زي ما العنوان بيقول موضوعنا النهاردة هو إنضمام دولة السويد لحلف شمال الأطلنطي ويمكن ده الخبر اللي عدي من غير ما حد يقف قدامه بإعتبار وإيه الجديد يعني لإن زي ما انا شرحت قبل كده لما إتكلمت عن سلاح الغواصات السويدي فإحنا في دماغنا مش حاطين السويد في شلة الدول اللي بتعرف تصنع سلاح .. في دماغنا السويد هي البلد اللي عملت IKEA اللي الفروع بتاعتهم فيها مطعم تحفة أبقوا جربوه بس خد معاك كيس ملح وفلفل عشان أكلهم بيبقي عادب أوي متفهمش ليه وكمان بتعمل عربيات فولفو Volvo .. بس الحقيقة مش كده .. السويد بلد تقيلة في تصنيع السلاح رغم إنها بلد عدد سكانها يدوبك 10 مليون بني أدم ومش بتصرف علي قواتها المسلحة غير يدوبك 1.54% من الناتج الوطني الإجمالي بتاعهم اللي هو GDP ودي إختصار Gross Domestic Product وتقدر تقول إنها الفلوس اللي بتخش السويد أول كل سنة.. إنضمام السويد للحلف بيحط أوروبا قدام واقع جديد يستحق إننا نقف قدامه ونتكلم عنه لإن دلوقتي حرفياً وبدون أدني مبالغة الغرب بقي محاصر روسيا من كل حتة وعشان كده النهاردة عايزين نجاوب سوا علي كذا سؤال:
- إيه معني إن السويد إنضمت لدول حلف شمال الأطلنطي؟
- إزاي السويد إنضمت للحلف؟
الوضع علي الأرض بالنسبة لروسيا .. العدو علي الأبواب:
بص كده علي الخريطة اللي عندك .. دلوقتي تعالي نتخيل إننا بنلعب Red Alert وإحنا روسيا فإنت حتلاقي حاجة غريبة جداً .. إنت دول NATO ودي إختصار North Atlantic Treaty Organization اللي هي حلف شمال الأطلنطي راكنين صف تاني داير ما يدور حوليا .. فنلندا فوق خالص إنضمت للحلف مع السويد .. أستونيا ولاتفيا وليتوانيا منضمين للحلف في الألفينات .. بيلاروسيا تبعي الحمد لله يعني وأوكرانيا أنا متخانق معاها من ساعة ما دخلت أرضها عافية في فبراير 2022 .. ده معناه إن عشان السفن بتاعتي تطلع لبحر البلطيق Baltic Sea اللي هو الممر اللي بيوصلني للمحيط الأطلنطي فأنا مبقاش عندي غير الكام كيلومتر اللي قدام ساحل مدينة سانت بطرسبرج ده غير منطقة كاليننجراد Kaliningrad المحشورة بين بولندا وبين ليتوانيا واللي تعتبر جزء من أرضي وفق تقسيم الحدود اللي حصل بعد الحرب العالمية الثانية .. مش كده وبس .. كابلات الإنترنت ومواسير الغاز الطبيعي اللي مشغله أوروبا كلها دلوقتي بقت تحت سيطرة NATO فأنا كروسيا لو حاولت أنكد علي الأوروبيين عيشتهم مش حعرف .. أنا بس حابب أفكرك بكارثة تفجير خط الغاز الطبيعي Nord Stream واللي لحد دلوقتي الأمريكان بيقولوا الروس هم اللي فرقعوه والروس حالفين بالطلاق إن الأمريكان هم اللي ورا اللي حصل.
زود علي كده حتة إن السويد مش زي الدول الكسر اللي منضمية للحلف عشان تتشعلق في حضن أميركا .. إنت فاكر ليه دولة زي ليتوانيا مثلاً حفيت عشان تنضم للحلف؟ .. بيوزعوا حاجة حلوة في الهالويين مثلاً .. الفكرة إن لايحة الحلف فيها فقرة رقم خمسة بتقول إن أي إعتداء خارجي من أي دولة علي أي دولة من دول الحلف يعتبر إعتداء علي دول الحلف كلهم .. طبيعي إن دولة زي ليتوانيا أو زي أستونيا كانت زمان جزء من الإتحاد السوفيتي وخايفة من اليوم اللي روسيا تبلعها زي ما بلعت أوكرانيا إنها تجري ورا إنضمامها للحلف علي أساس إن لو روسيا داستلها علي طرف فاللي حيقف في صفها هو أميركا بجلالة قدرها .. ده خلي دول كتير من دول الحلف تكبر دماغها من فكرة إنها تصرف علي قواتها المسلحة زي بريطانيا مثلاً اللي بقالها فوق 20 سنة بتنفذ سياسات خفض في إنفاقها العسكري علي أساس إن أميركا موجودة ونفس الكلام علي ألمانيا ودي كانت حاجة بتخلي كيس الشيتوس الحجم العائلي (دونالد ترامب Donald Trump) كل ما عينه كانت تيجي في عين المستشارة الألمانية وقتها (أنجيلا ميركل Angerla Merkel) يفضل يقطم فيها ويعايرها بإن لولا قاعدة رامشتاين الجوية الأميريكية اللي في ألمانيا لكانت روسيا إحتلت بلدكوا من سنين .. فعلياً مفيش من ضمن دول الحلف كلهم دولة عندها استعداد تحارب بكره الصبح غير أميركا وأنا مش ببالغ صدقني وأنا عارف إن الحلف فيه دول عندها قوات مسلحة جامدة زي فرنسا وتركيا بس الدول دي كلها معندهاش الميزة اللي عند السويد وهي إن لسنين وسنين عشان السويد عاشت علي الحياد من أول حتي الحروب النابلونية وبعدها الحرب العالمية الأولي وفي ديلها الحرب العالمية الثانية لحد الحرب الباردة ومروراً بالحرب علي الإرهاب ودلوقتي دخلنا في الحرب الباردة الثانية أهو وده خلي السويد مجبرة إنها تبني قطاع صناعة سلاح محترم بس الأهم إنه مستقل مش معتمد علي موافقة حد إنه يديها مفك صليبة حتي ودي نقطة محتاجة تتشرح كويس.
لو بتتكلم عن الطيارات فالسويد هي اللي بتصنع الطيارة Saab JAS39 Gripen اللي تعتبر من أحسن الطيارات المقاتلة في العالم .. عايز بنادق ألية حتلاقي عندهم البندقية كارل جوستاف Carl Gustav .. عايز صواريخ مضادة للدبابات محمولة علي الكتف فهم بيعملوا صواريخ AT4 .. عايز غواصات عندهم واحدة من أحسن الغواصات التقليدية علي مستوي العالم اللي هي جوتلاند كلاس Gotland-Class .. عايز صواريخ مضادة للسفن عندهم صواريخ RBS15 .. عايز دبابات فهم واخدين رخصة تصنيع الدبابة Stridsvagn 112 ودي تبقي النسخة السويدي من الدبابة الألماني ليوبارد Leopard-2 .. وهي دي الفكرة إن السويد مش جايه سد خانة .. بناء علي كلام المعهد الدولي للدراسات الاستراتيجية IISS فميزانية الإنفاق العسكري السويدي لسنة 2023 كانت 9.2 مليار دولار ودول تقريباً 1.54% من GDP بتاع السويد .. حلو .. سنة 2014 في الإجتماع السنوي لدول الحلف فهم وافقوا علي إنهم لازم يصرفوا علي الأقل 2% من GDP بتاع كل بلد علي الإنفاق العسكري وطبعاً ده كان بلح .. فيه دول فعلاً نفذت ده وسبحان الله كانت الدول القريبة من روسيا زي بولندا اللي وصل إنفاقها العسكري 4% من GDP بتاعها ..أستونيا وصلت 2.7% .. المجر ورومانيا وفنلندا ولاتفيا وصلوا 2.4% .. صحيح الدول دي كلها أقل من 1.54% بتوع السويد بس ولا واحدة من الدول دي بتصنع سلاحها بنفسها ورغم كده السويد تعهدت إنها سنة 2024 حتحقق التارجيت بتاع 2% وده اللي بيخليني أقول إن إنضمام السويد للحلف مش حبقي ببالغ لو قلتلك إنه حيخلي قطاع تصنيع السلاح السويدي حيطلع نار من بقه.
رحلة إنضمام السويد للحلف .. الصبر يا رب:
في مايو 2022 السويد وفنلندا سوا قدموا طلب رسمي للإنضمام للحلف .. أيوه عارف إنك خدت بالك لإن الطلب اتقدم يدوبك بعد 3 شهور بس من بداية الغزو الروسي لأوكرانيا .. خلال أقل من سنة كانت فنلندا ورقها إتقبل والدنيا كانت سالكة بس تقريباً التراخيص عصلجت شوية مع السويد لإن إنضمامها وقفه معارضة المجر وتركيا .. برده نشرحلك بسرعة المشكلة فين .. لايحة الحلف بتقول إن عشان دولة جديدة تنضم لازم كل الدول الأعضاء بالإجماع يوافقوا .. اللي حصل إن المجر حرفياً ومش بهزر قالت للسويد شخللي عشان تعدي .. تاني الفكرة إن السويد عندها اللي مش عند فنلندا ولا أستونيا ولا ليتوانيا ولا حتي لمجر وهو قطاع تصنيع عسكري محترم .. المجر وافقت علي إنضمام السويد مقابل إنها تاخد منها 4 طيارات Saab Gripen C ببلاش وتمضي عقد صيانة مدته 10 سنين لاسطول الطيارات دي اللي تحت إيد المجر .. مشكلة تركيا إنها برده قالت شخلل عشان تعدي بس مقالتهاش للسويد إنما قالتها لأميركا .. قدام الناس واللي بيتقال في الإعلام إن تركيا كانت رافضة إنضمام السويد قال إيه عشان السويد عايش عندها عناصر منتمية لحزب العمال الكردستاني اللي سواء الأتراك أو الأمريكان بيعتبروه تنظيم إرهابي .. اللي مش قدام الناس ومكانش بيتقال في الإعلام إن تركيا كانت عايزة من أميركا توافقلها علي صفقة طيارات F-16 فلما الأمريكان وافقوا الأتراك قالوا يا مراحب بأحفاد الفايكينج.
المصادر:
- مقالة بعنوان What Sweden brings to NATO نشرت في مجلة Politico وده لينك المقالة الأصلية:
https://www.politico.eu/article/sweden-nato-membership-military-power/
