لينك التسجيل الصوتي للمقالة علي Sound Cloud:
https://soundcloud.com/user-112011687-312727988/ivkheilgyqph
من فترة هفني الشوق إني أتفرج علي فيلم Captain Marvel اللي أنا منزله High Quality مساحته 11 جيجا و ضيعت في تنزيله 6 ساعات Download و فضل ملطوع علي الكومبيوتر بتاعي محدش فكر إنه يشوفه .. إتفرجت علي الفيلم و إستغربت من حاجة في أول ربع ساعة فيه .. مش عايز أحرقلك الفيلم في حالة إنك مشفتوش بس إفتتاحية الفيلم إن شخصية Captain Marvel اللي بتقدمها الممثلة (بري لارسون Brie Larson) عندها أرق و مش عارفه تنام فبتقوم تخبط علي باب الضابط المسئول عنها في وش الفجر و اللي طلع الممثل الأمور جداً (جود لو Jude Low) .. أساساً (جود لو) حلو من غير حاجة بس بسم الله ما شاء الله الواد عامل فورمة الساحل و المكياج مخلي عنيه لونها أخضر في أصفر فبعيد عنك تخيلت إن البنت دايبه فيه و جياله بليل تقضي معاه السهرة و يساعدها تنام .. طبعاً إنت فاهم قصدي يا خلبوص منك ليه .. إذا بيها بتقوله طب ما تيجي نتمرن .. مش مشكلة يمكن هي بنت عنيفة حبتين و فيه رجاله بتحب ده في البنات .. مشهد التدريب بيخلص و أنا قاعد مستني إنه يعاكسها أو هي حتي تتدلع عليه .. ولا الهوا .. العلاقة بينهم زي ما تقول كده أخ و أخته الصغيرة.
بلاش دي .. فضلت مستني شوية أشوف شخصية (نيك فيوري Nick Fury) و هو صغير و اللي بيقدمها الممثل (صامويل إل جاكسون Samuel L. Jackson) عشان أشوف يمكن تكون Captain Marvel هي حب حياته و ساعتها ده حيفسر ليه شخصية (نيك فيوري) متجوزتش و عايش دور كبير السناجلة في نفسه .. ولا الهوا .. العلاقة بينهم ولا كأنهم إتنين صحاب بيحبوا يقلشوا علي بعض .. هنا جالي السؤال .. إزاي فيلم زي ده الناس كلها مستنياه و ألاقيه فيلم مفيهوش يمكن أهم عنصر من عناصر أي فيلم سينما .. قصة الحب .. إزاي Captain Marvel مفيش راجل في حياتها؟
شوية سيرش و لقيت إن نقاد السينما كلهم لاحظوا الحكاية دي و مبسوطين بيها جداً .. فيلم Captain Marvel أخرجه إتنين اللي هما (أنا بودين Anna Boden) و (ريان فليك Ryan Fleck) و النقاد كانوا فرحانين بيهم جداً لدرجة إتقال إن حكاية إن Captain Marvel مفيش رجل في حياتها دي هي النقطة اللي بتخلي فيلم Captain Marvel في رأي النقاد يتفوق علي فيلم Wonder Woman .. سامعك يا اللي كاتم الشتيمة في قلبك و خايف لا يكون فيه بنات بتقرأ المقالة دي بس عشان خاطري إستني شوية .. بشوية سيرش و بشوية صنفرة في الذاكرة بتاعتي إكتشفت إن دي هي موضة أفلام السوبرهيروز دلوقتي .. مفيش حد عنده وقت يحب.
بص علي أفلام السوبرهيروز أول ما طلعت .. Iron Man و Captain America: The First Avenger و Man of Steel و Thor و Batman Begins حتكتشف إن في الأفلام اللي أنا قلتها دي كانت فيه قصة حب واخدة مساحة كبيرة من أحداث الفيلم .. في Iron Man شخصية (بيبر بوتس Pepper Potts) اللي جسدتها الممثلة (جوينيث بالترو Gwyneth Paltrow) كانت شخصية محورية في الفيلم .. شخصية (بيجي كارتر Peggy Carter) اللي جسدتها الممثلة (هايلي أتويل Hayley Atwell) مكنتش مجرد البنت اللي بيحبها Captain America و دورها كان كبير جداً في الفيلم .. نفس الكلام علي شخصية (جاين فوستر Jane Foster) اللي جسدتها الممثلة (ناتالي بورتمان Natalie Portman) في فيلم Thor .. جري سلاسل كل فيلم و حتلاقي إن واحدة واحدة قصص الحب دي إتركنت علي الرف و حل محلها الصراع الملحمي بين السوبرهيرو و الشرير .. فعلاً التريند بتاع أفلام السوبرهيروز دلوقتي هو مفيش وقت للحب و الإعجاب و خليني أبقي قليل الأدب حبة صغيرين و أقولك إن حتي مشاهد البوس و الجنس تقريباً إتلغت من النوع ده من الأفلام.
في فيلم Doctor Strange مثلاً أنا فعلياً مش شايف أي معني للدور اللي قدمته الممثلة (رايتشل ماك-أدامز Rachel McAdams) في شخصية (كريستين بالمر Christine Palmer) .. يعني أنتوا جايبين ممثلة قدراتها التمثيلية عالية جداً و شكلها حلو جداً عشان يدوبك تطلع في كام مشهد فيه شخصية (ستيفن ستراينج Steven Strange) بيقولها كلام زي السم يحرق دم أي بنت .. حتي شخصية (لويس لاين Lois Lane) اللي قدمتها الممثلة (إيمي أدامز Amy Adams) في Man of Steel و كانت شخصية مهمة و مساحتها كبيرة إذا بيها مع كل جزء جديد بينزل دورها عمال يقل و يقل لدرجة إنه فعلياً معادتش ليها أي ستين لازمة .. عايز بس أفكرك بالعلاقة العاطفية المتوترة أوي بين الثلاثي (وولفرين Wolverine) و (جين جراي Jean Grey) و (سايكلوبس Cyclops) اللي كانت فاكهة السلسلة الأولانية من X-Men معادتش موجودة في ولا جزء جديد من السلسلة حتي بعد ما بدأوا يعيدوا السلسلة كلها من الأول.
من ضمن كل أفلام السوبرهيروز اللي أنا إتفرجت عليها لا يحضر الي ذهني مشاهد فيها مشاعر تخليك تقول لنفسك اه فعلاً الشخصيتين دول بيحبوا بعض إلا مشهدين .. المشهد الأول في فيلم Superman الأولاني خالص لما Superman اللي كان بيجسده الممثل (كريستوفر رييفز Christopher Reeves) شال شخصية (لويس لاين) اللي جسدتها الممثلة (مارجوت كيدر Margot Kidder) بين السحاب و باسها .. المشهد الثاني في فيلم Spider-Man الأولاني خالص برده اللي أخرجه (سام رايمي Sam Raimi) لما Spider-Man اللي كان بيجسده وقتها (توبي ماجواير Toby Maguire) كان متشعلق و راسه تحت و رجله فوق و البنت اللي بيحبها (ماري جاين واتسون Mary Jane Watson) اللي جسدتها الممثلة (كريستين دانست Kristen Dunst) شالت القناع بتاعه عشان تبوسه من شفايفه و الدنيا بتشتي وجو رومانسي فاضله شوية شموع و حد بيعزف كمان و طرابيزة و كوبايتين لمون .. ده بيخليني أسأل .. هي أفلام السوبرهيروز حتفضل كلها ضرب ضرب مفيش أي مشاعر خالص؟
الحقيقة اه و ده لسببين: بص لأي فيلم من نوعية الأفلام الرومانسية حتلاقي إن الفيلم مقسوم 3 حتت: حلاوة البدايات و خازوق في نص الفيلم بيخلي البطل و البطلة يسيبوا بعض و أخيراً النهاية اللي البطل بيعمل كل حاجة هو قال إنه مش حيعملها في أول الفيلم عشان يثبت للبطلة إنه بيحبها .. مفيش فيلم رومانسي حتلاقيه بيتكلم عن معاناة البطل في توضيب الشقة أو إزاي في الخطوبة هي بتتخانق معاه عشان لقت نمرة بنت علي موبايله أو مش حتلاقي فيلم رومانسي بيتكلم عن خناقة أي إتنين متجوزين يا تري وقفة العيد الكبير حنقضيها عند أمي ولا عند أمك .. أفلام السوبرهيروز مضغوطة و مفيهاش حمل للهري ده كله .. لا حلاوة بدايات و لا خوزايق نهايات ولا أي حاجة من دي و ده يبقي السبب الثاني .. لما يبقي عندك فيلم زي Avenger: Endgame فيه أكتر من 50 ممثل كل واحد فيهم يقوم فيلم لوحده فإنت مش حتضيع دقايق في الفيلم عشان توري المشاهد إزاي هو بيكراش علي شخصية تانية لما ممكن الدقايق دي تروح في مشهد أكشن.
لو أخدت بالك إن الأفلام اللي بتنزل السينما الأيام دي أغلبها أفلام سوبرهيروز و أفلام رعب و خيال علمي و أفلام الرومانسية عماله تقل تقل تقل .. إذا كانت الأفلام الرومانسية عموماً في طريقها للإنقراض مش عايز المشاهد الرومانسية في أفلام السوبرهيروز هي كمان تنقرض .. أنا عارف إن ناس كتير في مصر مش مقتنعة بسلسلة Star Wars و شايفينها لعب عيال بس للي منكوا إتفرج علي السلسلة القديمة و الجديدة اللي بتتعرض حالياً بذمتك مش فيه فرق السما و الأرض بين العلاقة العاطفية الملهلبة المولعة بين شخصيتي الأميرة (ليا Leia) اللي جسدتها (كاري فيشر Carrie Fisher) و (هان سولو Han Solo) اللي جسدها (هاريسون فورد Harrison Ford) و بين العلاقات اللي شبه صحاب الجامعة بين أبطال السلسلة الجديدة .. بلاش Star Wars .. خد عندك سلسلة The Bourne .. في الجزء الأول The Bourne Identity شخصية (جايسون بورن Jason Bourne) كان بيعشق شخصية (ماري Marie) اللي قدمتها الممثلة (فرانكا بوتينتني Franka Potente) و يا عيني شخصيتها إتقلت في الجزء الثاني و عدي الجزء الثالث و الرابع و مشوفناش (جايسون بورن) بيكراش علي كلبة حتي .. سلسلة Fast & Furious بدأت بإتنين كابل بيحبوا بعض و خلصت علي شلة رجاله متصاحبين و مقضيينها شقاوة و تحس إن أي واحد فيهم عنده إستعداد يقضي حياته كلها مع صحابه يتشاقي معاهم ولا إنه يقضي يوم متجوز واحدة عشان تنكد عليه .. أحب بس أقول للناس اللي بتحب الرومانسية و أخص بالذكر البنات الوقت ده مش وقتكوا .. وقت Pretty Woman و You’ve Got Mail خلص و راح لحاله .. أهلا بيكوا في وقت الAvengers و كنت حقول Justice League بس يلا بقي أنتوا فاهمين قصدي.
المصدر:
مقالة بعنوان Why Don’t Superheroes Fall in Love Anymore? .. نشرت في جريدة The Guardian و ده لينك المقالة الأصلية:
ps://www.theguardian.com/film/2019/mar/13/why-dont-superheroes-fall-in-love-any-more
