و إنت بتتفرج علي دراما رمضان السنة دي ممكن تكون لاحظت و ممكن تكون عدت عليك و إنت بتتفرج علي التتر بتاع المسلسل إن فيه أسامي ممثلين مش غريبة عليك .. أساميهم بتقول إنهم ولاد و بنات ممثلين تانيين وبقوا ممثلين هم كمان .. يعني مثلاً .. الفنان (أشرف زكي) متجوز الفنانة (روجينا) و عندهم بنت اسمها (مريم) فلقينا إن في مسلسل ستهم اللي من بطولة (روجينا) إن بنتها (مريم أشرف زكي) بتمثل معاها .. بالمناسبة مسلسل ستهم فيه كمان (أحمد كمال أبورية) ابن الفنان (كمال أبورية) .. الفنان (عمرو سعد) له مسلسل اسمه الأجهر فلقينا إن ابنه (رابي) هو كمان بيمثل مع باباه .. أه بالمناسبة كمان مرة مسلسل الأجهر بيشارك فيه (نور خالد النبوي) إبن الفنان (خالد النبوي) و الحقيقة إن بسم الله ما شاء الله واضح إن (نور خالد النبوي) موهبة قوية جداً لإنه في سيزون رمضان حتلاقيه في مسلسل مذكرات زوج مراهق كمان اللي هو من بطولة الفنان (طارق لطفي) .. مش بس الأبناء فيه الأحفاد كمان لإن (محمود عمرو محمود ياسين) حفيد الفنان (محمود ياسين) الله يرحمه حتشوفه في مسلسل الكتيبة 101 .. شفت كل ده .. ده ولا حاجة قصاد اللي بيحصل في هوليوود و حتي في بوليوود .. فكرة أبناء العاملين دي بره بيسموها نيبوتيزم Nepotism و فيه ناس بتسميها نيبو بيبيز Nepo-Babies عشان بس لو عدي عليك المصطلحين دول تكون فاهم معناهم بس الفكرة واضحة أظن .. كلمة Nepotism صحيح هي كلمة إنجليزي بس أصلها كلمة لاتيني هي Nepos يعني أبن أخويا والكلمة دي بدأت تظهر لما طلعت موضة كده متفهمش إزاي إن باباوات الفاتيكان كانوا كل ما يحتاجوا حد يعمل شغلانة تلاقيه جايب ولاد أخوه و ولاد أخواته.
اللي عايزين نتكلم عنه النهاردة هو أبناء العاملين أو Nepotism بس في بينزس صناعة السينما و التليفيزيون .. بمعني إنت ممثل ربنا كرمك بولد أو بنت فبتقرر إنهم هم كمان يدخلوا بيزنس التمثيل .. عادي بتحصل في كل الشغلانات اللي في الدنيا .. مش دي القضية .. القضية الحقيقة هو حاجتين .. البجاحة و الثمن اللي البيزنس كله بيدفعه بسبب إنتشار الظاهرة دي.
خلينا نبدأ بأول نقطة عايزين نتكلم فيها .. البجاحة:
أنا شخصياً أعرف ناس كتير زمايلي مهندسين جايين من عيلة كلها مهندسين .. حضرتك باباك مهندس و يمكن مامتك كمان مهندسة فهم عايزينك تطلع مهندس زيهم .. جميل .. حضرتك بتخش علمي رياضة يطلع ميتين أهلك .. بتخش كلية هندسة تتسحل فيها خمس سنين و يمكن أكتر و يطلع ميتين أهلك برده عشان في الأخر يتقال عليك مهندس .. نفس الكلام في الطب نفس الكلام في القوات المسلحة أو في أي شغلانة تانية .. لو إنت صاحب بيزنس عندك وظيفة عايز تعين فيها حد و متقدم ليها إتنين مهندسين واحد فيهم أبوه مهندس و الثاني لا فمش حتفرق الحقيقة لإن الإتنين نظرياً علي الأقل ليهم نفس المؤهل العلمي .. ده مش موجود في التمثيل .. مش حتفرق إذا كانت قدراتك التمثيلية ولا (أل باتشينو Al Pacino) في زمانه ولا إنك لو وقفتي علي خشبة مسرح حتبقي كأنك (فاتن حمامة) الله يرحمها بُعثت من جديد .. طالما إنت معندكش القدرة إنك تقعد مع منتج أفلام أو مسلسلات فموهبتك ملهاش معني .. كواحد شغال فيما يسمي شو بيزنس فإنت السي في بتاعك هو بإختصار شديد معاك نمر مين علي تليفونك .. مجرد إنك تقعد في أوضة واحدة مع منتج ده 80% من الكارير بتاعتك فلو مامي أو دادي خدك من إيدك و قعدك مع المنتج فإنت مينفعش بأي حال من الأحوال و تحت أي مسمي تطلع في سوشيال ميديا تقول إن الكاريير بتاعتك كفنان محدش ساعدك فيها أو إنك تعبت عشان تبنيها زيك زي أي حد تاني متولدتش في بيت فيه حد شغال في البيزنس ده .. دي أول نقطة .. لو إنت من أبناء العاملين اللي ربنا أراد و دخلت بيزنس التمثيل فرجاء بعد إذنك بوس إيدك وش و ظهر و حط في بقك جزمة قديمة.
يحكي أن في العرض الرسمي لفيلم Once Upon a Time in Hollywood و علي الريد كاربيت صحفي سأل الممثلة الشابة (مايا هوك Maya Hawk) اللي كانت من ضمن فريق الفيلم سؤال بسيط جداً .. شايفه إزاي مامي و دادي ساعدوكي عشان المخرج (كوينتين تارانتينو Quintin Tarantino) يختارك للدور ده .. معلومة علي الماشي ليك (مايا) تبقي بنت الممثل (إيثان هوك Ethan Hawk) اللي يمكن إنت تعرفه من فيلم Training Day و من مسلسل Moon Knight و مامتها تبقي الممثلة (أوما ثيرمن Uma Thurman) اللي هي أساساً يعني إشتغلت مع المخرج (كوينتين تارانتينو) في 3 أفلام اللي هم Pulp Fiction و ثنائية Kill Bill .. كان المفروض إن (مايا) تبتسم إبتسامة مصطنعة و تقول أنا محظوظة إن ليا مامي و دادي مشاهير وقفوا ورايا و ساعدوني و تسكت .. بس إزاي .. متبقاش من الجيل المهبب بتاع دلوقتي لو قالت كده .. (مايا) شبه إتخانقت مع الصفحي و قالتله إن مامي و دادي مقدموليش أي حاجة و أنا إشتغلت في الفيلم ده بمجهودي .. طبعاً هي شبه نست إن (كوينتين تارانتينو) إختارها لما هي بعتتله فيديو تجربة أداء أو Audition ليها بس الفيديو ده اللي أخرجه ليها و وجهها فيه يبقي أبوها اللي هو أساساً مخرج موهوب جداً غير إنه ممثل شاطر.
نقطة تانية و هي معلش يعني أعمل سكان بعينك كده لكل الأدوار الدرامية في مسلسلات رمضان كلها و طلعلي دور واحد قوي درامياً اللي هو حاجة زي مثلاً شخصية (والتر وايت Walter White) في مسلسل Breaking Bad اللي قدمها الممثل (برايان كرانستن Brian Cranston) و يا سيدي عشان محسسكش إني شايف الممثلين الأجانب هم بس اللي بيعرفوا يمثلوا فقولي مثلاً من جيل الممثلين الحالي مين له نفس الحضور بتاع الفنان (ممدوح عبدالعليم) الله يرحمه في مسلسل الضوء الشارد مثلاً .. فأغلب الأدوار في مسلسلات رمضان مش بتتطلب أداء تمثيلي جدير بالأوسكار فمعلش كمان مرة لو إنت من أبناء العاملين في مجال السينما و التليفزيون طالما إنت مترحشتش للأوسكار أو الجولدن جلوب فعشان خاطري نقطنا بسكاتك لإنك مش بتعمل حاجة مفيدة ولا حتي بتعمل حاجة تخلينا نقول شنو هذااااااااع علي رأي (رؤوف خليف).
أرجع تاني و أقولك مش عيب إطلاقاً إنك تبقي من أبناء العاملين في البيزنس ده .. الممثلة (جايمي لي كورتيس Jamie Lee Curtis) اللي خدت أوسكار أحسن ممثلة مساعدة السنة دي عن دورها في فيلم Everything, Everywhere, all at Once تبقي بنت إتنين من أساطير هوليوود اللي هم (جانيت لاي Janet Leigh) و (توني كيرتس Tony Curtis) .. الممثل الأسطوري (جيف بريدجيز Jeff Bridges) اللي برده معاه أوسكار أحسن ممثل عن دوره في فيلم Crazy Heart يبقي ابن الممثل (لويد بريدجيز Lloyd Bridges) اللي كان بيشترط إنه عشان يمثل في أي أدوار إن ابنه هو كمان لازم يمثل معاه .. بس الفرق إن الأتنين معترفين بده و بيقولوا إن لولا أبهاتنا و أمهاتنا مكناش بقي لينا الكاريير دي و ده كل اللي أنا بطلبه .. إنك تبقي صادق مع نفسك و تقول أيوه أنا ربنا كارمني مش أكتر ولا أقل .. مش مطلوب منك غير إنك مثلاً يعني تبقي زي (إليزابيث أولسن Elizabeth Olsen) اللي إنت عارفها بدور (سكارليت ويتش Scarlet Which) في سلسلة أفلام The Avengers .. الست (إليزابيث) تبقي الأخت الصغيرة للأختين التوأم (ماري كيت أولسين Mary Kate Olsen) و (أشلي أولسين Ashley Olsen) و دول إتشهروا أوي بسبب مسلسلاتهم اللي كانت بتتذاع علي قناة ديزني .. (إليزابيث) بتعترف إن أيوه أنا دخلت البيزنس ده عشان أخواتي البنات مشاهير و ياريت مكنش ده الوضع بس هي دي إرادة ربنا .. (إليزابيث أولسين) اللي أداءها في فيلم Wind River يضرب كل ممثلات دراما رمضان بالجزمة بس لمجرد إنها عارفه إن نص السكة في الكاريير بتاعتها إتوفرت عليها فلازم تطلع تقول أيوه حصل.
و ده بيحطنا قدام النقطة الثانية .. الثمن اللي بيتدفع:
تبقي المشكلة و إن كانت في مصر إحنا ممكن منقدرش نفهم ده كويس هو إن صناعة السينما و التليفيزيون محدش بيعمل لنفسه اسم فيها من غير ما يكون بيفهم شوية .. خد عندك مثلاً حد زي (ستيفين سبيلبيرج Steven Spielberg) أو (كريستوفر نولان Christopher Nolan) .. إنت بقيت بتتكلم عن ناس بتروح تدفع ثمن تذكرة فيلم عشان تتفرج علي شغل مخرج .. في مصر مفيش الكلام ده .. صناعة السينما في مصر بقت ماشية بالكوسة لدرجة إن بقالنا كتير مشفناش مخرج خلاك و إنت بتتفرج تقول لنفسك إيه العظمة دي .. طب أنا رايح لفين بكلامي ده .. الإنطباع العام مش بس في مصر إنما في العالم كله إن شغلانة التمثيل دي مبتأكلش عيش .. قصاد كل (توم كروز Tom Cruise) بينجح فيه مئات و يمكن الاف من قصص الفشل .. ناس كتير ضيعت شبابها في السعي ورا فرصة الشهرة و بناء كارير في البيزنس ده علي الفاضي .. ده بالنسبة للناس العاديين .. لكن لو مامي أو دادي كانوا شغالين في البيزنس ده فساعتها إنك تجرب حظك في التمثيل مش بيكلفك لا وقت ولا فلوس كتير و يمكن كمان تتفرض علي المشاهد بالعافية لمجرد إن مفيش حد عايز يزعل بابي و مامي .. ده بيترجم إن مع الوقت كتير من الشباب اللي عندهم الموهبة و اللي يمكن لو حد أمن بقدراتهم كانوا بقوا من عظماء صناعة السينما بيلاقوا إن مفيش فايدة وبالتالي بيروحوا يشوفوا أكل عيشهم في شغلانة تانية هم مش حابينها .. مع الوقت بيزنس صناعة السينما بيكون شغال فيه ناس كلهم عارفين بعض و معندهمش بربع جنيه موهبة.
ده مش معناه إن فيه ولاد فنانين بيكون فعلاً موهوبين .. مثال صارخ علي ده هو المخرجة (صوفيا كوبولا Sofia Coppola) اللي تعتبر من أكتر مخرجات جيلها موهبة و هي اللي أخرجت الفيلم اللي بيخلي البنات متبطلش عياط لما تتفرج عليه Lost in Translation .. فيه ممثلين كتير بيحفوا وراها عشان ترضي تختارهم في أفلامها .. بس لو قلتلك إن البنت دي رغم موهبتها عمرك ما كنت حتسمع سيرتها لولا إن باباها هو اللي أنتج ليها أول فيلمين تعملهم .. عارف مين باباها؟ .. المخرج الأسطوري (فرانسيس فورد كوبولا Francis Ford Coppola) اللي أخرج ثلاثية الأب الروحي The Godfather .. طب أقولك علي الكبيرة .. إبن عم (صوفيا) يبقي (نيكولاس كايدج Nicolas Kage) اللي يعتبر من أكتر ممثلين جيله موهبة و محدش كان ممكن يعرف عنه حاجة لولا إن عمه (فرانسيس فورد كوبولا) كان إختاره في أول 3 أفلام يعملهم في الكاريير بتاعته كممثل .. كونك طفل إتولدت في بيت باباك أو مامتك كانوا شغالين في بيزنس صناعة السينما فده بيخليك من و إنت صغير حابب إنك تشتغل الشغلانة دي و عمال تتعلم من الدروس اللي بتسمعها حوليك .. محدش قال إن كل أبناء العاملين في صناعة السينما مش مؤهلين و معندهمش الموهبة الكافية إنهم يشتغلوا في البيزنس ده بس كل اللي بقوله إن مش كلهم ينفعوا ..وهي دي المشكلة .. إنك تفتح الباب للناس اللي فعلاً عندها موهبة إنها تخش حتي لو مش مسنودين.
الفكرة في نقطة تركيز سوشيال ميديا اللي بيحسسك إن أبناء العاملين في السينما و التليفيزيون بقت ظاهرة و ده يمكن ميكونش حقيقي .. إحسب كده فيه كام ممثل شارك في مسلسلات رمضان و شوف نسبة ولاد الفنانين منهم حتلاقيها نسبة قليلة و ده مفهوم .. إنت مش قصاد كارثة فعلياً بس المشكلة لما السوشيال ميديا تفضل تركز علي النقطة دي و تعيد و تزيد فيها و عشان الزن علي الودان أمر من السحر فمع الوقت إنت كمشاهد حتحس إن الموضوع بقي أوفر و خرج عن السيطرة .. فيه مصطلح أنا بحبه جدا اسمه Meritocracy و ده معناه إنك طالما إنت مؤهل و تستحق إنك تمسك الشغلانة دي فمش فارق معايا إنت ابن مين في البلد بس هو السر إنك تبقي تستاهل .. بص علي لاعيبة الكورة .. إنت ممكن تبقي ابن لاعيب كورة مشهور .. ممكن تخش المنتخب بتاع الناشئين و الشباب عشان إنت ابن لاعيب كورة مشهور .. بس عمرك ما حتبقي أساسي في فرقة بتلعب في الدوري الممتاز و تتاخد منتخب مصر الأول عشان حضرتك ابن لاعيب كورة مشهور .. جت هوجة كده اليومين اللي فاتوا إن كتير من ولاد كباتن كورة كتير بقوا بيلعبوا في مرحلة الناشئين و بيتاخدوا منتخب مصر للناشئين بس السؤال هو كام واحد فيهم حيوصل لمرحلة إنه يبقي أساسي في تشكيلة النادي الأهلي أو الزمالك أو منتخب مصر .. نفس الكلام في الهندسة أو الطب أو أي شغلانة عشان تشتغلها لازم تبقي مؤهل إنك تخشها .. أنا عارف إن اليومين دول الفرص مش بتيجي علي حسب إنت كاتب إيه في السي في بتاعك قد ما إنت معاك أرقام مين في موبايلك .. المشكلة في تركيز السوشيال ميديا.
أنا شخصياً إترفضت إني أدخل شركة في قطاع البترول عشان أنا مش من أبناء العاملين و اللي إتعين مكاني كان إبن واحد في الشركة .. صحيح أنا شفت ده وقتها إنه ظلم بين ليا بس خلينا نكون متفقين إن من وجهة نظر البيزنس ده عادي علي أساس إن علي الأقل أنا معايا شهادة بكالريوس في الهندسة و اللي إتعين مكاني معاه شهادة بكاليروس في الهندسة فالموضوع بيتبلع .. المشكلة لو ممثل جاب إبنه يمثل معاه فهل فيه أي ضمانة إن الإبن ده موهبته التمثيلية طاغية لدرجة إنك تقول و إنت متطمن إنه الممثل المناسب للدور؟ .. هل دي مشكلة كبيرة أوي بتواجه صناعة السينما؟ .. في رأيي لا بس تركيز السوشيال ميديا علي يا تري إبن مين من الممثلين بيمثل في أنهي مسلسل حيخلي الناس فعلياً الموضوع يبقي في دماغها و ده بدأ يحصل فعلاً في دراما رمضان الموسم ده.
المصادر:
- مقالة بعنوان Nepo babies: why nepotism is such a problem for British film and tv- and how to fix it نشرت في مجلة The Conversation و ده لينك المقالة الأصلية:
https://theconversation.com/nepo-babies-why-nepotism-is-such-a-problem-for-british-film-and-tv-and-how-to-fix-it-202007 - مقالة بعنوان Nepotism is Hollywood’s killer problem: The age of casting your own children is plaguing the entertainment sector نشرت في موقع Hollywood Insider و ده لينك المقالة الأصلية:
https://www.hollywoodinsider.com/nepotism-hollywood-problem/ - مقالة بعنوان Nepotism in the movies: it’s time to call out the acting school of mum and dad نشرت في جريدة The Guardian و ده لينك المقالة الأصلية:
https://www.theguardian.com/film/2019/jul/24/nepotism-in-the-movies-its-time-to-call-out-the-acting-school-of-mum-and-dad
