فيه حاجات معينة بتقع عينك عليها و أول حاجة بتيجي في دماغك هي أميركا .. عندك مثلاً لما تشوف علامة ماكدونالدز أو تشوف علامة دجاج كنتاكي أو تشوف الماركة بتاعة Apple .. من ضمن الحاجات اللي برده أول ما تشوفها بعنيك أول حاجة بتيجي في دماغك أميركا هي حاملة الطائرات .. موضوعنا اللي حنتكلم عنه النهاردة هو حاملة الطائرات Aircraft Carrier و الحقيقة اللي حنتكلم عنه النهاردة ملوش علاقة بتسليحها ولا بأنواعها .. اللي حتكلم عنه النهاردة هو مستقبلها .. عشان أوضحلك أنا حتكلم عن إيه تخيل إن وزارة الدفاع الأمريكية أو زي ما بتتسمي هناك بنتاجون Pentagon عامله زي أبوك و أمك و حاملة الطائرات دي هي إنت أول ما خلصت ثانوية عامة و جت مرحلة التنسيق عشان تقدم علي كلية .. كلنا عدينا بالمرحلة دي في حياتنا إن أبوك مثلاً شايف إن مستقبلك حيبقي مضمون لو دخلت كلية هندسة بس مامتك شايفه حاجة تانية خالص و هي إن المستقبل في إدارة الأعمال و إنت في دماغك تصور ثالث خالص إنك عايز تبقي Photographer محترف .. أهو حاملة الطائرات هي كمان في المرحلة دي .. فيه خناقة كبيرة جوه وزارة الدفاع الأميريكية علي مستقبل حاملة الطائرات و خليني في الأول كده أفهمك هو مين واقف ضد مين؟
علي إيدك اليمين الناس اللي شايفة إن حاملة الطائرات هي Superman بتاع الترسانة العسكرية الأميريكية اللي محدش يقدر ييجي جنبه و الناس دول يبقوا كبار قادة القوات البحرية الأميريكية .. دول لو حنكمل في التشبيه إنك بتقدم علي كلية عاملين زي الست والدتك بالضبط .. هم شايفين زي أي أم في الدنيا إن إبنها ده أحسن حد في الدنيا و إن إبنها ده متولدش و مش حيتولد حد زيه .. قادة القوات البحرية مؤمنين بقدرات حاملة الطائرات لدرجة إنهم كانوا بيزقوا جامد عشان البرلمان الأميريكي اللي بيتسمي الكونجرس Congress يوافق علي إنه يديهم فلوس يشتروا بيها حاملتي طائرات جداد لانج من طراز Gerald Ford-Class و طراز (جيرالد فورد) ده اللي إتسمي علي أسم رئيس أميريكي سابق تقدر تسميه الBMW بتاع حاملات الطائرات .. المهم إن قادة القوات البحرية كانوا عايزين ياخدوا 24 مليار دولار يدوها للشركة اللي بتصنع النوع ده من حاملات الطائرات و إسمها هانتينجتون إينجالز إينداستريز Huntington Ingalls Industries تحت مسمي شوفي الصح إيه و أعمليه .. قادة القوات البحرية الأميريكية كانوا مبسوطين أوي من نفسهم عشان نفوذهم كان مسمع جامد جوه الكونجرس لإن فيه أعضاء كتير في البرلمان كانوا موافقين علي خطة الرئيس الأميريكي (دونالد ترامب Donald Trump) إن الأسطول البحري الأميريكي لازم يبقي فيه 12 حاملة طائرات و 355 قطعة بحرية .. مع العلم إن لحد الوقت اللي إنت بتقرا فيه المقالة دي الأسطول الأميريكي فيه 11 حاملة طائرات و 285 قطعة بحرية.
علي إيدك الشمال الناس اللي شايفة إن إذا كانت حاملة الطائرات هي Superman فالروس و الصينيين بقي معاهم الكريبتونايت Kryptonite أو الحاجة اللي تقدر تهزم Superman و هي الصواريخ بعيدة المدي المتوجهة بالأقمار الصناعية .. هم بالضبط عاملين زي والدك شايفين إنك عيل متدلع متخيل إنك رجل بس الحقيقة إنك متقدرش تشيل مسئولية .. الكبير بتاع الناس دول كان وزير الدفاع الأميريكي (جيمس ماتيسJames Mattis ) و اللي حتي لما قدم إستقالته و مشي وجه وراه واحد إسمه (باتريك شاناهان Patrick Shanahan) اللي هو كمان مشي بس هو كمان ماشي في نفس سكة (جيمس ماتيس) و شايف إن المستقبل مش لحاملات الطائرات إنما للغواصات و الصواريخ اللي بتطير بسرعات أعلي من سرعة الصوت أو Hypersonic و الأمن الأليكتروني Cyber-Security و الذكاء الصناعي AI .. تقدر تقول عليه وزير دفاع شاب فانكي من بتوع اليومين دول اللي كبروا علي ثورة الSmartphones و محضروش أيام التليفون الأرضي الأسود أبو بكره ده.
الخناقة كانت كالأتي .. قادة القوات البحرية راسهم وألف سيف يشتروا حاملتي الطائرات و وزارة الدفاع حالفة مية يمين إن ده مش حيحصل .. فين و فين بعد خناق و عراك قعد شهور الطرفين إتفقوا علي الأتي .. القوات البحرية حتشتري حاملتي الطائرات اللي هي عايزاهم و حتموت عليهم بس في المقابل حيأجلوا عملية إعادة التفويل اللي بتتعمل لما حاملة الطائرات توصل لنص عمرها الإفتراضي لواحدة من حاملات الطائرات القديمة من طراز نيمتز Nimitz-Class و الكلام كان علي حاملة الطائرات (هاري ترومان) USS Harry Truman اللي خدمت في حروب أميركا في العراق و أفغانستان و سوريا .. طبعاً فيه ناس دلوقتي بتهرش في شعرها بتحاول تفهم الألغاز اللي أنا قلتها من شوية دي فخليك معايا أفهمك واحدة واحدة.
أي حاملة طائرات في الدنيا بتتصمم علي إنها تقدر تشتغل 50 سنة بس عشان ده يحصل لازم لما يعدي علي حاملة الطائرات 25 سنة في الخدمة بيتعملها حاجة إسمها Midlife Refueling يعني تفويلة منتصف العمر إن حضرتك بتجيب حاملة الطائرات و بتغير الوقود النووي بتاعها كله بحيث إن العملية دي بتكلف فلوس كتير و بتاخد علي الأقل سنة كاملة شغل .. لو إنت قررت تأجل الخطوة دي كذا سنة فكده إنت بتخاطر إن المفاعل النووي بتاع حاملة الطائرات ممكن ميشتغلش لإن وقوده النووي بيخلص و لو ده حصل فإنت كأن عربيتك جابت وش سلندر .. بس علي عكس العربيات إنك ممكن تشتريلها موتور جديد فحاملات الطائرات مينفعش تعمل معاها كده و عشان كده فخطوة تأجيل الMidlife Refueling دي بتتوصف إنها زي ما تطلع حاملة الطائرات معاش مبكر.
معني إن وزارة الدفاع تقول للقوات البحرية إنهم حيأجلوا عملية الRefueling أو إعادة التفويل للمفاعل النووي بتاع أي حاملة طائرات كأنك بالضبط حتطلع حاملة الطائرات دي معاش مبكر بس الحقيقة مش دي المشكلة .. المشكلة إن لما حضرتك تطلع حاملة طائرات بره الخدمة دلوقتي فإنت حتخلي الأسطول الأميريكي من دلوقتي و لحد 2025 علي الأقل عايش علي 10 حاملات طائرات مش 11 .. زود علي كده إن القوات البحرية مش حتستلم حاملتي الطائرات الجداد إلا علي سنة 2027 أو 2030 و لإن عمر ما شركة بتسلم مشروع كبير زي حاملة طائرات في معاده فأكيد التسليمة حتتأخر عن كده.
اللي أنا شخصياً مكنتش قادر أفهمه هو الإجابه عن سؤال: ليه؟ .. ليه وزارة الدفاع تقول أنا حشتريلكوا حاملتي الطائرات اللي أنتوا عايزينهم بس تطلعوا واحدة قديمة بره الخدمة؟ .. فيه منكوا دماغه حتوديه إن أكيد الموضوع له علاقة بالفلوس خصوصاً لما تعرف إن قرار إن حاملة الطائرات USS Harry Truman تطلع معاش مبكر حيوفر علي وزارة الدفاع الأميريكية أكثر من 4 مليار دولار .. بس الحقيقة هو الموضوع ملوش علاقة بالفلوس قد ما له علاقة بإثبات وجهة نظر .. زي ما قلتلك وزارة الدفاع الأميريكية مش مقتنعه بإن الإجابة عن سؤال إيه هي الحاجة اللي حتخلي القوات المسلحة الأميريكية تسيطر علي العالم هو حاملة الطائرات .. هم شايفين إن لما تيجي سنة 2040 يعني بعد 20 سنة من دلوقتي حاملة الطائرات حتبقي زي التليفون الأرضي كده دلوقتي محدش بيستخدمه و كله ماسك موبايلات.
أظن السؤال دلوقتي هو طب إيه اللي حيحصل؟ .. عشان تفهم اللي حيحصل سنة 2030 خليني أحكيلك قصة حصلت فعلاً سنة 2014 و القصة دي إن وقتها وزارة الدفاع الأميريكية قالت إن إحنا لسه خارجين من أزمة مالية عالمية و البلد محتاجه تربط الحزام شوية علي بعزقة الفلوس و لإن وزارة الدفاع أكتر حد بيصرف فقالوا إن كل فرع من الأفرع الرئيسية للقوات المسلحة يقترح طريقة إنه يوفر بيها كام مليار دولار .. إقتراح القوات البحرية كان إنهم حيأجلوا الMidlife Refueling لحاملة طائرات قديمة شوية من طراز Nimitz-Class إسمها (جورج واشنطن) USS George Washington بحيث إن قرار زي ده هو زي ما وصفتلك بالضبط لما تقول أنا حطلع حاملة الطائرات دي معاش مبكر .. لما جم يحسبوا هم حيوفروا قد إيه؟ إكتشفوا إن لما حاملة الطائرات بالطيارات اللي عليها يطلعوا معاش مبكر فإنت كده حتوفر علي نفسك مصاريف 7 مليار دولار من سنة 2016 لحد سنة 2021 .. يا بلاش.
لسه الناس جوه وزارة الدفاع حيقولوا هييييييييييه إكتشفوا خازوق مستنيهم .. دلوقتي حاملة الطائرات دي كانت حيتعملها Midlife Refueling في شركة Huntington Ingalls Industries و الشركة دي عينت ناس مخصوص عشان المشروع ده فلما القوات البحرية تلغي المشروع فكده الشركة حتمشي 1200 موظف .. طبعاً البرلمان لما عرف المعلومة دي قال لا خلاص متطلعوش حاملة الطائرات معاش مبكر و خلوها تعمل الMidlife Refueling عادي خالص عشان حرام نقطع عيش الناس .. هو مش حرام نقطع عيش الناس قد ما النائب البرلماني عن الولاية اللي فيها الشركة خاف يوافق علي قرار زي ده فالناس تغضب عليه و متنتخبوش تاني .. ده معناه إيه؟ .. ده معناه إن الكونجرس حيرفض إن حاملة الطائرات USS Harry Truman تطلع معاش مبكر و حيوافق إن القوات البحرية تشتري حاملتي طائرات زيادة يعني كلام القوات البحرية حيمشي فوق دماغ وزارة الدفاع .. مش لسبب غير إن أعضاء البرلمان خايفين علي كراسيهم.
أيا كان اللي حيحصل فالخناقة دي عملت جو نفسنة جامد جوه المؤسسة العسكرية الأميريكية لإن إنت وصلت لمرحلة إن كلام وزير الدفاع مبقاش يتسمع و يمكن عشان كده (جيمس ماتيس ) خدها من قصيرها و قدم إستقالته بدري لإنه محبش حد في سنه و مكانته يتحط في موقف بايخ زي ده .. و حاجة تانية تفهمها كويس أوي .. غالباً قرارات المؤسسة العسكرية الأميريكية عشان تفهمها حاول تفسرها من منظور الفلوس و منظور الإنتخابات بتاعتهم .. زي ما إنت شايف عشان نائب برلماني يفضل في كرسيه ممكن يلبس البلد كلها في الحيط.
المصدر:
مقالة بعنوان Nothing Projects Power Like an Aircraft Carrier: Does the Pentagon Think Otherwise? .. نشرت في مجلة Foreign Policy الأميريكية وده لينك المقالة الأصلية:
https://foreignpolicy.com/2019/03/01/nothing-projects-power-like-an-aircraft-carrier-does-the-pentagon-think-otherwise-mattis-military-uss-truman/
