كلاشينكوف .. الأحفاد اللي حيحلوا محل الجدة الكبيرة.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/g6xkyteqqc0w?si=ffe014998b7a46979c0e7061a13c2851

بسم الله ما شاء الله روسيا بلد مساحتها كبيرة .. روسيا فيها مناطق تلج ومناطق جبلية ومناطق غابات وصحاري كمان .. ليهم وجود مسلح في سوريا .. ليهم وجود مسلح في أوكرانيا .. ده معناه إن الروس محتاجين العساكر بتوعهم يبقي معاهم بندقية ألية تقدر تعتمد عليها مهما كانت الظروف .. هم محتاجين يبقي معاهم بندقية ألية لو الدنيا شتت أو لو العسكري غاطس في الطينة فبرده تضرب طلقاتها عادي جداً .. لو العسكري في الصحرا وفي درجة حرارة معديه الأربعين فبرده بتشتغل عادي ولا كأنها قاعدة في أوضة مكيفة .. اللي حنتكلم عنه النهاردة هو أحدث بندقيتين أليتين حيدخلوا الخدمة في القوات المسلحة الروسية اللي هم AK-12 و AK-15 والإتنين تقدر تعتبرهم أحفاد البندقية الألية الأسطورية الكلاشينكوف أو AK-47 .. في المقالة دي حنحاول نجاوب علي سؤالين:

• هم ليه الروس أساساً محتاجين دلوقتي إنهم يعملوا بندقية ألية جديدة تحل محل القديم؟
• أساساً ليه عملوا بندقيتين؟ ليه AK-12 و AK-15 ومتبقاش بندقية واحدة وخلاص؟

الأول نديك شوية مراجعة سريعة لإزاي أساساً وصلنا للمرحلة دي .. بص يا سيدي .. البندقية AK-47 اللي هي جدة البندقيتين الجداد دول إخترعها واحد اسمه (ميخائيل كالاشينكوف Mikhail T. Kalashinkov) وده كان عسكري في سلاح الدبابات الروسي أيام الحرب العالمية الثانية .. أيام ما كان الرجل ده في الجيش كانت القوات السوفيتية معتمدة علي بندقيتين:

• البندقية الأولانية هي بندقية قديمة حبتين اسمها موسين Musin ودي بيتقال عليها Manually Operated أو Bolt Action يعني بعد ما تضرب الطلقة بتسحب الإبرة عشان تطرد المظروف بتاع الطلقة وبعد كده تضغط الزناد تاني وهكذا .. ميزتها إن طلقتها تقيلة وبالتالي بتطلع بطاقة حركة أو Power كبير يعني لو ضربتها علي حد فغالباً حقتله من أول طلقة .. عيبها إن رد فعلها أو Recoil لو أنا مخدتش بالي وأنا بستخدمها ممكن يخلعلي كتفي من قوته .. عيب تاني إن البندقية Musin كانت طويلة حبتين وده معناه إن صعب أوي المدرعات السوفيتي بتاعة نقل الجنود الضيقة واللي مينفعش تساع عدد كبير من الجنود يكونوا شايلين كلهم بنادق زي دي.
• السلاح الثاني كان PPsh41 ودي بيتقال عليها Submachine Gun أو مدفع رشاش خفيف مداه قريب يعني مبعرفش أقتل به حد بعيد عني وخزنة الذخيرة بتاعتها شكلها عامل زي العلبة المدورة بتشيل 30 طلقة.

اللي (ميخائيل كالاشينكوف) كان عايز يعمله إنه يعمل بندقية ألية تحل محل الإتنين .. الAK-47 كانت بتستخدم طلقة عيار 7.62×39 مليمتر وده كان عيار أقل من اللي مُستخدم في البندقية Musin يعني ملهاش نفس القوة بتاعتها بس بتقدر تطير مسافة أطول (حوالي 400 متر) ده غير إن رد فعلها أو الRecoil أقل بكتير .. في نفس الوقت الAK-47 ليها نفس قدرة الPPsh41 إنها تضرب طلقاتها بشكل أوتوماتيكي يعني طول ما إنت دايس علي الزناد الطلقات حتفضل تطلع بشكل مستمر لحد ما الخزنة اللي برده فيها 30 طلقة تخلص.

سنة 1947 الAK-47 دخلت الخدمة في القوات المسلحة السوفيتية .. في الستينات السوفييت رموا بنادق AK-47 بتاعتهم في الزبالة وحلو محلها ببنادق شبهها بس أحسن شوية اسمها AKM .. في السبعينات السوفييت عملوا بندقية أحدث حبة سموها AK-74 .. هنا إنت محتاج تقف بقي .. لحد بنادق AKM كانت كل البنادق السوفيتية اللي بتنزل بتستخدم طلقات عيار 7.62×39 مليمتر .. الجديد في AK-74 إنها لأول مرة إستخدمت عيار جديد من الطلقات اللي هو 5.45 مليمتر والسبب إن السوفييت فكروا يعملوا كده هو إنهم قالوا لنفسهم طب ما نجرب حاجة قريبة من عيار الطلقات 5.56 مليمتر المستخدم في بنادق M-16 اللي الأمريكان بيستخدموها .. حالياً أغلب القوات البرية الروسية شايلة بنادق AK-74M ودي بنادق بدأ الروس ينتجوها سنة 1991  بتستخدم عيار 5.45 مليمتر .. المشكلة إن مخازن السلاح الروسي دلوقتي فيها أكتر من 2 مليون طلقة عيار 7.62×39 مليمتر اللي مستخدمة في بنادق AK-47 و AKM القديمة وعدد كبير بس مش محدد من طلقات عيار 5.45 مليمتر اللي مستخدمة في بنادق AK-74 و  AK-74M.

الروس بقالهم فترة طويلة عارفين إن بنادق AK-74M اللي بفكرك إنها دخلت الخدمة في التسعينات قدمت فمابالك ببنادق AK-74 اللي في الخدمة من السبعينات بس هم كانوا خايفين إنهم يرموا البنادق دي في الزبالة ويعملوا بندقية جديدة لسببين: الأول إن الموضوع حيبقي مكلف فشخ خصوصاً إن عدد القوات البرية الروسية بسم الله ما شاء الله كبير .. الثاني إنهم فعلياً عندهم مخزون محترم من عيارين مختلفين من الطلقات.

الحل كان البندقيتين AK-12 و AK-15 .. دول موديلين جداد لانج تقدر تعمل فيهم اللي إنت عايزه بس لازم يكونوا شغالين علي نفس عياري الطلقات اللي متخزن عن الروس .. البندقيتين من تصنيع شركة كلاشينكوف كونسيرن Kalashinkov Concern .. الإتنين تصميمهم الداخلي يعتبر نسخة طبق الأصل من تصميم البندقية AK-74M بس بإستثناء إن كل واحدة فيهم شغاله بعيار طلقات مختلف:

• بنادق AK-12 حتشتغل بعيار طلقات 5.45 مليمتر اللي هو نفس العيار المستخدم في بنادق AK-74 و AK-74M ودي حتبقي السلاح الأساسي في إيد القوات الروسية علي جبهات القتال.
• بنادق AK-15 ودي حتشتغل بعيار طلقات 7.62×39 مليمتر اللي كان مستخدم في بنادق AK-47 و AKM ودي حتبقي السلاح الأساسي لقوات الإحتياط.

التصميم الخارجي لAK-12 و AK-15 هو اللي فيه كلام وإختلافات شوية عن الأجيال القديمة:

• لو خدت بالك فيه حاجة شبه المجري المدرج فوق وتحت الماسورة بتاعة البندقيتين .. المجري ده بيتسمي بيكانتيني ريل Picatinny Rail أو سكة حديد بيكاتيني واتسمي علي اسم الشركة اللي إفتكسته اللي هي بيكانتيني أرسينال Picatinny Arsenal ودي شركة أميريكية هي اللي إخترعت المجري ده عشان يتركب عليه إكسسوارات البندقية الألية .. يعني مثلاً المجري العلوي ممكن تركب عليه كشاف كهربا ونشان بصري أو موجه بالليزر والمجري التحتاني ممكن تركب عليه مقبض إضافي عشان يزود شوية من تحكم العسكري في رد فعل البندقية أو ممكن يتركب عليها قاذف قنابل يدوية Grenade Launcher.
• البندقيتين الكعب بتاعهم بيتفك ويتركب وبيتني وده إختلاف كبير عن عيلة بنادق AK-74 اللي كان دايماً كعبها بيبقي خشب وبيبقي ثابت مبيتشلش .. دي ميزة حلوة أوي للعساكر اللي بيشتغلوا كتير جوه المدرعات والدبابات لإن المساحة بتبقي ضيقة ومعموله كمان لعناصر القوات الخاصة اللي لو مثلاً طالعين علي سلم ضيق فهو عايز يشيل بندقية خفيفة وقصيرة عشان مش كل شوية تحك في الحيطة وتضايقه وهو بيطلع جري علي السلم.

المصدر:

• مقالة بعنوان Behold: This is the gun that will replace the deadly AK-47 يعني بص و إتفرج علي البندقية اللي حتحل محل AK-47 .. نشرت في مجلة The National Interest وده لينك المقالة الأصلية:
  https://nationalinterest.org/blog/buzz/behold-gun-will-replace-deadly-ak-47-29272