شراء السلاح عشان تفهمه هو زيه زي شراء العربيات المستعملة بالضبط .. إنت بتبقي عايز عربية بسعر معين بناء علي الميزانية اللي إنت حاططها و بتدعي ربنا إنه يحط في طريقك عربية حالتها كويسة بالسعر اللي إنت تقدر عليه بس الأهم إن ميبقاش فيها خوازيق تقرفك في عيشتك بعد كده .. صدقني لو قلتلك إن شراء السلاح فيه نفس المشكلة بتاعة شراء العربيات المستعملة و هو إنك مش بتشوف الخوازيق دي إلا بعد فوات الأوان .. بس يمكن أهم عامل مشترك بين الإتنين هو إنهم مبنيين علي فكرة النصيب .. إنت عايز تشتري و البايع عايز يبيع و نصيبكوا إنكوا لقيتوا بعض في الوقت المناسب .. النصيب هو يمكن أهم شخصية في القصة اللي حنحكيها النهاردة و هي قصة إزاي مصر بقت الدولة الوحيدة في القارة الأفريقية و في الشرق الأوسط اللي عندها قوات بحرية تحت إيدها حاملة طائرات .. و مش بس واحدة دول إتنين .. هي صحيح حاملة طائرات هليكوبتر بس إحنا حنتمحك في الناس اللي عندها حاملات طائرات مقاتلة و نقول علي نفسنا إننا زيينا زيهم .. النصيب هو البطل بتاع الشخصية دي لإن لا إحنا بصفتنا المشتري ولا البايع اللي هم الفرنساويين كان في دماغنا أصلاً إن البيعة تتم بس هي الظروف و النصيب اللي جمعتنا سوا و عشان كده النهاردة حنحاول سوا نجاوب علي سؤالين:
- إيه اللي خلانا أصلاً نروح نكلم الفرنساويين عشان يدونا الحاملتين دول؟
- نيجي بقي للأهم هو يا تري حاملة الطائرات الميسترال دي بتعمل إيه في عيشتها؟
إزاي الصفقة تمت؟
بسم الله الرحمن الرحيم الحاملتين دول أساساً يعني كانوا رايحين لروسيا مش لينا .. سنة 2011 الرئيس الفرنساوي وقتها (نيكولا ساركوزي Nicolas Sarkozy) اللي لسبب ما الناس مش فاكراله غير إنه كان ماشي مع ممثلة في نص عمره طلق عشانها مراته كان بيحتفل بأكبر ضربة معلم تحققها فرنسا من سنين لما مضي مع الرئيس الروسي (فلاديمير بوتين Vladimir Putin) إتفاق بيع حاملتي طائرات ميسترال بقيمة 1.3 مليار دولار .. دي كانت أكبر صفقة سلاح تعملها دولة منتمية لحلف شمال الأطلسي NATO اللي هي فرنسا مع روسيا .. صفقة كان المفروض إنها تبعت رسالة للعالم إن خلاص الحرب الباردة خلصت .. روسيا بقت صاحبتنا و مننا علينا وبقي فيه بينا عيش و ملح .. جري الشريط 3 سنين و كانت الصفقة إتلغت بعد ما طلع قرار من الإتحاد الأوروبي بفرض حظر تصدير سلاح لروسيا بسبب إنها سنة 2014 خدت شبه جزيرة القرم من أوكرانيا وضع يد .. الكلام وقتها علي إن مش بس روسيا بتمول الإنفصاليين الأوكرانين في شرق أوكرانيا عشان قدام الناس يعلنوا نفسهم بلد مستقلة عن أوكرانيا بس من تحت لتحت يبقوا شخشيخة في إيد الروس إنما يمكن اللي خلي الغرب يقلب علي الروس قلبة وحشة أوي هو إسقاط الطيارة المدنية رحلة رقم 17 التابعة للخطوط الجوية الماليزية بصاروخ أرض جو من منظومة الدفاع الجوي BUK اللي روسيا عطتها للإنفصاليين الأوكرانيين .. علي فكرة .. وقتها الإتحاد الأوروبي قال لفرنسا إن صفقة بيع حاملتي الميسترال إتمضت قبل قرار حظر بيع السلاح لروسيا و عشان القرار مش طالع بأثر رجعي و عشان حرام منقطعش عيش الناس اللي إشتغلت في بناء الحاملتين فأنتوا ممكن تكملوا الصفقة عادي و تبعتوا الحاملتين لروسيا .. متفهمش ليه الرئيس الفرنساوي وقتها (فرانسوا أولاند Francois Holland) اللي محدش فاكرله غير إنه طلق مراته عشان يمشي مع واحدة قد بنته عمل فيها ستين رجل في بعض و قالك لا إحنا حنلغي الصفقة خالص و تغور فلوس الروس مش عايزينها.
فرنسا إضطرت ترجع المقدم اللي روسيا دفعته ليها وعشان العقد فيه شرط جزائي في حالة إن فرنسا رجعت في كلامها و إعتذرت عن الصفقة فالفرنساويين إضطروا يدفعوا للروس 2.67 مليار دولار بس كتعويض و فيه ناس بتقول إن المبلغ كان مجرد 440 مليون دولار لمجرد إن (فرانسوا أولاند) حب يرسم نفسه دكر قدام الناس و اللي دفع الفاتورة هو المواطن الفرنساوي البسيط و شركات السلاح الفرنساوي اللي ضيعت سنين و ملايين عشان تبني الحاملتين .. الشركة اللي أسمها كان علي اللوح كانت شركة DCNS اللي دلوقتي إتغير بقي Naval Group بس الصفقة من الباطن إتوزعت لشركتين .. الأولانية اسمها STX و دي اللي بنت السفينتين و شركة تانية اسمها CNIM ودي اللي بنت السطح بتاع السفينة اللي حتطلع من عليه الطيارات الهليكوبتر .. الفكرة كمان إن السفينتين أتبنوا بناء علي مواصفات أو Specifications كانت عايزاها البحرية الروسية .. يعني مثلاً .. الطيارة الأساسية اللي حتشتغل من علي حاملة الطائرات دي لو كانت راحت لروسيا كانت حتكون Kamov Ka-52 Alligator و دي طيارة كبيرة شوية فالعنابر بتاعة الطيارات إتصممت عشان تستوعبها .. عشان روسيا ساقعة زي ما إنت عارف فسطح السفينة إتركب تحت منه مواسير تمشي فيها مياه سخنة عشان تسيح الثلج اللي ممكن يتكون علي سطح الحاملة و مش يزحلق العساكر إنما يخلي الطيارات متعرفش تهبط.
مش بس كده .. الفرنساويين دفعوا دم قلبهم و لقوا نفسهم في وضع زي الزفت إن تحت إيدهم حاملتي طائرات هم مش محتاجينهم .. فضلت الحاملتين ملطوعين في الترسانة البحرية سانت نيزير Saint-Nazaire الفرنساوية فوق السنتين لحد ما في مارس 2016 إتمضي إتفاق معانا بين الرئيس الفرنساوي وقتها (فرانسوا أولاند) و بين الرئيس (عبدالفتاح السيسي) إننا حناخد إحنا الحاملتين مقابل 1.06 مليار دولار .. السعر ده شامل الحاملتين و تكاليف تدريب حوالي 400 ضابط بحري مصري في فرنسا علي إزاي يستخدموا الحاملتين .. علي فكرة فيه دول تانية زي كندا مثلاً كانت دخلت في مفاوضات فعلاً مع فرنسا إنها تاخد الحاملتين بس البيعة رسيت علينا.
تطلع إيه الميسترال دي بقي؟
زي ما إنت شايف من الصور فالميسترال دي عبارة عن سفينة بس سطحها إلي حد كبير مستوي أو زي ما بنقول كده في السوق مياة واحدة عشان تطلع من عليه و تهبط عليه طيارات هليكوبتر .. إنت فيه عندك علي سطحها 6 أماكن لإقلاع و هبوط الطيارات الهليكوبتر .. الحاملة الواحدة بتقدر تشيل حوالي 16 طيارة هليكوبتر و 4 كباري عائمة و كتيبة مدرعات كاملة و لحد 500 عسكري .. بإختصار شديد الحاملة الواحدة بتديك قدرة عالية أوي إنك تفرض سيطرتك علي مساحات واسعة من العمليات و زي ما قلت إحنا مش بس إشترينا واحدة .. دول إتنين اللي هم (جمال عبدالناصر) و (محمد أنور السادات) .. عارف إننا مشينا ورا الأمريكان في حتة إنهم بيسموا حاملات الطائرات بتاعتهم علي أسامي رؤساء سابقين بس إحمد ربنا إن محدش سماها (محمد حسني مبارك) و إلا بقت خناقة لرب السما .. بس الأول خلينا نتكلم في الأساسيات و نفهم يعني إيه ميسترال و بتعمل إيه؟
مبدأياً هي بره بتتسمي اسمين .. يا إما بيتقال عليها سفينة هجوم برمائية Amphibious Assault Ship .. يا إما بيتقال عليها سطح هبوط طيارات هليكوبتر Landing Helicopter Docks أو LHD إختصاراً .. الاسمين صح بالمناسبة .. بس اللي عايزك تعرفه إن السبب ورا إن الفرنساويين بالذات طايرين بالميسترال و طالعين بيها السما إن الأمريكان هم كمان عاملين واحدة زيها بيسموها طراز الدبور Wasp-Class LHD بس الفرق إن الميسترال رغم إنها بتقوم بنفس الدور بتاع Wasp-Class LHD إلا إنها بتقدر تعمل ده بربع الحجم و ربع عدد البحارة اللي مطلوب إنهم يشتغلوا علي السفينة .. الميسترال سفينة بتعمل كذا حاجة .. غير إنها مطار هليكوبتر عايم علي وش المياه يا بتشيل 16 طيارة هليكوبتر تقيلة يا 35 طيارة هليكوبتر خفيفة .. و غير إنها بتقدر تشيل كتيبة مدرعات يعني بتتكلم عن تقريبا 40 دبابة يا إما ليكلريك Leclerc الفرنساوي أو M1A1 Abrams الأمريكاني .. و غير إنها بتشيل إتنين هوفركرافت .. هي كمان فيها مستشفي سعة 69 سرير و ده بيخليها مثالية لعمليات الإنقاذ و الإجلاء من أي حتة .. يعني مثلاً سنة 2006 لما قامت الحرب بين إسرائيل و حزب الله واحدة من حاملات الطائرات الميسترال اللي تحت إيد فرنسا أجلت الرعايا الفرنساويين من بيروت و نفس الكلام حصل سنة 2011 لما برده فرنسا سحبت الرعايا بتوعها من ليبيا وقت الحرب الأهلية هناك.
تبقي النقطة اللي يمكن كانت ولازالت محيراني هو ليه؟ .. ليه جبنا الميسترال أساساً؟ .. زي ما قلنا في البداية إن شراء السلاح شبه شراء العربيات المستعملة فإنت قبل ما تجيب عربية مستعملة لازم الأول تكون متعود عليها و عارف إمكانياتها كويس و تقدر تتعامل معاها .. يعني مثلاً مينفعش تبقي كل تجربتك في السواقة كانت مع الفيات 128 و اللادا تقوم مرة واحدة شاري عربية BMW X6 اللي هو إنت عشان تفهم كل زرار في التابلوه بيعمل إيه إنت محتاج تاخد أجازة شهر من الشغل .. الميسترال أو حاملات الطائرات في المطلق بيتقال عليها أنظمة تسليح معقدة .. دي مش سلاح .. دي نظام تسليح .. عشان قواتك البحرية تبقي متعودة إنها تشتغل من علي حاملة طائرات فإنت محتاج خبرة مش سنين دي أجيال خصوصاً إنك بتتعامل مع سفينة كبيرة .. كبيرة أوي.
السفن عشان تميز هي كبيرة قد إيه فإنت بتستخدم حاجة بيسموها الإزاحة أو Displacement .. لما حضرتك يبقي عندك بانيو في البيت و فضلت تملاه لحد ما المياه فيه وصلت لمستوي معين تقوم حضرتك نازل في البانيو فإنت بتلاحظ إن منسوب المياه جوه البانيو إرتفع .. عشان كده لو إنت كنت مالي البانيو علي الأخر و جيت نزلت فيه حتلاقي المياه طلعت بره البانيو و غرقت أرضية الحمام .. اي جسم بينزل جوه حوض فيه مياه بيسبب إزاحة يعني شوية مياه كانوا جوه الحوض بتلاقيهم طلعوا براه و كمية المياه دي إحنا بنجيبها و بنوزنها بالطن عشان تعبر عن حجم القطعة البحرية .. يعني مثلاً .. قبل ما مصر تشتري الميسترال كان كل اللي بتملكه البحرية المصرية من قطع برمائية هي 3 سفن بولندي اسمهم بولنوشني Polnochny الواحدة فيهم طولها 70 متر ولما بتنزل المياه بتسبب إزاحة قدرها 830 طن فإنت بتتكلم عن سفينة إلي حد ما تقيلة مش خفيفة .. لما تيجي تقارن ده بالميسترال فإنت قصاد سفينة طولها 200 متر ولما بتنزل المياه بتسبب إزاحة 21,000 طن .. إنت متخيل الفرق .. بلاش دي .. تاني أكبر قطعة بحرية بتمتلكها القوات المسلحة المصرية بعد الميسترال هي الفرقاطة فريم FREMM اللي طولها 140 متر و بتسبب إزاحة 6,000 طن واللي دخلت الخدمة عندنا في يونيو 2015 .. فإنت حقاً و صدقاً و بدون أي مبالغة تحولت من قوات بحرية كان أخرها يبقي عندها اللادا و هوبا إتقالها خدي BMW X6 روقي علي نفسك .. مسئولية التعامل مع كيان معقد زي الميسترال كفيل إنه يجيب كوابيس لقيادة القوات البحرية .. حتي إسأل الأستراليين.
مهم تبقي فاهم إن قدرة أفراد القوات المسلحة لأي بلد مرتبط بمدي جمدان النظام التعليمي عندهم .. يعني مثلاً .. كنا إتكلمنا قبل كده عن إزاي القوات المسلحة السنغافورية رغم إن سنغافورة بلد إلي حد كبير صغيرة بس قواتها المسلحة بتتصنف علي إنها من الصفوة علي مستوي العالم .. ليه؟ .. عشان خاطر النظام التعليمي في سنغافورة جامد تنين .. بلد زي أستراليا مثلاً عندها برده نظام تعليمي جاحد ولأجل الصدف برده في نوفمبر 2014 أشتروا برده حاملة طائرات هليكوبتر سموها كانبيرا علي اسم العاصمة بتاعتهم HMAS Canberra .. السفينة دي دخلت الخدمة في القوات المسلحة الأسترالية في نوفمبر 2013 .. لمدة سنتين فضلوا يجربوا فيها و يشوفوا مشاكلها و يحاولوا يعالجوها لحد ما توصل لمرحلة ما يسمي Initial Operation Capability و إختصاراً بتتسمي IOC و دي معناها زي ما تقول كده لما يبقي معاك عربية لسه شاريها و أبوك يقولك إنت إتعلمت تعرف تسوقها فأخرك تتمشي بيها في الشوارع اللي حوليكوا .. لمدة سنتين كمان يعني لحد 2017 الأستراليين فضلوا يجربوا فيها لحد ما توصل لمرحلة Final Operational Capability أو FOC اللي هو تقدر تسافر بعربيتك عادي .. يعني قوات مسلحة متعلمة كويس و مصروف عليها كويس زي أستراليا عشان تتعامل مع سفينة معقدة زي الميسترال إحتاجت أربع سنين فإنت متوقع إننا نوصل للمرحلة دي خلال كام سنة.
نقطة تانية كنا إتكلمنا عنها قبل كده لما جبنا سيرة حاملات الطائرات هي إن حاملة الطائرات مش بتمشي لوحدها .. لنفترض إن مثلاً مصر دخلت حرب مع إسرائيل فإيه اللي يمنع سلاح الجو الإسرائيلي إنه يستهدف الميسترال وهي في المياه؟ .. إذن لازم السفينة تدافع عن نفسها و عشان كده هي بتمشي و حوليها عزوتها من فرقاطات و غواصات و يمكن حتي طيارات مقاتلة من سلاح الجو .. فرح العمدة ده محتاج يتعمل صح و بيتكتب ليه كتب و مراجع إحنا منعرفش عنها حاجة و محتاجين نقرأها كويس و نحفظها .. محدش قال إن الموضوع صعب و ميتعملش لإن نفس البق الحمضان ده إتقال للصينيين لما أشتروا حاملة الطائرات لياونينج Liaoning و دلوقتي بسم الله ما شاء الله بيبنوا بنفسهم تاني حاملة طائرات تخش الخدمة في القوات البحرية الصينية و ده اللي بيخليني أختم بأخر نقطة و يمكن دي أكتر نقطة حيبقي عليها خلاف .. إنت عشان تتعلم و تفهم كل صغيرة و كبيرة عن أي سلاح بتشتريه لازم تجربه و عشان تجرب سلاح لازم تخش حرب.
يمكن الإشاعة اللي إتقالت وقت ما مصر مضت مع فرنسا إتفاق شراء الميسترال هي إن السعودية هي اللي دفعت جزء من فلوس الصفقة علي أساس إن مصر تشيلها جميلة للسعودية و عشان نردلهم الجميل لازم نبعت قوات مصرية تشارك في العمليات العسكرية في اليمن .. أنا فاهم كويس أوي إن الحرب الخليجية في اليمن دي جريمة حرب لازم يتحاسبوا عليها .. و فاهم كويس أوي إن التدخل العسكري في اليمن مش هو أحسن طريقة للتعامل مع التهديد اللي بيشكله الحوثيين للأمن القومي السعودي .. كل ده علي راسي من فوق و عشان كده أنا شخصياً موافق علي قرار مصر إنها متبعتش عسكري واحد لليمن .. بس في نفس الوقت قواتك البحرية مش حتقدر تفهم الميسترال طول ما هي راكنة في الميناء و أخرها تشارك في مناورات بحرية زي كليوباترا 2016 أو مناورة جسر الصداقة 2019 و اللي شاركت فيها لأول مرة يمكن في تاريخ القوات البحرية المصرية ما يسمي بالتاسك فورس Task Force وهي إن يبقي عندك حاملة طائرات اللي هي جمال عبد الناصر شايله ميكس طيارات هيلوكوبتر بين Ka-52 Kamov الروسية و AH-64D/E Apache الأميريكية بيحميها فرقاطة من طراز Perry-Class اللي هي سليمان عزت و غواصة من طراز Class-209 عشان تنفذ عملية برمائية لإنزال قوات خاصة علي ساحل شط .. كل ده جميل و علي راسي من فوق بس حاملات الطائرات إنت عمرك ما حتجيب أخرها بإنك تجربها في مناورات .. ليه أنا بقول كده؟
مشكلة حاملة الطائرات الأزلية هي إزاي تدافع عن نفسها .. المفروض إنت لو بتتكلم عن حاملة طائرات مقاتلة زي اللي عندك الأمريكان فخط الدفاع الأول عنها هو الطيارات اللي هي شايلاها .. بعد كده بيبقي فيه عندك طبقة دفاع تانية عبارة عن صواريخ جو-أرض متوزعين علي طول الحاملة و بعد كده فيه طبقة ثالثة هي مدافع رشاشة بتتوزع علي سطح الحاملة عشان توقع الصواريخ اللي ممكن تتضرب عليها .. في حالة الميسترال إنت بتتكلم عن حاملة طائرات هيكوبتر يعني لو برده نرجع للمثال بتاع الحرب اللي قامت بين مصر و إسرائيل و إتضربت بسرب طيارات F-35I Adir ودي تبقي النسخة المخصوص اللي استلمتها إسرائيل من الطيارة F-35 Lightening II فالحاملة حتغرق قبل ما نلحق نصوت عليها .. الحل اللي الروس كانوا حيطبقوه عندهم لو كانت الحاملتين راحوهم كان إنهم حيركبوا صواريخ أرض جو اسمها SA-N-8 و حيرتكب علي سطحها مدافع رشاشة AK-360 .. طبعاً لما إحنا أشترينا الحاملتين من فرنسا مجاش معاها لا الصواريخ ولا المدافع الرشاشة و عشان كده لما نزلت صور المناورة كليوباترا علي السوشيال ميديا الناس إترقيت لما شافت البحرية المصرية حلت المشكلة بتاعة إزاي تدافع عن الميسترال بإننا ركبنا عليها عربيات هامفي متربطة كويس بسطح السفينة بس الناس اللي كانت بتسف دي مكنتش فاهمة نقطة .. هي العربيات الهامفي دي بتهبب إيه في عيشتها؟
دي عربيات بيتقال عليها AN/TWQ-1 Avenger ودي مش عربية قد ما هي منظومة دفاع جوي متنقلة يمكن معروفة أكتر باسم M1097 .. العربية دي بتقدر تشيل 8 صواريخ ستينجر FIM-92 Stinger المضادة للطيارات و فيها مدفع رشاش M3P عيار خمسين مليمتر بيقدر يضرب لحد 1200 طلقة في الدقيقة .. بلاش دي .. حتقولي طب ما إنت كان ممكن تشتري من فرنسا أنظمة الدفاع الجوي اللي بتيجي أصلاً مع الميسترال حقولك إن الفرنساويين بيركبوا عليها منظومة دفاع جوي علي الله حكايتها اسمها سندباد Simbad اللي هو أساساً يعني عربية M1097 من دول برقبتها بس أرجع و أقولك تاني إنت عمرك ما حتقدر تقيم فعلاً هل إعتمادك علي حل بلدي زي إنك تربط عربية علي سطح سفينة حيجيب معاك نتيجة ولا لا إلا لما تجربه في معارك و مهام قتالية مش مجرد مناورات حتي لو كانت بالذخيرة الحية.
خلينا نتفق إن صحيح حاملة الطائرات الميسترال نقلت القوات البحرية المصرية سنين ضوئية لقدام .. معاك إن بقي تحت إيدك سلاح بيديك قدرات قتالية مكنتش تحلم بيها قبل كده .. بس في نفس الوقت السلاح زيه زي عربيتك محتاج تبقي متعود عليه و فاهم حدوده و عيوبه و مميزاته و ده مش بيجي غير بإنك تفرك بالعربية كتير .. سواقتك علي طريق سفر بتخليك عارف هي عربيتك لما تعدي 120 كليومتر في الساعة بتبقي ثابتة علي الأرض ولا لا .. سواقتك في زحمة بتوريك هو موتور عربيتك بيسخن ولا لا .. ده برده نفس الوضع مع الميسترال .. عشان نقدر نفهمها صح لازم نجربها كتير و للأسف اللي أنا شايفه إن ده مش حيحصل في السنين الجاية وده بيخلينا قدام وضع إن يبقي تحت إيدك عربية BMW X6 بس أخرك في السواقة إنك تسوقها لحد شغلك و ترجع اللي هو أساساً يعني أخر الشارع من بيتك.
المصادر:
- مقالة بعنوان France to sell Egypt two warships previously contracted to Russia نشرت في موقع وكالة أنباء CNN و ده لينك المقالة الأصلية:
https://edition.cnn.com/2015/09/23/europe/france-egypt-warship-sale/index.html - مقالة بعنوان Why in the world Does Egypt Want French Mini-Carriers? نشرت علي موقع War is Boring و ده لينك المقالة الأصلية:
https://warisboring.com/why-in-the-world-does-egypt-want-french-mini-carriers/ - مقالة بعنوان EGYPT’S ACQUISITION OF THE MISTRAL AMPHIBIOUS ASSAULT SHIP: AN OPERATIONAL ANALYSIS نشرت في موقع Center for International Maritime Security و ده لينك المقالة الأصلية:
https://cimsec.org/egypts-acquisition-mistral-amphibious-assault-ship-operational-analysis/ - مقالة بعنوان Remember the Russian Mistral Amphibious Ships? Certainly, the Turks Do نشرت في موقع SLD info و ده لينك المقالة الأصلية:
https://sldinfo.com/2020/05/remember-the-russian-mistral-amphibious-ship-certainly-the-turks-do/ - مقالة بعنوان The French Mistral: The Case for the Russian sale and its aftermath نشرت في موقع SLD info و ده لينك المقالة الأصلية:
https://sldinfo.com/2023/02/the-french-mistral-the-case-of-the-russian-sale-and-its-aftermath/ - مقالة بعنوان Egypt’s navy MacGuyvers its newest ships to protect them from air attack نشرت في مجلة Business Insider و ده لينك المقالة الأصلية:
https://www.businessinsider.com/egypt-macguyvers-its-naval-ships-protect-them-from-air-assaults-2017-7
