في محاولة مني إني أخليك تستوعب المنطق و المبرر وراء السفه اللي ماشيه بيه المؤسسة العسكرية الأميريكية في حتة تطوير برامج تسليحهم و خصوصاً الطيارات المقاتلة فخليني يائساً يعني أشرحلك ده بمثال عن لاعيبه كرة القدم .. دلوقتي إنت فيه عندك المهاجم الكلاسيكي رقم تسعة الجتة الطول بعرض اللي يسد عين الشمس و شغلته يقف جوه ال18 عشان يجيب جوان .. أمثلة ده كتير الحقيقة من (ألان شيرر Alan Shearer) زمان و النسخة الجديدة بتاعة اليومين دول (إيرلينج هالاند Erling Haaland) .. و فيه المهاجم اللي بيتطرف علي الجناح كتير و تلاقيه بسم الله ما شاء الله بيدوس بنزين متشوفهوش زي (تييري هنري Thiery Henery) مثلاً و النسخة بتاعة اليومين دول منه (كيليان إمبابي Kylian Mbabe) .. نادر تلاقي المهاجم اللي بيعمل كل حاجة .. تلاقيه عنده راس متركبة علي سوست و مساعدين و عنده موتور في رجله و في نفس الوقت جتة لو لطشك كتف قانوني يوقعك لا و كمان بيعرف يرقص .. ده برده حال الطيارات المقاتلة .. مفيش الطيارة اللي بتعمل كل حاجة .. مفيش الطيارة اللي بتتخفي من الرادار و بتجري بسرعة و بتعرف تخمس في السما و ينفع تستخدمها في الغارات الجوية علي أهداف أرضية و في الإستطلاع و دي الحقيقة اللي الأمريكان إكتشفوها .. هم صحيح عندهم أسطول محترم من طيارات F-16 Fighting Falcon بتخدم في قواتهم الجوية .. عندهم طيارات F/A-18 Super Hornet شغالة من علي حاملات الطائرات بتاعتهم .. عندهم طيارة بتعب جمباز في الجو و ليها القدرة علي التخفي من الرادار زي F-22 Raptor .. و الأهم إن عندهم F-35 Lightening II و اللي فيها مشكلة كبيرة أوي إنها بتعمل كذا حاجة بس مش شاطرة في ولا واحدة فيهم.
الطيارة F-35 بكل النسخ بتاعتها سواء F-35A اللي بتخدم في القوات الجوية أو F-35B اللي بتخدم في سلاح مشاة البحرية U.S. Marine Corps أو حتي F-35C اللي بتخدم علي حاملات الطائرات ضمن القوات البحرية لا هي سريعة زي F-16 ولا هي دحلاب في الجو زي F-22 ولا حتي بتشيل نفس التسليح بتاع F/A-18 .. ده معناه إن أسطول طيارات F-35 مينفعش يحل محل أي طيارة تانية من الطيارات اللي أنا قلتها دي لإنها زي ما قلت طيارة بتقدر تعمل كذا شغلانة بس هي مش شاطرة في ولا واحدة فيهم و ده بيحطك قدام القرار اللي إنت ممكن تشوفه مش منطقي و غريب إن قيادة القوات الجوية الأميريكية شغالة دلوقتي و دايسة جامد الحقيقة في مشروع طيارات الجيل السادس و اللي لما تنزل السوق إن شاء الله حتبدأ تحل محل أسطول طيارات F-22 Raptor .. ليه؟ .. عشان طيارات F-35 مينفعش تعمل ده و ده اللي إحنا جايين نتكلم عنه النهاردة .. المقالة دي هدفها إنها تحاول تجاوب علي سؤالين:
- إيه اللي يخليك محتاج تعمل طيارات جيل سادس أصلا؟ و هي يعني طيارات الجيل الخامس قصرت معاك في حاجة؟
- يا تري بقي طيارات الجيل السادس دي المفروض يعني إنها حتعمل إيه؟ .. حتطلع نار من بقها مثلاً؟
الجيل السادس .. ليه؟
الاسم الرسمي للمشروع هو طيارة الجيل الجاي للهيمنة الجوية Next Generation Air Dominance و إختصاراً بيسموها NGAD و دي طيارة حتتصمم عشان تدوس علي وش أي طيارة تانية في الإشتباكات الجوية اللي بتتسمي دوج فايت Dogfight .. دي طيارة المفروض إنها لما تنزل السوق في 2030 زي ما الأمريكان نفسهم يحصل حتبقي طيارة مش بتتلقط بالرادار أو Stealth و وليها قدرة علي المناورة فوق قدرة أي طيارة تانية في السوق .. بمعني أخر دي حتبقي Upgrade بتاع الطيارة F-22 Raptor و اللي زي ما إتكلمنا عنها قبل كده مشكلتها إنها طيارة قديمة إتبنت في التسعينات فقطع غيارها و صيانتها بقت غالية لدرجة إن أرخصلك تعمل طيارة تحل محلها من إنك تصرف عليها عشان تخليها شغالة.
مهم بالنسبة لي إنك تبقي فاهم هي العملية أو Process اللي بناء عليها تصميم الطيارة بيتم إختيارة بتمشي إزاي لإن القوات الجوية مش هي اللي بتصمم الطيارة بنفسها .. القوات الجوية بتطلع شوية مواصفات أو طلبات اللي تقدر تقول إنهم جايين يحققوا أحلامهم و شركات تصنيع الطيارات هي اللي شغلتها إنها تحقق الطموحات و الأماني دي علي لوح بتتقدم و التصميم اللي يخش دماغ القوات الجوية هو اللي بيتم إختياره .. جري العرف إن أي طيارة جديدة بتتصنع القوات الجوية بتختار نموذجين مش واحد .. فيه كذا شركة بتقدم تصميمتها و أحسن إتنين علي الورق هم اللي بيتحطلهم ميزانية محترمة عشان الشركتين اللي تم إختيارهم يبدأوا يعملوا النموذج الأولي أو Prototype و النموذج الأولي ده بيطلع ميتين أمه في الإختبارات و اللي يحقق فيهم النتيجة اللي تبسط الناس بتاعة سلاح الجو بيتم إختياره .. يعني مثلاً:
- مشروع الطيارة F-35 اسمه بالكامل كان Joint Strike Fighter Program و بعد ما شركات كتير قدمت تصميماتها الدنيا صفت علي شركتين الللي هم لوكهيد مارتن Lockheed Martin و بوينج Boeing و الإتنين عملوا Prototype وفي الأخر التصميم بتاع Lockheed Martin هو اللي إتوافق عليه.
- قبل منه في الثمانينات لما إتعمل برنامج الطيارة F-22 Raptor و اللي اسمه بالكامل كان Advanced Tactical Fighter Program بعد ما برده شركات كتير قدمت تصميماتها اللي وصل للفاينال كان تصميمين واحد من نورثروب جرومان Northrop Grumman و الثاني من Lockheed Martin و برده الشركتين عملوا إتنين Prototype وبعد سلسلة طويلة من الإختبارات التصميم بتاع Lockheed Martin هو اللي تم إختياره.
الطريقة دي و اللي فضلت القوات الجوية ماشية بيها لسنين الحقيقة مش حتتطبق المرة دي .. بناء علي كلام سكرتير القوات الجوية الأميريكية (فرانك كيندال Frank Kendall) فالناس دي يوم 28 مايو 2023 جاتلها لوح تصميمات من 3 شركات للطيارة نفسها و الشركات اللي قدمت التصميمات دي هي لوكهيد مارتن Lockheed Martin و بوينج Boeing و نورثروب جرومان Northrop Grumman .. كمان إتقدم تصميمين للموتور بتاع الطيارة قدمتهم شركتين اللي هم برات أند ويتني Pratt & Whitney و جنرال إليكتريك General Electric .. التصميمات دي كلها حتتراجع كويس و التصميم اللي يتشاف إنه الأفضل هو اللي حيتعمل منه Prototype بتاع الطيارة NGAD خلال 2024.
المتوقع إن سلاح الجو الأمريكاني حيطلب ما بين 200-250 طيارة من دول بس هي المشكلة في السعر .. الطيارة NGAD الواحدة حتكلف بالميت خالص فوق 100 مليون دولار مستريح قصاد إن تكلفة الطيارة F-35A الواحدة يدوبك 85 مليون دولار بس بس مهم تفهم الفرق بين حاجتين مهمين أوي .. ما يسمي Capital Cost و بين Running Cost .. كلمة Capital Cost معناها الفلوس اللي إنت بتدفعها عشان تبني الحاجة بس Running Cost هي الفلوس اللي إنت بتدفعها عشان الحاجة تشتغل .. يعني مثلاً .. لنفترض إن سيادتك عايز تشتري تكييف في صالون بيتكوا فبيتقالك والله إن فيه نوعين من التكييفات .. واحد بيتركبله حاجة بيسموها Inverter و واحد من غيره .. التكييف اللي من غير Inverter أرخص بكتير من التكييف أبو Inverter يعني Capital Cost أقل بس التكييف أبو Inverter بيوفر كهرباء النص .. بمعني .. لو جبت تكييف أبو Inverter صحيح حتكعلك كعة حلوة في الأول بس مع الوقت حتدفع فاتورة كهرباء أقل .. اللي الأمريكان عايزين يعملوه مع الطيارة NGAD إنهم يبعزقولهم حبة حلوين في الأول بحيث تكلفة المشروع ممكن توصل 16 مليار دولار مستريح بس قصاد ده فتكلفة صيانة و قطع غيار و تشغيل الطيارة حتكون أقل من F-22 Raptor ومن حتي F-35A .. هل التارجيت ده حيوصلوله فعلاً؟ .. الله أعلم بس زي ما قلتلك كلها أحلام و أماني.
واحدة من أكبر مشاكل برنامج الطيارة F-35 Lightening II هو العقد اللي إتكتب بين الشركة اللي صنعتها اللي هي Lockheed Martin و بين وزارة الدفاع و العقد بيقول بمنتهي البساطة إن الطيارة دي تعتبر سر حربي بس مملوك للشركة مش للبلد .. بمعني .. لو مثلاً شركة تانية زي Boeing عملت إفتكاسة حلوة في واحدة من الطيارات بتاعتها و حبت وزارة الدفاع تركبها في F-35 فمن حق Lockheed Martin ترفض .. العقد إتكتب زي ما تكون الشركة هي الكلاينت مش الجيش و دي الغلطة اللي سلاح الجو الأمريكاني بيحاول يتفاداها في مشروع NGAD و عشان كده فيه كلام علي إن Lockheed Martin ممكن يتم استبعادها خالص من المشروع .. و بسبب مشكلة العقد بتاع F-35 دي ففيه برده خناقة بين سلاح الجو و البحرية علي إن كل واحد فيهم عايز يبقي له مشروع NGAD الخاص بيه بحيث NGAD بتاعة سلاح الجو تبدأ تحل محل F-22 Raptor و NGAD بتاعة القوات البحرية تبدأ تحل محل F/A-18E/F Super Hornet اللي بتشتغل من علي حاملات الطائرات.
الجيل السادس .. إيه الجديد؟
عشان تجاوب علي السؤال ده لازم تفهم هي الطيارة NGAD حتطير ضد مين و إجابة السؤال ده واضحة .. الصين .. معاك و خدامك أنا و العربية إن سلاح الجو الأمريكاني لحد اللحظة اللي إنت بتقرأ فيها كلامي لا يزال أقوي و أفضل من سلاح الجو الصيني بس خلينا برده نتفق إن الفجوة بين الإتنين قلت أوي خلال العشرين سنة اللي فاتوا .. الفروقات مبقتش كبيرة أوي زي مان .. برده في حتة تكنولوجيا التخفي من الرادار أو Stealth فالطيارات الصيني متفرقش كتير عن الطيارات الأمريكاني .. و حتي جوه طيارات الجيل الخامس فالصينين عملوا الطيارة J-20 و دلوقتي شغالين علي الطيارة الثانية من الجيل الخامس اللي هم يصنعوها بإيديهم .. عشان برده تفهم هي مشكلة سلاح الجو الصيني إيه فخليني أقولك إن أي طيارة مقاتلة في العالم هي عبارة عن ميكس بين 3 حاجات:
- أول حاجة هي Aerodynamics يعني تصمم طيارة بتعرف تطير و تخمس في الجو و دي إلي حد كبير الصينيين شاطرين فيها.
- ثاني حاجة هي الموتور اللي بيكون محرك نفاث Jet Engine و دي الصينيين ضعاف فيها شوية و عشان كده كل طياراتهم تقريباً بيتركبلها مواتير روسي.
- ثالث حاجة هي الرادار و دي الحقيقة نقطة تفوق الصينيين لإن أغلب طياراتهم بيتركبلها رادارات من طراز AESA و دي أعلي فئة من الرادارات و كمان بيتركبلها صواريخ جو-جو بعيدة المدي موجهة بالرادار ودي ميزة لحد دلوقتي مش موجودة في الطيارات الأمريكاني.
ده معناه إن الطيارة NGAD لازم تبقي طيارة كقدرات أعلي بكتير من أعلي طيارة في سلاح الجو الصيني .. لازم تكون بتعرف تهرب من صواريخ الدفاع الجوي الأرض-جو .. لازم يبقي ليها مدي طيران كبير و ده بيحصل بإن بيتركبلها تانك بنزين كبير شوية خصوصاً لو الطيارة NGAD حتطير من علي حاملات طائرات .. الفكرة إن أغلب الطيارات اللي بتخدم علي أسطول حاملات الطائرات الأمريكاني فيها عيب أزلي و هي إنها بيتركبلها تانك بنزين صغير قصاد إنها بتبقي شايلة زوربيح صواريخ و قنابل و ده معناه إن عشان المشكلة دي تتحل لازم حاملة الطائرات نفسها تقرب أوي من الشط بتاع البلد اللي أميركا حتضربها عشان الطيارات تعرف ترجع تاني تهبط علي الحاملة .. حيجي حد يقول طب ما ممكن الطيارات دي تتفول بنزين في الجو .. حقولك صح بس الطيارة اللي شايلة بنزين مش بتتصمم عشان تبقي Stealth و ممكن أي حد يلقطها فده حيخلينا نلف نلف و نرجع للنقطة الأولانية .. NGAD لازم تتصمم عشان تقدر تطير لمسافات طويلة .. بتتكلم كمان عن طيارة تقدر تطير مع سرب طيارات بدون طيار Drones و تتحكم فيهم في الجو .. بتتكلم عن طيارة تقدر تضرب أهداف أرضية .. زي ما إنت شايف تحسها لستة طلبات مراتك من السوبر ماركت قبل أجازة العيد فيبقي السؤال .. هل التارجت ده حيقدر الأمريكان يحققوه؟ .. الله أعلم.
أيا كان اللي حيحصل في الدنيا فإنت لازم تبقي عارف إن الفلوس اللي حتتحرق عشان مشروع NGAD ده يتم حتيجي من حملة التخويف ضد التهديد الواضح و الصريح اللي بتشكله الصين علي الأمن القومي الأميريكي و إلا إيه المبرر عشان نبعزق الفلوس دي كلها علي مشروع محدش عايزه غير ما يسمي Military Industrial Complex أو لوبي شركات تصنيع السلاح الأميريكية .. فلوس حتتدفع في تصميمات و تجارب و تدريب و صيانات علي سلاح غالبا حيتعمل و محدش حيضرب بيه طلقة زي ما حصل مع F-35 بالضبط .. مشوفتلهاش أمارة و توقعي الشخصي حتفضل كده ملهاش أمارة لإن كل السلاح ده المبرر ورا تصنيعه هو مجرد التخويف من بوبع مش موجود .. مجرد وهم بس بيتوظف صح عشان القوات المسلحة الأميريكية تحقق أحلامها.
المصادر:
- مقالة بعنوان The Air Force Says There Can Only Be One Secret New Fighter Jet نشرت في مجلة Popular Mechanics و ده لينك المقالة الأصلية:
https://www.popularmechanics.com/military/aviation/a43978942/air-force-only-building-one-ngad-sixth-generation-fighter-jet/ - مقالة بعنوان Three Demonstrators Now Part Of Next Gen Air Dominance Fighter Program نشرت في مجلة The Drive و ده لينك المقالة الأصلية:
https://www.thedrive.com/the-war-zone/next-generation-air-dominance-fighter-program-involves-three-demonstrators-report
