لينك التسجيل الصوتي للمقالة علي ساوند كلاود:
https://on.soundcloud.com/pRc11
يمكن بسبب ثقافتنا أو بسبب الطريقة اللي إتربينا بيها أو يمكن بسبب إن مفيش حد بيكلمنا عن الثقافة الجنسية وإحنا صغيرين فكل اللي نعرفه عن الجنس جايبينه من أفلام البورن وده بالضبط عامل زي إنك تروح تتعلم أصول الصرف والنحو من حد زي (حمو بيكا) .. ده في الأخر إترجم إن المعلومة اللي إتحفرت في دماغنا (كرجاله بالذات) إن الرجل الجامد في السرير هو اللي بيطول في العملية الجنسية .. أنا متؤكد إنك لو مشيت في الشارع كلمت شاب شاب سألته إيه أكتر مرض هو مرعوب إنه يتصاب به فكتير منهم لا حيفكر في الضغط ولا السكر ولا حتي السرطان إنما حيقولك أنا خايف أكتشف إني مُصاب بسرعة القذف .. كتير من الشباب لما بيقعد مع نفسه يفكر يلاقيه إترعب من فكره هو يا تري عشان أنا بتفرج علي أفلام بورن كتير وبمارس العادة السرية فده معناه إني لما أتجوز حقذف بدري ومراتي حتضايق مني وتقول عليا مش راجل .. هااااااااااااار أسود .. اللي عايز أتكلم عنه النهاردة هي معلومة أنا لما قريتها مصدقتهاش الصراحة من أول مرة وهي إن أغلب الستات في العالم مبتحبش الجنس يطول أصلا .. مبدأياً عايزكوا تهدوا وتاخدوا نفسكوا وخصوصاً الولاد وخليكوا معايا واحدة واحدة.
فيه واحد إسمه (لورينس سيجل Lawrence Siegel) شغال متخصص في الأمراض الجنسية اللي هو تقدر تقول عليه (هبة قطب) بتاع أميركا .. المهم إن الرجل ده إخترع حاجه إسمها المدي المعقول أو Goldilocks Range ودي عبارة عن الوقت اللي يعتبر مناسب جداً للعملية الجنسية وهنا أنا بتكلم عن المرحلة اللي العضو الذكري بدأ يدخل في المهبل .. مش بتكلم عن الجنس عموماً من أول ما تدخلوا أوضة النوم .. الرجل بيقول إن البشر بغض النظر عن الجنس وعن اللون وعن العرق وعن الديانة ليهم حد أقصي وحد أدني من الوقت هم بيعتبروه مناسب عشان يقول علي نفسه إنه إتبسط .. عشان أقربهالك زي ما تقول كده أنا عشان أتبسط في لعب الكورة لازم ألعب أكتر من ربع ساعة بس مزودتش عن 45 دقيقة .. أقل من ربع ساعة ححس إني ملعبتش وأكتر من 45 دقيقة حتعب وححس إني مش قادر أجري .. في الجنس برده الحد الأدني هو 8 دقايق والحد الأقصي هو 13 دقيقة .. وتاني أنا هنا بتكلم عن العملية الجنسية يعني لما العضو الذكري يدخل المهبل وعلي حسب كلام (لورينس سيجل) نادر أوي لما تلاقي حد بيحتاج إنه يكمل أكتر من 13 دقيقة .. كلام (لورينس سيجل) أكدته دراسة كبيرة أوي إتعملت سنة 2008 .. في الدراسة دي إتجاب عدد من الدكاترة اللي زي (لورينس سيجل) من أميركا وكندا يعني تقدر تقول إنهم جابوا كل اللي زي (هبة قطب) كده هناك وسألوهم من خبرتهم ومن اللي شافوه إيه هو الوقت اللي الناس عموماً بتشوفه وقت قليل أوي للعملية الجنسية؟ وإيه هو الوقت اللي شايفينه طويل زيادة عن اللزوم؟ وإيه هو الوقت المناسب أوي؟
اللي فعلاً خلاني مش مصدق اللي بيتقال هو كلام (لورينس سيجل) إن أغلب البشر بغض النظر هم مين ومنين أخرهم في العملية الجنسية هو ما بين 5 ل8 دقايق بس .. المعلومة دي بالذات أكدتها دراسة إتعملت سنة 2009 واللي عملوا الدراسة إخترعولنا حاجة سموها ILET وده مش إمتحان الأيلتس بتاع الانجليزي ..الILET ده إختصار Intravaginal Ejaculatory Latency Time اللي هو بإختصار الوقت اللي الرجل بيحتاجه لحد ما يقذف بمجرد ما يبدأ عضوه الذكري يدخل المهبل .. الدراسة دي جابت رجاله من 5 دول اللي هم هولندا وبريطانيا وإسبانيا وتركيا وأميركا وبدأوا يحسبوا بالStopwatch هم محتاجين كام دقيقة عشان يقذفوا بمجرد ما العملية الجنسية بتبدأ .. الدراسة خدت في إعتبارها تأثير الواقي الذكري أو الCondom وخدت في إعتبارها هل الرجل عامل عملية ختان ولا لا ووقت المداعبة Foreplay متحسبش وكمان الدراسة دي شملت جنس بين رجالة وستات بس يعني مفيش شواذ جنسياً شاركوا في الدراسة دي .. هات فشارك والبيبسي بتاعك وإسمع النتايج:
رجالة تركيا الجامدين أوي بتوع (مهند) و(عمر) طلعوا حصالة الدراسة وحققوا أقل ILET ب4.4 دقيقة في المتوسط .. رجاله بريطانيا رفعوا رأس أوروبا كلها وجابوا أعلي ILET ب10 دقايق في المتوسط .. الAverage أو المتوسط بتاع الدراسة كان 6 دقايق .. ركز بقي .. يعني الAverage بتاع أغلب الرجاله في العالم هو 6 دقايق وده أقل بدقيقتين من من ال8 دقايق اللي هم الحد الأدني اللي أغلب الناس قالت إنه حلو أوي عشان يتبسطوا من الجنس .. وأنا عارف إن دي صدمة لناس كتير بس متقلقش ده طبيعي .. أغلب الذكور في المخلوقات اللي خلقها ربنا بتقذف بدري ودي حاجة في جينات الذكور عموماً .. لو إنت ثور بتمارس الجنس مع جاموسة في الغابة فده معناه إن في الكام دقيقة اللي عضوك الذكري في مهبلها إنت مش معانا في الدنيا أصلاً .. ده معناه إنك مش حتبقي مُدرك لأي خطر حوليك زي مثلاً أسد أو نمر حيصطادك فغريزة حب البقاء فيك بتجبرك إنك تقذف بدري عشان تخليها تحمل وتخلص .. نفس الفكرة في البني أدم البدائي .. الخاصية دي إن غريزة حب البقاء بتسيطر علي الذكور وقت ممارسة الجنس فضلت مكملة في جيناتنا كرجاله حتي في العصر اللي إحنا فيه لإن في الوقت اللي إنت فيه مع مراتك مفيش أسد حينط عليكوا ياكلكوا إنتوا الإتنين .. بس هي جيناتنا كده .. أهي المشكلة دي هي السبب في الكلام اللي إنت دايماً بتسمعه .. أنا جوزي بيقذف بدري قبل ما أنا أوصل .. عشان تشوف ده بنفسك بص علي الرسم البياني ده اللي عمله دكاترة من جامعة كاليفورنيا وإسمه Response Cycle أو دورة رد الفعل.
خلاصه الرسم البياني ده إن الرجل عادة بيقذف قبل ما الست توصل لنشوتها .. تاني حاجة إن بمجرد ما الرجل يقذف فهو خلاص كده طلع بره الخدمة في حين إن نشوة الست الأولانية ممكن تبقي واحدة من سلسلة ورا بعضها بينهم وقت قليل أوي .. ده اللي بيقول الرسم البياني ده .. وده اللي متوافق مع الكلام اللي أنا كتبته في الأول إن في المتوسط الستات بتفضل الجنس يستمر ما بين 8 ل13 دقيقة بس الرجاله المتوسط بتاعها 6 دقايق وفهمنا الفرق ده جاي منين .. اللي أنا عايزك تفهمه بقي هو مين اللي هبد الهبدة التاريخية بتاعة إن الستات بتحتاج إن الجنس يستمر علي الأقل 20 دقيقة عشان توصل للنشوة؟
زي ما الأبحاث العلمية اللي بتتعمل علي الدايت وإيه أحسن نظام دايت ممكن تمشي عليها فيها هري كتير فكمان الأبحاث العلمية اللي بتتعمل علي الجنس فيها هري كتير أو علي الأقل ده اللي بيقوله (روب بيركنز Rob Perkins) وده رجل أسس حاجة إسمها OMGYes ودي مؤسسة تقدر تسميها Google بتاعة الأبحاث المتعلقة بالجنس .. الرجل ده بيقول إن لما تشوف دراسة علمية العنوان بتاعها فيه كلمة متعة جنسية Sexual Pleasure إعرف إن كل كلمة في الدراسة دي هبد لإن مفيش حد بيمول أبحاث عن الموضوع ده وبالتالي معلومة إن الست في المتوسط بتحتاج 20 دقيقة عشان توصل للنشوة الجنسية دي هبداية من العيار الثقيل لإنها مش مبنية علي أي أبحاث علمية محترمة .. السؤال دلوقتي هو الرقم ده جه منين؟ .. فيه واحدة إسمها (سوزانا فايس Suzannah Weiss) فضلت تنخرب ورا الموضوع لحد ما وصلت إلي إن الرقم بتاع العشرين دقيقة يا إما هبد يا إما الناس جابته من كلام قاله واحد إسمه (ألفريد كينزي Alfred Kinsey) كتب كتاب مشهور أوي من 65 سنة إسمه Sexual Behavior in the Human Female يعتبر من أوائل الكتب العلمية اللي إتكتبت عن موضوع النشوة الجنسية عند الستات .. يعني واحد كتب كتاب من 65 سنة إتقالت فيه معلومة مسكت في دماغ الناس لحد دلوقتي .. لا تخرج قبل أن تقول سبحان الله.
طب خلاصة الكلام الكتير اللي أنا قلته ده إيه؟ .. فيه عوامل كتير أوي بتدخل في حسبة هو الرجل بيفضل مكمل قد إيه في العملية الجنسية؟ .. عوامل نفسية وصحية ومالية .. في رأيي الشخصي إن سبب تركيز الرجاله المبالغ فيه علي إن الحاجة الوحيدة اللي تعيب الرجل هي مدي قوته في السرير هو إننا منعرفش حاجة عن الجنس .. إنت لو رجل متجوز خليني أسألك كذا سؤال وحاول تفكر قبل ما تجاوب .. لو لقيت نفسك مش عارف تجاوب علي الأسئلة دي فإنت حتقدر تفهم هو حضرتك ليه مهووس أوي بهو إنت بتقعد كام دقيقة ماسك نفسك قبل ما تقذف .. هو إنت عارف مراتك بتحب تسمع مزيكا إيه وهي معاك في السرير؟ هل تعرف هي بتحب إيه وبتكره إيه في المداعبة؟ هو إنت بتداعبها أصلاً؟ هل إنت عارف جسم مراتك كويس؟ هل فيه حتت من جسمها بتوجعها؟ هل عملت عمليات جراحية قبل كده؟ هل فيه وضع معين هي بتحبه في السرير؟ هل بتحب إنك تقولها كلام معين؟ .. فكر في الأسئلة دي كلها ومتتسرعش في الإجابة لإن اللي أنا إكتشفته إن إحنا كرجاله عندنا مشكلة كبيرة أوي إننا مش فاهمين .. وبلاش تخلي الTarget بتاعك هو اللي إنت بتشوفه في أفلام البورن لإن كل ده تمثيل في تمثيل.
المصدر:
- مقالة بعنوان Most People Don’t Actually Want Sex to Last Very Long .. أغلب الناس فعياً مبتحبش الجنس يطول أوي .. نشرت في موقع Vice وده لينك المقالة الأصلية:
s://www.vice.com/en_nz/article/bj4y3d/most-people-dont-actually-want-sex-to-last-very-long
