تعديل اتعمل يوم 28 فبراير 2021 .. سنة 2020 قيادة القوات البحرية الأميريكية طلعت قرار بإلغاء مشروع المدمرة زوموالت و المدمرات الثلاثة اللي إتصنعوا حيتركنوا مؤقتا لحد ما يشوفوا حيعملوا فيهم إيه.
عمرك إشتغلت في مشروع وكان كله هري؟ .. اللي هو كل شوية الشغل يتعاد من أول و جديد و التكلفة عماله تزيد و تحميل الساعات عمال يزيد ولا انت مبسوط ولا العميل مبسوط ولا الشغل بيخلص .. أكيد كلنا في مرحلة معينة من حياتنا في الشغل شفنا حاجة زي دي .. أهو دي قصة حياة السفينة زوم-والت Zumwalt اللي حنتكلم عنها النهاردة و اللي هي عبارة عن سلسلة من الهري .. لو حتشبه السفينة Zumwalt بحاجة فهي أقرب تشبيه ينفع ليها هي حرب أفغانستان اللي هو الأمريكان صرفوا عليها دم قلبهم و موصلوش لحاجة و لما تيجي تسألهم ليه كل ده؟ يردوا عليك بنظرة حد مستغرب السؤال و يقولك إيه انت مش شايف الإنجازات بتاعتنا في أفغانستان ولا إيه؟
الموضوع كله بدأ سنة 1994 .. في السنة دي قيادة القوات البحرية الأميريكية كانت بتقول إن جه الوقت إنهم يعملوا مدمرة جديدة لانج محدش عملها قبل كده و سموها DD-21 بس من 1994 لحد 2001 محدش وصل لحاجة فقالوا لنفسهم يلا نبدأ من الأول و بدل ما يسموها DD-21 علي أساس إنه إسم نحس قالوا نسميها DD-X .. من 2001 لحد 2006 قالوا خلاص نسميها DDG-1000 بحيث إن إذا كانوا من 1994 لحد 2001 كانوا عايزين يعملوا 32 مدمرة بس قللوهم ل24 و بعد كده قللوهم تاني ل16 وفي 2001 قالوا خلاص نخليهم 7 مدمرات لحد ما في سنه 2006 لما الكونجرس الأميريكي وافق علي تمويل مشروع بناء 3 نسخ من السفينة الجديدة لانج بحيث إن أول واحدة فيهم إتسمت زوم-والت Zumwalt علي إسم أدميرال كبير في البحرية الأميريكيه إسمه (ايلمو زوم-والت Elmo Zumwalt) وفيه ناس بتحب تسميها DDG 1000.
فكرة السفينة Zumwalt إن الأمريكان كانوا عايزين يبنوا مدمرة من المستقبل .. المدمرات أو Destroyers مهمين أوي لأي قوات بحرية .. صحيح إن في البحرية الأميريكيه حاملات الطائرات هم (محمد صلاح) بتاع الفرقة اللي هو نجم الفرقة و أكتر حد الناس بتتكلم عنه بس المدمرات هم العمود الفقري للقوات البحرية الأمريكية .. لو حنكمل التشبيه بتاع ليفربول فالمدمرات هم (أليسون بيكر Alisson Becker) و (فيرجل فان دايك Virgil Van Dyke) و (فابينيو Fabinho) و معاهم كمان (روبيرتو فيرمينيو Roberto Ferminho) .. إذا كانت القوات البحرية الأميريكية تحت إيدها 287 قطعة بحرية فمنهم 65 مدمرة .. حالياً القوات البحرية الأميريكية عندها 8 طرازات مختلفة من المدمرات بحيث إن اخر العنقود هو الجيل DDG-1000 او Zumwalt.
الأمريكان لما بدأوا يفكروا يشتغلوا علي المدمرة Zumwalt كانوا عايزين يعملوا مدمرة يتحط فيها علي الأقل 12 تكنولوجيا جديدة لانج متجربوش قبل كده مع إن الأصول بتقول إنك لما تبني مدمرة أو حتي حاملة طائرات و تقول لنفسك انا عايز أعمل اللي متعملش بيبقي اخرك تحط فيها ما بين 3 ل4 تكنولوجيات جديدة لإن محدش ضامن إيه اللي ممكن يحصل؟ و عشان متعقدش الأمور علي نفسك وقت الإختبارات و الصيانة و التجربة.
جري الشريط 12 سنة و تلاقي نفسك قدام واقع إن ولا سفينة من السفن التلاتة ينفع تخش الخدمة ولا حينفعوا يخشوا الخدمة ولا بعد 10 سنين من دلوقتي بعد ما إتصرف عليهم و حيتصرف عليهم لسه ملايين الدولارات وبعد ما الناس اللي شغالين في المشروع إتسحلوا شغل وصل بيهم إنهم إشتغلوا 100 ساعة في الإسبوع .. وشوف فوق ده كله سنة 2017 حصلت حادثة تصادم بين سفينتين منهم واحدة Zumwalt و الحادثة دي أدت لوفاة 17 بحار وكل ده بسبب الهري .. الهري عموما في أي شغل بيبدأ من البداية خالص إن الناس اللي ماسكة الشغلانة مبتبقاش عارفه تبدأ منين؟ و مبيبقوش عارفين يحطوا الأساسات بتاعة الشغل فتلاقيهم بيعكوا أي أساسات و يقولك ما كده كده العميل حيعدل .. لو ده حصل في أي شغلانة سواء في المقاولات أو في التصميمات فخليك عارف إن الشغلانة دي حتبقي كلها هري .. وده اللي حصل مع السفينة Zumwalt .. بس مهم تفهم هي المشكلة فين بالضبط؟
المدمرة Zumwalt إتعملت أساساً عشان فيه سلاح إسمه سلاح مشاة البحرية US Marine Corpse وده واحد من الأفرع الرئيسية للقوات المسلحة الأميريكية بس متخصصين أوي في العمليات البرمائية .. خليني أشبهالك بإن لو مثلاً أميركا حبت تغزو مصر عسكرياً بكره الصبح و كانت جزء من خطتهم إنهم ينزلوا قوات علي شواطيء الإسكندرية فالقوات اللي حيتم إنزالها دي حتبقي من سلاح مشاة البحرية لإن طبيعة شغلهم هي العمليات البرمائية .. القوات دي و هي بتنزل علي ساحل الإسكندرية محتاجه سفن حربية تحميها من البحر وهنا المشكلة .. قيادة سلاح مشاة البحرية شايفه إن السلاح إتظلم إن لحد دلوقتي مفيش في القوات المسلحة الأميريكية قطعة بحرية تقدر تحميهم وهم بينفذوا عمليه زي دي و عشان كده لما جم يعملوا المدمرة Zumwalt فالأخوة العباقرة في البحرية الأميريكية اللي هم كانوا الكلاينت أو العميل طلبوا يتعملهم سفينة عليها شوية مدافع بحيث تشتغل زي السفن القديمة خالص إنها تبحر قريب من الساحل و تضرب الأهداف بتاعتها بالمدافع اللي عليها .. ليه ده؟ .. عشان المدمرة دي إتعملت عشان خاطر عيون سلاح مشاة البحرية.
كان فيه إتنين مقاولين هم اللي خدوا شغلانة بناء السفينة بس واللي مكنش ليهم علاقة بالمدافع ولا يعرفوا عنها حاجة .. الشركتين دول كانوا شركة إسمها باث أيرون ووركس Bath Iron Works ودي شركه بناء سفن تعتبر واحدة من الشركات اللي تحت إيد شركة تصنيع سلاح كبيرة أوي إسمها جينيرال دايناميكس General Dynamics ومقر الشركة دي في ولاية ماين Maine الأميريكية و الشركة الثانية هي إينجالس شيب-بيلدينج Ingalls Shipbuilding of Pascagoula ودي شركة تابعة لشركة كبيرة أوي إسمها هانتينجتون اينجالس Huntington Ingalls Industries.. لما خلاص قربوا يخلصوا شغلهم و يسلموا قيادة القوات البحرية السفن بتاعتها إكتشفوا إن المقاول اللي خد شغلانة المدافع اللي هي شركة لوكهيد مارتن Lockheed Martin اللي تعتبر من أكبر شركات السلاح في العالم وهي اللي بتصنع الطيارة F-35 Lightening II معرفتش تعمل المدافع ولبست المشروع كله في الحيط.
من 2007 والكلام اللي كان بيتقال إن المدمرة Zumwalt حيتركب عليها حاجة إسمها Advanced Gun System او AGS ده عبارة عن مدفع بيضرب دانات إسمها LRLAP ودي إختصار Long Range Land Attack Projectiles بحيث إن الدانة الواحدة قطرها 155 مليمتر و طولها حوالي 2 متر و وزنها حوالي 100 كيلوجرام و بتقدر تطير لمسافة 172 كيلومتر .. الSystem كان المفروض إنه يشتغل أوتوماتيك .. الحساسات أو Sensors بتلقط الأهداف اللي بتضرب نار علي قوات سلاح مشاة البحرية اللي علي الأرض والمدفع بيضربهم من غير ما طاقم السفينة يحتاج حتي إنه ينشن .. الSystem ده كان بيتوصف علي إنه Sensor-to-Shooter يعني الحساس هو اللي بيضرب .. لما إتعملت الدانات اللي المواصفات بتاعتها تحسسك إنهم جايبينها من سلسلة Avengers دي إكتشفوا إن الدانات بتاعة المدافع ثمنها أغلي من ثمن المدافع نفسها يعني الدانة الواحدة كانت واقفة عليهم ب915,000 دولار .. وكمان مش بتطير ال172 كيلومتر إنما أخرها 108 كيلومتر بس .. عشان بس أحطك في الصورة .. الإخوه في Lockheed Martin بعد سنين من الصرف كل اللي وصلوا ليه إنهم عملوا دانة مدفع تكلفتها تقريباً نفس تكلفة صاروخ كروز بعيد المدي و بعشر المسافة اللي بيقدر يطيرها .. زي بالضبط إن نادي زي الأهلي مثلا يقول إنه عايز يشتري لاعيب بنفس إمكانيات و سعر (محمد صلاح) وفي الاخر تلاقيهم إشتروا (مروان محسن) مثلاً .. شابوه والله يا جماعة يعني أنا عمال أسقف من فرط الإنبهار.
ده في الوقت اللي المقاولين الإتنين اللي دورهم كان بناء السفن كانوا خلاص خلصوا بناء سفينتين و سلموهم فعلاً للبحرية الأميريكية .. فضلوا في الهري ده 11 سنة لحد ما في 2017 الكلاينت (اللي هو القوات البحرية الأميريكية) قالك طب خلاص شيلي المدافع دي كلها إرميها في المخازن و حطلي منصات إطلاق صواريخ بعيدة المدي أو اللي بتتسمي صواريخ كروز Cruise Missiles .. إكتشفوا بعد كده إن التصميم بتاع السفينة مش نافع معاه يحطولها منصات صواريخ عادية فهم لسه حيصممولها منصات مخصوص بصواريخ مخصوص بحيث إن عملية التصميم و التصنيع دي محتاجة علي الأقل 4 سنين بتكلفة 679 مليون دولار عشان تعملهم .. قالك خلاص مش مشكلة نصبر طالما المشكلة بس مشكلة منصات إطلاق .. طلعلهم خازوق جديد وهو إن زمان إنتوا كنتوا قايلين إن المدمرة دي تسليحها حيبقي عبارة عن مدفع بيضرب دانات .. طب لما الذخيرة تخلص فبسهولة أوي لإن الدانات خفيفة فممكن أي سفينة إمداد تدي للمدمرة صندوق دانات .. زي بالضبط في المعارك عسكري طلقاته تخلص فيستلف خزنة طلقات من زميله .. قالك طب بما إننا حنركبلها صواريخ بعيدة المدي و دي صواريخ لو خلصت لازم المدمرة كلها تنسحب و تروح لأقرب ميناء عشان تتسلح من أول و جديد .. مش كده وبس .. معني إنها بقت حتضرب صواريخ بعيدة المدي فالمدمرة مبقاش ينفع إنها تحمي قوات برية علي الأرض لإن ساعتها مش حيبقي مطلوب منها تقرب أوي من سواحل الإسكندرية مثلاً لو حنكمل المثال بتاع إن الأمريكان حيغزوا مصر .. طب هل معني كده إننا حنكسر خاطر سلاح مشاة البحرية تاني؟
إكتشفوا بعد كده إن المقاول بتاع تركيب Combat System اللي هو تقدر تسميه الOperating System بتاع السفينة أو الWindows بتاعها لتقريب التشبيه يعني تقريباً مكنش بيحضر الإجتماعات وميعرفش إن فيه معاد تسليم ولحد دلوقتي السفينة ملهاش Operating System وحتي الOperating System اللي كان معمول كان إتعمل علي أساس إنهم حيحطوا عليها مدافع بس دلوقتي المدافع إتشالت و حيتحط منصات صواريخ اللي هي لسه أساساً متصممتش ومتعملتش .. هري هري هري .. الهري بيفتح الباب للفتي .. زي مثلاً إن حد قالك طب ما نحط عليها مدافع ليزر .. واحد تاني قالك نحط عليها صواريخ شغالة بالطاقة النووية اللي هو أي حد شاف فكرة عجبته في فيلم عمال يقترحها يمكن ربنا يكرم و السفينة تشتغل.
كل ده خلي البحرية الأميريكية تقول بالميت خالص عشان السفن التلاتة يتعملوا فهم محتاجين شاكب راكب 23.5 مليار دولار يعني تقريباً السفينة الواحدة واقفة عليهم ب8 مليار دولار .. ده حيخلي المشروع أغلي و أطول مشروع يتعمل في البحرية الأميريكية بعد مشروع بناء حاملة الطائرات .. انت عشان تبني السفينة الواحدة من دول انت كده صارف ضعف الفلوس و بتستهلك ضعف الوقت اللي انت محتاجه عشان تعمل مدمرة عادية .. خلي بالك المدمرة العادية عشان تتبني مش محتاج أكتر من سنتين و أخرك تصرف عليها 50 مليون دولار مش إنك تحرق 12 سنة من عمرك و تكع 8 مليار دولار من فلوسك .. كل ده بيخلينا نسأل السؤال المهم: ليه؟ .. ليه صابرين وليه مستحملين ده كله؟ .. فيها إيه يعني السفينة دي عشان يتصرف عليها كل الصرف ده؟ .. الحقيقة هي فيها كتير:
- مبدأياً هي حتبقي Stealth يعني ليها القدرة علي التخفي من الرادارات .. التصميم الخارجي بتاعها اللي بيخليها تخترق الأمواج زي السيف و الCoating أو الدهان الخارجي بتاعها بيخلي أي رادار معادي لما يجي يشوفها بيلاقي إن الRadar Cross-Section بتاعها أو بصمتها شبه بصمة مركب صيد صغيرة .. بس في نفس الوقت ده خلي حجمها فعلياً ضخم .. هي أكبر حجماً من أي مدمرة عادية بحوالي 65% لإنك حاطط منصة القيادة و الرادارات جوه البرج بتاعها.
- ثانياً كل حاجة فيها شغالة بدواير كهربا حتي الرفاصات .. تخيل سفينة شغالة بموتور كهرباء و بتقدر تجري في البحر بسرعه 50 كيلومتر في الساعة وده بيشكل عبء كبير علي مولدين الكهرباء بتوعها واللي من تصنيع شركة Rolls Royce البريطانية اللي الواحد فيهم بيقدر يولد 75 ميجاوات كهرباء ودي كمية كهرباء كفاية أوي انها تنور 50,000 بيت.
- الOperating System بتاعها إشتغل عليه 1200 مبرمج شغالين في أكتر من 30 شركة عشان في الأخر الCode اللي كتبوه يوصل ل16 مليون سطر.
- بالنسبة لشغل الكهرباء بتاعها فانت بتتكلم عن سفينة عليها 35,000 حساس Sensor بيقيسوا كل صغيرة و كبيرة فيها من أول إيه هي الأبواب المفتوحة و المقفولة؟ لحد كمية الكهرباء اللي طالعة من المولدات .. كمية الSensors دي في الأخر هدفها إن فيه أكتر من 18,000 شغلانة كان المفروض بحارة المركب يقوموا بيها بقت تتعمل أوتوماتيك .. ده معناه إن المدمرة Zumwalt بتشيل عدد أفراد طاقم أقل بنسبة 25% عن أي مدمرة تانية .. يعني نظرياً برده تكلفة التشغيل بتاعة السفينة المفروض إنها كده حتقل.
خليني أحطهالك بمثال .. لو باتمان كان عنده سفينة كانت حتبقي Zumwalt .. يمكن عشان كده الأمريكان مصرين إن المشروع ده يكمل .. خلال الخمس سنين الجايين حيصرفوا مليار دولار زيادة عشان 3 سفن يشتغلوا و البداية حتبقي 522 مليون دولار في السنة المالية 2019 عشان تكفي لبناء منصات الصواريخ بعيدة المدي واللي حتستخدم نوع مخصوص من صواريخ توماهوك Tomahawk وكمان حيتركبلها صواريخ إسمها Standard Missile 6 مضاد للطائرات .. المميز كمان في Zumwalt إنها من حيث الحجم أكبر من أي مدمرة تانية فده بيديها إمكانية إنك تحط فيها حاجات كتير زي مثلا طائرة بدون طيار أو غواصة بدون طاقم أو أي حاجة تانية .. بس هي فيها مشكلتين:
- أول مشكلة إنها سفينة بس حتي مش عارفه تقوم بالدور الطبيعي لأي سفينة إنها تمشي في البحر من غير ما تعطل .. المدمرة Zumwalt عطلت قبل كده 3 مرات منهم واحدة في نوفمبر سنة 2016 في أول رحلة تجريبية ليها و عطلت في نص قناة باناما بسبب إن عشان حركة المولد أو الGenerator بتاع السفينة تنتقل للرفاص بتاعها بتشتغل بنفس الفكرة بتاعة دبرياج عربيتك بس الفرق إن فيه دايرة تبريد زيت .. المهم إن دايما بيحصل تسريب لمياه البحر من بين فتحة الرفاص و المياه بتخش علي الزيت و بتلاقي درجة الحرارة عليت أوي .. خصوصا إن ده رفاص باسم الله ما شاء الله وزنه 30 طن و قطره حوالي 5 متر .. المشكلة دي حصلت قبل كده تاني في سبتمبر 2016.
- ثاني مشكلة هي عارف انت الرقص علي السلالم اللي هو انت في النص لا طلعت ولا نزلت .. الZumwalt حتبقي فيها 96 صاروخ Tomahawk مقارنة ب80 صاروخ بس لأي مدمرة تانية ودي حاجة كويسة بس في نفس الوقت الرادار بتاعها أضعف من الرادارات المستخدمة في المدمرات الثانية .. هي Stealth بس مش أوي زي الغواصات النووية .. اللي هو تحس إن الأمريكان عاملينها مجرد شو مش أكتر.
لو فيه درس نقدر نتعلمه من السفينة Zumwalt فهو إنك لما تيجي تعمل حاجة جديدة في شغلك بلاش تجيب أكتر من فكرة جديدة أغلبهم متجربوش قبل كده و تيجي تدفسهم مع بعض في حتة واحدة و تقول لنفسك انا عملت اللي محدش عمله قبل كده لإنك في الاخر حتلاقي نفسك لبست خازوق زي ما الأمريكان لبسوا كده .. الناس دول صرفوا 24 مليار دولار علي 3 سفن مبيشتغلوش يعني انت صارف تقريباً 8 مليار دولار علي السفينة الواحدة و بعد ما خلصوا سفينيتين من الثلاثة جالهم قرار من مجلس الشعب إنهم يرجعوهم تاني للمقاول اللي صنعهم عشان يعيد شغله .. القوات البحرية لما جت تعمل المدمرة Zumwalt قالت لنفسها إحنا حنجرب إسلوب جديد مع المقاولين اللي هو انا ككلاينت حسيبك تعمل اللي انت عايزه ومش كل شوية حقولك إبعتلي تسليمة أتفرج و مش كل شوية أعدل في التصميم و أقرفك في عيشتك .. انا ككلاينت قلتلك إنت كمقاول أعمل الصح و حاسبني في الاخر بس إكتشفوا إن الإسلوب ده ممكن ينفع وانت بتشطب شقة بس مينفعش في تطوير أسلحة .. محدش قال إن الكلاينت يبقي رخم بس في نفس الوقت مينفعش يسيب إيده خالص.
المصادر:
مقالة بعنوان Zombie Zumwalt: The ship program that never dies نشرت في مجلة Roll Call وده لينك المقالة الأصلية:
https://www.rollcall.com/news/policy/zombie-zumwalt-the-ship-program-that-never-dies
مقالة بعنوان The U.S. Navy’s Titanium “Tin Can” .. نشرت علي موقع POGO.com وده لينك المقالة الأصلية:
https://www.pogo.org/analysis/2019/01/the-u-s-navys-titanium-tin-can/
