لينك التسجيل الصوتي للمقاله علي Sound Cloud:
https://soundcloud.com/user-112011687-312727988/17mvblvl4vpf
أنا عارف كويس إن البنات في مصر ملهاش في التسليح ومش بتحبه .. أي بنت في مصر لو سألتها إيه الفرق بين F-22 Raptor و MiG-29 Fulcrum غالباً حتفتكر إنك بتسألها عن موديلات عربيات .. بس قول قدام أي بنت اسم الطيارة الشبح وحتبقي عارفاها .. تقريباً مفيش بني أدم في مصر لو شاف صورتها مش حيقولك اه يا عم دي الطياره الشبح الأمريكاني .. الطيارة دي بقت تجسيد لمدي تفوق السلاح الأمريكاني .. الطيارة دي هي اللي غالباً هي والماركة بتاعة ماكدونالدز بقوا علامة مميزة لإزاي الأمريكان دول ناس جامدة .. الأمريكان نجحوا يزرعوا في دماغنا إن مينفعش نقف قدامهم أو نقولهم لا لإن لو الحرب قامت بينا وبينهم طيارة واحدة من دول كفاية أوي إنها ترجع مصر للعصر الحجري .. النهاردة إحنا عايزين نتكلم شوية عن الطيارة دي .. مبدأياً وأول معلومة ممكن تبقي صادمة لناس كتير بس الأمريكان مش بيسموها الشبح .. بص هو مش ده اسمها أوي يعني .. هي اسمها B-2 Spirit يعني الروح وبصراحة اسم الشبح سيكسي عن اسم الروح .. تصدق تنفع .. ما علينا نفترض إن اسمها فعلاً الشبح .. النهاردة عايزين نحاول سوا نجاوب علي سؤالين: إيه كان التطور الطبيعي لفكرة الطيارة دي؟ أو بمعني أخر ليه الأمريكان عملوها من الأساس؟ .. السؤال الثاني هو بجد يعني وبحق ربنا هي الطيارة دي بتعمل إيه وقدراتها إيه من غير مبالغة؟
التطور الطبيعي للطيارة الشبح:
عشان تفهم الطيارة دي لازم تفهم الهدف اللي هي اتعملت عشانه .. الطياره دي اتعملت في زمن كان فيه حاجة اسمها الإتحاد السوفيتي واللي لو إنت متعرفش هو يطلع إيه البتاع ده فتخيل إن هو روسيا دلوقتي بس واخده فياجرا .. الهسهس اللي كان في دماغ الأمريكان هو لو جه اليوم وقامت الحرب النووية فإزاي هم حيضربوا السوفييت؟ .. كان فيه حلول كتير الحقيقة .. ممكن غواصة شايله صواريخ نووية .. ممكن صواريخ عابرة للقارات .. الحل اللي القوات الجوية كانت عايزاه هي إن يبقي عندها طيارة تعرف تطير لمسافات طويلة فشخ وبتقدر تشيل حمولة تقيلة فشخ عشان تطير فوق الإتحاد السوفيتي ترمي حمولتها واللي عبارة عن قنابل نووية وتروح تاني علي أميركا .. الطيارة اللي بتعمل الشغلانة دي اسمها قاذفة أو Bomber .. في الستينات سلاح الجو الأمريكاني كان عنده طيارة هم فرحانين بيها أوي اسمها B-52 كانت عبارة عن عربية نقل بتطير .. هي بطيئة صحيح بس بتشيل حمولة تقيلة .. شوية والأمريكان لقوا إن الطيارة دي مبقتش نافعة لسببين: السبب الأول إن السوفييت بقوا يصنعوا طيارات سريعة أوي زي سوخوي-15 اللي اتصممت عشان تطلع بسرعة تصطاد الطيارات B-52 في الجو .. السبب الثاني هي إن السوفييت بقوا شاطرين أوي في أنظمة الدفاع الجوي زي سام SAM اللي احنا استخدمناها في حرب أكتوبر واللي بتعرف توقع الطيارات زي B-52 وهي بتطيرعلي ارتفاعات عالية .. السؤال اللي الأمريكان سألوه لنفسهم طب وبعدين؟
الحل إن الأمريكان صرفوا دم قلبهم علي تطوير نوعين طيارات حلوين أوي اللي هم F-111 Aardvark و B-1 Lancer .. الأولانية طلعت بره الخدمة خلاص والثانية لسه مكمله معانا ودول طيارات ينفع تسميهم قاذفات يعني طيارات بتطير لمسافات طويلة وبتشيل حمولة كبيرة بس مش متصممين عشان يطيروا علي ارتفاعات كبيرة .. هم اتصمموا عشان يطيروا علي نفس الارتفاعات بتاعة الطيارات المقاتلة العادية .. إيه الحكمة ورا ده؟ .. عشان المعلومة اللي كانت عند الأمريكان إن أنظمة الدفاع الجوي السوفيتية زي SAM مش قويه أوي ضد الطيارات اللي بتطير علي ارتفاعات واطية .. شوية والأمريكان اتصدموا لما السوفييت بقوا يدوسوا أوي في سكة أنظمة الرادارات والدفاع الجوي اللي بتتسمي Doppler Radar وكانوا بقوا شاطرين أوي في تطوير الرادارات اللي بتتركب علي الطيارت المقاتلة .. تاني الأمريكان بصوا لبعض وسألوا نفسهم: طب وبعدين؟
في الوقت ده كانت فيه افتكاسه بدأت تنتشر وسط المهندسين الأمريكان اسمها المواد اللي بتقدر تمتص موجات الرادار والمواد اللي مش بتعكس الموجات الصوتية من عليها .. الفكرة إنك لو جبت أي طيارة وعملت السطح الخارجي بتاعها من المواد دي فإنت نظرياً تقدر تقلل من احتمالات إن الرادار يلقطها .. الفكرة دي خدتها شركة لوكهيد مارتن Lockheed Martin وهبدت الأول بما فيه الكفاية في الطيارة SR-71 Blackbird بس هم استفادوا من كل الهبد اللي هم هبدوه وكل العك اللي اتعمل في إنهم يعملوا أول طيارة تجسس ليها القدرة علي التخفي من الرادار أو زي ما بتتسمي Stealth بحق ربنا اللي هي F-117 Nighthawk .. كل ده جميل بس الطيارتين مش بيعملوا الوظيفة اللي سلاح الجو كان عايزها .. أنا عايز Bomber أو قاذفة وكمان تبقي Stealth يعني ليها القدرة علي التخفي من الرادار .. عارف إنهم شبه العيل الصغير اللي شبطان في لعبة بس ده التشبيه اللي فعلاً يفهمك دماغ القوات الجوية الأميريكية .. شوية أطفال شبطانين في لعبة .. المهم إن سنة 1981 طلباتهم دي اتحطت في مشروع اتسمي Advanced Technology Bomber أو ATB إختصاراً و اتقال للشركات اللي شغالة في بيزنس الطيارات اللي يعرف يديلنا تصميم يحققلنا الطلبات دي يوريهولنا.
لو كنت سألت أي حد وقتها جوه وزارة الدفاع تفتكر مين الشركة اللي حتاخد عقد مشروع ATB فكان حيقولك أكيد لوكهيد مارتن لإنها هي الشركة اللي داست في سكة Stealth وعملت بيها طيارتين .. متفهمش إزاي شركة تانية اسمها نورثروب Northrop طلعت فجأة قالتهم صاربرايز ماذرفاكرز .. اللي حصل إن سنة 1949 يعني قبل 32 سنة من ما القوات الجوية تقول إنها عايزه قاذفة تبقي Stealth كانت الشركة بتجرب تصميم طيارة شكلها غريب من غير ذيل وطول الجناحين بتوعها معديين 52 متر ومسميينها YB-49 .. التصميم ده في الطيران بيسموه Flying Wing يعني إنت دلوقتي عارف إن أي طيارة في الدنيا هي شاسيه ومتركب فيه جناحين وفي أخره ديل .. كلمة Flying Wing معناها إن التصميم ده اتشال منه الشاسيه واتشال منه الديل وبقي مجرد جناحين طايرين في الهوا .. الألمان في الحرب العالمية الثانية كانوا جربوا يشتغلوا علي طيارة بالتصميم ده وعملوا واحدة اسمها هورتين هو Horten Ho 229 .. (جاك نورثروب Jack Northrop) مؤسس شركة نورثروب وواحد من أكتر مهندسين الطيران اللي دماغهم متكلفة في التاريخ هو اللي اشتغل علي تصميم YB-49 بنفسه .. سنة 1981 شركة نورثروب قدمت التصميم بتاع الطيارة دي وسبحان الله اتوافق عليه والشركة خدت العقد من بين إيدين لوكهيد مارتن.
تعامل وزارة الدفاع مع مشروع ATB كان غريب شوية .. هو اتقال قدام الناس إن القوات الجوية شغاله علي تصميم طيارة جديدة .. بتعمل إيه الطيارة دي؟ محدش عارف .. طب مين اللي حيصممها؟ محدش عارف .. طب قدراتها إيه؟ محدش عارف .. لو مثلاً التصميم بتاع شركة نورثروب فيه إنهم عايزين يركبوا كومبريسور Compressor ومحتاجين يشتروه ويركبوه ومثلاً كانت الشركة اللي بتصنع الكومبريسور ده هي جنرال إليكتريك General Electric مثلاً فوزارة الدفاع كانت بتخلي المحاسبين بتوع الوزارة يعملوا شركة وهمية عشان تطلب هي الكومبريسور من General Electric بدل ما شركه نورثروب اللي بتصنع الطيارة هي اللي تطلبه .. أي حد كان بيراجع الحسابات بتاعة وزارة الدفاع ومعندوش أي خلفية بتفاصيل مشروع ATB كان حيلاقي إن فيه حفرة محدش عارف بتعمل إيه وزارة الدفاع عماله ترمي فيها فلوس .. سنة 1988 ميزانية المشروع كانت عدت 42 مليار دولار و بمجرد ما الموضوع اتعرف كانت فضيحة .. أنهي طيارة دي اللي متكلفة المبلغ ده؟ .. عشان محدش كان مسموح له إنه يعرف أي حاجة فطبيعي إن الناس تستغرب .. بسبب الضغط الشعبي إن الناس عايزه تعرف هي الفلوس دي كلها بتروح فين اضطرت وزارة الدفاع إنها توري للأمريكان الPrototype أو النسخة التجريبية للطيارة في نفس السنة اللي هي 1988 .. السنة اللي وراها الطيارة طارت أول طلعة جوية تجريبية ليها .. لسه وزارة الدفاع هتقول هيييييه سنة 1993 لما كانت بتدي أمر إن خط الإنتاج بتاع الطيارة يبدأ يشتغل بعد ما كل المشاكل وكل الكومنتات بتاعة التصميم اتحلت هوبا الإتحاد السوفيتي إنهار.
حسبة الفلوس غيرت كل حاجة .. الطيارة دي اتصرف عليها كتير فشخ وكان المبرر ورا كل الصرف ده كان هو أنتوا مش عايزينا نحميكوا من السوفييت ولا إيه؟ .. طب دلوقتي الإتحاد السوفيتي راح في داهية إزاي حنبرر صرف الفلوس دي كلها ؟ .. بلاش دي .. هو إنت فاكر إن القوات الجوية هي اللي بس كانت بتبعزق فلوس تحت شعار الخطر السوفيتي؟ .. طب ما إنت عندك القوات البحرية كانت برده بتصرف علي تطوير موديل غواصات جديد اسمه Sea Wolf .. وزارة الدفاع قالت إننا عشان نبرر الفلوس دي كلها عايزك تحط أي أوبشن إنت محتاجه ولو حتي مش محتاجه .. المهم تكربسلي الطيارة دي أوبشنات .. يعني إيه مش فاهم برده يا فندم؟ .. إنت دلوقتي خليت الطيارة بتشيل قنابل نووية والتصميم بتاعها من بره بيخليها Stealth بس ده ميمنعش إننا نركب عليها أحدث أنظمة التشويش علي الرادار .. لو حد سأل هي الأوبشنات دي كلها ضرورية ومحتاجينها يعني؟ حيكون الرد إن والله كان المفروض قبل ما الأوبشنات دي تتضاف إن الطيارة B-2 Spirit حتطير ومعاها شوية طيارات EA-6B Prowler ودي طيارات متركب عليها أنظمة حرب أليكترونية وتشويش علي الرادار فقلنا إن بدل ما يبقي فرح العمدة ده بيطير مع بعضه فالطيارة B-2 Spirit تبقي بتطير لوحدها.
برده الفلوس اللي حتدفع كانت كتير أوي .. في الأول قالوا طب خلاص إحنا بدل ما كنا طالبين 132 طيارة نخليهم 75 بس .. سنة 1993 ولسه خط الإنتاج بتاع الطيارة B-2 Spirit بيشد حيله طلع قرار من إدارة الرئيس الأميريكي (جورج بوش الأب) إن عدد الطيارات المطلوب يقل من 75 لعشرين طيارة بس .. إدارة الرئيس (بيل كلينتون) اللي جه الحكم بعد (جورج بوش الأب) جابوا الطيارة الأولانية خالص الPrototype عدلوا فيها شوية عشان في الأخر سلاح الجو يبقي تحت إيده 21 طيارة .. حتعرف كمان شويه إن واحدة منهم انفجرت سنة 2008 فده خلي إن إجمالي عدد الطيارات الشبح اللي في الخدمة دلوقتي عشرين طيارة بس .. قرار إدارة الرئيس (جورج بوش الأب) إنهم يخسفوا بعدد طيارات B-2 Spirit اللي حتتصنع الأرض بالشكل ده فرقع في وش الأمريكان لإن القرار ده رفع سعر الطيارة الواحدة من 500 مليون دولار بقي 737 مليون دولار .. زود عليهم أعمال التطوير والصيانة وقطع الغيار تلاقي الطيارة ثمنها نط بقي 900 مليون دولار.
المهم إن سنة 1997 الطيارة دي خدت ختم إنها ينفع تخش الخدمة والختم ده الأمريكان بيسموه Initial Operating Capability أو IOC وده عامل زي ختم النسر اللي بتمضي بيه الورق من مدام (عفاف) في الدور الرابع واللي بيقول إن الطيارة دي زي الفل وينفع تخش الحرب بكره الصبح .. الطيارة فضلت مركونة سنتين لحد ما في يوم 24 مارس 1999 الطيارة الشبح بتعمل أول مهمة رسمية ليها لما شاركت في الحملة الجوية ضد يوغوسلافيا وهنا إنت محتاج تفهم نقطة .. كل الطيارات B-2 Spirit اللي في الخدمة محطوطين مع بعض في جناح القاذفات الجوي 509 وده نفس السرب اللي رمي القنبلتين النوويتين علي هيروشيما وناجازاكي علي فكرة والسرب ده مقره قاعدة وايتمان الجوية في ولاية ميزوري .. ده معناه إن الطيارة الشبح كانت بتطلع من القاعدة الجوية بتاعتها في ولاية ميزوري وتروح تعدي المحيط الأطلنطي في رحلة مدتها 30 ساعة رايح جاي عشان تضرب يوغوسلافيا وترجع تاني .. في الحرب دي سرب طيارات الشبح نفذ 50 غارة جوية اترمي فيها 30% من إجمالي القنابل والصواريخ اللي اتضربت علي يوغوسلافيا طول الحرب.
إذا كنت فاكر إن 30 ساعة طيران عشان تروح تضرب هدف وترجع كتير فعايز أقولك إن سنة 2001 في غزو أفغانستان أطقم الطيارات دي كانوا بيتفشخوا 70 ساعة طيران عشان يطيروا من ميزوري لحد أفغانستان ويرجعوا وده كسر الرقم القياسي لأطول عدد ساعات طيران في غارة جوية في التاريخ .. الطيارات دي اُستخدمت في حرب العراق وكمان كانت هي اللي بتتولي ضرب الأهداف الليبية وقت الثورة اللي قامت ضد (معمر القذافي) الله يرحمه .. يمكن عشان كده قمرة القيادة بتاعة الطيارة فيه وراها أوضة محطوط فيها سرير ومطبخ وحمام.
امكانيات الطيارة بين الحقيقة والهبد:
حاول متنساش إن أهم إمكانية تحت إيد الطيارة دي هي قدرتها علي الإختفاء من الرادار وخليني أفهمك النقطة دي براحة .. كلمة رادار Radar دي إختصار Radio Detection and Ranging وعشان تفهم يعني إيه رادار تخيل معايا الأتي .. تخيل معايا إن أنا وإنت قاعدين مع بعض في أوضة بس أنا لابس طاقيه الإخفاء .. متضحكش وحتفهم قصدي كمان شوية .. إنت مطلوب منك تعرف أنا فين بس إنت مش شايفني .. تفكيرك حيهديك إن ليه لا أجيب جردل مياه وأقوم راميه في الأوضة في الهواء .. لما المياه تخبط فيا فهي حترتد عني وحيبقي باين أوي قدامك إن المياه خبطت في حد وارتدت .. هي دي فكرة الرادار .. الرادار ما هو إلا Energy Pulse بتترمي في الهواء وحضرتك قاعد قدام شاشة الكومبيوتر عشان تشوف هل هي خبطت في جسم طاير في الجو أو لا .. مجرد إن الEnergy Pulse دي تخبط في طيارة وترجع تاني فحضرتك كضابط دفاع جوي مطلوب منك تعرف شدة الموجة اللي ارتدت وزاوية ارتدادها وبالمعلومتين دول تقدر تحدد حجم وموقع الهدف بتاعك .. لكن .. الطيارة B-2 Spirit مفيهاش شاسيه .. الطيارة مفيهاش ديل .. الشكل الخارجي للطيارة اتصمم بحيث إنه ميعكسش موجات الرادار بحيث لو إنت ضابط دفاع جوي بتتفرج علي شاشة الرادار بتاعك إنت حتشوفها كأنها طير طاير في الجو .. زود علي كده الطلاء اللي بيمتص أشعة الرادار اللي جسم الطيارة الخارجي مدهون بيه .. زود عليهم فكرة إن محركي الطيارة محطوطين جوه جسمها وده معناه إن الطيارة دي ملهاش بصمة حرارية Hear Signature .. يا مؤمن دول حتي فتحات العادم بتوعها معمولين من نفس المادة اللي اتعمل منها السطح الخارجي لمكوك الفضاء .. الخلاصة دي إن دي طيارة الأمريكان صارفين عليها ومكلفين.
بس خلي بالك امكانيات الطيارة الشبح مينفعش تتقال لوحدها كده .. إنت كده بتبقي عامل زي اللي ماسك في الأية اللي بتقول ولا تقربوا الصلاة بس إنت لازم تكملها للأخر عشان تعرف إن ربنا بيقول ولا تقربوا الصلاة وأنتم سكاري .. صحيح الطيارة امكانياتها فشيخة بس كمان مصاريفها فشيخة وأنا هنا مش بتكلم عن ثمن الطيارة .. أنا بتكلم عن تكاليف الصيانة .. كل طيارة لازم تتحط في هانجر مخصوص مكيف بالكامل عشان يحافظوا علي الطلاء الخارجي تكلفته بتعدي 5 مليون دولار .. كل سبع سنين الطيارة الواحدة بيتعملها عمرة كاملة بتكلفة 60 مليون دولار والعمرة دي بتبقي للسطح الخارجي بتاعها بس عشان ينضفوا الطبقة الخارجية اللي بتمتص أشعة الرادار ويكشفوا عن هل حصل فيها أي شروخ .. صيانة الطيارة نفسها إنت لو فكرت شوية في تكاليفها حتحس بكرشة نفس .. كل ساعة طيران بيتدفع قصادها 163,000 دولار صيانة ده غير مرتبات 60 فني ومهندس للطيارة الواحدة .. ده معناه إنك سنوياً بتدفع 40 مليون دولار صيانة بس للطيارة الواحدة .. طب خد التقيلة بقي .. بحسبة الصيانات وقطع الغيار فالطيارة الواحدة واقفه علي الأمريكان بحوالي 2 مليار دولار.
الطيارة الشبح زي ما إنت شايف هي طيارة غريبة في شكلها وحكايتها .. حتي اسمها .. إنت تعرف إن ال21 طيارة اللي في الخدمة متسميين علي اسم ولايات أميركا .. هم فعلياً 20 طيارة دلوقتي لإن فيه طيارة انفجرت سنة 2008 في حادثة في قاعدة جوام الجوية بس الطيار قدر إنه يطلع من الطيارة بالمقعد القاذف .. يعني أول طيارة تخش الخدمة اتسمت روح ميزوري Spirit of Missouri .. يمكن الاستثناء الوحيد إن فيه طيارة منهم اسمها روح كيتي هوك Spirit of Kitty Hawk ودي مدينة في ولاية نورث كارولاينا .. الأمريكان بيخططوا إن علي سنة 2036 الطيارات دي حتطلع بره الخدمة عشان يحل محلها الجيل الجديد B-21 Raider .. بس يمكن السؤال المهم بالنسبة لي بغض النظر عن الأسئلة زي يا تري إيه فرق الإمكانيات بين الطيارتين هو هل يا تري الأمريكان حيستحملوا يخشوا نفس الخناقة بتاعه التكاليف اللي هم عاشوها في الطيارة B-2 Spirit؟ .. فكك من الكلام اللي حتسمعه بإن الطيارة الجديد B-21 Raider دي أرخص أو إنها معموله بتكنولوجيا Cost-Effective .. كل الكلام ده بلح .. ساعة الجد الميزانيات بتضرب في السما وفيه ناس بيجيلها إمساك لما بتسمع الفلوس اللي اتصرفت وبتقول لنفسها أحيه هو أنا حدفع كل كده؟
المصادر:
- مقالة بعنوان Meet the B-2 Spirit stealth bomber: The most expensive aircraft ever built نشرت في مجلة The National Interest وده لينك المقالة الأصلية:
https://nationalinterest.org/blog/reboot/meet-b-2-spirit-stealth-bomber-most-expensive-aircraft-ever-built-163408 - مقالة بعنوان B-2 Spirit: The $2 billion flying wing نشرت في موقع قناة CNN وده لينك المقالة الأصلية:
https://edition.cnn.com/style/article/b-2-spirit-stealth-bomber/index.html
