ألبوم صور .. الصراع العربي الإسرائيلي في خرايط.

الصراع العربي الإسرائيلي من الحاجات اللي شكلت دماغنا أو علي الأقل دماغ جيلنا .. الجيل الجديد محضرش أوبريت الحلم العربي ولا الإنتفاضة ولا حصار الرئيس (ياسر عرفات) الله يرحمه .. الجيل الجديد محضرش الشيخ (أحمد ياسين) الله يرحمه .. الجيل ده محضرش لما كان محدش بيهتم بهو ده تبع حركة فتح ولا حركة حماس .. زمان كان إسمها فلسطين و المقاومة الفلسطينية .. النهاردة حنتكلم عن تاريخ الصراع العربي الإسرائيلي في صورة خرايط .. الخرايط هي اللي فعلاً بتوريك حجم المأساة .. مأساة فلسطين لازم نفضل نتكلم عنها ومنزهقش .. حتي لو جيلنا مش هو اللي حيجيب حقها بس مجرد إننا نفضل نتكلم عنها و نفضل فاكرينها فممكن حد من الجيل اللي لسه حيجي ربنا يكرمه و يحقق المعجزة.

الإنتداب البريطاني سنة 1922: لسنين و سنين كانت الحتة اللي انت عارفها دلوقتي بإسم فلسطين تحت سيطرة الدولة العثمانية .. في الخريطة اللي عندك حتلاقي نهر الأردن قاسم الحتة دي نصين اللي هم فلسطين و الأردن .. بعد الحرب العالمية الأولي الدولة العثمانية خسرت الأرض دي كلها و سنة 1922 بريطانيا أعلنت إن الحتة الصفرا اللي عندك في الخريطة دي كلها بقت تحت الإنتداب البريطاني .. كلمة إنتداب دي النسخة السيكسي من كلمة إحتلال .. ناس كتير متعرفش إن قرار وضع الحتة دي تحت الإنتداب البريطاني اللي طلع من عصبة الأمم اللي هي النسخة الأولانية خالص من الأمم المتحدة كلف بريطانيا إنها تؤسس وطن لليهود في فلسطين.

قرار تقسيم فلسطين الصادر عن الأمم المتحدة سنة 1947: ده تقريباً كان السبب ورا إعلان حرب فلسطين السنة اللي وراها .. اللي حصل إن سنة 1947 بريطانيا أعلنت إنسحابها من فلسطين و سابتها مخضرة للأمم المتحدة .. الأمم المتحدة قعدت تعصر مخها تلاقي حل للمصيبة دي لحد ما هبدوا الهبداية العابرة للقارات دي .. فلسطين حتتقسم نصين واحد تبع العرب و الثاني تبع الصهاينة و حتفضل القدس الشريف تحت إشراف الأمم المتحدة .. قرار تقسيم فلسطين ده قبلته المنظمة الصهيونية العالمية بس رفضه قادة العرب.

قرار الهدنة الصادر من الأمم المتحدة سنة 1949: يوم 14 مايو 1948 كان يوم غريب جداً .. ده اليوم اللي الإنتداب البريطاني لفلسطين إنتهي بمعني أخر ده اليوم اللي أخر عسكري بريطاني إنسحب من فلسطين و ده برده نفس اليوم اللي أعلن فيه قيام دولة إسرائيل .. الغريب فعلاً إن أي دولة في الدنيا لما بيعلن إنشاءها بيتقال الدولة إسمها حيبقي كذا و علمها كذا و حدودها كذا إلا إسرائيل الدولة أعلنت و مفيش حد كان عارف حدودها فين .. تاني يوم قامت حرب فلسطين لما دول مصر و سوريا و الأردن و العراق و لبنان دخلت فلسطين .. بعد سلسلة من قرارات وقف إطلاق النار طلع قرار الهدنة برعاية الأمم المتحدة و اللي قال إن فلسطين حتتقسم لكذا حتة .. قطاع غزة حيبقي تحت سيطرة مصر .. القدس الشرقية و الضفة الغربية من نهر الأردن حيكونوا تحت سيطرة الأردن .. الباقي حيبقي دولة إسرائيل.

نكسة يونيو 1967: النكسة أو حرب الأيام الستة علي حسب انت واقف في أنهي مدرجات تعتبر أهم نقلة في الصراع العربي الإسرائيلي .. بعد الحرب دي إسرائيل مساحتها تضاعفت 3 مرات و بقي تحت إيدها شبه جزيرة سيناء من مصر و هضبة الجولان من سوريا و القدس الشرقية و الضفة الغربية من الأردن .. بعد الحرب دي إسرائيل من نفسها كده قالت إن من هنا و رايح عاصمتنا مش تل أبيب إنما القدس الشريف .. علي فكرة مفيش حد من الدول الكبيرة في العالم موافق علي إعتبار عاصمة إسرائيل هي القدس مش تل أبيب يمكن بإستثناء أميركا اللي في وقت حكم كيس الشيتوس الحجم العائلي (دونالد ترامب) أعلنت إنها بتعترف بالقدس عاصمة لإسرائيل.

بعد إتفاقية كامب ديفيد سنة 1982: سنة 1979 كانت السنة اللي مصر إعترفت بيها بدولة إسرائيل عشان تبقي أول دولة عربية تاخد الخطوة دي .. سنة 1979 برده كانت السنة اللي الحدود الجنوبية لإسرائيل إلي حد ما بقت واضحة .. سنة 1982 أخر عسكري إسرائيل غار في ستين داهية من شبه جزيرة سيناء بس فضلت إسرائيل محتلة قطاع غزة و هضبة الجولان و القدس الشرقية.

حدود إسرائيل دلوقتي: سنة 1994 الأردن بقت تاني دولة عربية بعد مصر تمضي إتفاقية سلام مع إسرائيل و بكده كمان الحدود الشرقية لإسرائيل بقت واضحة .. بالنسبة للبنان فصحيح هي و إسرائيل ممضوش إتفاقية سلام بس قرار الهدنة بتاع سنة 1949 اللي طلع من الأمم المتحدة عشان ينهي حرب فلسطين هو اللي بيرسم الحدود بين البلدين و لحد دلوقتي لبنان و إسرائيل ساكتين .. الحدود اللي إسرائيل لسه لحد دلوقتي مش واضحة ومش محلولة هي حدودها مع سوريا .. سنة 2005 إسرائيل أنسحبت بشكل أحادي من قطاع غزة بس لسه لحد دلوقتي الأمم المتحدة بتعتبر إن قطاع غزة و الضفة الغربية تحت الإحتلال الإسرائيلي.

المصدر:

مقالة بعنوان Israel’s Borders Explained in Maps نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-middle-east-54116567