في العيد رحت إتفرجت علي فيلم John Wick Chapter 4 اللي يبقي الجزء الرابع من سلسلة John Wick و اللي في رأيي الشخصي هو أحلي أجزاء السلسلة بلا منازع و نهاية تليق الحقيقة لختم سلسلة من أقوي سلاسل الأكشن في تاريخ السينما .. بس و أنا بتفرج علي (كيانو رييفز Keanu Reeves) و هو طايح في خلق الله تلطيش جه في دماغي سؤال بسيط .. هو ليه كل ده؟ .. إنت مش متخيل كم الضرب اللي هو خده .. إيه اللي يخلي أي شخصية زي (جون ويك) تستحمل كل الضرب و الألم ده كله؟ .. عشان إيه؟ .. الحقيقة إن المبرر اللي كان واضح جداً هو الإنتقام .. في الجزء الأول هو كان عايز ينتقم في الأول من (لوسيف تاراسوف Losef Tarasov) إبن زعيم المافيا (فيجو تاراسوف Viggo Tarasov) عشان زي ما كلنا عارفين قتل كلبته و سرق عربيته .. في الجزء الثاني بينتقم من (سانتينو دي أنتونيو Santino D’Antonio) زعيم المافيا الإيطالية اللي بعد ما لبس (جون ويك) في إنه يغتال أخته (جيانا Gianna) فهو باعه و عرض عقد لأي حد يقدر يقتل (جون ويك) .. في الجزء الثالث إنتقامه بقي موجه لتنظيم الطرابيزة أو The Table اللي المفروض إنه هو اللي بيتحكم في كل حاجة جوه العالم بتاع الجريمة في سلسلة (جون ويك) .. في الجزء الرابع (جون) مبقاش قدامه لا شغله ولا مشغله غير إنه يسيح دم (الماركي فينسنت دي جرامو Marquis Vincent de Gramont) اللي لسبب ما لا يعلمه إلا الله شايف نفسه الوريث الشرعي للحاج (دون كورليون) من سلسلة The Godfather.
سلسلة طويلة عريضة لسه فاضلها جزء خامس اسمه Ballerina حينزل السنة الجاية إن شاء الله و أحداثه حتبقي بين الجزئين الثالث و الرابع من سلسلة (جون ويك) و مسلسل بيحكي قصة فندق الكونتينتال برده حينزل قريب قائمة بشكل شبه كامل علي فكرة الإنتقام .. الحقيقة إنك لو فكرت فيها حتلاقي تقريباً أغلب إن لم يكن كل أفلام الأكشن اللي في السوق و مش بس دلوقتي إنما من زمان الحقيقة الدافع الأساسي وراها هو فكرة الإنتقام .. أي سيناريو لفيلم قائم علي الإنتقام بيبقي فيه شوية مقادير اللي هم:
- أولاً لازم البطل يبقي قادر إنه يرتكب جريمة القتل .. سواء بقي هو ضابط أو مجرم أو قاتل محترف أو بلطجي مش حتفرق .. إنتقام من غير قتل مينفعش في الأفلام .. في حالة (جون ويك) القتل أساساً شغلته .. بس في نفس الوقت لازم ده يتم في وسط مجتمع أو بيئة مفيهاش قوانين و مفيش رادع بحيث إن البطل القادر علي القتل مش بيبقي قدامه خيار غير إنه ياخد حقه بإيده.
- ثانياً شبح من الماضي غالباً بيكون حد عزيز علي قلب البطل بس إتقتل أو إتظلم .. في حالة (جون ويك) فده يبقي مراته (هيلين Helen) و اللي جسدتها الممثلة (بريدجيت موناهان Bridget Monynahan) .. و في نفس الوقت (جون ويك) هو شبح في دماغ أعداءه لدرجة إنهم مطلعين عليه اسم الدلع البعبع أو Baba Yaga اللي هي النطق الروسي لكلمة Boogeyman بالإنجليزي.
- ثالثاً هو الجنون إن لازم الدنيا تفلت و الدم يبقي للركب و اللي بيعبر عن ده هو مشاهد الأكشن اللي الحقيقة خلال سلسلة (جون ويك) كلها كانت تتحط في متحف و تعتبر مرجع لأي مخرج عايز يعمل مشاهد أكشن .. المخرج (تشاد ستيواسكي Chad Stahelski) كان الدوبلير بتاع (كيانو ريفز) في سلسلة The Matrix بعد كده بدأ يروح في سكة الإخراج .. الناس اللي زي حالاتي اللي قديمة شوية في حتة الفرجة علي الأفلام حتحس إن أسلوب الأكشن بتاع سلسلة (جون ويك) قريب سيكا من اللي كنا بنشوفه في أفلام الأكشن الأمريكاني في التسعينات اللي كان بيخرجها المخرج الصيني (جون وو John Woo) و ده اللي عمل فيلم Mission: Impossible 2 و فيلم تحفة اسمه Broken Arrow و الرجل ده هو اللي إخترع ما يسمي بGun-fo ودي إن الأكشن يبقي ميكس بين الفنون القتالية العادية مع استخدام المسدسات فتقدر تقول إن سلسلة (جون ويك) هي الUpgrade بتاع سلاسل الأكشن اللي إحنا كنا بنتفرج عليها و إحنا صغيرين و ده يفسرلك ليه السلسلة دي ليها معجبين سواء صغيرين أو كبار.
- رابعاً و ده المهم هي العلاقة بين البطل و الشرير و اللي لازم تكون في الأول مايله ناحية الشرير .. هو بيقف الند بالند قصاد زعيم المافيا الروسية في الجزء الأول .. قصاد زعيم المافيا الإيطالية في الجزء الثاني .. قصاد تنظيم الطرابيزة أو The Table اللي المفروض إنه مسيطر علي كل التنظيمات الإجرامية في العالم في الجزئين الثالث و الرابع .. في كل مرة بتتفرج بتقول لنفسك هو يا تري (جون ويك) حيطلع سليم من كل ده إزاي؟
مفيش فيلم إنت شفته فكرته قايمة علي الإنتقام مفيهوش العناصر الأربعة دول .. من أول فيلم Unforgiven اللي أنتج سنة 1992 من بطولة (كلينت إيستوود Clint Eastwood) في دور (وليام ماني William Munny) اللي برده زيه زي (جون ويك) كان قاتل محترف بس بيقرر يطيح في خلق الله بعد ما صاحبه الأنتيم (نيد Ned) و اللي قام بدورة الممثل (مورجان فريمان Morgan Freeman) بيتقتل عشان الدم يبقي برده للركب لحد فيلم Taken إنتاج سنة 2008 اللي فيه واحد من أحلي المونولوجات اللي إتقالت في تاريخ السينما لما شخصية (برايان ميلز Brian Mills) اللي جسدها الممثل (ليام نييسون Liam Neeson) وهو بيهدد اللي خطف بنته بإنه لو مسابهاش فهو حيطارده و حيصطاده و حيقتله .. مجرد إني أفتكر صوت (ليام نييسون) في ودني بيخليني أقشعر.
أي فيلم بيتكلم عن فكرة الإنتقام برده لازم تلاقي فيه مشهد درامي جداً للبطل و هو بيشرح المبرر الأخلاقي للمجزرة اللي هو عمال يفرجنا عليها طول الفيلم .. في الجزء الأول كان المشهد ده لما (جون ويك) إتأسر و كان متكتف في كرسي و بيكلم (فيجو) بيشرحله إزاي الكلبة دايزي دي مكنتش مجرد كلبة إنما كانت أخر هدية تجيله من مراته (هيلين) قبل ما تموت و كأنها بتقوله سامح نفسك علي كل اللي إنت عملته في حياتك عشان يجي (لوسيف) ياخد كل ده منه .. في أخر المشهد (جون) بيزعق في وش (فيجو) و بيقوله يا تسلمني ابنك يا حتموت جنبه و إنت بتصرخ .. أو يمكن المشهد اللي أنا بحبه جدأً من الجزء الأول من سلسلة The Equalizer لما شخصية (روبيرت ماكول Robert McCall) اللي قدمها الممثل (دينزل واشنطن Denzel Washington) راح زار يزور زعيم المافيا الروسية (نيكولاي إيتشينكو Nicolai Itchenko) و اللي جسده الممثل (مارتون كوساكس Marton Csokas) في المطعم بتاعه في مشهد فنياً و تمثيلياً ممكن يتحط جنب المشهد التاريخي في فيلم Heat .. يمكن الفرق بين بين أفلام الأكشن القائمة علي فكرة الإنتقام هو الدافع اللي بيكون وراه جنس البطل .. بمعني .. لو البطل رجل فغالباً المبرر ورا الإنتقام بيكون يا إما إن حد من عيلته إتقتل زي سلسلة John Wick علي أساس إن الكلبة دايزي كانت فعلاً من عيلته زي ما هو شايفها أو إتخطف زي مثلاً سلسلة Taken .. بس لو البطلة ست فغالباً و بنسبة كبيرة فالدافع وراء الإنتقام هو جريمة إغتصاب زي مثلاً فيلم حلو جداً اسمه Promising Young Woman من بطولة (كاري موليجان Carey Mulligan).
الحقيقة أنا عايز أختم بإني أتكلم شوية في حتة هو يا تري إحنا ليه كمشاهدين بنحب قصص الإنتقام حتي في مسلسلات رمضان عندنا .. لو فكرت فيها حتلاقي إن أغلب مسلسلات (محمد رمضان) اللي نجحت الفكرة الأساسية وراها هي الإنتقام .. المبرر في رأيي هو إننا نفسنا نعرف ننتقم .. كلنا إتظلمنا في حياتنا في مرحلة ما و كلنا كان نفسنا لو نقدر نبص في عين اللي ظلمنا و نقوله زي (جون ويك) قبل ما النهار يطلع حتكون ميت .. يمكن السبب في إننا كمشاهدين مبنعرفش نبقي زي (جون ويك) هو إننا مش معانا أهم عنصر في المقادير بتاعة أفلام الإنتقام .. القدرة علي القتل أو يمكن لإننا كمشاهدين أسوياء نفسياً عارفين إن السعي الأعمي ورا الإنتقام بيكون ثمنه غالي أوي .. فكرة الثمن الغالي دي شفناها في فيلم رائع الحقيقة اسمه True Grit أنتج سنة 2010 من إخراج الأخوين كوين Coen Brothers و بيحكي إزاي بنت صغيرة عندها 14 سنة اسمها (ماتي روز Mattie Rose) قامت بدورها الممثلة (هايلي ستاينفيلد Hailee Steinfeld) مش بيبقي في دماغها هسهس غير الإنتقام من اللي قتلوا أبوها فبتروح تأجر قاتل محترف اسمه (مارشال كوجبيرن Marshal Cogburn) قام بدوره الممثل (جيف بريدجيز Jeff Bridges) و اللي في مقابل الإنتقام بتخسر دراعها بسبب عضة تعبان و حتي مش بتلحق تشوف (مارشال كوجبيرن) بيموت و بتفقد أي فرصة ليها إن يمكن في يوم من الأيام يبقي عندها عيلتها الخاصة .. هل الإنتقام من اللي قتلوا أبوها نفعها كده؟
فكرة الثمن الغالي اللي بيتدفع دي شفناها برده في سلسلة (جون ويك) .. في الجزء الأول هو ملحقش يودع و يشكر صاحبه (ماركوس) اللي لولا مساعدته ليه وقت ما كان متكتف و بيصرخ في وش (فيجو) في أقوي مشهد درامي في الفيلم كان زمان (جون ويك) مات .. في الجزء الثاني (جون) بيخسر حريته .. في الجزء الثالث بيخسر صباعه و أي فرصة ليه إن يمكن في يوم الأيام يرتاح من الهم ده و يبدأ حياة جديدة مع حد جديد .. في الجزء الرابع بيخسر حياته .. يمكن اللي عرف يورينا إزاي الإنتقام ملوش معني كان (كريستوفر نولان Christophe Nolan) في فيلمه Memento اللي أنتج سنة 2000 من بطولة (جاي بييرس Guy Pearce) في دور (ليونارد شيلبي Leonard Shelby) اللي عنده فقدان ذاكره و عايز ينتقم من نفسه و من اللي حوليه في حلقة مقفولة ملهاش أي معني و دي كانت رسالة الفيلم .. الإنتقام كفكرة ملوش معني .. يمكن اللي فلت من فكرة الإنتقام دي و عمل فيلم أكشن برده كويس كانت سلسلة Taken بإن البطل اللي هو (برايان ميلز) مش بينتقم لمقتل حد من عيلته قد ما هو عايز يرجعهم بعد ما أتخطفوا يمكن لإن المخرج (بيير موريل Pierre Morel) شاف المطب اللي أنا بتكلم عنه .. الإنتقام كفكرة ملوش معني بس إنك تعمل المستحيل عشان تنقذ حد خصوصاً حد من عيلتك يستحق عشانه إن الدم يبقي للركب.
يمكن اللي مش عاجبني أحياناً هو إن كتير من أفلام الأكشن القائمة علي فكرة الإنتقام مش بتجيب سيرة الثمن اللي بيتدفع .. فيلم زي The Gunman أو سلسلة The Equalizer الأبطال فيهم مقضيينها تلطيش في خلق الله و محدش فيهم أساساً بيتعور حتي و الغريب إن و إحنا بنتفرج مش بيبقي فارق معانا أوي يمكن بالعكس إحنا بنتضايق لو حد مد إيده علي البطل بتاعنا اللي بياخد حقه بدراعه بالنيابة عننا .. إحنا عايزين البطل بتاعنا يفضل يقتل و يعذب المجرمين و الفاسدين و قتالين القتلة و إحنا بنشجعه .. الحاجة الوحيدة اللي إنت محتاج تقف قدامها هو إزاي إنت نفسك تبقي زيهم و ده يوريك قد إيه المجتمع اللي إحنا عايشين فيه ده فيه حاجة غلط .. أنا مش قصدي أتفلسف بس الفيلسوف الفرنساوي (فرانسيس بيكون Francis Bacon) بيوصف الإنتقام إنه عدالة الغابة و هي دي المشكلة إن أنا أقدر أتفهم إن حد زي (محمد رمضان) في بلد زي (مصر) القانون فيها بيطبق علي الغلابة بس يبقي عايز ينتقم من اللي ظلموه خصوصاً لو مسنودين بس إنت لما تيجي تتفرج علي أحداث الأفلام الأجنبية اللي أنا جبت أساميها حصلت فين تلاقي نفسك جوه المجتمع الغربي .. فيلم Taken أحداثه في العاصمة الفرنسية باريس .. الجزء الأول من سلسلة The Equalizer بتدور أحداثه في أميركا و الجزء الثالث اللي حينزل قريب إن شاء الله في إيطاليا .. ده معناه إن إحنا كبشر دلوقتي بغض النظر عن إحنا عايشين فين جوانا حاجة بتقولنا إن لو حد غلبان إتظلم من ناس مسنودة فممكن بنسبة كبيرة الغلبان ده ميقدرش ياخد حقه و ده اللي حيخلي فكرة الإنتقام شاغله دماغنا كبشر و حتخلينا نفضل نتفرج علي المسلسلات و الأفلام اللي بتتكلم عنها لإن إنت كمتفرج بتبقي زيك زي شخصية البطل في السيناريو عايز توصل للعدالة اللي إنت شايفها صح و دي نقطة مهمة.
العدالة وجهة نظر خلي بالك .. يعني مثلاً .. في الجزء الأول من سلسلة The Equalizer الشرارة اللي بتولع الدنيا إن عناصر من المافيا الروسية إغتصبوا بنت يعرفها البطل الللي هو (روبيرت ماكول) الضابط السابق في المخابرات المركزية الأميريكية CIA .. القانون بيقول إن الناس دي حتي لو إتقبض عليها أخرهم يتحبسوا كام سنة .. هل ده العدل؟ .. العدل من وجهة نظره هو إن الناس دي تموت .. القانون مش حيجيب حق الغلبان .. عدالة الغابة اللي حتقدر تعمل ده و مفيش حد يقدر ينفذ عدالة الغابة غير البطل اللي برجع تاني و أقول إن أهم نقطة فيه إنه يبقي قادر علي إرتكاب جريمة القتل .. بناء علي عدالة الغابة فدايرة العنف مش حتقف .. (جون ويك) بعد ما خلص علي (فيجو تاراسوف) طلعله (سانتينو دي أنتونيو) .. بعد ما خلص علي (سانتينو) طلعله الماركي (فينسنت دي جرامو) .. حلقة عمالة تدور و تدور و ده بيخليك تسأل هو يا تري الإنتقام ده حيفضل مكمل كده كتير؟ .. الحقيقة هي للأسف اه .. الفرامل الوحيدة اللي تقدر توقف العجلة دي هي القصاص.
في الأية 45 من سورة المائدة ربنا بيقول و كتبنا عليهم فيها أن النفس بالنفس و العين بالعين و الأنف بالأنف و الأذن بالأذن و السن بالسن و الجروح قصاص فمن تصدق فهو كفارة له و من لم يحكم بما أنزل الله فأولئك هم الظالمون .. المهاتما (غاندي) كان رأيه في فكرة العين بالعين دي إننا لو طبقناها فكده البشر كلهم حيبقوا عميان بس هو (غاندي) و غيره الحقيقة من اللي ضد فكرة القصاص مش قادرين يستوعبوا الحكمة و هي الردع .. زي ما فيه حاجة اسمها الردع النووي إن أنا معايا سلاح نووي و إنت معاك سلاح نووي فإحنا الإتنين حنفكر ألف مرة قبل ما حد فينا يستخدمه ضد الثاني فالردع بتاع القصاص بيقوم بنفس الوظيفة .. فكر فيها خصوصاً لو المظلوم و المنتقم كان بنت زي فيلم Promising Young Woman مش عايزة حاجة في حياتها غير إنها تنتقم صاحبتها اللي أغتصبت.
المصادر:
- مقالة بعنوان How the John Wick franchise fits into the bloody tradition of the revenge file genre نشرت في مجلة The Conversation و ده لينك المقالة الأصلية:
https://theconversation.com/how-the-john-wick-franchise-fits-into-the-bloody-tradition-of-the-revenge-film-genre-203136 - مقالة بعنوان Revenge movies offer mythic middle-aged protectors نشرت في جريدة The New York Times و ده لينك المقالة الأصلية:
https://www.nytimes.com/2015/03/08/movies/revenge-movies-offer-mythic-middle-aged-protectors.html - مقالة بعنوان Wild Justice: Why Do We Love Revenge Movies? نشرت علي موقع Christian Research Institute و ده لينك المقالة الأصلية:
https://www.equip.org/articles/wild-justice-why-do-we-love-revenge-movies/
