ألبوم الصور ده كان المفروض أسميه تباً لحياة الفقراء بس حسيت إني حبان بحسد ولا حاجة .. العروسة اللي قدامك دي إسمها سيرين Serene و دي حضرتك تبقي يخت بس يخت نظيف شوية فبيتسمي ميجايخت Megayacht و ست الحسن دي إتصممت مخصوص عشان خاطر زبون من الزباين التقيلة أوي و هو رجل الأعمال الروسي (يوري شيفلر Yuri Shefler) اللي بعد كده باعه ب400 مليون دولار كاش و علي الطرابيزة لولي العهد السعودي (محمد بن سلمان) .. سيرين عشان تتعمل إشتغل عليها شركتين:
- الشركة الأولي هي ترسانة صناعة السفن الإيطالية فينكانتييري Fincantieri و أساساً الشركة دي مش بتصنع يخوت فتقدر تقول سيرين تبقي أول العنقود و أول يخت تصنعه الشركة و الكلام ده كان سنة 2011 .. ممكن تستغرب إن طول سيرين حوالي 132 متر بس فعلياً هي مش أضخم يخت في العالم إنما الثالث .. اليخت الأضخم علي مستوي العالم إسمه الكسوف Eclipse طوله 165 متر و مملوك لرجل الأعمال الروسي برده (رومان إبراموفيتش) و اللي إنت لو ليك في الكورة حتبقي عارفه بإنه كان المالك بتاع نادي تشيلسي الإنجليزي قبل ما الحكومة البريطانية تجبره يبيعه .. ثاني أضخم يخت علي مستوي العالم إسمه نصر المحيط Ocean Victory طولة 138 متر و مملوك برده لرجل أعمال روسي إسمه (فيكتور راشيكوف Victor Rashikov) .. بس شوف رغم إن سيرين مش أضخم يخت في العالم بس هي أحلي يخت في العالم و السبب في ده هي الشركة التانية اللي إشتغلت عليها.
- إذا كانت ترسانة فينكانتييري بنت سيرين كسفينة فاللي عمل الديكور بتاعها أو Interior Design يبقي (باسكال رايموند Pascal Raymond) من مكتب Raymond Langton Design .. لو إنت مهندس ID تخيل يجيلك كلاينت يقولك عندي فيلا مساحتها الداخلية 4,500 متر مربع و حاول تستوعب كم الشغل المطلوب منك عشان تفرش المساحة دي كلها.
ده يخت فيه مهبط طيارات هليكوبتر .. فيه حمام سباحة و بالمناسبة حمام السباحة ده ممكن يتغطي بحيث يتحول لمهبط طيارات هليكوبتر إضافي أو مكان رقص Dance Floor زي قاعات الأفراح كده .. ده يخت من 7 أدوار بحيث أهم مكان فيه هو أوضة صاحب الياخت و دي عبارة عن سويت زي بتاع الفنادق كده و السويت ده له أسانسير مخصوص .. غير السويت ده فيه 12 أوضة فندقية كل أوضة فيها سريرين فإنت بتتكلم عن 24 سرير .. يخت فيه غواصة ملحقة بيه عشان الضيوف يركبوها و يتفرجوا علي السمك .. لو مش حابب تركب غواصة ففيه أوضة حيطانها زجاج في قاع اليخت عشان تتفرج علي السمك براحتك .. يخت في قاعة سينما و بيوتي سنتر متكامل.
(يوري شيفلر) اللي سيرين إتعملت عشانه رغم إنه ملياردير و هو صاحب شركة SPI Group و دي أكبر شركة بتبيع فودكا في العالم و أكتر ماركة بتبيعها هي Stolichmaya و رغم إن مجلة Forbes قالت إن في مارس 2022 إجمالي ثروته 1.5 مليار دولار إلا إنه مكنش عنده مشكلة يأجر سيرين زي ما يكون شاليه في الساحل الشمالي .. من ضمن اللي أجروا اليخت كان رجل الأعمال (بيل جيتس) اللي في 2014 دفع 5 مليون دولار في الأسبوع عشان يقضي شهر علي اليخت .. سنة 2020 (محمد بن سلمان) بعت مندوب عشان يخلص صفقة شراء سيرين من (يوري شيفلر) و البيعة خلصت في ساعات و بمجرد ما الفلوس إتحولت لحساب (يوري شيفر) ف(محمد بن سلمان) خد منه مفاتيح اليخت و قاله يتفضل بره .. بس مش دي القضية .. القضية إن سنة 2017 (محمد بن سلمان) إشتري لوحة سالفاتور ماندي Salvator Mundi اللي رسمها (ليوناردو دافنشي) و دفع فيها كاش 500 مليون دولار و بكده اللوحة بقت أغلي عمل فني يتباع في التاريخ .. تخيل إن (محمد بن سلمان) حاطط اللوحة جوه سيرين يعني اليخت محطوط فيه لوحة أغلي من اليخت نفسه.
لوحة سالفاتور ماندي Salvator Mundi اللي رسمها (ليوناردو دافنشي) و كان المفروض إن (محمد بن سلمان) يهدي اللوحة دي لمتحف اللوفر أبوظبي بس هو رجع في كلامه و حط اللوحة في يخت سيرين.
المصدر:
مقالة بعنوان Saudi prince MBS bought this $400 million megayacht from a Russian Oligarch and immediately kicked him out. The 439 feet long vessel has two helipads, a submarine, and a nightclub. The royal has also hung a $450M painting in it نشرت في موقع Luxury Launches و ده لينك المقالة الأصلية:
https://luxurylaunches.com/transport/saudi-prince-mohammed-bin-salman-serene-megayacht.php
