من يوم 7 أكتوبر 2023 وإنت طالع والدنيا مولعة .. من الصدمة لمدي شجاعة ونجاح الهجوم اللي عملته حركة حماس ضد إسرائيل لمدي وحشية وقسوة وعدم إنسانية الرد الإسرائيلي لمدي تكبير الدماغ والتطنيش عند حكوماتنا العربية لمدي نشفان دماغ طلبة الجامعات الأميريكية لمدي الدعم الأميريكي لإسرائيل زي ما تكون إسرائيل هي العيل اللي أميركا خلفته ونسته .. من أول إحساسنا بالعجز عن القيام بأي دور له معني لحد صدمتنا إن السلطات بتاعتنا بتعتقل أي حد شايل علم فلسطين وهو داخل استاد يشجع ماتش كورة .. بس وسط كل ده الحاجة الوحيدة اللي بتحركنا كعرب وكمسلمين وحتي كمسيحيين هي مشاعرنا .. إحنا حاسين بالغضب بس لما حد بيتكلم معانا في تفاصيل الصراع العربي الإسرائيلي دايماً أغلبنا بيلاقي نفسه عاجز عن إنه يلاقي معلومة يرد بيها علي أي حد بيتهم الفلسطينيين بإنهم شوية إرهابيين .. اللي مننا نصيبه خلاه عايش في بلد غربي دلوقتي سواء بسبب شغله أو تعليمه أو إنه هاجر هناك بيلاقي نفسه فعلياً معندوش حاجة يقولها لإنه متعلمش إزاي يدافع عن القضية الفلسطينية بأدلة تخلي أي حد واقف في صف إسرائيل يحط جزمة في بقه وده اللي إحنا سوا حنحاول نعالجه ونغيره .. النهاردة إحنا حنقدملك عريضة الدعوة لشرح ليه إسرائيل بلد بنت كلب وعشان تبدأ تفهم ليه قانوناً هي بلد بنت كلب لازم تفهم هي إيه الجريمة اللي إسرائيل ارتكبتها في حق الفلسطينيين وهي الحقيقة مش جريمة واحدة دول جريمتين اتعملوا ميكس مع بعض اللي هم Settler Colonialism أو الاستعمار الاستيطاني.
ليه إسرائيل بلد بنت كلب؟
كلمة استعمار أو Colonialism إنت ممكن تفهمها بسهولة لإنك ببساطة كمواطن مصري جربتها فوق السبعين سنة مع الإحتلال البريطاني لبلدك .. كلمة استعمار معناها إن فيه بلد سيطرت علي بلد تانية وبدأت تستغل موارد البلد المحتلة عشان تنفع مصالحها .. زي ما قلتلك ده اللي عاشته مصر والهند تحت الاحتلال البريطاني .. مشكلة الاحتلال الإسرائيلي للأراضي الفلسطينية إنه مش استعمار أو Colonialism عادي زي اللي إحنا عارفينه ومتعودين عليه .. لا ده استعمار محطوطله شوية بهارات زيادة أهمها الاستيطان Settler.
بناء علي تفسير معهد قانون كورنيل الإنجليزي لكلمة استيطان فهو مش بس استعمار عادي اللي هو إن بلد بتحتل بلد وبتسرق مواردها إنما أنا كمان بجبر أهل البلد اللي أنا احتلتها إنهم يسيبوا أرضهم وببدأ أمحي ثقافة الشعب اللي كان عايش في البلد عشان أنا أحل محله وأدعي قدام الناس إن أنا المحتل بقيت صاحب الأرض .. عشان الاستيطان الاستعماري عملته أميركا مع الهنود الحمر فمش حتلاقي إن القانون الدولي بيقول نصاً إن الاستيطان الاستعماري ده جريمة يعاقب عليها القانون .. حتي معاهدة جنيف مش بتقول نصاً إن الاستيطان الاستعماري ده حاجة وحشة بلاش تعملوها إنما الفقرة 49 من نص معاهدة جنيف بيلمح بس إن طرد سكان البلد الأًصليين وإنك تحل محلهم بناس تانية تحت مظلة التطهير العرقي دي حاجة مش كويسة وهي دي المشكلة .. الاستيطان الاستعماري كان هو حجر الأساس اللي اتبنت عليه أميركا واتبنت عليه إسرائيل .. الأولانية استخدمته عشان تطهر الأرض عرقياً من الهنود الحمر والثانية استخدمت نفس الأسلوب مع الفلسطينيين وده اللي إنت محتاج تبقي فاهمه كويس.
الفكرة بمنتهي البساطة إن سنة 1917 وقت ما الحرب العالمية الأولي قربت تخلص بريطانيا أحتلت المكان اللي إنت عارفه باسم فلسطين تحت مسمي سيكسي شوية اللي هو الإنتداب البريطاني British Mandate ولمدة 30 سنة فتحت حنفية الهجرة لليهود من أوروبا اللي كانوا بيتعرضوا للإضطهاد في أوروبا خلال مرحلة ما قبل الحرب العالمية الثانية مروراً بمرحلة الهولوكوست وما بعدها .. ده معناه إن كان فيه ناس عايشه في مكان وجيت إنت جبتلهم ناس تانية طردتهم من المكان ده وعاشوا مكانهم ده تحت مسمي الصهيونية Zionism .. تطلع إيه الصهيونية دي؟ .. برده فكرتها بمنتهي البساطة إن اليهودية مش بس ديانة إنما كونك يهودي معناه إنك مواطن لبلد اسمها إسرائيل مكانها هي الأراضي الفلسطينية .. المهم إن سنة 1917 وزير الخارجية البريطاني (أرثر جيمس بالفور Arthur James Balfour) كتب جوابه المشهور اللي اتسمي بعد كده باسم وعد بالفور بإن بريطانيا بتؤيد فكرة إقامة دولة مستقلة لليهود مكانها فلسطين واسمها إسرائيل .. للعلم بالشيء يعني وعد بالفور لما تقراه حتلاقي فيه جملة مستفزة جداً إن صحيح بريطانيا مع إقامة دولة إسرائيل بس بشرط إن ده ميكونش بيؤثر علي حقوق الغير يهود اللي عايشين في فلسطين .. الجملة المستفزة دي هي اللي بريطانيا بتعتبرها دليل براءة ليها ضد أي إتهام ليها بإنها دعمت الاستعمار الاستيطاني الإسرائيلي للأراضي الفلسطينية رغم إن الجواب لا قال هم مين الناس دي ولا قال بريطانيا حتحميهم إزاي.
ليه بريطانيا دعمت البلد بنت الكلب؟
الحقيقة إن فيه كذا سبب .. أنا شخصياً لما حكيت قصة إتفاقية سايكس بيكو ولما حكيت قصة النكبة قلت إن السبب الأساسي كان رغبة بريطانيا إن وجود إسرائيل يبقي عامل زي الخنجر المغروز في قلب الأمة العربية عشان ميجيش اليوم اللي مصر وسوريا والعراق يتحدوا سوا مع بعض .. بس فيه أسباب تانية .. منها مثلاً إن البريطانيين كانوا قلقانين من موجة الهجرة اليهودية لأراضيهم من دول شرق أوروبا ومن ألمانيا .. منها مثلاً إن البريطانيين كانوا حاسين إن الحرب العالمية الأولي مكنتش نهاية الخط وحيجي اليوم اللي العالم يولع تاني فهم محتاجين يبقي ليهم أصدقاء في الشرق الأوسط .. منها برده سبب مهم إن قناة السويس بالنسبة للبريطانيين كانت رأس مال مهم فهم كانوا عايزين يضمنوا سيطرتهم عليها لسنين وعندهم إحساس إن الملكية المصرية مش الحليف اللي يقدروا يعتمدوا عليه وهم متطمنين .. بمعني أخر سبب دعم بريطانيا لإسرائيل هو الخوف المرضي اللي كان مسيطر علي البريطانيين إن مصر تروح منهم .. قوة استعمارية خلقت قوة استعمارية تانية عشان تضمن إن مصالحها في المنطقة متروحش منها .. بريطانيا بنفسها كتبت البيان اللي طلع من عصبة الأمم League of Nations اللي هي الكيان اللي اتعمل قبل الأمم المتحدة عشان تدي لنفسها حق ضمان هجرة اليهود لفلسطين لحد ما يجي يوم إعلان الدولة اليهودية .. اللي أنا عايزك تفهمه إن إسرائيل كمشروع من أول ما فكروا فيه هو كان مشروع استعماري عشان تجيب اليهود اللي مضطهدين في أوروبا يجوا فلسطين يستوطنوها.
طب دي بريطانيا .. دي بلد شايفه إن مصلحتها إنها تقف في ظهر قيام دولة لليهود في فلسطين وياسيدي خلينا نبقي براجماتيين ولا أكننا تلاميذ إبليس ونقول إن من حقهم ده .. السؤال هنا هو كان إيه موقف الصهاينة؟ .. هم كانوا شايفين الدنيا إزاي؟
أنا عارف كويس إنك مينفعش تاخد فكر بني أدم واحد وتعممه علي حركة كاملة بس يمكن لما البني أدم ده يبقي مؤسس الحركة اللي الناس اللي فيها مشيت وراه يبقي إنت تقدر تعمل ده والشخص اللي عايزين نتكلم عنه هو (تيودور هيرتزل Theodor Herzl) واللي يبقي الأب الروحي للكيان الصهيوني واللي الحقيقة كان باني رؤيته للبلد اللي بيحلم بيها واسمها إسرائيل إنها قايمة علي الأتي:
- إحنا عايزين اليهود اللي يأسسوا إسرائيل يبقوا اليهود اللي منهم رجي اللي هم اليهود الأوروبيين اللي زي حالاته كده لإن (هيرتزل) كان نمساوي بس أتولد في المجر فهو مكنش عايز أغلبية اليهود اللي يأسسوا الدولة الصهيونية يبقوا اليهود اللي جايين من الدول العربية.
- العرب اللي عايشين في فلسطين لازم نطردهم منها وده ملوش اسم غير إنه تطهير عرقي Ethnic Cleansing عشان اليهود الأوروبيين يحلوا محلهم وياخدوا أرضهم وياكلوا أكلهم ويشربهم شربهم.
- من النقطتين واحد وإتنين فالمشروع الصهيوني هو أولا وأخيراً مشروع استعماري .. هو كان شايف إسرائيل حتبقي مستعمرة أوروبية في قلب الأراضي العربية .. هو وصفها بإن البلد دي حتكون مستعمرة للحضارة وسط شوية برابرة.
خلال فترة الإنتداب أو الإحتلال البريطاني لفلسطين الكثافة السكانية لليهود نطت من 6% بقت 33% وبناء عليه معادلة إنشاء إسرائيل كانت سهلة وبسيطة .. فيه بلد اجنبية استعمرت بلد عربية وجابت ناس أجانب تانيين عشان يستوطنوا الأرض العربية دي وتاخدها وضع يد .. سنة 1947 يعني بعد سنتين من نهاية الحرب العالمية الثانية بريطانيا بتعلن إنتهاء انتدابها للأراضي الفلسطينية وبيطلع القرار رقم 181 من مجلس الأمن بتقسيم فلسطين واللي كانت مشكلته الحقيقة إن تقريباً اللي كتبوا القرار ده ساقطين حساب .. سنة 1947 كانت التقسيمة السكانية لفلسطين إن عدد سكانها العرب تلت اربع عدد البني أدمين اللي عايشين فيها يقوم يطلع القرار رقم 181 يقول إن الدولة الفلسطينية العربية حتتبني علي 56% بس من مساحة فلسطين .. السنة اللي وراها أُعلن قيام دولة إسرائيل وقامت حرب 1948 اللي كسبتها إسرائيل واللي بمجرد ما خلصت الحكومة الإسرائيلية أقرت قانون حق العودة Law of Return اللي بيقول إن أي مواطن يهودي إياكش حتي يكون عايش في ساحل العاج من حقه إنه يجي إسرائيل يقعد فيها وتتعطاله الجنسية الإسرائيلية .. النكبة كان ضحيتها التطهير العرقي لأكثر من 750,000 ألف فلسطيني أُجبروا إنهم يسيبوا بيوتهم تحت تهديد السلاح بإعتراف تقرير طلع من الموساد اللي هو المخابرات العامة الإسرائيلية تقدر تقراه بنفسك هنا ولحد دلوقتي مفيش قانون حق لعودة الفلسطينيين لأرضهم.
الرد اللي الصهاينة دايماً رافعينه قصاد الناس إن يعني إيه احتل بلد أنا كنت عايش فيها من سنين .. هم شايفين إن بما إن أنا يهودي يبقي أنا ليا حق العودة لأرضي اللي كنت عايش عليها من الاف السنين .. وبناء عليه مينفعش تيجي تقول إن الإحتلال الإسرائيلي للأراضي الفلسطينية زيه زي الاستعمار الغربي للأراضي الأميريكية وتطهيرهم العرقي للهنود الحمر بس النقطة اللي محدش منهم بتلاقيه بيجيب سيرتها إن القانون الدولي مفيهوش حاجة تقول إن عشان التوراة قالت إن كان فيه دولة يهودية في فلسطين من الاف السنين إن ده يدي الحق لمواطن يهودي عايش في أوكرانيا إنه يجي ياخد فلسطين بالعافية .. النقطة الأهم إن فكرة الاستعمار الاستيطاني لسه بتتطبق لحد دلوقتي بس عشان اللي بيطبقوها عارفين إنها غلط فبتلاقيهم بيعملوها في الاستخبص من غير ما حد يعرف .. الحكومة الصينية متهمة بإنها بتدي حوافز للصينيين من عرق الهان عشان يروحوا يعزلوا لمحافظة جينيانج Xinjiang اللي عايش فيها أغلبية مسلمة وكمان يروحوا يعزلوا للتيبت اللي عايش فيها أغلبية من البوذيين التيبت .. نفس التهمة بتتوجه لحكومة رئيس الوزراء الهندي (ناريندرا مودي Narendra Mody) إنه بيحاول يلعب في التوزيع السكاني لإقليم كشمير بحيث ميخليش عايش فيه أغلبية مسلمة.
الاستعمار مأساة .. بس الاستيطان كارثة:
علي بلاطة ومن غير أي مقدمات قانونية ملهاش لازمة فالمستوطنات اللي إسرائيل بنتها سواء في الضفة الغربية أو في قطاع غزة بتمثل خرق واضح لنصوص معاهدة جنيف اللي بتقول إنك مينفعش تروح تحتل بلد تقوم جايب شعبك يقعد في البلد اللي إنت احتلتها .. ليه المستوطنات دي مصيبة دي نقطة لازم تبقي واضحة ليك:
- مبدأياً وجود مستوطنة عامل زي ما تقوم الصبح تلاقي الحكومة قررت تبني محطة مترو في الشارع بتاعك .. ده معناه إنك مينفعش تخش بعربيتك للشارع اللي إنت ساكن فيه .. وعشان توصل بيتك مينفعش تاخد الطريق العادي إنما لازم تلف حولين نفسك في شوارع مكسرة لحد ما توصل .. وجود المستوطنة بيخلي الفلسطينيين مش عارفين يتحركوا في بلدهم لإن بيتقالهم المستوطنة ممنوع حد فلسطيني يخشها والطريق اللي رايحها واللي راجع منها مينفعش فلسطيني يمشي فيه.
- المستوطنات الكتير في الضفة الغربية واللي زي ما قلتلك مخلية الفلسطينيين مش عارفين يعيشوا في بلدهم دي السبب اللي مخلي ناس كتير تتهم الإحتلال الإسرائيلي إنه شبه حكم التفرقة العنصرية في جنوب أفريقيا اللي معروفة باسم ابارتهايد Apartheid واللي كان فيه المواطن الجنوب أفريقي الأسمر مينفعش يمشي في شوارع معينة ومينفعش يسكن في مناطق معينة ومينفعش يشتغل شغلانات معينة .. حتي الرئيس الجنوب أفريقي (نيلسون مانديلا Nelson Mandela) الله يرحمه قال فعلاً إن معاناة الشعب الفلسطيني شبه معاناة الشعب الجنوب أفريقي وعشان كده البلد الوحيدة اللي كان عندها دم ورفعت قضية ضد إسرائيل في المحكمة الجنائية الدولية كانت جنوب أفريقيا.
المصادر:
- مقالة بعنوان Is Israel a ‘Settler-Colonial’ state? The Debate Explained نشرت في مجلة Vox وده لينك المقالة الأًصلية:
https://www.vox.com/world-politics/24128715/israel-palestine-conflict-settler-colonialism-zionism-history-debate
