مسلسل The Crown .. لما الدراما تبقي نسخة طبق الأصل من التاريخ.

الألبوم ده يوريك أهمية الإهتمام بالتفاصيل في الدراما .. إنت بتلاقي مخرجين كتير لما بيشتغلوا علي أعمال درامية مبنية علي أحداث حقيقية يقولك أصل الدراما مش فيلم وثائقي و لازم المتفرج يحط في إعتباره و هو بيتفرج إنه يسيب المخرج يسرح شوية بخيالة في الأحداث .. بس لو حنسمح لنفسنا إن إحنا نصدق الكلام ده فلازم علي الناحية الثانية يبقي فيه ناس في طاقم العمل تلتزم قدر الإمكان بالدقة التاريخية للأحداث .. خصوصاً الناس اللي بتشتغل في حتة الديكور و إختيار الملابس و الحقيقة إن مسلسل The Crown عموماً و خصوصاً الجزء الرابع بتاعه يعتبر درس مهم أوي في الحتة دي .. الألبوم ده عبارة عن شوية صور بين اللي حصل فعلاً في التاريخ و بين إزاي الحدث ده إنت شفته جوه عمل درامي .. في ناس من جيل الثمانينات القديمة اللي زي حالاتي كانوا عاصروا الفترة دي و عاشوها و بالنسبة ليهم الأميرة (ديانا) كانت زيها زي (سوزان مبارك) كده فإني أشوف مسلسل درامي بيحكي قصتها فبالنسبة ليا بالذات دي حاجة أنا كنت مستنيها و الحقيقة إن الناس بتاعة مسلسل The Crown مخيبوش ظني.

علي اليمين الصورة الحقيقية للملكة (إليزابيث الثانية Elizabeth II) في حفل إستقبال الحرس الملكي في العاصمة البريطانية لندن سنة 1979 .. علي الشمال الممثلة البريطانية (أوليفيا كولمان Olivia Colman) في دور الملكة (إليزابيث الثانية) ضمن أحداث مسلسل The Crown.

الصورة اللي تحت ألتقطت في أول يوم (مارجريت ثاتشر Margret Thatcher) تروح شغلها في منصبها الجديد كرئيسة وزراء بريطانيا سنة 1979 .. الصورة اللي فوق الممثلة (جيليان أنديرسين Gillian Anderson) في دور (مارجريت ثاتشر) ضمن أحداث مسلسل The Crown و تجسيد لنفس الأحداث اللي حصلت في اليوم ده.

الصورة اللي تحت ألتقطت سنة 1981 و دي تبقي صورة مجمعة للحكومة البريطانية الجديدة المشكلة من حزب المحافظين الحاكم وقتها برئاسة الست الوحيدة اللي في الحكومة (مارجريت ثاتشر Margret Thatcher) .. الصورة اللي فوق هي تجسيد اللحظة دي زي ما شفناها من مسلسل The Crown.

الصورة اللي تحت إتصورت سنة 1981 في عزبة بالمورال Balmoral Estate في أسكتلندا للأمير (تشارلز Charles) و الأميرة (ديانا Diana) .. الصورة اللي فوق هي تجسيد اللحظة دي في مسلسل The Crown و حاول بس تستوعب كم الإهتمام بالتفاصيل من الناس اللي عملت المسلسل سواء من حيث المكياج أو الديكور أو حتي الملابس.

الصورة اللي علي اليمين إتصورت علي سلالم قصر باكنجهام يوم إعلان خطوبة الأمير (تشارلز Charles) علي الأميرة (ديانا Diana) .. في الصورة اللي علي الشمال هي تجسيد اللحظة دي في مسلسل The Crown و برجع تاني أجيب سيرة تصميم الملابس و إزاي كانوا مهتمين أوي بالدقة التاريخية للحظات اللي زي دي.

الفستان اللي لبسته الأميرة (ديانا) في فرحها بين الحقيقة اللي شفناها في التليفزيون و بين الدراما زي ما شفناها في مسلسل The Crown.

برده الزي الرسمي اللي لبسه الأمير (تشارلز Charles) يوم فرحه بين الحقيقة و بين الدراما.

معروف إن تاني أشيك ست في أي فرح هي أم العريس .. الملكة (إليزابيث الثانية Elizabeth II) يوم فرح إبنها ما بين الحقيقة و زي ما شفنا الممثلة (أوليفيا كولمان Olivia Colman) بتوريهولنا في مسلسل The Crown.

الصورة اللي تحت تبقي رئيس الوزراء البريطانية (مارجريت ثاتشر Margret Thatcher) في حفلة إستقبال المحاربين اللي شاركوا في إنتصار بريطانيا علي الأرجنتين في حرب جزر فوكلاند سنة 1982 .. الصورة اللي فوق هي تجسيد اللحظات دي زي ما شفناها في مسلسل The Crown و الممثلة (جيليان أنديرسين Gillian Andersen) بتقدم شخصية المرأة الحديدية أو Iron Lady (مارجريت ثاتشر).

الصورة اللي علي اليمين هي وصول الأمير (تشارلز Charles) و معاه الأميرة (ديانا Diana) و إبنهم الكبير الأمير (وليام William) لأستراليا في زيارة رسمية سنة 1983 .. الصورة اللي علي الشمال هي تجسيد اللحظة دي زي ما شفناها في مسلسل The Crown.

المانشيت اللي هز عرش بريطانيا .. واحدة من أشهر إصدارات الجرايد في التاريخ و اللي عمله جرنان Sunday Times البريطاني لما نشر ريبورتاج بيقول إن الملكة (إليزابيث الثانية) مش عاجبها سياسات (مارجريت ثاتشر) رئيسة الوزراء.

إستقبال الجماهير الأسترالية للأميرة (ديانا) بين الواقع و الدراما .. الأميرة (ديانا) كانت بدأت بتحب تلبس فساتين من تصميم ممصمي أزياء مش لازم يبقوا مشاهير بس بيحبوا يعبروا عن رأيهم في اللبس اللي هم بيصمموه زي الفستان اللي هي لابساه ده من تصميم (دونالد كامبيل Donald Campbell).

الصورة اللي تحت هي رقصة الأميرة (ديانا) مع راقص الباليه (واين سلييب Wayne Sleep) في حفلة إتعملت في دار الأوبرا الملكية البريطانية في لندن سنة 1985 و الرقصة دي كانت علي أغنية Uptown Girl اللي غناها (بيلي جويل Billy Joel) .. الصورة اللي فوق هي تجسيد الرقصة دي في مسلسل The Crown.

المصدر:

مقالة بعنوان 27 “The Crown” Season 4 Moments Vs. The Real Life Events That Show How Detailed The Series Is نشرت علي موقع BuzzFeed و ده لينك المقالة الأصلية:
https://www.buzzfeed.com/noradominick/the-crown-season-4-moments-vs-real-life