موضوعنا النهاردة اللي حنتكلم عنه هو حاجة عملتها شركة سويسرية اسمها كلايم-وركس Climeworks والحاجة دي هي تكنولوجيا جديدة ممكن تنقذ العالم اسمها Direct Air Capture .. اللي حصل إن الشركة دي يوم 31 مايو 2017 اللي فات شغلت أول مصنع في العالم بيمص غاز ثاني أكسيد الكربون من الهواء الجوي وبيوديه لصوبة زراعية عشان النباتات اللي في الصوبة تتغذي علي غاز ثاني أكسيد الكربون ده .. المصنع ده موجود في مدينة سويسرية صغيرة اسمها هينويل Hinwil وشكل المصنع موجود عندك في الصور .. هو البتاع اللي شكله زي ما يكونوا جايبين 3 صفوف غسالات فول أوتوماتيك رصينهم فوق بعض.
شركة Climeworks لازم تكون عارف إنها شركة إتأسست سنة 2009 وعملها إتنين (يان ورزباخر Jan Wurzbacher) و(كريستوفر جيبالد Christopher Gebald) والإتنين كانوا شغالين في جامعة إي تي إتش زيوريخ ETH Zurich السويسرية .. شركتهم عشان تصرف علي الأبحاث بتاعة تكنولوجيا Direct Air Capture خدوا تمويل من جهة حكومية سويسرية اسمها المعامل الفيدرالية السويسرية لعلوم المواد والتكنولوجيا Swiss Federal Laboratories for Material Science and Technology وكمان خدوا تمويل من أربع صناديق تمويل استثمارية هم Venture Kick و Gebert Ruf Stiftung و de Vigier Stiftung و ClimateKIC.
فيه شوية أسئلة لازم نسألها لنفسنا ونحاول نجاوب عليها في المقالة دي:
- إيه هي بالضبط تكنولوجيا Direct Air Capture؟
- هل التكنولوجيا دي إقتصادياً بتجيب نتيجة؟
- وإيه اللي يخلي أي دولة في العالم تلجأ لإستخدام التكنولوجيا دي؟
خلينا نبدأ إننا نفهمك إيه هي تكنولوجيا Direct Air Capture وبتشتغل إزاي؟
شايف المكعبات اللي شبه الغسالات الفول أوتوماتيك دي؟ .. دي عبارة عن فلاتر وظيفة كل فلتر إنه يمتص غاز ثاني أكسيد الكربون من الجو .. مشكلتك هي إزاي تسحب غاز ثاني أكسيد الكربون اللي الفلاتر لقطته عشان توديه علي الصوبة الزراعية .. الحل إنك بتسخن الفلاتر دي لدرجة حرارة 212 فهرنهايت اللي هي 100 درجة سليزيوس .. طبعاً حتقولي ما درجة حرارة زي دي لازم عشان أوصلها إني أحرق حاجة يعني أنا حولد ثاني أكسيد كربون فأنا كسبت إيه؟ .. الفكرة إن عشان المصنع ده معمول في منطقة أرياف فإنت جنب المصنع بتاع كلايم-وركس Climeworks فيه مصنع تاني بتاع شركة اسمها كيزو Kezo بياخدوا مخلفات المزارع زي مثلاً قش الرز وعن طريق تكنولوجيا اسمها Waste Incineration أو حرق المخلفات فالفكرة إنك زي ما تكون ماشي بالمثل الشعبي زيتنا في دقيقنا .. الحرارة اللي طالعه من Waste Incineration بتروح لتكنولوجيا Direct Air Capture .. غاز ثاني أكسيد الكربون بعد ما يطلع من الفلاتر بيعدي علي Compressors وبيروح لصوبات زراعية عاملاها شركة ثالثة اسمها جيبرودر ماير Gebruder Meier زارعين فيها خس وبناء علي كلام الشركة ففكرة ضخ غاز ثاني أكسيد الكربون للصوبة الزراعية دي بيحسن من إنتاجية الخس بنسبة 20%.
التكنولوجيا دي لحد دلوقتي المهندسين بيستخدموها في المناطق اللي فيها تركيز عالي أوي من الملوثات .. فكر مثلاً في منطقة زي حلوان في القاهرة أو المكس في إسكندرية .. دي مناطق فيها مصانع أسمنت وبالتالي الهواء الجوي فيه نسبة ثاني أكسيد كربون عالية أوي .. الجديد اللي عملته شركة كلايم-وركس Climeworks إنها ممكن تحط المصنع ده في أي حتة .. إنت في أي مكان في قلب القاهرة فوق أي مبني عالي شوية ممكن تركب المصنع ده عشان ينقيلك جو العاصمة من عوادم القطارات و السيارات.
السؤال الثاني هو هل التكنولوجيا بتاعة Direct Air Capture بتجيب نتيجة؟
المصنع اللي شركة كلايم-وركس Climeworks عملته متوقع إنه كل سنة يجمع 900,000 متر مكعب من ثاني أكسيد الكربون يعني بتتكلم عن نفس كمية ثاني أكسيد الكربون اللي بتطلعها 200 سيارة سنوياً .. هل دي حاجة كويسة ولا حاجة وحشة؟ .. فيه دراسة علمية اسمها خريطة الطريق لإمتصاص غاز ثاني أكسيد الكربون A Roadmap for Rapid Decarbonization نشرت في مجلة Science سنة 2017 قالت إن عشان البشر يتفادوا إن درجة حرارة سطح الأرض تزيد عن إتنين درجة سليزيونس علي أخر القرن ال21 فإحنا محتاجين كبشر بقدرة قادر إننا نلاقي طريقة إننا نسحب 5 مليار طن من غاز ثاني أكسيد الكربون سنوياً من دلوقتي ولحد سنة 2050 .. يعني المفروض إننا نلاقي طريقة نسحب ضعف كمية غاز ثاني أكسيد الكربون اللي المحيطات بتمتصها .. فكر فيها ولما تحس إن مخك سخن يبقي إنت بدأت تستوعب حجم المصيبة اللي إحنا فيها كمهندسين علي الأقل.
تبقي مشكلة التكنولوجيا دي الأزلية هي الفلوس .. المصنع اللي إتعمل في مدينة هينويل Hinwil لوحده متكلف مليون دولار من غير ما تحسب تكلفة الR & D اللي هم البحث والتطوير Research & Development بحيث إنك لو حبيت تدخلهم في حسبتك فإنت بتتكلم علي إن المصنع الواحد حيكلف حوالي 2 مليون دولار .. سبب من أسباب إن التكنولوجيا دي غالية أوي إتقال في تقرير نشر سنة 2015 عن مؤسسة الأكاديميات الوطنية الأميريكية US National Academies قال إن تكلفة إمتصاص طن واحد من غاز ثاني أكسيد الكربون بتتراوح ما بين 300 دولار إلي 1000 دولار .. طبعاً إنت شايف إن الفرق كبير أوي وسبب التفاوت الكبير ده هو إن عندك إختيارات كتير أوي من نوعيات الفلاتر علي نوعية المراوح وطبيعة تركيب الفلاتر دي .. فطالما إنت عندك Options كتير فإنت فعلياً متقدرش تحكم علي بالضبط سعر وتكلفة التكنولوجيا دي حيبقي قد إيه فإحنا بنضطر نفترض الأسوأ.
نيجي لأخر سؤال .. إيه اللي يخلي أي دولة في العالم تحط فلوس في إنها تستخدم تكنولوجيا Direct Air Capture؟
تكنولوجيا Direct Air Capture بتتحط تحت عيلة كبيرة شوية اسمها تكنولوجيات الإنبعاثات السالبة Negative Emissions Technologies ودي بتتقال علي أي تكنولوجيا بتشتغل علي مص أو سحب الملوثات من الهواء الجوي .. النوع ده من التكنولوجيا مش حينفع متستخدموش لو إنتي كحكومة بتحترمي نفسك وناوية تحترمي إتفاقية باريس Paris Agreement ودي الإتفاقية اللي مضت عليها 196دولة سنة 2015 بما فيهم مصر بالمناسبة عشان كل الدول تشتغل مع بعضها بحيث إرتفاع درجة حرارة سطح الأرض ميزيدش عن إتنين درجة سليزيوس سنوياً .. ميزة الإتفاقية دي إن مفيش قواعد ثابتة أو جدول زمني محدد لشوية الأهداف أو Targets المطلوبة مثلاً من الحكومة المصرية إنها توصلها .. يعني الإتفاقية دي مثلاً مش بتقول إن لازم خلال سنة كل الدول اللي وقعت عليها تبطل تحرق فحم .. الموضوع متساب مفتوح خالص وبمبدأ لا يُكلف الله نفسا إلا وسعها بس النقطة إنهم سابوا الموضوع هنا تنافسي بين الدول .. بمعني إيه؟
إنت ممكن كدولة زي مصر إنها تقول إنها عشان تنفذ إتفاقية باريس حتبدأ تقفل أي محطة كهرباء شغالة بالفحم بس حتي ده مش كفاية لإنك لو قارنته بدول تانية فحتكتشف إن القرار اللي خدته مصر ده واللي ناس كتير حتعتبره ثورة بيئية هو الحقيقة صفر علي الشمال مقارنة بدول تانية .. دول زي ألمانيا والسويد قالوا إنهم بداية من 2018 مفيش سيارة بتشتغل بمحرك إحتراق داخلي حتتباع .. إنت متخيل قرار زي ده ممكن يأثر إزاي علي دولة كاملة؟ .. تخيل معايا إن مصر قالت إنها خلال سنتين مثلاً حتبطل تبيع أي سيارة بتشتغل بالبنزين أو السولار وإن كل السيارات الجديدة اللي حتتباع حتبقي سيارات كهربية … متخيل فيه كام محطة بنزين لازم تتقلب لمحطات شحن كهرباء ومتخيل تأثير ده علي الأرياف ووسائل المواصلات ونقل الفواكة والخضروات؟ .. عشان كده أسهل حاجة ممكن دولة زي مصر إنها تعملها هي إنها تفكر جدياً في تكنولوجيا Direct Air Capture لمجرد إنها تتنافس مع الدول الأوروبية ويبقي شكلنا إلي حد ما حلو قدام العالم.
والموضوع سهل و بسيط .. الحكومة المصرية ممكن ببساطة تروح تتكلم مع شركة كلايم-وركس Climeworks لإنهم حاطين لنفسهم هدف إنهم بحلول سنة 2025 عايزين يقدروا يسحبوا 1% من إجمالي إنبعاثات غاز ثاني أكسيد الكربون في العالم وعشان يعملوا ده محتاجين يركبوا 750,000 مصنع بتكنولوجيا Direct Air Capture حول العالم ونقدر نتكلم معاهم عشان يركبوا المصانع دي في أماكن مختلفة من مصر.
بس تكنولوجيا Direct Air Capture عشان تخش مصر مش لازم الحكومة تدخلها لتنقية البيئة .. أنا فاهم كويس أوي إنك عشان تقول للحكومة ركبي محطات Direct Air Capture عشان تمتص ثاني أكسيد الكربون من محطات إنتاج الكهرباء اللي شغالة بالفحم عشان نحمي البيئة حيقولك طب وأنا إيه اللي يخليني أدفع فلوس زيادة وفي الأخر المواطن هو اللي حيشيلها في فاتورة الكهرباء اللي بيدفعها .. نفس الكلام لمصانع الأسمنت أي محاولة من الحكومة لإجبارهم علي إنهم يدفعوا ملايين عشان يركبوا محطات زي دي في مصانعهم حتترجم في شكل زيادة في سعر بيع شكارة الأسمنت وإنت برده كمستهلك اللي حتشيل الليلة .. بس فيه شركات في مجالات تانية حيبقي من مصلحتها إنها تحط فلوسها كاستثمار في تكنولوجيا دي زي مثلاً شركات الأغذية وشركات المشروبات الغازية زي Pepsi و Coca-Cola لإن طبيعة شغلها بتخليها محتاجة يبقي عندها Supply مستمر من غاز ثاني أكسيد الكربون.
المصدر:
- مقالة بعنوان This factory will be the first to suck up carbon dioxide and feed it to vegetables نشرت في Website إسمه Vice وده لينك المقالة الأصلية:
https://news.vice.com/story/this-factory-will-suck-carbon-out-of-the-air-and-feed-it-to-plants
