لينك التسجيل الصوتي علي ساوند كلاود:
https://on.soundcloud.com/K6d1sC7wWCxH7KQ5y2
النهاردة حنتكلم عن تجربة لبلد شبه مصر في شوية حاجات وهي إن الظروف حطتها في موقع جغرافي منيل بستين نيلة إنها لقت نفسها لازم تلاقي طريقة تدافع عن نفسها قدام تحديات أكبر من قدرة دول تانية علي استيعابها .. انت هنا في مصر عندك جار تحت متمثل في السودان ايادي خارجية هارياه لعب وده عاملك صداع لأمنك القومي .. عندك أثيوبيا اللي كل شوية تقفل محبس المياه العمومي بتاعك .. عندك الصهاينة اللي نفسهم يجي اليوم اللي يلاقوا نفسهم واخدين أرضك وبياكلوا أكلك .. عندك الحوثيين اللي اه صحيح الواحد مبسوط من الكلاحة اللي هم بيعملوها علي الصهاينة بس في نفس الوقت الواحد مش مبسوط إن ده مسمع معانا في عائدات قناة السويس .. مشاكل في كل حتة بتخلي الكيان اللي المفروض دوره إنه يحمي البلد اللي هو القوات المسلحة مش عارفين يلاقوها منين ولا منين وقصاد المشاكل دي كلها بتتحط علي الطرابيزة حلول كتير .. حلول من ضمنها انك تجيب سلاح من بره .. من ضمنها إنك تبدأ تستخدم سلاح الحروب بالوكالة أو ما يسمي Proxy Warfare اللي هو تنقيلك طرف في دولة من الدول اللي حوليك اللي قارفاك في عيشتك تديله فلوس وسلاح عشان يبقي الرجل بتاعك اللي هي نفس الاستراتيجية اللي بتلعب بيها الإمارات مثلاً .. بس يمكن النهاردة انا جاي أعرض عليك حل مختلف .. حل شغاله عليه بلد تقريباً عندها نفس مشكلتك .. فنلندا.
لما بنقول فنلندا فاحنا بنتكلم عن إيه؟
فنلندا بلد فوق خالص في شمال أوروبا وهي واحدة من الدول الإسكندنافية اللي هي الدول الجامدة زحليقة في كرة اليد ودايماً بيكسبونا في أخر ثانية دول اللي هم النرويج والسويد والدانمرك وأيسلندا ومعاهم فنلندا .. بلد عدد سكانها 5 مليون بني أدم .. بلد من القليلين في أوروبا اللي لسه عندها نظام التجنيد الإجباري زينا وعشان كده التجربة الفنلندية في رأيي الشخصي من المواضيع اللي تستحق إننها نبصلها ونتعلم منها وعشان فنلندا عندها التجنيد الإجباري فصحيح عدد أفرادها القوات المسلحة النظاميين حوالي 24,000 مقاتل اللي هم الناس اللي بياخدوا مرتب ثابت من وزارة الدفاع بس ساعة الجد ممكن فنلندا تستدعي قوات الاحتياط وساعتها حيبقي تحت ايدها 240,000 مقاتل .. لو بكره الصبح الحرب قامت فانت بتتكلم عن بلد تقدر تحشد 5% من اجمالي تعداد السكان بتاعها للجبهة والحقيقة إن دي معلومة مهمة بشكل انت لا تتخيله والسبب في حتة النسبة والتناسب .. انا وانت متفقين إن أمريكا عندها أفضل وأقوي قوات مسلحة علي مستوي العالم بس في نفس الوقت أمريكا معندهاش التجنيد الإجباري وبتعتمد علي المتطوعين عشان يخدموا في القوات المسلحة بتاعتها .. طب تعالي نفترض جدلاً إن بكره الصبح أمريكا طبقت التجنيد الإجباري .. ولنفترض جدلاً يعني إن أمريكا قدرت زي فنلندا إنها تستدعي 5% من عدد سكانها في شكل تعئبة عامة للقوات المسلحة فانت بتتكلم عن قوات مسلحة قوامها 55 مليون بني أدم .. تاني .. كنسبة وتناسب فانت بتتكلم إن فنلندا عندها واحدة من أكبر القوات المسلحة علي مستوي العالم.
نظام التجنيد الإجباري في فنلندا بقي مختلف شوية عن اللي موجود في مصر .. انت كشاب لما بتخلص جامعة وبتقدم ورقك للجيش فانت يا بتخش الجيش يا سنة كعسكري أو 3 سنين كضابط .. في فنلندا انت يا بتخش 165 يوم أو 255 يوم أو 347 يوم بناء علي اختيارك الشخصي .. سنوياً فيه 27 الف مواطن فنلندي بيخش الخدمة العسكرية ولو حضرتك رفضت تخلص خدمتك العسكرية فانت بتتسجن .. من ضمن كل الدول اللي لسه عندها نظام التجنيد الإجباري فتلاقي إن فنلندا نسبة انهاء الخدمة العسكرية فيها بتوصل 80% ودي النسبة الأعلي علي مستوي العالم .. المختلف في فنلندا إن التجنيد الإجباري مش مطلوب للبنات بس فيه بنات كتير بتتطوع .. سنوياً برده 1400 بنت فنلندية بتتطوع عشان تؤدي الخدمة العسكرية .. فترة التجنيد الإجباري في فنلندا برده مختلفة شوية عن مصر .. هناك مفيش حاجة اسمها إن جيشك إنك تبيع فراخ ولحمة أو إنك تقف علي كارته أو إنك تبقي حرس شرف في قاعة حفلات .. بسم الله الرحمن الرحيم إنت أول ما تخش التجنيد الإجباري في فنلندا بتقعدلك 6 أسابيع في معسكر تدريب .. بعد كده علي حسب مدة الخدمة اللي انت حتقعدها بتاخد كورس مكثف في وظيفة معينة في المهام القتالية زي مثلاً القناصة أو النسف والتدمير أو الاستطلاع .. فنلندا بلد فيها فوق 200,000 بحيرة وانت قريت الرقم صح وكتير منهم درجة الحرارة فيهم ممكن توصل -40 درجة مئوية وانت كعسكري في القوات المسلحة الفنلندية لازم تتعلم تعمل ايه لو لا قدر الله وقعت في بحيرة ثلجية من دول .. لازم تتعلم هو انت لو اتسبت في غابة ثلجية لوحدك ازاي تولع نار .. ازاي تصطاد حاجة تاكلها .. حرفياً انت بتتعلم ازاي تعيش لو حصلك فيلم Cast Away بحق وحقيقي بس بدل ما (توم هانكس) طيارته وقعت في جزيرة في المحيط فانت طيارتك وقعت في القطب الشمالي.
القدرات القتالية الفنلندية .. بتعرف تعد لحد كام:
الحجم الصغير لبلد زي فنلندا من حيث عدد السكان والمساحة وحتي الإنفاق العسكري مش بيدي انطباع إن دي بلد عندها قدرات قتالية فعلاً تستحق الإحترام وفيه دول تانية بتحسدها عليها .. يعني مثلاً .. انت ممكن تستغرب إن فنلندا عندها أقوي سلاح مدفعية في أوروبا كلها .. حط سلاح المدفعية بتاع القوات المسلحة الالمانية والفرنساوية مع بعض وبرده المدفعية الفنلندية تكسب .. دي بلد تحت ايدها 700 مدفع هاوتزر و زيهم مدافع هاون تقيلة و فوق 100 قاذفة صواريخ .. سلاح الطيران بتاعها عندها طيارات F-35 Lightening II .. عندها واحدة من أقوي القوات الخاصة في العالم المتخصصة في القتال في البيئة الثلجية اسمهم كتيبة ييجر Jaeger Brigade .. فكرة الحروب في البيئة الثلجية الناس بتاعة العسكرية بيحبوا يسموها Arctic Warfare واتسمت كده عشان هي بتحصل في المناطق القريبة من القطب الشمالي اللي بتتسمي Arctic وكل سنة بتتعمل مناورة عسكرية اسمها فرن المنطقة القطبية الشمالية Arctic Forge زي مناورات النجم الساطع كده اللي بتعملها أمريكا معانا و مناورة Arctic Forge بتشارك فيها قوات من أمريكا و كندا والنرويج و السويد وفنلندا .. وفوق ده كله في إبريل 2023 فنلندا انضمت مع السويد رسمياً لحلف شمال الأطلسي NATO.
الإنفاق العسكري الفنلندي .. السلاح ده مش ورث ده جاي بخلع الضرس:
المذهل بالنسبة ليا واللي انا واقف قدامه الحقيقة هو إزاي الفنلنديين عملوا من الفسيخ شربات في حتة الإنفاق العسكري .. انت دلوقتي بتصرف 2% بس من GDP بتاعك علي قواتك المسلحة وفي حالة إنك مش عارف إيه هو GDP فده يبقي اختصار Gross Domestic Product أو الناتج الوطني الإجمالي وده بمنتهي البساطة لما البلد تقعد أول كل شهر تحسب هو داخلها فلوس قد ايه .. انت بتجيب فلوس الضرايب وفلوس التصدير وفلوس الريع اللي بيجيلك من تأجير أي حاجة عندك ولو انت كنت مسلف حد فلوس وردهالك .. بتحسب كل الفلوس دي كلها اللي هو زي ما تقول كده ميزانية البيت كله قبل ما تشيل منه مصاريفك وده بيسموه GDP .. إنك تصرف 2% من GDP علي انفاقك العسكري صحيح بيتماشي مع متطلبات NATO بس في نفس الوقت خلينا نتفق إن دي نسبة صغيرة.
اللي بيقرالي عارف قد إيه أنا ببقي معجب جداً بتجارب التصنيع المحلي خصوصاً في القطاع العسكري وفنلندا كان صعب إنها تحقق القدرات الدفاعية دي من غير ما يكون عندها قطاع تصنيع عسكري واقف علي رجله .. أهم شركة فنلندي شغالة في التصنيع العسكري هي باتريا Patria ودي شركة أساساً شغالة في تصنيع المدرعات و مدافع الهاون .. سنة 2025 الشركة أعلنت انها حتستثمر 40 مليون يورو في تطوير خطوط إنتاج تصنيع المدرعات بتاعتها والسبب ورا إن الشركة قررت تبعزقلها المبلغ ده هو إن في السنة اللي قبلها اللي هي 2024 انت بتتكلم عن شركة مضت عقود بقيمة 28 مليار يورو .. شركة فنلندي تانية برده هي أيسي Iceye ودي شركة صدق أو لا تصدق بتصنع أقمار صناعية للتجسس وهي بتشتغل مع شركة تانية اسمها ري أوربيت Re-orbit ودي بتعمل برنامج التحكم Software اللي بيشغل الأقمار الصناعية اللي بتصنعها شركة Iceye .. هو صحيح ده مش غريب علي البلد اللي طلعت لينا شركة نوكيا Nokia بس برده الواحد منبهر بإن بلد صغيرة قررت تشمر هدومها وتنزل تشتغل.
السبب .. هو معلش يعني كل ده ليه؟
حرجعك تاني لخريطة فنلندا .. ملاحظ حاجة غريبة .. واخد بالك من من الحدود بين فنلندا وروسيا .. انت متخيل إن يبقي عندك شريط حدودي طوله 1300 كيلومتر مفيهوش لا جبل ولا نهر ولا ترعة حتي تقدر تعتبر حاجز جغرافي .. ده احنا عندنا شريط حدودي من رفح لحد إيلات طوله 206 كيلومتر مطلع ميتين اللي جابونا فتخيل إن فنلندا عندها 6 أضعاف المسافة دي عشان تغطيها .. فكرة إن يبقي حدود بالطول المبالغ فيه ده بين بلدين مش القضية لإن مثلاً الشريط الحدودي بين أمريكا وكندا تقريبا 9000 كيلومتر .. المشكلة إن تاريخ العلاقات الروسية الفنلندية فعلاً توكسيك لإن لسنين وفنلندا كانت جزء من الإمبراطورية الروسية لحد ما قامت حرب الاستقلال وفعلاً فنلندا بقت دولة مستقلة سنة 1917 .. سنة 1939 الإتحاد السوفيتي حاول ياخد فنلندا غصب زي ما حصل وخدوا نص بولندا غصب برده بالاتفاق مع ألمانيا النازية في حرب اتسمت حرب الشتاء Winter War استمرت سنة كاملة بس فنلندا قدرت تصد الهجوم السوفيتي .. صحيح إن الحرب بينهم انتهت سنة 1945 مع إنتهاء الحرب العالمية الثانية بس دايماً فضل السؤال اللي عايش في دماغ الفنلنديين .. طب افرض الروس عمولها تاني .. ده زي ما كده مراتك تقفشك بتخونها مع زميلتك وانت تحلفلها إنت علاقتك بيها اتقطعت .. هي ممكن تصدقك وجوازكوا يكمل بس هي دايماً حتفضل في حالة شك مستمر .. حالة شك لو اتسابت ممكن تجنن أي ست.
مع انهيار الاتحاد السوفيتي بدأ الشك ده يقل شوية بشوية .. فكرة إن العلاقات الإقتصادية بين روسيا وبين أوروبا كانت شغالة الله ينور خلت ناس كتير تقول لنفسها إن القرشين اللي بيخشوا روسيا من تصديرها للغاز الطبيعي بتاعها لأوروبا حيخلوها تفكر ألف مرة قبل ما تقرر تلعب بديلها وتمد ايدها علي أي بلد أوروبية .. ده السبب ورا إن بدأ تريند كده في دول أوروبا من أول الألفينات وانت طالع إن يا جدعان مفيش داعي نصرف كتير علي قواتنا المسلحة .. دول كتير لغت فكرة التجنيد الإجباري .. دول تانية راحت في سكة إنها تبيع سلاحها القديم لإنها شايفه إنه مبقاش له لازمة .. فنلندا معملتش كده .. فضلت محتفظة بالتجنيد الإجباري .. السلاح اللي دول أوروبا كانت بتيبعه خرده هي كانت بتشتريه يعني مثلاً هم اشتروا من ألمانيا 100 دبابة T-72 روسية اللي هي اساسا كانت دبابات قديمة ورثتها المانيا من الوحدة بين ألمانيا الشرقية والغربية .. لسنين وأوروبا كلها بتتريق علي فنلندا عشان شايفينها مهووسة بخطر خلاص معادش موجود .. كانوا شايفين فنلندا زي الرجل اللي في فيلم Independence Day اللي فضل يحذر الناس إن غزو الكائنات الفضائية جاي جاي والناس بتضحك عليه فاكراه مجنون لحد ما حصل اليوم اللي الغزو الروسي لأوكرانيا بقي واقع قدام الناس كلها.
دلوقتي انت قدام وضع غريب جداً هو إن دول NATO قررت مثلاً إنها تزود انفاقها العسكري بحيث يبقي 5% من GDP بتاعها والسبب ورا غرابة الموقف هو المبرر بتاعه .. انت من كام شهر لو انا قلتلك إن دول NATO قررت تعمل الخطوة دي فأول حاجة حتيجي في دماغك إن أكيد ده سببه التهديد الروسي للدول الأوروبية والخوف إن مسلسل أوكرانيا يتكرر تاني .. جري الشريط لدلوقتي وحتلاقي إن الدول الأوروبية الأعضاء في NATO مش بس بقوا خايفين من روسيا إنما كمان خايفين من كيس الشيتوس الحجم العائلي .. اصراره الطفولي إنه ياخد جرينلاند وضع يد من الدانمرك اللي هي بلد اسكندنافية زيها زي فنلندا ويعتبروا ولاد عم مخلي دول أوروبا تبص لنفسها وتقول إحنا بقينا لوحدينا .. الدانمرك اللي مات من شبابها في حرب أفغانستان تاني أكبر عدد بعد أمريكا ولا أكنها قدمت أي تضحيات عشان خاطر حماية الأمن القومي الأمريكي وتحس إنهم عمالين يغنوا واتنسيت أكني ما جيت وده حقيقي .. أبوحنان ولا فارق معاه الكلام ده.
خليني اختم معاك بحتة إن أهمية فكرة الخدمة العسكرية الإجبارية لإن ممكن انت كشاب لسه متخرج من الجامعة شايف إن بشكل ما أو باخر دخولك الجيش ده بيعطلك عن الكاريير بتاعك وإنها بتبقي فترة قاسية جداً نفسياً عليك وانا متفهم ده .. أنا شخصياً خدت اعفاء من الخدمة العسكرية فانا مش حدعي إني أقدر اتفهم بشكل كامل مشاعرك تجاه الموضوع بس في نفس الوقت خلينا نتفق إن فيه سوء استخدام ممنهج لحتة الخدمة العسكرية .. الفكرة نفسها أنا معاها وبؤيدها بس تطبيقها في مصر فيه مشاكل يتحكي فيها كتب وعشان كده أنا متوقف جداً قدام التطبيق الفنلندي لفكرة الخدمة العسكرية الإجبارية وإن ازاي التطبيق ده بيخلي 83% من الشارع الفنلندي رجاله وستات عندهم استعداد يشيلوا سلاح عشان يدافعوا عن بلدهم قصاد بلد تانية زي بريطانيا اقتصادها اكبر بكتير من فنلندا وعدد سكانها أكبر بكتير من فنلندا وانفاقها العسكري اكبر بكتير من فنلندا ورغم كده استطلاعات الرأي بتقول إن 33% من الشارع البريطاني جاهز إنه يرفع سلاح يدافع عن بلده واظن دي الإحصائية اللي لو كان (وينستون تشرشل) عايش وسمعها كان زمانه طب ساكت.
قدرة الدول إنها تدافع عن نفسها مش بس مرتبطة بهي يا تري شايله سلاح شكله عامل ازاي أو بتصرف قد ايه علي تسليحها انما كمان مرتبطة بإرادة الشعب إنه يموت عشان بلده تعيش .. أهل قطاع غزة دليل صارخ علي ده إن ازاي شعب شبه اعزل مش شايل غير شوية مدافع رشاشة وعبوات ناسفة وقادر ينكد علي الصهاينة عيشتهم .. بس يمكن تعاطفي الوحيد مع الفنلنديين إنهم تخيلوا إن روسيا هي أكبر تهديد ليهم وعشان كده راحوا اترموا في حضن NATO عشان يحميها منهم وإذ يكتشفوا إن نهاية NATO مش حتكون علي إيد الروس .. لا .. حتبقي علي إيد أبوحنان.
المصادر:
- فيديو بعنوان Why Finland Has Most BADASS Military in Europe تقدر تشوفه علي YouTube في اللينك ده:
Why Finland Has Most BADASS Military in Europe - مقالة بعنوان The Rise of Finnish Defense Firms: A Powerhouse in the Making نشرت علي موقع MSMTimes وده لينك المقالة الأصلية:
The Rise of Finnish Defense Firms: A Powerhouse in the Making | MSMTIMES.COM
