لينك التسجيل الصوتي للمقالة علي ساوند كلاود:
https://on.soundcloud.com/hGyQP
أهم درس في العلاقات الدبلوماسية بين الدول تكون عارفه كويس هو إن السياسة الخارجية للدول بيحطها رجاله كبار في السن .. ده طبيعي لإن اللي بيحكم في الغالب رجاله أغلبهم عواجيز .. الرجالة عموماً بتلاقيهم قلبوا علي حريم في حالتين .. لما يكبروا في السن .. و لما يمسكوا سلطة في إيدهم .. ده يفسرلك جو النفسنة اللي أحياناً بيبقي مش مبرر بين قادة الدول خصوصاً الدول العربية .. هي طبيعة الرجاله كده .. علي رأي (محمد هنيدي) في فيلم جاءنا البيان التالي الرجاله لما بتكبر بتتهبل .. عشان تشوف جو نفسنة الستات ده في السياسة الخارجية للدول بص علي الخناقة بين المملكة العربية السعودية و باكستان .. أنا مش حبدأ بأني أشرحلك الخناقة دي سببها إيه؟ .. أنا حبدأ بإني أوريك إزاي إحنا كمواطنين عاديين عرفنا إن فيه مشكلة بين السعودية و باكستان و بمجرد ما تلاقي نفسك بتضرب كف علي كف من الإستغراب فحتلاقيني شرحتلك أصل الموضوع .. جاهز ضغط يعلي؟
يوم 31 مارس 2019 كان المفروض إن مدينة مكة المكرمة تستضيف قمة منظمة المؤتمر الإسلامي OIC و دي إختصار Organization of Islamic Cooperation .. دي قمة إنت كمواطن كحيان بتكح تراب مش فارقة معاك في حاجة .. يعني إنت حياتك مش حتتحول للأحسن لما تعرف جدول أعمال القمة دي كان إيه .. هو إيفينت الناس بتروح تتفسح فيه تعملها عمرة و تاكل في الأوبين بوفيه بتاع الفندق و خلاص .. متفهمش ليه قبل القمة بكام يوم طلع بيان من وزارة الخارجية الباكستانية بإن لازم السعودية تحط قضية كشمير ضمن النقاط اللي حتتناقش في القمة .. كشمير للي ميعرفش دي حتة أرض عليها خناقة بين الهند و باكستان .. المشكلة مش في الطلب المشكلة في الطريقة اللي إتقال بيها الطلب .. البيان اللي طلع من وزارة الخارجية الباكستانية قال إن لو ده محصلش فباكستان حتنسحب من المنظمة خالص و تشوف هي ممكن تقوي إزاي من علاقاتها مع الصين و إيران؟ .. ده بالضبط زي ما إنت تكون متخانق مع مراتك و تيجي تقولك لو مجبتليش السلسلة الدهب اللي وعدتني بيها حروح أخرج مع خطيبي الأولاني.
السعودية تسكت؟ .. لا طبعاً .. الخارجية السعودية ردت بإن و النبي إحنا لينا عندكوا فوق المليار دولار سلفناها ليكوا عشان تسندوا العملة بتاعتكوا فالفلوس دي عايزينهم .. الناس بدأت تاخد بالها و عشان الموضوع يتلم ف(قمر جاويد باجوا) و ده يبقي قائد قيادة الأركان المشتركة الباكستانية راح الرياض في زيارة يراضي السعوديين .. و هو هناك إتقاله إن (محمد بن سلمان) و اللي في حالة إنك متعرفش ده مين فأنا مش فاهم إنت كنت عايش في أنهي كهف لإن (محمد) يبقي ولي العهد السعودي و القائم فعلياً بأعمال ملك السعودية قرر إنه مش حيقابله .. تاني .. أهم بني أدم في المؤسسة العسكرية الباكستانية اللي تحت إيدها سلاح نووي جه يقابلك في بيتك و إنت مرضتش تطلع تقابله .. إنت متخيل التهزيق؟ .. السعودية تسكت علي كده؟ .. لا طبعاً.
في الفترة من 21-22 نوفمبر 2020 السعودية إستضافت قمة الدول العشرين العظمي في العالم اللي إسمها G-20 و كان إيفينت المملكة حضرتله كتير و حاولت تروجله كتير .. من ضمن الدول اللي حضرت القمة دي كانت باكستان و طبعاً السعودية كنوع من الدعاية طبعت عدد محدود من العملات اللي تصميمها مختلف .. زي ما كده مثلاً مصر تستضيف كأس العالم في كرة القدم فالحكومة تطبع عدد ورقات محدود من فئة 100 جنيه بس بدل ما يحطوا عليها وش أبو الهول يحطوا شعار البطولة مثلاً .. المهم المملكة طبعت ورقة 20 ريال حطوا عليها خرايط الدول اللي حتشارك في القمة بس لو ركزت أوي أوي يعني في خريطة باكستان حتلاقيهم شايلين منها إقليم كشمير و كمان شايلين إقيلم تاني إسمه غليجيت بالتستان و ده برده عليه خناقة بين باكستان و الهند و معاهم الصين كمان .. برده حاول تتخيل إن لو مصر ان شاء الله تأهلت لبطولة كاس العالم الجاية في قطر 2022 و في كل الحملات الدعائية للبطولة اللي إتحط عليها خريطة مصر كان متشال منها حلايب و شلاتين.
لحد هنا إحنا عرفنا إن فيه خناقة بين باكستان و السعودية و باين من اللي حكيته إن الخناقة دي زي ما تكون بين حريم مش بين رجاله .. الرجاله بتقعد مع بعضها علي القهوة قعدة عرب يتصافوا يا بيمسكوا في خناق بعض .. لكن شغل تلقيح الكلام ده للحريم .. و دي مشكلة الرجاله زي ما قلتلك لما بتكبر في السن أو بتمسك سلطة إنها بتقلب علي حريم بس دلوقتي جه وقت إننا نفهمك المشكلة دي سببها إيه؟ و عشان تفهم ده لازم نحاول نجاوب علي سؤالين:
- هو الباكستانيين شايفين السعوديين إزاي؟
- ليه السعوديين بقوا شايفين إنهم مش محتاجين باكستان خلاص؟
إزاي السعوديين باصين لباكستان .. هم الإيكس اللي مستحيل أرجعله:
تفتكر ليه (أحمد أبوهشيمة) إتجوز (ياسمين صبري)؟ .. هل هي سيدة أعمال معاها فلوس فلما يتجوزا حيبقوا Power Couple في إيدهم جزء كبير من الثروة في مصر؟ .. هل هي دماغها جامدة في البيزنس أو بتعرف تفكر؟ .. هل هي عشان ممثلة كويسة و ليها شعبية مثلاً؟ .. الإجابات هي لا و بالتأكيد لا و إنت عبيط يلا دي مبتعرفش تمثل أساساً .. السبب الوحيد اللي خلي (أبوهشيمة) يتجوز (ياسمين صبري) هو شكلها و مفيش سبب تاني .. برده السبب الوحيد اللي خلي السعودية تتصاحب علي باكستان هو سلاحها النووي .. ده السبب الوحيد و مفيش سبب تاني.
كنت إتكلمت قبل كده عن العقيدة القتالية للقوات المسلحة السعودية و قلت إنك لو رحت سألت أي حد جوه مؤسسة الحكم السعودية مين الدولة اللي السعودية شايفاها بتمثل تهديد واضح و صريح لأمنها القومي فالإجابة حتكون إيران .. إيران عندها جيش كبير فإحنا حنصرف مليارات علي السلاح الأمريكاني .. إيران ماشية في سكة إنها تصنع سلاح نووي فإحنا حنتصاحب علي باكستان و حنديها المليار دولار بنفس راضية .. ليه؟ .. عشان باكستان عندها سلاح نووي .. بس في نفس الوقت زي ما قلت قبل كده في نفس المقالة إن الحرب الحالية اللي من تحت الطرابيزة بين إيران و السعودية هي زي ما بنقول Proxy War أو حرب بالوكالة .. عشان تفهم أنا قصدي ايه حرجع أضربلك مثال باليمن.
اليمن دلوقتي مقسومة نصين .. نص تبع الحوثيين و دول اللي واقف وراهم هم الإيرانيين قصاد الحكومة اليمنية و دي اللي واقف في ظهرها يبقي السعوديين و الإماراتيين .. فعلياً و حق الله اللي يتقال الإيرانيين ملهمش عساكر علي الأرض بتحارب في اليمن .. اللي بيحصل إن ليهم ناس بتحارب بالنيابة عنهم و عن مصالحهم .. عشان إيران تسيطر علي اليمن زي ما سيطرت علي العراق و لبنان و سوريا فهي بتدي سلاح و فلوس للناس اللي مستعدة تبقي رجاله إيران .. السلاح ده عبارة عن ايه؟ .. سلاح خفيف زي البنادق الكلاشينكوف و يوم ما توسع مننا أوي نبعتلهم طيارات بدون طيار .. السعوديين أخيراً فهموا اللعبة دي .. السعوديين فهموا إن شراءهم لسرب طيارات F-15E Strike Eagle مش حيبقي مؤثر زي حاوية فيها بنادق كلاشينكوف متهربة من السوق السودا .. ده إترجم إلي إن خلاص السعودية مبقتش محتاجة باكستان .. من وجهة نظر السعوديين فالترسانة النووية الباكستانية دي معدش ليها لازمة زي الأول خلاص .. الترسانة النووية اللي باكستان بتصرف عليها كل سنة حوالي 2.5 مليار دولار مبقاش ليها لازمة .. اه يا زمن خليت الأعمي ساعاتي.
صحيح أبقي غلطان و بقاوح في عرض وجهة نظري لو مقلتش إن فيه شوية عوامل تانية ساعدت في إن باكستان تبقي الإيكس بتاعة السعودية:
- أنا قلت من شوية إن السعوديين عرفوا إن عشان يكسبوا إيران لازم يقلدوا الإيرانيين .. ده معناه إنهم بقوا يفهموا إن البندقية الكلاشينكوف في حرب قذرة زي حربهم مع إيران حتبقي مؤثرة أكتر من القنبلة النووية .. كمان عرفوا إن المستقبل هو للطيارات بدون طيار .. مين بيعرف يصنع طيارات بدون طيار كويسة في السوق؟ .. إسرائيل .. ده يفسرلك جوء الدفء في العلاقات بين الخليج و بين إسرائيل في الوقت الحالي.
- سبب مساعد كمان هو إن باكستان رفضت تلبي طلب السعودية إنها تبعت قوات برية لليمن .. تاني حاول تبص للنقطة دي من وجهة نظر السعوديين .. إنتي يا باكستان معندكيش مشكلة تبعتي 30,000 مقاتل للبحرين كقوات تأمين للحكومة البحرينية .. دي معلومة حقيقية بالمناسبة .. البحرين اللي أغلب شعبها بينتمي للمذهب الشيعي و بيحكمهم عيلة مالكة بتنتمي للأقلية السنية بيحميها قوات باكستانية اللي بيدفع تكاليف قعدتها في البحرين هو السعودية .. السؤال اللي كان حياكل دماغ السعوديين هو ليه مرضتوش تساعدونا في اليمن؟ .. قد يقول قائل إن المشكلة مش إن باكستان مرضتش تبعت قوات .. المشكلة إن باكستان بلد علي الأقل قدام الناس ديموقراطية .. بلد ليها مجلس شعب لازم يوافق علي إرسال قوات مسلحة بره البلد و البرلمان ده سنة 2015 رفض إن ده يحصل .. مش معني إن الحكومة السعودية تتمني ل(محمد بن سلمان) الرضا يرضي إن باكستان هي كمان ماشية بنفس الإسلوب.
- فيه سبب ثالث ممكن يكون جه في دماغ الناس الدحيحة اللي مذاكرة كويس العلاقات الباكستانية السعودية و هو إن دكتور (عبدالقادر خان) الأب الروحي للمشروع النووي الباكستاني إتعرف إنه سرب سر الصنعة للإيرانيين و دي كانت فضيحة هزت أوي العلاقة بين باكستان و المملكة.
إزاي الباكستانيين شايفين السعودية .. لو إحنا الإيكس بتاعكوا فإحنا إترمينا في حضن الصين:
فعلياً والله و دي شهادة لله يعني نادر أوي تلاقي بلد تقف جنب بلد في وقت زنقتها زي ما السعودية وقفت جنب باكستان في السبعينات .. المفروض يعني باكستان تشيل الهلال و النجمة في علمها و تحط مكانهم صورة الملك (فيصل) الله يرحمه .. سنة 1971 إنفصلت بنجلاديش عن باكستان .. باكستان وقتها كانت بلد في طريقها لمزبلة التاريخ بس السعودية لحقتها .. الملك (فيصل) وقف جنبهم .. عايزين فلوس خدوا .. أهل بلدكوا مش لاقيين شغل هاتوهم عندي السعودية يشتغلوا .. عايزين تنظموا قمة منظمة التعاون الإسلامي من عينيا و فعلاً إتنظمت القمة في مدينة لاهور الباكستانية سنة 1974 و هي دي النقطة .. أنا بحكي حاجة حصلت في السبعينات .. زي ما موضة السبعينات خلاص إنتهت و محدش بقي بيلبس بناطيل الشارلستون ولا بيلبس القمصان اللي بياقات كبيرة فبرده لا إقتصاد السعودية دلوقتي زي ما كان في السبعينات ولا اللي بيحكم السعودية دلوقتي زي اللي كان بيحكمها في السبعينات .. (محمد بن سلمان) عامل زي (محمد صبحي) في مسرحية كارمن لما كان بيجسد شخصية المخرج اللي له تصور تاني خالص عن أي حد تاني.
المشكلة إن زي ما السعوديين بقي ليهم تصور تاني خالص عن علاقتهم مع باكستان فبرده الباكستانيين بقي ليهم تصور تاني خالص عن مستقبلهم كدولة .. فعلياً و مش ببالغ لو قلتلك إن باكستان إترمت في حضن الصين .. الباكستانيين مش علي لسانهم غير كلمة واحدة .. CPEC .. دي إختصار China-Pakistan Economic Corridor يعني الممر الإقتصادي بين باكستان و الصين و دي إتفاقية إقتصادية تعتبر جزء من إستراتيجية كبيرة أوي إسمها OBOR و دي إختصار One Belt One Road يعني مبادرة طريق واحد و حزام واحد.
أنا أقدر أتفهم إن العلاقات بين الدول شبه العلاقة بين البني أدمين .. أحيانا رجل و ست متجوزين يقرروا يتطلقوا .. هو لوحده رجل كويس و هي لوحدها ست كويسة بس قعدتهم مع بعض بتطلع أسوأ ما فيهم .. ده طبيعي و ساعتها الطلاق بيكون هو الحل المناسب .. برده السعودية و باكستان وصلوا لمرحلة الطلاق .. السعودية كانت عايزة باكستان عشان سلاحها النووي و لما السعودية لقت إنها مش محتاجه ده فبقت مش معتبره باكستان بلد ضروري إنها تبقي حليفة ليها .. برده باكستان كانت محتاجة السعودية عشان فلوسها و لما فلوس السعودية خلصت راحت إترمت في حضن الصين .. ده أنا أقدر أفهمه .. اللي أنا مش قادر أفهمه هو شغل النسوان في الخناقة بينهم .. خلاص أنتوا بلدين بقيتوا مش شايفين إن مصلحتكوا إنكوا تفضلوا متجوزين فزي ما دخلتوا بالمعروف أخرجوا بالمعروف.
المصادر:
- مقالة بعنوان Pakistan-Saudi Arabia Relations: End of an Era نشرت في مجلة Eurasia Review و ده لينك المقالة الأصلية:
https://www.eurasiareview.com/20112020-pakistan-saudi-arabia-relations-end-of-an-era-oped/ - مقالة بعنوان Are Saudi Arabia and Pakistan untying the knot? نشرت في موقع Deutsche Welle و ده لينك المقالة الأصلية:
https://www.dw.com/en/are-saudi-arabia-and-pakistan-untying-the-knot/a-55976690
