الغزو الروسي لأوكرانيا غير حاجات كتير أوي حولينا .. من الزيادة الغير منطقية أحياناً في الأسعار اللي خلت سعر الخضار في السوق يزيد لحد الخوف من إن تقوم حرب نووية بين روسيا و أميركا .. الحرب دي خلتنا عايشين في عالم مفيهوش كتاب يحكمه و يمكن اللي زود أوي الإحساس ده هو القرار اللي طلع من الرئيس الروسي (فلاديمير بوتين) في فبراير 2023 بإن بلده قررت تعليق مشاركتها في إتفاقية New START لحظر إنتشار الأسلحة النووية اللي مضتها مع أميركا وبالمناسبة كلمة START دي إختصار جملة معاهدة تقليل الأسلحة الإستراتيجية Strategic Arms Reduction Treaty .. و يمكن عشان إحنا بنترعب من لما كلمات زي حرب و روسيا و أسلحة نووية تتحط في نفس الجملة فناس كتير علي السوشيال ميديا إتكلمت عن إن القرار ده زي ما يكون بيقول زي الفنان (أحمد عز) في فيلم ولاد رزق .. أنا حضرب بالنووي يا حارة اللهم بلغت اللهم فأشهد .. زود علي كده كمان حقيقة إن 90% من الرؤوس النووية علي مستوي العالم دلوقتي متوزعة بين روسيا و أميركا بحيث الأغلبية موجودة في روسيا اللي عندها 6,000 راس نووي .. يمكن عشان كده النهاردة إحنا جايين نتكلم شوية عن الموضوع ده بإننا نحاول نجاوب علي كذا سؤال:
- تطلع إيه إتفاقية New START دي بالصلاة علي النبي و بتعمل إيه في عيشتها؟
- إيه اللي خلي (بوتين) يقرر إنه يعلق مشاركة بلده في الإتفاقية وهل ده معناه إنه إنسحب منها؟
- هي الدنيا رايحة علي فين بعد كده؟
تطلع إيه إتفاقية New START دي؟
بمنتهي البساطة الإتفاقية دي بتقول إن لازم روسيا و أميركا يقللوا من عدد الأسلحة النووية الهجومية اللي عندهم بحيث الإتفاقية دي إتمضت لأول مرة سنة 1991 تحت مسمي START 1 و كانت بين أميركا و الإتحاد السوفيتي و بدأت تخش حيز التنفيذ سنة 1994 .. النسخة الأولانية خالص دي من الإتفاقية كانت بتقول إن سواء أميركا أو روسيا حيقللوا مش بس عدد الرؤوس النووية إنما كمان حيقللوا عدد القاذفات و دي تبقي الطيارات اللي بتشيل القنابل النووية عشان ترميها فوق الهدف اللي عايزه تدمره و كمان تقلل عدد الصواريخ العابرة للقارات Intercontinental Ballistic Missiles أو ICBMs بحيث مجموع القاذفات و الصواريخ العابرة للقارات كلهم علي بعض لما تجمعهم سوا ميزيدوش عن 1600 لكل بلد فيهم و ده لوحده يخليك تسأل إذا كانوا حيقللوهم يبقوا 1600 أومال هم كانوا كام أصلاً .. مش بس كده .. كمان عدد الرؤوس النووية اللي عند كل بلد فيهم مينفعش تزيد عن 6000 تحت أي ظرف .. و عشان كل بلد تبقي متطمنة فإتحط في الإتفاقية بند إن تقدر كل بلد تبعت لجنة تفتيش للبلد الثانية عشان تتأكد بنفسها إن الدنيا ماشية صح .. و الحقيقة إني لازم أشهد دلوقتي إن الإتفاقية دي بالذات عملت اللي عليها و زيادة .. سنة 1985 إنت كنت عايش في عالم موجود فيه فوق 64,000 رأس نووي .. جري الشريط لسنة 2022 حتلاقي العالم مفيهوش غير 12,700 رأس نووي و ده إنجاز يستحق إننا نقول للبلدين عليه برافو و تسلم الأيادي.
إتفاقية START 1 إنتهي العمل بيها في ديسمبر 2009 بس زي ما قلتلك الإتفاقية كانت شغاله زي الفل و محدش بيشتكي منها لدرجة إن لمدة 5 شهور الروس و الأمريكان قعدوا مع بعض عشان يتفقوا علي تمديدها تحت مسمي إتفاقية New START ويوم 8 إبريل 2010 إتمضت إتفاقية New START بين الرئيسين الأميريكي (باراك أوباما) و الروسي (ديميتري ميدفيديف) في العاصمة التشيكية براغ بحيث الهدف من الإتفاقية دي بمنتهي البساطة إن سواء أميركا أو روسيا مينفعش بأي حال من الأحوال إن أي بلد فيهم يبقي عندهم في الخدمة فوق 1,550 رأس نووي و إن برده بأي حال من الأحوال مينفعش عدد الصواريخ العابرة للقارات أو عدد القاذفات اللي تقدر تشيل رؤوس نووية يزيدوا عن 700 وعشان البلدين يبقوا متطمنين فالإتفاقية قالت إن كل بلد من حقها تطلب إنها تزور المنشأت النووية بتاعة البلد التانية لحد 18 مرة في السنة عشان تشوف بعنيها إن محدش بيلعب بديله .. فضلت الدنيا ماشية زي الفل لحد مافي مارس 2020 زيارات التفتيش إتأجلت بسبب جائحة فيروس كورونا Covid-19 .. الإتفاقية دي إتمضت زي ما قلت سنة 2010 و بدأت تشتغل يوم 5 فبراير 2011 و إتجددت سنة 2021 لما جدو (جو بايدن) مسك الرئاسة لمدة خمس سنين كمان يعني المفروض إنها حتنتهي صلاحيتها في فبراير 2026 .. كان المفروض إن بعد ما ربنا زاح عننا جائحة كورونا إن في نوفمبر 2023 تتعمل جولة مفاوضات بين الروس و الأمريكان في مصر عشان يتفقوا حيرجعوا تاني الزيارات إزاي و إمتي بس بسبب الغزو الروسي لأوكرانيا الروس أجلوا المفاوضات دي لأجل غير مسمي.
إيه اللي خلي الروس ياخدوا القرار ده؟
الحقيقة إن محدش يقدر يقولك الإجابة إيه و هو متؤكد من كلامه لإن كل طرف شايف الدنيا من وجهة نظره .. حاول تتخيل إن الخناقة بين روسيا و أميركا دلوقتي هي أشبه ما تكون بالخناقة بين إتنين متجوزين بحيث كل واحد عايش دور الضحية و كل واحد شايف إن الطرف التاني هو السبب في خراب البيت .. يعني مثلاً لو قريت نص الخطاب بتاع حالة الإتحاد اللي (بوتين) أعلن فيه تعليق دور بلده في إتفاقية New START حتلاقي المبرر اللي هو قاله إن المخابرات العامة الروسية FSB شايفة إن وزارة الدفاع الأميريكية بتحاول تعيد تاني الإختبارات النووية ودي الحاجة اللي مخلية روسيا بتقول إن الأمريكان دول عيال صغيرة بيرجعوا في كلامهم فإحنا حنبقي أعيل منهم ولو رجعوا يجربوا أسلحة نووية فإحنا كمان حنفرقعلنا شوية قنابل نووية .. علي الناحية الثانية الأمريكان هم اللي شايفين إن الروس هم المسئول الأول و الأخير و إنهم هم اللي خرقوا بنود الإتفاقية لما منعوا الأمريكان يزوروا المنشأت النووية الروسية.
نقطة تانية وهي إن الروس بيقولوا و الحقيقة إن عندهم حق في الحتة دي إن لما إحنا ننسحب من إتفاقية خفض أسلحة إياكش حتي خفض بنادق الرش الناس بتتجنن بس لما الأمريكان يعملوا نفس الحركة بيبقي علي قلب الناس زي العسل .. يعني مثلاً .. الأمريكان وقت حكم كيس الشيتوس الحجم العائلي (دونالد ترامب) إنسحبوا من إتفاقية حظر إنتشار الأسلحة النووية المتوسطة المدي Intermediate-Range Nuclear Forces Treaty اللي معروفة باسم INF و محدش قال للأمريكان سلامات يا أم أحمد ولا حتي لما (ترامب) برده خلي بلده تنسحب من إتفاقية السماء المفتوحة Open Skies Treaty اللي سمحت بطيران طيارات الاستطلاع الغير مسلحة.
هو المستقبل مخبي لينا إيه؟
فيه ناس شايفه إن الموضوع مجرد فرش عضلات ملوش أي علاقة بالواقع و المبرر بتاع الناس دي هو إن لو (بوتين) قرر إنه يبدأ يزود من قدرات بلده النووية مكنش بس علق مشاركة بلاده في إتفاقية New START و وقف الزيارات للمنشأت النووية بتاعته إنما كمان كان المفروض يوقف مشاركة البيانات و الأرقام الرسمية للترسانة النووية بتاعته بينه و بين الأمريكان و لسه لحد دلوقتي الجزء ده من الإتفاقية شغال .. الجزء ده من الإتفاقية بيقول إن لو الأمريكان مثلاً حيطلعوا صاروخ ICBM بره منصة الإطلاق بتاعته عشان يصلحوه فهم لازم يبعتوا إيميل رسمي للروس يبلغوهم بده فالإتفاقية بتدي للطرفين سواء الروس أو الأمريكان إنه زي ما يكون قاعد جوه الترسانة النووية للبلد التانية .. الناس دي بتقول إن دي كانت مناورة من (بوتين) عشان يخلي (بايدن) يقلق فيبدأ يتكلم مع الأوكرانيين إن كده الموضوع حيقلب بجد و محتاجين حل سياسي عشان الأزمة دي تخلص علي خير بدل ما كلنا نتفرج علي فيلم أوبينهايمر Oppenheimer بحق و حقيقي مش بس في السينما.
بس يمكن نتايج قرار روسيا إنت ممكن متشوفهاش دلوقتي بس حتحس بيها قدام .. خلينا متفقين إن عشان روسيا تزود من عدد الرؤوس النووية اللي تحت إيدها فده مش حيفيدها في حاجة لإن لو عندك 1,500 رأس نووي مش حتفرق معاك لو بقوا 1,501 خصوصاً إن ده حيسحب وقت و فلوس و يا حسرة روسيا لا عندها الوقت ولا الفلوس لإن الحرب في أوكرانيا حنفية مصاريف مكسورة و مغرقة الدنيا و أنا الصراحة مصدق (بوتين) لما طلع قال إن بلده مش عايزه تزود من عدد الرؤوس النووية بتاعتها فوق السقف المسموح بيه في إتفاقية New START .. هي الفكرة إن قرار زي ده حيخلي المؤسسة العسكرية الأميريكية تقول لنفسها يلا نصرف أكتر علي تسليحنا عشان نواجه الخطر الروسي اللي هو أساساً يعني مش موجود .. الخوف إن لما تيجي سنة 2026 و الإتفاقية فترة صلاحيتها تنتهي فكل الدول اللي عندها سلاح نووي تبص لنفسها و تقول طب معلش يعني إيه اللي ممكن يحميني غير إن يبقي عندي مش بس سلاح نووي إنما صواريخ عابرة للقارات و قاذفات و غواصات نووية كلهم يقدروا يشيلوا سلاح نووي .. وركز علي كلمة كل الدول اللي معاها سلاح نووي .. ده مش حيبقي سباق تسلح شبه اللي كان بين الأمريكان و السوفييت في الحرب الباردة .. لا خالص .. ده حيبقي سباق بتذكرة اللي عايز يخش يخش:
- إيران من الدول اللي وش حتخش براسها في الخناقة دي لإن إيران من ساعة إنسحاب أميركا من الإتفاق النووي الإيراني و هي بتفرك عشان تطور من برنامجها النووي العسكري.
- دول المفروض إنها حليفة لأميركا زي كوريا الجنوبية حتقول لنفسها طب إشمعني كوريا الشمالية بس اللي يبقي عندها سلاح نووي لإن مع إنهيار إتفاقيات حظر إنتشار الأسلحة النووية فدي فرصة كويسة إن ميبقاش كوريا الشمالية لاوية دراعي.
- بس يمكن أهم دولة حتسعي إنها تخش في السباق ده هو الصين اللي صحيح هي دولة نووية بس إمكانياتها من حيث الصواريخ العابرة للقارات و الغواصات و القاذفات أقل بكتير من روسيا و أميركا .. بإختصار الصين عندها سلاح نووي بس ممكن متعرفش تضربك بيه و دي العيب اللي هم حيحاولوا يعالجوه لما فجأة نصحي الصبح علي عالم مفيهوش إتفاقيات حظر إنتشار أسلحة نووية.
- الرعب فعلاً لو الهند و باكستان إتعدوا من الفيروس ده لإن دول دولتين ضربوا بعض قبل كده فإيديهم مش بتترعش علي الزناد ومش حتفرق لو ده كان زناد بندقية ألية أو زرار إطلاق صاروخ نووي.
خليك برده فاهم إن تطوير الأسلحة النووية ده عامل زي المخدرات بمجرد ما مشيت في سكتها مش حتعرف تبطل .. ده اللي فعلاً يتغناله يخرب بيتك يا كيف و يخرب بيت معرفتك .. خد عندك باكستان مثلاً .. دي بلد ثقتها في الهند زي بالضبط ثقة مراتك فيك بعد ما عرفت إنها بتخونها مع زميلتك في الشغل و بالتالي أي كلمة تقولها الهند طبيعي إن باكستان متصدقهاش .. المهم إن لنفترض إنك مرشح نفسك للرئاسة في باكستان و إنت رأيك إن مش حتفرق إذا كانت بلدك عندها خمسين رأس نووي أو واحد و خمسين و شايف إن الفلوس اللي حتتصرف علي تطوير الترسانة النووية الباكستانية دي ملهاش لازمة و ممكن تتصرف علي حاجات أهم .. دي أفكار ناس عاقلة و راكزة و دارسة بره و جوه بس صدقني لو دخلت إنتخابات قصاد مرشح كل اللي بيقوله للناس إن الهنود دول عايزين يموتوا رجالتنا و ياكلوا أكلنا و يغتصبوا ستاتنا فإنت وش حتخسر الإنتخابات ضده .. البشر أسهلهم يترعبوا من حد من إنهم يثقوا فيه .. خيني أبقي واضح في كلامي .. أنا من الناس اللي شايفة إن الغزو الروسي لأوكرانيا كان غلطة و كان فيه طرق كتير أحسن بكتير من كده عشان روسيا توصل للي هي عايزاه بس الدماغ بتاعة (بوتين) دلوقتي هو إنه لو مش حيقدر يهزم العالم لوحده فهو حيخلي العالم يهزم نفسه بنفسه .. يمكن (بوتين) فاهم النفس البشرية كويس و عشان كده هو ماشي في السكة دي .. هو كان أمله إن تعليق مشاركة بلاده في إتفاقية New START حتخلي الأمريكان يجروا عليه عشان يترجوه و ساعتها حيقولهم شروطه الخاصة بأوكرانيا .. و لما ده محصلش هو حيتفرج علي العالم وهو بياكل بعضه.
المصادر:
- مقالة بعنوان New Start nuclear treaty explained-and what is suspension could mean نشرت في مجلة The Telegraph و ده لينك المقالة الأصلية:
https://www.telegraph.co.uk/world-news/2023/02/22/new-start-treaty-nuclear-arms-putin-russia-america-suspension/ - مقالة بعنوان Factbox: What is the new START nuclear arms treaty? نشرت في موقع وكالة أنباء رويترز و ده لينك المقالة الأصلية:
https://www.reuters.com/world/what-is-new-start-nuclear-arms-treaty-2023-02-21/ - مقالة بعنوان What is the New Start nuclear treaty and what are the risks of Russia suspending it? نشرت في جريدة The Guardian و ده لينك المقالة الأصلية:
https://www.theguardian.com/world/2023/feb/22/what-is-the-new-start-nuclear-arms-treaty-and-what-are-the-risks-if-russia-vladimir-putin-suspends-it - مقالة بعنوان Explained: What is START treaty and why Russia suspending it is a big deal? نشرت في موقع وكالة أنباء CNBC و ده لينك المقالة الأصلية:
https://www.cnbctv18.com/world/explained-what-is-start-treaty-and-why-russia-suspending-it-is-a-big-deal-15996791.htm - مقالة بعنوان Tha last US-Russia arms control treaty is in big trouble نشرت في موقع Vox و ده لينك المقالة الأصلية:
https://www.vox.com/world-politics/2023/2/25/23610797/ukraine-war-putin-nuclear-new-start-treaty-suspension
