لينك التسجيل الصوتي للمقالة علي Sound Cloud:
https://soundcloud.com/user-112011687-312727988/lord-of-the-rings-16
لو حد جه سألني إيه أكتر فيلم كان نفسك تشوفه في السينما أول ما نزل بس محصلش نصيب فحتكون إجابتي من غير أي تردد هي فيلم Lord of the Rings: Return of the King .. معاك إن فيه أفلام تانية لما إتعرضت في السينما جابتلنا كلنا صدمة نفسية إن إزاي حاجة زي دي تتعمل .. عندك مثلاً The Matrix أو Avatar بس السبب اللي خلاني أختار Return of the King مش بس الإبهار إنما النجاح التجاري و الفني لفيلم .. أفلام كتير أوي بتلاقيها مكنة فلوس بسم الله ما شاء الله يعني .. أفلام تانية تلاقيها إتعملت عشان تاخد جوايز .. بس إنك تعمل فيلم يقدر يحقق الإتنين مع بعض فدي حاجة ممكن تحصل في العمر مرة.
خليني بس أرجعك بالزمن لحفلة الأوسكار في فبراير 2004 .. قبل توزيع الجوايز كلنا كنا عارفين إن فيلم Return of the King مترشح ل11 جايزة أوسكار بس فيه نقطة .. الفيلم ده لو حبيت تصنفه فهو فيلم فانتازيا .. تاني .. فيلم Return of King و سلسلة Lord of the Rings كلها مش أفلام خيال علمي .. دي أفلام بتتكلم عن عالم خيالي أو فانتازيا و لحد السنة دي أفلام كتير أوي كانت بتتصنف علي إنها أفلام فانتازيا ربنا كرمها و إترشحت للأوسكار بس محصلش قبل كده خالص إن فيلم منهم ياخد جايزة أوسكار و خصوصاً أوسكار أحسن فيلم .. عشان تفهم النقطة دي أحسن تعالي ناخد مع بعض مقارنة بسيطة أوي بين Lord of the Rings و فيلم زي Avatar.
متستغربش لو سمعت معلومة إن ناس كتير بتعتبر روايات Lord of the Rings اللي كتبها الرجل اللي مجاش زيه (جيه أر أر تولكين J.R.R. Tolkien) هي شغل خيالي علمي .. ده معناه إن الأفلام اللي بتحكي الروايات هي كمان لازم تتصنف علي إنها أفلام خيال علمي زيها زي Avatar اللي تقدر تقول عليه فيلم خيالي علمي لإنه بيحكي عن سفر البشر لكوكب تاني و إزاي إحنا كبشر بنتعامل مع شعب ثاني له ثقافته و لغته و عاداته و تقاليده .. فيلم Avatar إترشح لأوسكار أحسن فيلم و مخدهاش .. فيلم Return of the King عملها .. أخر فيلم بيتصنف علي إنه خيال علمي أو خلينا نقول إنه ميكس بين الخيال العلمي و الفانتازيا و قدر ياخد أوسكار أحسن فيلم كان Shape of Water و اللي أنا شايفه فيلم زبالة و لو قارنته بReturn of the Ring فكأنك بتقارن فيلم اللمبي بفيلم الطريق إلي إيلات مع إن الإتنين شارك فيهم الفنان (محمد سعد).
الدماغ اللي ورا العالم بتاع Lord of the Rings زي ما قلتلك هو بني أدم جامد زحليقة إسمه (جيه أر أر تولكين) و فيه فيلم نزل السنة دي بيحكي قصة حياته إسمه Tolkien أنصحك جداً إنك تتفرج عليه .. لما الأخ (تولكين) كان في الجيش لما قامت الحرب العالمية الأولي و وسط بشاعة الحرب و الدم و الرصاص فهو بدأ يكتب .. خياله خلاه يبني عالم هو سماه الأرض الوسطي Middle Earth و بدأ يبني الشخصيات اللي فيه بكمية عمق و تفاصيل محدش في التاريخ حاول يوصلها قبل كده .. أكتر من 20 سنة و هو عمال يكتب و يتخيل كل صغيرة و كبيرة في العالم ده لحد ما في سنة 1937 إتنشرت أول رواية بتحكي عن اللي بيحصل في العالم ده اللي هي The Hobbit و دي كانت رواية يدوبك 200 ورقة مش معقدة أوي و مفيهاش تفاصيل كتير .. بعدها بعشرين سنة تانية قام نازلنا بالتقيلة Lord of the Rings .. رواية بالصلاة علي النبي كده 1,728 صفحة .. اللي أذهل الناس فعلاً لما الروايات إتنشرت هو كم العمق و الإهتمام بالتفاصيل .. (تولكين) مش هو أول بني أدم يخترع لغة جديدة اللي هي لغة الجن أو Elves .. الجديد بقي إنه عمل للغة دي قواعد نحو و صرف لحد ما وصل لمرحلة إنه قسمها للغتين و بقيت و إنت بتقرأ الروايات فاهم هو الفصل ده جه ليه؟ و إزاي؟
من الحاجات الغريبة جداً إن لما الرواية دي إتنشرت كانت لسه بريطانيا بتفوق من صدمة الحرب العالمية الثانية و كان لا فيه ورق و لا حبر يكفي إن كتاب واحد بالحجم ده يتطبع و يتنشر فإضطروا إنهم يقسموا الكتاب ل3 كتب إتنشروا خلال سنة .. مفيش بني أدم فيكي يا أوروبا مكنش بيتكلم عن الروايات دي أول ما نزلت .. و أول ما الناس بدأت تتكلم عنها إتقال إن ليه لا نعملها فيلم بس اللي وقف في الموضوع كان (تولكين) شخصياً و الرجل الحقيقة كان عنده حق .. وجهة نظره إن أي فيلم يتعمل بإمكانيات سينما الستينات عمره ما حيوفي الروايات حقها .. أنا عارف إن فيه ناس ممكن تزعل بس في رأيي الشخصي حاجة زي Lord of the Rings مليانه بكتير عن حاجة زي Game of Thrones مثلاً و أنا مش قصدي هنا إني أقلل من Game of Thrones قد ما هي محاولة إنك تفهم ليه (تولكين) كان ضد إن رواياته تتعمل أفلام في الوقت ده.
صحيح إن سواء Lord of the Rings أو Game of Thrones بتدور أحداثهم في عالم خيالي سواء بقي Middle Earth أو ويستروس Westros بس لو حتقارن بين العالمين حتلاقي حاجة غريبة جداً .. في Game of Thrones أغلب الشخصيات بشر عاديين عايشين في مدن عادية و يمكن أكتر مخلوقين تقدر تقول عليهم إنهم خياليين من دماغ المؤلف هم التنانين و الوايت ووكرز White Walkers .. علي الناحية الثانية Lord of the Rings دي فرح العمدة .. ده فيها بشر و فيها جن أو Elves و فيها أقزام Dwarfs و فيها شجر بيتكلم اللي هو الإنتس Ents و فيها الجن اللي مشو في سكة شمال اللي هم الأوركس Orcs و فيها السحرة اللي أقل واحد فيهم يمسح بكرامة (دامبلدور) الأرض (سوري لو إنت من الناس اللي بتحب سلسلة هاري بوتر) .. اه صحيح و فيها (جولوم Gollum) اللي يمكن هو أهم شخصية في الروايات كلها .. إنك تحاول تعمل فيلم بتتكلم فيه عن المولد ده كله حاجة مش سهلة و محتاجة تكنولوجيا أكيد مكنتش متاحة أيام ما (تولكين) كان عايش .. لما مخرج مجنون و لاسع حبتين زي (بيتر جاكسون Peter Jackson) هبت في دماغه إنه يعمل Lord of the Rings فيلم هو قال لنفسه إن حاجة معقدة زي دي مينفعش بأي حال من الأحوال إنك تتعامل معاها بالطريقة التقليدية اللي مخرجين الأفلام بيشتغلوا بيها.
أول خطوة كانت إنه يلاقي منتج أو شركة إنتاج ترضي تديله فلوس يعمل علي الأقل الجزء الأول فهو راح لشركة إسمها ميراماكس Miramax كان ماسكها رجل أنا إتكلمت عنه قبل كده إسمه (هارفي واينستين Harvey Weinstein) و اللي كان موافق إنه ينتج الفيلم بشرط إن سلسلة Lord of the Rings بأجزاءها الثلاثة بقدرة قادر تتعمل كلها في فيلم واحد .. اللي هو زي ما أنا أخدك أوديك لمطعم صبحي كابر و أقولك أنا عايز تدوق المنيو كلها و إنت قاعد .. (بيتر جاكسون) قاله طب خليها فيلمين و أنا حعرف أضغط الأحداث بس (هارفي واينستين) رفض و أصر إنهم يبقوا فيلم واحد عشان يوفر .. طبعاً (بيتر جاكسون) معجبوش الكلام و بدأ يدور تاني لحد ما رجله ودته لشركة تانية إسمها New Line Cinema.
(بيتر جاكسون) كان فاضل يبوس إيديهم يدوله فلوس عشان يعمل فيلمين فوسط الكلام رئيس الشركة (بوب شاي Bob Shaye) سأله سؤال منطقي أوي .. هو يا إبني مش فيه 3 كتب طب إنت ليه عايز تعمل فيلمين بس ما تعمل 3 أفلام .. مش بس كده .. دول خلوه يصور و يكتب الأجزاء الثلاثة مع بعض .. تاني .. (بيتر جاكسون) أخرج و صور الأجزاء الثلاثة كأنهم فيلم واحد مع بعض .. فيه منكوا أكيد بيسأل نفسه دلوقتي طب ليه؟ .. ليه يزاول نفسه بالشكل ده؟ .. الفكرة كلها إن العالم بتاع Lord of the Rings معقد و كله تفاصيل و إحتمالات الأخطاء فيه عالية .. إفرض أنا عملت الجزء الأول Fellowship of the Ring و عرضته و إكتشفت بعد ما إتعرض إن كان ممكن حاجة تتغير أو إني عملت غلطة خلتني مضطر إني أصور الجزئين الثاني و الثالث عليها .. طب ما أنا أصور ال3 أجزاء مع بعض عشان لو غيرت في حاجة أقدر أعدلها في الأفلام كلها قبل ما تتعرض .. التصوير بدأ سنة 1999 في نيوزيلاندا و إستمر 438 يوم كاملين.
تأثير Lord of the Rings في السينما مينفعش حد يقلل منه .. هنا أنا مش بتكلم عن التصوير و الموسيقي و الممثلين .. لا خالص .. أنا بتكلم عن صنعة السينما نفسها .. مبدأياً كده محدش بقي يخاف يقول أنا عايز أحول كتاب أو سلسلة روايات لفيلم .. سنة 2005 بدأت تتعرض سلسلة أفلام The Chronicles of Narnia اللي برده مبنية علي سلسلة روايات مشهورة أوي .. سنة 2007 إتعرض فيلم The Golden Compass و اللي مبني علي سلسلة روايات إسمها His Dark Materials و اللي علي فكرة قناة HBO حتحولها لمسلسل و برده أنصحك إنك تبدأ تتفرج عليه لإن الكلام إن المسلسل ده حيعدي Game of Thrones .. حتي فكرة إن يبقي عندك جزئين فيلم تقرر إنك تصورهم مع بعض بدأ مخرجين كتير يطبقوها .. الجزئين الثاني و الثالث بتوع سلسلة The Matrix اللي هم The Matrix Reloaded و The Matrix Revolutions إتصوروا مع بعض في وقت واحد .. الجزئين الثاني و الثالث من سلسلة Pirates of the Caribbean اللي هم Dead Man’s Chest و At World’s End برده إتصوروا مع بعض في وقت واحد.
بصوا أنا ممكن أتكلم عن السلسلة دي من هنا لحد بعد بكره و مزهقش بس أنا مش عايز أطول عليكوا أكتر من كده .. أنا بس حبيت أفتكر معاكوا سلسلة أفلام أنا حبيتها جداً و كان نفسي يبقي عندي الفرصة إني أتفرج عليها في السينما بس يلا قدر الله و ما شاء فعل.
المصادر:
- مقالة بعنوان 15 years later, Lord of the Rings: Return of the King is still a high mark for fantasy films .. نشرت علي موقع إسمه Fansided.com و ده لينك المقالة الأصلية:
ps://fansided.com/2018/12/17/lord-of-rings-return-king-oscars-fantasy-15-year-anniversary/ - مقالة بعنوان Looking Back at What Made the Lord of the Rings Trilogy Special, 15 Years Later .. نشرت في موقع The Verge و ده لينك المقالة الأصلية:
http://www.theverge.com/2016/12/23/14055580/lord-of-the-rings-trilogy-movies-peter-jackson-15th-anniversary
