ليه؟ .. إزاي؟ .. إمتي؟ .. لو عندك أي مشكلة في حياتك قرفاك في عيشتك وعايز تخلص منها اسمع مني ومتراجعش ورايا وحاول تجاوب علي الثلاث أسئلة اللي قلتهملك من شوية .. ليه المشكلة دي حصلت؟ .. إزاي أقدر أصلح اللي حصل بعد ما قدرت أعرف من إجابة السؤال الأولاني السبب الأساسي ورا المشكلة؟ .. إمتي أقدر أحقق ده وهل أنا محتاج أستني شوية علي العلاج لحد ما يبقي معايا مصاريفه والوقت اللي ححتاجه عشان أحل المشكلة؟ .. أنا عارف إن دلوقتي إنت حاسس إني عايش دور اللايف كوتش اللي مليين السوشيال ميديا بس صدقني الطريقة دي متجربة وبتنفع سواء كنت بتتكلم عن مشكلة بتواجه بني أدم أو بتواجه دولة بس اللي محدش حتلاقيه بيقولك عليه إن عشان الطريقة دي تجيب نتيجة إنت محتاج تبقي صادق مع نفسك خصوصاً وإنت بتحاول تجاوب علي السؤال الأولاني .. هي المشكلة دي حصلت ليه؟
يوم 24 فبراير 2022 العالم كله صحي علي مشكلة وهي إن الرئيس الروسي (فلاديمير بوتين Vladimir Putin) لبس بلده وأوروبا والعالم كله بما فيهم إحنا في الحيط لما قرر يغزو أوكرانيا .. (بوتين) كان عنده مشكلة وهي إنه حاسس إن البساط بيتسحب من تحت رجله .. الغرب متمثلاً في الكيان اللي اسمه حلف شمال الأطلنطي أو NATO بيتسحب زي الثعبان وبقي بيعصر روسيا زي الأناكوندا وده كان باين أوي في الكلام اللي كان بيتقال إن الأوكرانيين عايزين ينضموا للحلف .. عشان برده تحاول تبقي مقدر هو (بوتين) واللي حوليه كانوا شايفين الدنيا إزاي تخيل إن وقت حرب الإستنزاف وإحنا والإسرائيليين دايرين تلطيش في بعض تيجي السودان اللي كانت زمان إحنا وهي حاجة واحدة تطلع تمضي إتفاقية سلام مع إسرائيل .. جميل .. (بوتين) طبق القاعدة اللي بقولك عليها إنه بدأ يحاول يجاوب علي السؤال الأولاني هو ليه المشكلة دي حصلت فلقي إن الإجابة هي إن اللي ماسك أوكرانيا دلوقتي (من وجهة نظره علي الأقل) كوميديان طيشة عايز يرمي نفسه في حضن الأمريكان .. (فلوديمير زيلينكسي Volodymyr Zelenskyy) اللي يبقي رئيس أوكرانيا (بوتين) شايفه ميفرقش حاجة عن (علي ربيع) مثلاً بتاع مسرح مصر .. حلو .. كده عرفنا إن (زيلينسكي) هو السبب طب إيه الحل؟ .. الرجل ده يتشال من علي الكرسي ويترمي في الشارع بس مينفعش يتقتل كده عادي لا .. إحنا عايزين نفرج الدنيا كلها عليه .. يبقي يتشال بعد ما بلده كلها تبقي تحت إيدنا .. قشطة .. طب وإمتي؟ .. عملية عسكرية أخرها أسبوعين ويتقال لزعيم الأمة (بوتين) تعالي ألقي خطاب النصر من قلب العاصمة الأوكرانية كييف .. السؤال دلوقتي .. إحنا وصلنا لحد فين؟
إنت قدام حرب مات فيها عشرات الألاف من الأوكرانيين .. إترحل 14 مليون أوكراني بره بلدهم .. بقيت قدام بلد بتتكلم عن فاتورة إعادة إعمار ممكن توصل 100 مليار دولار مستريح .. بلد قواتها المسلحة خسرت 100,000 مقاتل ما بين قتيل وجريح .. الأرقام دي تحسسك إن روسيا فعلاً كسبت الحرب زي ما (بوتين) كان عايز وحاسب بس مش ده اللي حصل .. لو صدقت كلام المخابرات النرويجية فالروس خلال سنة من الحرب مات ليهم 180,000 مقاتل ودول حضرتك 12 ضعف عدد اللي ماتوا من القوات المسلحة السوفيتية في غزوها لأفغانستان.
اللي إتعلمناه من اللي حصل إن (بوتين) واللي حوليه جاوبوا علي الثلاث أسئلة اللي في الأول غلط .. هو كان عنده حق يحس إن بلده بتتعرض لخطر واضح وصريح من الغرب وكمان عنده حق إن لو أوكرانيا باعت روسيا فحيبقي نهار أسود يا أستاذ (ممتاز) بس ده مش معناه إن الإجابة إنك تخلص من (زيلينسكي) .. وحتي لو أصريت علي إنك تخلص منه فالحرب مكنتش هي الطريقة الصح .. دلوقتي إنت عايز تقنع أوكرانيا إن مستقبلها مش مع الغرب فلازم تحاول تعرف إنت ممكن تقنعها إزاي .. هل فيه طرق إقتصادية وسياسية؟ .. هل المخابرات العامة بتاعتك ممكن يبقي ليها دور؟ .. هل أساساً اللي إنت عايز تحققه الحرب هي أحسن طريقة ليه؟ .. طب لو الحرب هي الطريقة الوحيدة هل قواتك المسلحة جاهزة إنها تنفذ المطلوب منها؟ .. هل دي حرب ممكن تطول منك وتبهوق معاك فتبقي محتاج تشحن الروح المعنوية لشعبك .. وفوق ده كله تبقي صادق مع نفسك .. تبقي عارف حدود إمكانياتك إيه وتبقي مؤمن بإن لا يكلف الله نفساً إلا وسعها وأدي الأمريكان قدامك أهم تقدر تعتبرهم درس قاسي أوي والحقيقة إن أنا شخصياً مش فاهم إن إحنا إزاي مش بنتكلم كتير أوي عن ده.
الأمريكان في أفغانستان صرفوا وقت عشرين سنة وصرفوا فلوس فوق 2.3 ترليون دولار .. ليه؟ .. عشان قال إيه يحولوا بلد عمرها ما عرفت إستقرار سياسي ولا إقتصادي ولا أهلها أصلاً طايقين بعض وطول عمرها عايشة في فساد مسوس في كل حتة فيها وعايز تخلي مقلب الزبالة ده اللي إسمه أفغانستان بقدرة قادر يبقي النسخة الإسلامية من النرويج .. نفس الكلام مع العراق .. إيه اللي يخليك تتخيل إنك حتقدر تحول بلد عمر شعبها ما جرب يعني إيه إنتخابات عشان يبقي واحة الديموقراطية في الشرق الأوسط؟ وهل إنت متخيل إن الحرب هي أحسن طريقة توصل بيها لده؟ .. الأمريكان زي الروس سألوا نفسهم الثلاث أسئلة اللي في أول سطر وبسم الله ما شاء الله زيهم زي الروس جاوبوا غلط والنتيجة بقي عندك شاب أمريكاني مبقاش عنده رغبة إنه يتطوع في جيش بلده ووزارة الدفاع الأميريكية بقت محتاسة ومش لاقيه عساكر ينضموا ليها .. الأمريكان في العراق وأفغنستان زيهم زي الروس في أوكرانيا وهم بيحاولوا يوصلوا للي هم عايزينه نسوا أهم نقطة .. يبقوا صادقين مع نفسهم.
فيه حد أقنع (جورج بوش الإبن George W. Bush) و(بوتين) إنهم جامدين زحليقة ومحدش يعرف يقف قدامهم .. (بوتين) تخيل إن أوكرانيا دي عايش فيها شوية مهزقين وماسكها شوية هلافيت حينخوا مع أول ألم ينزل علي وشهم .. (بوتين) زيه زي (بوش) حاوط نفسه بشوية رجاله بشنبات ميعرفوش حاجة غير كل ما يشوفوا الرئيس يقوموا يقفوا ويهتفولوه طويل العمر يطول عمره يزهزه عصره ينصره علي مين يعاديه .. واحد زي (فاليري غيراسيموف Valery Gerasimov) رئيس هيئة الأركان المشتركة للقوات المسلحة الروسية اللي كان رأيه إن 140,000 عسكري روسي كافيين جداً عشان يسيطر علي تاني أكبر بلد في أوروبا من حيث المساحة وعايش فيها سادس أكبر تعداد سكاني اللي هو عايز تقوله حسبتها إزاي دي يا جهبز الفلاسفة .. مفيش حد من اللي حولين الرئيس كان عاقل إنه يقوله يا ريس بس إفرض لو الأمريكان والأوروبيين عملوا مع أوكرانيا زي ما عملوا مع الإسرائيليين في حرب أكتوبر 1973 وبقوا يبعتولهم سلاح عن طريق جسر جوي مبيقفش.
لسه الحرب قدامها شوية خلي بالك .. صحيح الروس مات ليهم كتير وصرفوا كتير بس قواتهم المسلحة رغم مشاكلها الكتير بس تقدر تقف علي رجليها أو علي الأقل تحافظ علي الأراضي اللي هي إحتلتها من أوكرانيا .. ده غير إن سمعة القوات المسلحة الروسية أساساً إنها لازم تعك شوية في الأول عاملين زي الأهلي في بطولة أفريقيا كده .. الأمريكان ما أحب ما عليهم يبعتوا ذخيرة وسلاح للأوكرانيين عشان بس يوروا العالم إزاي السلاح الأمريكان دايس علي وش السلاح الروسي .. الأوروبيين كل اللي هاممهم إنهم يوفروا إحتياجاتهم من الغاز الطبيعي ودلوقتي المنتجين بقت بتترمي علي عتبة باب بيتهم عشان يبيعولهم .. دي حرب مش حتخلص لا النهاردة ولا بكره .. دي حرب حتنتهي في حالة واحدة بس وهي إننا نصحي الصبح منلاقيش (بوتين) بقي رئيس روسيا.
المصادر:
- مقالة بعنوان Why Putin’s invasion has been such a disaster نشرت في موقع قناة MSNBC الأميريكية وده لينك المقالة الأصلية:
https://www.msnbc.com/opinion/msnbc-opinion/putins-invasion-ukraine-disaster-rcna72207
