقي معتمد أوي كده علي الدولار الأميريكي .. اللي بتتكلم عنه دول BRICS دي بيسموه De-Dollarization و ده اللي عايزين نتكلم عنه النهاردة.

عشان تفهم القصة بتاعة الحرب علي الدولار دي إحنا محتاجين سوا نلاقي إجابة عن 3 أسئلة:

هو إزاي أصلاً الدولار بقي البديل بتاع الذهب و إزاي قيمة أي عملة بتاعة أي بلد بقي بيحددها الدولار؟ و إيه علاقة ده بكلمة De-Dollarization؟
إيه هي الخطوات اللي دول BRICS شايفه إنها لو إتعملت فحنصحي الصبح علي دنيا جديدة مفيهاش سيطرة الدولار؟
هل يا تري الناس دي عايشة في مياة البطيخ ولا بتتكلم كلام ناس عاقلين ينفع يتحقق في يوم من الأيام؟

زعماء دول BRICS الخمسة في صورة واحدة ليهم .. دول بريكس يبقوا البرازيل و روسيا و الهند و الصين و جنوب أفريقيا.

إزاي الدولار بقي مفتري أوي كده علي الغلابة اللي زي الجنيه المصري؟

كان يا مكان بعد الحرب العالمية الثانية ما خلصت إتمضت إتفاقية اسمها بريتون وودز Bretton Woods Agreement هي اللي قالت إن من هنا و رايح الدولار حيبقي العملة الرسمية للتجارة العالمية .. ده معناه إن أي حد عايز يبيع لحد أي حاجة لازم الTransaction أو البيع و الشراء يتم بالدولار و عشان كده لو فتحت جوجل تعرف هو يا تري سعر برميل البترول النهاردة كام أو سعر متر المكعب الغاز طبيعي بكام حتلاقي السعر بالدولار .. في السبعينات الرئيس الأميريكي (ريتشارد نيكسون Richard Nixon) لغي العمل بالإتفاقية دي و ضرب كرسي في الكلوب و طلع الدولار بره الGold Standard عشان دول العالم كلها ميبقاش قدامها حل غير إن عملة كل بلد تبقي مربوطة بسعر صرف الدولار .. المشكلة اللي خلقها الوضع ده بانت زي الشمس بعد الغزو الروسي لأوكرانيا في فبراير 2022 لما أميركا عشان تقول لروسيا كخة اللي عملتيه ده يا روسيا يا نوتي عاقبتها بحاجتين:

عشان تقريباً نص الإحتياطي النقدي الأجنبي الروسي بالدولار (حوالي 300 مليار دولار) فالأمريكان من حقهم إنهم يجمدوا الفلوس دي فده عشان تتخيل نتيجته كأنك محوش تحويشة العمر بتاعتك نصها بالجنيه و نصها بالدولار و فجأة إتقالك سوري و الله إن النص اللي بالدولار ده إنت مينفعش تتصرف فيه من غير ما تصالح أميركا و ترضي عنك .. ده كان السبب في إن بعد الحرب قيمة الروبل اللي هو عملة روسيا إتداس علي وشها لإن زي ما قلنا قيمة الروبل زيه زي عملة أي بلد بيحددها هي البلد عندها إحتياطي نقدي أجنبي قد إيه فلما نص تحويشة العمر اللي بالدولار يبقي ولا كأن ليها قيمة فطبيعي إن العملة تقع.
كل البنوك الروسية الكبيرة إتمنعت من إنها تستخدم نظام سويفت SWIFT للتحويلات البنكية و ده نظام البنوك الكبيرة حول العالم شغاله بيه من سنة 1977 و ده عشان تتخيله هو زي ما يكون البنوك الكبيرة عاملين مع بعض جروب واتس بحيث لو عميل عنده حساب في بنك CIB فرع لندن مثلاً عايز يحول فلوس لعميل تاني عنده حساب HSBC بس فرع نيويورك فالتحويل بيتم شبه لحظي بناء علي إتفاق بين أميركا و الإتحاد الأوروبي و كندا و بريطانيا .. الحقيقة إن خروج البنوك الروسية بره سويفت كان ضربة كبيرة ليهم .. ده كان نظام عليه 11,000 بنك و منظمة متوزعين علي 200 بلد و بتتم عليه 42 مليون تحويل مالي يومياً .. سويفت كان عامل زي أنستاباي InstaPay كده بس علي مستوي العالم.

يعني إيه De-Dollarization؟ و حنستخدم أيه بداله؟

مهم تبقي فاهم إن دول BRICS معهمش خطة واضحة متفق عليها بينهم بخطوات مفهومة عشان نمشي وراها فيجي اليوم اللي منحتجش فيه دولار .. لحد دلوقتي كل دولة بتعمل اللي تقدر عليه يعني مثلاً تلاقي الصين بتقترح إن بدل ما هي بتشتري البترول من الخلايجة بالدولار فهي عايزاهم يقبلوا إنهم يبيعوا بترول باليوان Yuan اللي هو عملة الصين .. الروس مثلاً ماشيين برده في السكة اللي يقدروا يعملوها إن في مارس 2022 الرئيس الروسي (فلاديمير بوتين) طلع قرار رئاسي بإن أي بلد عايزة تمضي عقد شراء غاز طبيعي من بلده لازم تدفع ثمنه بالروبل Ruble اللي هو عملة روسيا .. يوم 31 مارس 2023 حكومة البرازيل طلعت أعلنت إن اليوان الصيني حل محل اليورو كثاني أكتر عملة أجنبية ضمن الإحتياطي النقدي الأجنبي للبلد .. زي ما إنت شايف كلها إجتهادات و مفيش خطة واضحة تقدر تقيمها و تحكم عليها هل حتنجح في إنها تجيب أجل الدولار أو لا.

هي الدنيا رايحة علي فين بالنسبة للدولار؟

الحقيقة إن الناس اللي شغلتها الإقتصاد واخدة بالها من اللي بيحصل للدولار .. صندوق النقد الدولي بيقول سنة 1990 نصيب الدولار كعملة مستخدمة كإحتياطي نقدي أجنبي في العالم قلت من 71% بقت 60% .. هو ده يبان خبر وحش للدولار بس في نفس الوقت وفق كلام صندوق النقد الدولي برده فلحد دلوقتي اليوان الصيني نسبته لا تتعدي 2.7% من إجمالي الإحتياطي النقدي الأجنبي لدول العالم .. يمكن التحدي الأكبر اللي أنا شايفه الحقيقة هو هل الصحاب حيقلبوا علي بعض؟ .. إنت دلوقتي قصاد واقع إن فيه خمس دول في BRICS اللي بفكرك تاني إنهم البرازيل و روسيا و الهند و الصين و جنوب أفريقيا .. منهم دولتين عملتهم تنفع تحل محل الدولار اللي هم الروبل الروسي و اليوان الصيني فالسؤال دلوقتي حيختاروا مين؟ .. الحل الوسط اللي هم بيتكلموا عليه إن العملتين يتم استخدامهم سواء كبديل مشترك للدولار بس هل ده واقعي؟ .. ده زي لما المعارضة بدل ما تتوحد كلها ورا مرشح واحد عشان يخش قدام الرئيس يقوموا مختارين إتنين و أصوات الناخبين المعارضين تتقسم علي إتنين .. في رأيي الشخصي إن العقبة الوحيدة ورا إن اللي عايزاه دول بريكس ده يحصل إن حد من (بوتين) أو الرئيس الصيني (جي جينبينج) يجي علي نفسه و علي بلده و يقول إن البديل الرسمي للدولار هو عملة البلد التانية .. هل ده حيحصل؟ .. أشك الصراحة و الله أعلم.

المصادر: