الحرب الأرمينية الأذربيجانية .. أوعوا تنسوا إن إسرائيل ليها أصابع بتلعب برده.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/8innjpyidx4c

خلينا نكون صرحاء مع بعض إن مفيش سبب واحد منطقي يخليك انت كمواطن كحيان عايش في مصر بتجري ورا أكل عيشك إنك تفكر تتابع خناقة بين دولة إسمها أرمينيا و دولة تانية إسمها أذربيجان .. بنسبة 99.9% لو انا نزلت الشارع و سألت الناس هو أنتوا تعرفوا فين أصلاً أرمينيا و أذربيجان دول علي الخريطة فتسعة من كل عشر بني أدمين حسألهم مش حيكونوا عارفين الإجابة .. ده طبيعي علي فكرة .. إنك تتابع خناقة بين أرمينيا و أذربيجان زي ما انت كده تتابع و تتفرج علي نهائي ماتش الكأس بتاع اليونان .. السبب الوحيد اللي خلي الناس في مصر تهتم باللي بيحصل هي حاجة واحدة بس .. تركيا .. إحنا عرفنا إن الأتراك واقفين في ظهر أذربيجان ضد أرمينيا و ده خلي المصريين يا إما غيروا صورة بروفايل بتاعهم علي سوشيال ميديا عشان يحطوا عليه علم أذربيجان أو خلي المصريين يسبوا و يلعنوا سلسفين الأتراك عشان بيتدخلوا في حرب مش بتاعتهم.

أيا كان مبرر الطرفين فأرجع و أقولك إن نسبة كبيرة منهم أساساً ميعرفوش أرمينيا و أذربيجان فين علي الخريطة .. انا شخصياً أول مرة أعرف إن فيه خناقة بين الدولتين لما كنت بتفرج علي فيلم أكشن حلو أوي إسمه The Peacemaker بتاع (جورج كلوني George Clooney) و (نيكول كيدمان Nicole Kidman) و الفيلم حلو فشخ علي فكرة إبقوا إتفرجوا عليه و لولا الفيلم ده مكنتش حعرف إن فيه خناقة بين الدولتين .. المهم إن انا النهاردة جاي أفهمك هو فيه إيه؟ .. ليه أرمينيا و أذربيجان ماسكين في خناق بعض؟ .. و الأهم بقي هو إيه اللي خلي الأتراك يتدخلوا أصلاً؟

خلينا نبدأ بالسؤال الأولاني .. هو مين بيتعارك مع مين و ليه؟

كان ليا واحد صاحبي الله يمسيه بالخير إسمه (فادي) كان دايماً يقولي البني أدمين عاجباهم دماغهم بس مش عاجبهم رزقهم .. دلوقتي انا عايزك تتعرف معايا علي أكتر واحد كانت عاجباه دماغه في تاريخ البني أدمين .. (جوزيف ستالين Joseph Stalin) .. (ستالين) كان زعيم الإتحاد السوفيتي في الفترة اللي قبل و أثناء و بعد الحرب العالمية الثانية .. دي معلومة رقم واحد .. معلومة رقم إتنين إن الرجل ده كان هبيد .. كان بيعشق الهبد زي عنيه .. سبب الخناقة أصلاً بتاعة أرمينيا و أذربيجان إن الرجل ده سنة 1921 يعني من زمان فشخ هبد هبداية عابرة للقارات لما خلي منطقة ناغورني قرة باغ أو Nagorono-Karabakh بالإنجليزي تبقي تحت إيد أذربيجان .. أقف بقي هنا عشان تفهم نقطة .. الإتحاد السوفيتي كان عبارة عن شوية دول متحالفين مع بعض و كبيرتهم كانت روسيا .. من ضمن الدول دي كانت أذربيجان و أرمينيا  اللي هم جيران و إقليم ناغورني قرة باغ ده موجود بينهم  بس الفرق إن أذربيجان أغلبها مسلمين و أرمينيا أغلبها مسيحيين .. تعالي انت يا (ستالين) إدي اقليم ناغورني قرة باغ اللي وقتها أكتر من 90% من تعداد سكانه مسيحيين لأذربيجان و قولها خدي الحتة دي هدية مني ليكي .. مش بس كده .. سنة 1923 (ستالين) جه قال إن الإقليم له حق الحكم الذاتي  .. يعني انت عندك إقليم أغلبه مسيحيين عايشين في دولة أغلبها مسلمين بس المسلمين اللي في الدولة دي ملهمش حق إنهم يقولوا لأهل الإقليم يعملوا إيه؟ .. اللي هو انت عايز تقولهم طب ليه بتازولوا نفسكوا كده؟ .. حتستفيدوا إيه يعني من اللخبطة دي؟ .. لحد هنا عادي .. فضلت الدنيا هادية و مفيش مشاكل الي حد ما لحد ما جت سنة 1988.

في الوقت ده الإتحاد السوفيتي كان بدأ يفك من بعضه و عشان كده في السنة دي البرلمان بتاع إقليم ناغورني قرة باغ طلع بيان قالوا فيه إن إحنا بالصلاة علي النبي كده عايزين ننضم لأرمينيا رغم إن جغرافياً يعني و بناء علي رسمة الحدود بتاعة الإتحاد السوفيتي بتقول إن إحنا تبع أذربيجان .. لحد هنا كانت لسه أرمينيا و أذربيجان جزء من الإتحاد السوفيتي فمكانوش يقدروا يمسكوا في خناق بعض .. سنة 1991 البرلمان بتاع الإقليم طلع أعلن نفسه دولة مستقلة .. الجديد إن وقتها كان الإتحاد السوفيتي إتفكك .. وقتها أرمينيا و أذربيجان كانوا دول مستقلة .. وقتها الإتنين مسكوا في خناق بعض و الروس فضلوا يتفرجوا .. حرب إستمرت حوالي سنة مات فيها أكتر من 30,000 بني أدم بس في الحرب دي الأرمينيين قدروا مش بس إنهم يطلعوا الأذربيجانيين من جوه الإقليم .. لا دول كمان خدوا حتة من أذربيجان وضع يد و أجبروا أهلها اللي هم فعلياً مواطنين من أذربيجان إنهم يسيبوا أرضهم و بيوتهم ويمشوا .. سنة 1994 روسيا إتدخلت عشان تخلي الإتنين يمضوا علي إتفاق وقف إطلاق نار و هي دي الفكرة .. ده مكانش إتفاق سلام .. ده كان مجرد إتفاق إنه يخلي الإتنين يبطلوا يضربوا بعض و إن يظل الوضع علي ما هو عليه بعد الحرب.

لما الحرب بين أرمينيا و أذربيجان ولعت سنة 1991 الأوروبيين حاولوا يلاقوا حل فعملوا حاجة إسمها مجموعة مينسك Minsk Group سنة 1992 و دي زي ما تقول كده لجنة مكونة من الأمريكان و الفرنساويين و الروس عشان يحاولوا يلاقوا حل سلمي للأزمة دي .. اللي محدش كان عامل حسابه عليه إن الأزمة دي خلت فعلياً أهل البلدين بقوا ضد أي إتفاق سلام .. التوتر بينهم بقي عامل زي الخناقة بين الأهلاوية و الزملكاوية علي سوشيال ميديا بعد ماتش نهائي بطولة دوري أبطال أفريقيا .. مشجعي الفرقتين عاجبهم إنهم بيشتموا بعض علي السوشيال ميديا .. عايزك بس تتخيل إن الشعب نفسه بقي ضد إن حكومته تسعي إنها تمضي إتفاق سلام و ده حصل مرتين علي فكرة:

• سنة 1997 مجموعة مينسك دي قدرت تقنع حكومتي أرمينيا و أذربيجان إنهم يوافقوا علي إتفاق سلام بيقول إن الخطوة الأولانية هي إن أرمينيا تنسحب من الأراضي اللي هي إحتلتها من أذربيجان حول إقليم ناغورني قرة باغ .. طبعاً الأرمن لما سمعوا الكلام ده قالك إحنا مش موافقين و الرئيس بتاع أرمينيا وقتها (ليفون تير بيتروسيان Levon Ter-Petrosyan) إضطر إنه يتنحي عن منصبه سنة 1998 عشان بس فكر إنه يمضي إتفاق سلام مع أذربيجان من ضمن شروطه إنه يرجع لأذربيجان الأرض اللي أرمينيا خدتها غصب.
• سنة 2000 حصل العكس لما الأمريكان أقنعوا الرئيس بتاع أذربيجان وقتها (حيدر علييف) اللي يبقي أبو الرئيس الحالي (إلهان علييف) إنه يوافق يعمل إستفتاء شعبي لأهل إقليم ناغورني قرة باغ عشان هم اللي يختاروا يبقوا جزء من أرمينيا ولا من أذربيجان .. لما (حيدر علييف) رجع بلده و إتعرف بإنه حيعمل كده المستشارين بتوعه أقنعوه بإن الشعب ممكن يثور عليه لإن محدش حيوافق بكده و فعلاً الرجل إنسحب من إتفاق السلام.

في إبريل 2016 الإتنين مسكوا في خناق بعض تاني و الخناقة دي إتعرفت بإسم حرب الأيام الأربعة .. اللي هو انت عايز تقولهم لا تسوي نفسك الصراع العربي الإسرائيلي يا طعمية .. المهم إن الخناقة دي مات فيها 350 بني أدم و الإتنين طلعوا قالوا إنهم هم الكسبانين .. الروس كالعادة جم خلوا الإتنين يقعدوا مع بعض و يمضوا إتفاق وقف إطلاق نار جديد .. في يوليو 2020 الإتنين مسكوا في خناق بعض تالت بس في الخناقة دي إتقتل 7 عساكر من أذربيجان من ضمنهم لواء في الجيش .. بس مش دي القضية .. القضية إن لحد هنا أذربيجان إقتنعت بإنها محتاجة مساعدة حد من بره عشان تقدر تهزم أرمينيا و ده حيخلينا نروح للسؤال اللي وراه.

إزاي تركيا و إسرائيل نكدوا علي الروس و الأرمن عيشتهم؟

في نفس الشهر اللي هو يوليو 2020 الأتراك قالوا إنهم حينفذوا مناورة عسكرية ضخمة مع أذربيجان حتستمر إسبوعين .. هي الحقيقة مكانتش مناورة دي كانت مشروع حرب .. يوم 2 أكتوبر 2020 الرئيس التركي (رجب طيب أردوغان) طلع قال و انا بنقل كلامه نصاً هنا .. “إحنا كأتراك حنقف ورا أختنا أذربيجان بكل اللي نقدر عليه لحد إن شاء الله إقليم ناغورني قرة باغ يتحرر من الغزو الخارجي” .. الأتراك بعتوا طيارات بدون طيار Drones لأذربيجان .. بعتولهم مسلحين سوريين من سوريا عشان يحاربوا مع القوات المسلحة بتاعة أذربيجان و يقال إن عدد المسلحين السوريين اللي تركيا بعتتهم لأذربيجان وصل 7,700 مقاتل .. و مش بس الأتراك اللي وقفوا ورا أذربيجان .. إسرائيل باعت لأذربيجان سلاح بالهبل.

يبقي السؤال اللي محدش بيفكر يسأله لنفسه هو ليه؟ .. إيه اللي يخلي الأتراك ياخدوا راحتهم أوي كده في مساعدتهم لأذربيجان؟ و الحقيقة إن السر هو إن الأتراك حسبوها سياسياً صح فشخ .. دور تركيا في أذربيجان انا في رأيي تجسيد واضح لإزاي مؤسسات الحكم من مخابرات و وزارة خارجية و وزارة دفاع يشتغلوا مع بعض من الأول علي مياه بيضا .. المخابرات التركية كانت عارفة إن مع أول طلقة تتضرب الروس حيبيعوا الأرمن .. ليه حيعملوا كده؟ .. لإن أرمينيا قبل سنة 2018 كان بيحكمها ناس أول ما بيصحوا من النوم لازم يصبحوا علي الكريملين .. اللي هو تقدر تقول إن رئيس وزراء أرمينيا كان بيسأل الناس اللي حول (فلاديمير بوتين) انا عايز أتغدي فراخ مشوية النهاردة لو معندكوش مانع يعني .. سنة 2018 حصلت ثورة سلمية جابت رئيس وزراء جديد قال إيه ديموقراطي إسمه (نيكول باشينيان Nikol Pashinyan) .. اللي الأتراك كانوا مراهنين عليه علية إن مع أول طلقة تتضرب زي ما قلتلك الروس حيبيعوا الأخ (نيكول) ده مش لسبب غير إنهم عايزينه يغور في ستين داهية .. بمعني أخر .. الرهان أو الRisk اللي خدها الأتراك كانت علي إنهم لو خدوا حبوب الشجاعة و وقفوا في ظهر أذربيجان فتقريباً أرمينيا خسرت الحرب من قبل ما تبدأ.

الناس اللي كانت متابعة أوي تطورات الأمور كنت تلاقيها مستغربة من اللي بيحصل .. فاكر مشروع الحرب اللي عملته القوات المسلحة التركية مع أذربيجان في أكتوبر 2020؟ .. الأتراك بعتوا سرب طيارات F-16 عشان يشارك في المناورات العسكرية دي و الروس ولا فتحوا بقهم .. لما الحرب ولعت فعلاً و الطيارات التركي دي أستخدمت في قصف أهداف أرمينية بطيارين أتراك فأرمينيا حبت تستخدم سرب طيارات سوخوي ثلاثين Su-30 اللي هي شارياهم من روسيا السنة اللي فاتت بس الروس رفضوا .. انت متخيل؟ .. الروس باعوا (نيكول) بتاع أرمينيا لدرجة إنهم منعوه يستخدم الطيارات اللي هم أدوها لأرمينيا عشان تدافع بيها عن نفسها .. و مش بس كده .. في الحرب دي الأتراك أدوا لأذربيجان السلاح اللي خلاهم يدوسوا علي وش الأرمن .. الطيارات بدون طيار .. مش لإن الطيارات بدون طيار التركي فشيخة .. لا خالص .. هي المشكلة في منظومة الدفاع الجوي بتاعة أرمينيا و دي النقطة اللي لازم تبقي واضحة بالنسبة ليك.

منظومة الدفاع الجوي الأرمينية علي الورق هي حاجة محترمة جداً .. الناس دي عندها منظومة S-300PT .. عندهم منظومة 9K37M Buk-M1 .. منظومة متفرقش حاجة عن شبكة الدفاع الجوي بتاعتنا اللي فشخت الإسرائيليين في أفكارهم في حرب 1973 و هي دي المشكلة .. دي منظومات دفاع جوي إتعملت في السبعينات و الثمانينات عشان تواجه طيارات إتعملت في السبعينات و الثمانينات .. أي منظومة دفاع جوي في الدنيا عبارة عن حاجتين .. صاروخ و حساسات Sensors .. الصواريخ في أنظمة الدفاع الجوي اللي تحت إيد أرمينيا زي الفل و شغالة و مفيهاش مشاكل .. المشكلة كلها في Sensors .. دي رادارات و Sensors إتصممت عشان تصطاد طيارات نفاثة و متعملتش عشان تصطاد طيارات بطيئة و صغيرة زي الطيارات بدون طيار اللي عطتها تركيا لأذربيجان .. علي فكرة العيب ده كان ممكن يتعالج .. كان ممكن أرمينيا تطلب من روسيا بما إنها هي اللي وردت ليها أنظمة الدفاع الجوي دي إنها تعمل عمرة بتتسمي Plot-Fusion .. العمرة دي بمنتهي البساطة زي إنك تجيب جهاز كومبيوتر قديم و تقول لنفسك انا عايز ألعب عليه لعبة Cyberpunk 77 اللي لسه حتنزل بجرافيكس فشيخة .. انت بتروح تشيل شوية Hardware من اللي قديم في الجهاز بتاعك و تبدله بحاجة جديدة و تلعب شوية في Software بحيث تعلي من كفاءة كارتة الشاشة مثلاً .. زي ما قلتلك هي عمرة و بتتعمل بس الأرمن معملوهاش و بالتالي زي ما قلتلك هم مش بس الروس باعوهم مع أول طلقة إنما كمان الدفاع الجوي بتاعهم طلع بره الخدمة.

و شوف يا أخي بعد كل اللي انا حكيته ده يبقي الجزء المسلي فشخ من وجهة نظري المتواضعة يعني هو إن الناس كلها مسكت في دور تركيا إن أذربيجان تكسب الحرب و سابوا دور إسرائيل .. إسرائيل لمن لا يعلم يعني بتتعامل مع أذربيجان بمبدأ السلاح مقابل النفط .. انتي يا أذربيجان بلد عندك بترول و إحنا يا إسرائيل بلد بتصنع سلاح فعلي رأي (عادل إمام) في فيلم السفارة في العمارة ف ها يعني .. حوالي نص إحتياجات إسرائيل من النفط بتيجي من أذربيجان .. في مقابل إن سلاح الجو الأذربيجاني معتمد بشكل كبير علي التكنولوجيا الإسرائيلية .. انا ليه بقول إن دور إسرائيل في الحرب دي مسلي؟ .. أصلك لما تيجي تتفرج علي الأساس اللي الدعاية الصهيونية إتبنت عليه هو إن اليهود دول ضحية الهولوكوست و إن اليهود دول أغلب من الغلب و ياما إتداس علي وشهم و كده يعني .. تقوم تلف الأيام و تدور الأيام و اليهود يقفوا مع أذربيجان ضد الأرمن اللي هم كمان الدعاية بتاعتهم بتقول إن إحنا ضحايا الوحشية العثمانية التركية الإسلامية .. حاول تتخيل إن اللي بتعمله إسرائيل مع أذربيجان ده شبه إنك تصحي الصبح تلاقي خبر علي السوشيال ميديا إن (رضوي الشربيني) إرتبطت ب(معز مسعود).

الحقيقة إنك لو جيت سألت الإسرائيليين علي جنب كده و بينك و بينهم هو أنتوا ليه بعتوا سلاح لأذربيجان؟ .. اللي هو مجرد دعوة للفهم يعني .. هل مثلاً محتاجين قرشين و الدنيا مزنقة معاكوا؟ .. إذ تكتشف إن السر يطلع إيران .. انت إتقالك في المدرسة إن إيران شيعية .. و إتقالك في البرامج الدينية إن الشيعة دول أنجاس كفرة .. بس محدش قالك إن زي ما فيه وسط أهل السنة و الجماعة حتلاقي السلفيين و حتلاقي اللي ماشيين بفكرة الإسلام الوسطي و فيه اللي تحسهم شايفين إن الدين ده أخره يتكتب علي البطاقة بس فبرده الشيعة عندهم نفس الإختلاف .. أذربيجان بلد شيعية .. أيوة .. أذربيجان أهلها شيعة بس انت تقدر تقول إنهم الشيعة الدايت .. إيران فيها الشيعة كامل الدسم .. و طبيعي إن الحكومة الإيرانية نفسها تبقي خايفة من أذربيجان علي أساس إن أذربيجان رغم كونها بلد شيعية إلا إنها مش ماشية علي نفس الأساس اللي الدولة الإيرانية ماشية عليه .. أذربيجان معندهاش مرشد أعلي للثورة الإسلامية .. أذربيجان معندهاش اية الله اللي كلامه بيمشي علي أطخن طخين .. و كتير من الإيرانيين نفسهم يصحوا الصبح يلاقوا نفسهم عايشين في أذربيجان .. عشان كده إسرائيل خدت أذربيجان بالحضن مش لسبب غير إنها تنكد علي إيران عيشتها.

الطيارات بدون طيار هي اللي حسمت الحرب لصالح أذربيجان:

عايزك تتخيل معايا إننا بنلعب سوا Red Alert و مطلوب منك إنك تلعب مكان أذربيجان .. دلوقتي القوات الأرمنية متحصنة كويس أوي في مناطق جبلية و انت عايز تسيطر علي المناطق دي .. جميل .. حضرتك بتبعت كام طيارة بدون طيار و زي ما قلت إن الدفاع الجوي الأرمني مكنش شايف أصلاً الطيارات دي .. الطيارات بتصور كل حتة في التحصينات الأرمنية .. العساكر فين؟ .. قوات الإحتياط اللي حتجري تلحقهم لو حصل هجوم عليهم فين؟ .. الاهم فشخ بقي إن الطيارات بدون طيار صورتلك الطريق اللي قوات الإحتياط دي حتيجي منه .. المدفعية بتاعتك حتتسلي علي التحصينات الدفاعية الأرمنية .. الطيارت بدون طيار بتاعتك اللي شايلة صواريخ حتفجر الكباري اللي قوات الإحتياط حتستخدمها عشان تلحق القوات اللي علي الجبهة .. كده القوات اللي علي الجبهة و الإحتياط بقوا قاعدين في مكانهم مش عارفين يتحركوا .. هنا بيجي دور الصواريخ الباليستية LORA اللي أذربيجان إشترتها من إسرائيل عشان تنزل فوق دماغ قوات الإحتياط العطلانة و مش عارفة تتحرك .. قواتك البرية يجي دورها إنها تحاصر و تحتل المواقع الحصينة اللي كان زمان الأرمن متخيلين إن موقعها الجغرافي و تضاريسها هي خط الدفاع الأول ليها.

أذربيجان كسبت الحرب بالطريقة دي .. معركة مدينة شوشا Shusha هي اللي بعدها أرمينيا أعلنت هزيمتها .. انت مش متخيل إزاي الطيارات بدون طيار هي اللي حسمت الحرب لأذربيجان .. فكرة إن أرمينيا معندهاش أنظمة حرب أليكترونية للتشويش علي إشارة التحكم بين الطيارة بدون طيار و بين مركز القيادة بتاعها فده خلي الطيارات بدون طيار التركي تعمل اللي هي عايزاه .. فين و فين الروس أخر الحرب بعتوا منظومة تشويش علي الرادار إسمها كراسوخا Krasukha ركبوها في مدينية أرمينية إسمها جيومري Gyumri عملت شغل حلو ضد الطيارات بدون طيار التركي بس أذربيجان كانت لأجل حظها يعني شارية طيارات بدون طيار إسرائيلي إسمها هاروب Harop عرفت تشتغل عادي جداً ولا كإن فيه حاجة.

الحرب الأخرانية دي خلصت علي إن الروس كعادتهم و ربنا ما يقطعلهم عادة خلوا الإتنين يمضوا إتفاق بس المرة دي كان إتفاق سلام مش وقف إطلاق نار و الحقيقة إني عايز أقف شوية قدام حبة نقط كده في الحرب دي لإنك لو فهمت النقط دي فانت حتقدر تستوعب هو ليه الإعلام بيقول إن أذربيجان كسبت الحرب:

أول نقطة و هي من ضمن المناطق اللي حول إقليم ناغورني قرة باغ و اللي أرمينيا خدتها وضع يد بعد إتفاق وقف إطلاق النار اللي إتمضي سنة 1994 هي منطقة إسمها كيباجار Kelbajar .. فكك من إسمها .. المنطقة دي هي منطقة جبلية تعتبر المنبع اللي بيدي بحيرة سيفان Lake Sevan و دي البحيرة اللي أرمينيا بتاخد منها 85% من مياه الشرب بتاعتها .. أهو إتفاق السلام اللي إتمضي خلي المنطقة دي تبقي تحت إيد أذربيجان .. حاول تتخيل إن في التشبيه بتاعنا إن بعد ما (رضوي الشربيني) و (معز مسعود) إتجوزوا سكنوا في عمارة محبس المياة بتاع شقتهم يبقي قصاد شقة الإيكس بتاعة (معز مسعود) و هم بسم الله ما شاء الله كتير يعني .. الفكرة إن في أي لحظة فعلياً أذربيجان ممكن تعكنن علي أرمينيا و تقطع عنها المياة .. ممكن مش الحكومة اللي تعمل كده .. يتقال إن فيه تنظيم إرهابي إسلامي رمي نفايات سامة أو مواد مشعة في مياة بحيرة سيفان مثلاً و ساعتها حكومة أذربيجان حتطلع تقول عليا الطلاق ما لينا دعوة .. ده مجرد واحد من المخاوف اللي في دماغ الأرمن دلوقتي.

ثاني نقطة إن الحرب اللي بقالها سنين دي محدش عارف يحسمها خلصت في 44 يوم بسبب تكنولوجيا الطيارات بدون طيار .. صدقني التكنولوجيا دي هي مستقبل الحروب و كل يوم الجيوش العربية بتضيعة و هي مش بتدرس و مش بتذاكر و مش بتطور من قدارتها في المجال ده بيكلفنا غالي أوي  .. زي ما قلتلك الحرب بين أرمينيا و أذربيجان بالنسبة لينا كانت شبه نهائي كاس اليونان بس علي الأقل أهو نطلع بدرس مستفاد بدل ما إحنا بنتفرج و خلاص.

المصادر:

مقالة بعنوان Azerbaijan’s drones owned the battlefield in Nagorno-Karabakh-and showed future of warfare نشرت في جريدة The Washington Post و ده لينك المقالة الأصلية:
https://www.washingtonpost.com/world/europe/nagorno-karabkah-drones-azerbaijan-aremenia/2020/11/11/441bcbd2-193d-11eb-8bda-814ca56e138b_story.html

مقالة بعنوان Military lessons from Nagorno-Karabakh: Reasons for Europe to worry نشرت في موقع المجلس الأوروبي للعلاقات الخارجية ECFR و ده لينك المقالة الأصلية:
https://ecfr.eu/article/military-lessons-from-nagorno-karabakh-reason-for-europe-to-worry/

مقالة بعنوان Israel’s Azerbaijan mistake نشرت في مجلة The National Interest و ده لينك المقالة الأصلية:
https://nationalinterest.org/feature/israel%E2%80%99s-azerbaijan-mistake-173476

مقالة بعنوان The conflict between Armenia and Azerbaijan, explained نشرت في موقع مجلة Vox و ده لينك المقالة الأصلية:
https://www.vox.com/21502327/armenia-azerbaijan-nagorno-karabakh-war-explained

مقالة بعنوان Five ways the 2020 Nagorno-Karabakh conflict will change the map نشرت في جريدة The Washington Post الأميريكية و ده لينك المقالة الأصلية:
https://www.washingtonpost.com/politics/2020/11/16/five-ways-2020-nagorno-karabakh-conflict-will-change-map/