مفيش حاجة تفسر الطريقة اللي البشر بيتعاملوا بيها مع الدنيا قد إنك دايماً تحط في دماغك إن المحرك الأساسي ورا تصرفاتنا في الحياة هو الجشع .. علي فكرة مش لازم كلمة جشع تقترن في دماغك بحاجة وحشة .. إنت ممكن تبقي جشع في عمل الخير .. ممكن تبقي جشع في السرقة .. ممكن تبقي جشع في الأكل إنك بتاكل عمال علي بطال أو إنك تكون جشع في سعيك إنك تحافظ علي فورمة الساحل اللي إنت عاملها .. دايماً البشر عايزين أكتر أيا كان إنت بتتكلم عن إيه اللي هم بيسعوا وراه .. اللي بيتجوز مرة عايز يتجوز تاني .. اللي جاله قرش عايز الثاني و الثالث .. جشع البني أدمين هو اللي خلانا نوصل للمعجزات العلمية و الطبية اللي إحنا عايشين فيها دلوقتي و هو السبب برده ورا كل الموت و الدمار و الحزن و المأسي اللي إحنا بنحس بيها و بنشوفها كل يوم .. المقدمة دي مهمة لسبب و هو إنها هي اللي حتساعدك تفهم الموضوع اللي حنتكلم عنه النهاردة و هو جشع الأمريكان إنهم يصرفوا علي قواتهم المسلحة بس الأول إنت محتاج يتشرحلك السياق بتاع الأحداث عشان تبقي فاهم الصورة الكاملة.
سنة 1990 إنهار الإتحاد السوفيتي و هنا إنت محتاج تبقي مستوعب إن الإتحاد السوفيتي بالنسبة للأمريكان كان البعبع اللي بيخوفوا بيه العيال الصغيرة .. طبيعي إن لما التهديد الأكبر للأمن القومي ينتهي فناس كتير حتبدأ تتكلم و تسأل نفسها هو يا تري حيبقي فيه داعي نصرف علي قواتنا المسلحة زي زمان؟ .. مش يمكن جه الوقت إننا نمسك العصاية من النص .. نقلل من إنفاقنا العسكري بس في نفس الوقت نفضل محافظين علي الإستعداد القتالي للقوات المسلحة؟ .. أول حد بدأ ياخد خطوات واضحة في السكة دي كان الرئيس الأميريكي (جورج بوش الأب George H.W. Bush) و بفكرك إن ده كان اللي ماسك أميركا وقت حرب الخليج الثانية اللي هي حرب تحرير الكويت و الرجل ده قلل الميزانية العسكرية بنسبة 9% .. جه وراه الرئيس (بيل كلينتون Bill Clinton) اللي قلل الميزانية العسكرية 8% زيادة .. شوية و جه الرئيس (جورج بوش الإبن) و هوبا حصلت هجمات 11 سبتمبر 2001 و عينك ما تشوف إلا النور.
جري الشريط لأخر السنة اللي فاتت لما صحينا علي خبر إنسحاب القوات الأميريكية من أفغانستان اللي أصدره الرئيس (جو بايدن Joe Biden) عشان ينهي أطول حرب في تاريخ أميركا كله .. ده ماشي بالتوازي مع قرار إنت يمكن متعرفش عنه حاجة إن الوجود العسكري الأميريكي في العراق بيقل هو كمان .. لو إنت متخيل إن القرارين دول هم جزء من تريند أو موضة بدأت تسيطر علي دماغ الأمريكان إننا لازم نقلل شوية من إنفاقنا العسكري و كفاية بعزقة فلوس في حروب ملهاش أي ستين لازمة تبقي غلطان .. قرار الإنسحاب من أفغانستان و خفض الوجود العسكري في العراق مشي معاه قرار طلع من الكونجرس الأميريكي بزيادة الميزانية العسكرية للسنة المالية الجديدة بمبلغ 30 مليار دولار عشان تبقي 768 مليار دولار .. عشان برده تتحط في الصورة .. الملبغ ده أكتر من المبلغ اللي صرفته أميركا علي حرب فيتنام أو الحرب الكورية .. ده أكتر من المبلغ اللي إتصرف في عهد الرئيس (رونالد ريجان Ronald Regan) عشان يغطي مصاريف سباق التسلح مع الإتحاد السوفيتي .. في تاريخ أميركا كله هي مصرفتش مبلغ زي ده علي الإنفاق العسكري يمكن بإستثناء اللي حصل سنة 2011 لما وصل الوجود العسكري الأميريكي في العراق و أفغانستان لأقصي عدد مقاتلين ضمن العملية اللي إتسمت الكسح The Surge ودي ممكن نبقي نتكلم عنها في وقت تاني.
دلوقتي إحنا بقينا في 2021 .. الأمريكان سحبوا جيشهم من أفغانستان .. يدوبك ليهم 2,500 عسكري في العراق .. علي حسب كلام جدو (بايدن) هم مبقوش زي زمان بيصرفوا 300 مليون دولار في اليوم علي الحروب اللي في الأخر خلصت علي مفيش .. السؤال دلوقتي هو ليه هم قرروا يزودوا من إنفاقهم العسكري؟ .. ليه ميفكروش ياخدوا الفلوس دي يبنوا بيها تاني الإقتصاد الأميريكي اللي إتخرب بيته بعد جائحة Covid-19؟ .. الإجابة سيدي القاريء هي كلمة واحدة .. الصين.
الأرقام هي اللي تقدر تفهمك إزاي الأمريكان بيبصوا للصين علي إنها بوبع .. دايماً بقول إن الكلام معلهوش ضرائب .. قول اللي إنت عايز تقوله لما تمسك مايك و الكاميرات تصورك .. إمضتك علي القرارات هي اللي بتفرق مش شفايفك لما تتحرك .. فاكر لما قلتلك إن الميزانية العسكرية الجديدة إتضافلها 30 مليار دولار زيادة عن السنة اللي قبلها؟ .. تخيل حضرتك إن جدو (بايدن) مكنش عايزهم .. الكونجرس قاله خد القرشين دول بس خليهم معاك أكيد حتحاجهم .. الفكرة إنك لما تشوف الفلوس الزيادة دي راحت فين فهم كلهم حيتصرفوا علي المواجهة اللي محدش عارف حتبقي إمتي و فين مع الصين:
- الإستراتيجية الأميريكية لمواجهة الصين في الأربع سنين الجايين بتوع الحاج (بايدن) هو سماها مبادرة ردع المحيط الهاديء Pacific Deterrence Initiative .. المفروض إن الميزانية الأولانية خالص اللي وزارة الدفاع قدمتها للكونجرس قالت إن الإستراتيجية دي حيتصرف عليها 5.1 مليار دولار .. جه الكونجرس قال لا مش كفاية زودوا عليهم 2 مليار دولار كمان عشان تبقي 7.1 مليار دولار.
- الكلام كله إن الصين بقت بتبني قطع بحرية بنفس المعدل اللي محلات الفراخ البروستد بتفتح في مصر اللي هو تحسها مبادرة ورك بروستد لكل مواطن .. ده خلي الكونجرس يزود من عنده 4.7 مليار دولار حتروح لبناء قطع بحرية جديدة و 3.5 مليار دولار حتروح لبناء قواعد بحرية جديدة في المحيط الهاديء .. خليك عارف إن الفلوس دي لا وزارة الدفاع ولا جدو (بايدن) قال إنه محتاجها أو عايزها.
- برده الكلام كله علي إن التطور العلمي للترسانة العسكرية الصينية بقي مينفعش يتسكت عليه ولازم أميركا تفضل ضامنه تفوقها العلمي علي الصين .. (بايدن) كان عارف ده فطلب زيادة ميزانية البحث و التطوير اللي هو Research & Development اللي إنت عارفه بالإختصار R&D جوه وزارة الدفاع بنسبة 5% بس .. جه الكونجرس قاله 5% إيه اللي إنت عايزها دي هي بيرة .. هم قرروا يزودوا 5.7 مليار دولار عشان تبقي الميزانية المخصصة لR&D لوزراة الدفاع خلال ال4 سنين الجايين توصل 117.7 مليار دولار.
الحقيقة إن فيه كذا حاجة أنا واقف قدامها بخصوص رعب الأمريكان من الصين و اللي مترجم بشكل صارخ في ميزانيتهم العسكرية الجديدة:
أول حاجة إن ده توجه مشترك بين الديموقراطيين و الجمهوريين اللي هم الأهلي و الزمالك بتوع السياسة الأميريكية .. قرار الكونجرس إنه يزود من دماغه كده الميزانية العسكرية وافق عليه 88 عضو في الكونجرس و رفضه 11 بس .. خلال الستين سنة اللي فاتوا قضية تمويل القوات المسلحة بيتبصلها علي إنها من المواضيع المحرمة إن حد يتكلم فيها .. فعلياً إحنا منفرقش كتير عنهم في الحتة دي .. المؤسسة العسكرية تاخد اللي هي عايزاه و زيادة.
ثاني حاجة فكرة إن المستفيد الأول و الأخير من زيادة الميزانية العسكرية في الأخر هي شركات السلاح .. الأمريكان بيسموهم Contractors يعني المقاولين عشان لو شفت الإسم ده تبقي فاهم المقصود بيه إيه .. شركات السلاح ليها 464,500 موظف شغالين Full Time علي حس الشغل اللي هم بياخدوه من وزارة الدفاع من الباطن .. بس حاول تفهم إن النقطتين الأولي و الثانية مرتبطين ببعض بشكل كبير و خليني أفهمك .. شركات السلاح في أميركا خلال سنة 2021 صرفت 98.9 مليون دولار علي أعضاء الكونجرس .. اللي بيحصل إن شركة زي لوكهيد مارتن Lockheed Martin واحدة من أكبر خمس شركات سلاح مش بس في أميركا إنما في العالم بتروح للمرشحين اللي داخلين الإنتخابات البرلمانية و تقولهم إحنا حنديكوا فلوس كتبرعات لحملتكوا الإنتخابية في مقابل لما حضراتكوا تخشوا الكونجرس مش حقول تشتغلوا لحسابنا بس خلينا نقول إنكوا تحطوا مصلحة الشركة في دماغكوا .. ده معناه أي مشروع زيادة للميزانية العسكرية توافقوا عليه .. ده معناه أي تمويل لسلاح جديد عاملاه شركتنا تمضوله و أنتوا مغمضين و دي علي فكرة النقطة اللي مخلية مشروع الطيارة F-35 عايش لحد دلوقتي.
الميكس ده بيعمل كذا حاجة .. مش معني إن الكونجرس زود الميزانية العسكرية يبقي كل أعضاء الكونجرس مقتنعين فعلاً إن الصين بتمثل تهديد صريح للأمن القومي الأميريكي لإن السبب بيكون في الغالب إن عضو الكونجرس عايز يعمل دور واجب مع شركة السلاح اللي دفعت فلوس تبرعات لحملته الإنتخابية .. طبعاً أعضاء الكونجرس مش عبط و مش هبل و عارفين إننا عارفين إنهم بياخدوا فلوس من شركات السلاح .. طب و الحل؟ .. تلاقي أعضاء الكونجرس مش بيفوتوا فرصة يطلعوا في الإعلام عشان يفكروا المواطن الأمريكاني إزاي الصين بعبع .. الصين هي أمنا الغولة .. و الناس بتصدق .. ليه؟ .. عشان الزن علي الودان أمر من السحر.
المصدر:
مقالة بعنوان Why the U.S. is paying more for the military after the Afghanistan war is over نشرت في موقع Vox وده لينك المقالة الأصلية:
https://www.vox.com/22840615/us-defense-spending-increase-afghanistan-withdrawal
