كلامي هنا للناس اللي إتفرجت علي مسلسل Game of Thrones و أنا عارف إنكوا كتير ما شاء الله .. عايزك تغمض عنيك و تخيل نفسك مكان الملك (روبيرت باراثيان Robert Baratheon) اللي هو الملك الطخين في الجزء الأول اللي كان متجوز (سيرسي لانيستر Cersei Lannister) و جاب (نيد ستارك Ned Stark) العاصمة عشان يبقي وزيره .. أتمني تكونوا إفتكرتوه .. لو إفتكرتوه فأنتوا غالباً فاكرين إنه مكنش بيكره في حياته قد الناس من عيلة (تارجاريان Targaryan) .. المهم .. غمض عينك و تخيل نفسك مكان (روبيرت) و جالك خبر إن واحد من أشهر الناس في المملكة و اللي صوتهم مسموع وسط الناس و ليكن مثلاً (نيد ستارك) مع إن ده مستحيل بس إفرض يعني إنه الناس بلغت (روبيرت) إنه بيقول إن عمر ما حيبقي فيه سلام في السبع ممالك إلا لما الملك (روبيرت باراثيان) يستقبل (دينيريس تارجاريان Daeneris Targaryan) و ينهي حالة الحرب بين عيلة (باراثيون) و عيلة (تارجاريان) .. ولا أقولك بلاش التشبيه ده للناس اللي مش بتتفرج علي المسلسل.
تخيل إن في الجمعية العمومية للنادي الأهلي حد تقيل جوه النادي طلع قال يا جماعة ما نرجع (عبدالله السعيد) ده ابن النادي برده و مش بس كده ده قالها و كابتن (محمود الخطيب) قاعد كمان .. تخيل رد فعل (روبيرت) حيبقي عامل إزاي؟ .. هل حيعديها بالساهل؟ .. هل حيجيب الحرس الملكي و يصرخ فيهم يقولهم هاتولي راس الكلب ده؟ .. غالباً تفكيرك حيوديك للإحتمال الثاني و غالباً إنت عندك حق .. مش لإن مسلسل Game of Thrones مسلسل دموي قد ما لإن شخصية (روبيرت باراثيان) كده .. هو بني أدم دماغه ناشفة مبيسمعش رأي حد .. هو بني أدم دموي لأبعد الحدود و طموح بشكل مبالغ فيه أحياناً .. أهو (محمد بن سلمان) هو (روبيرت باراثيان) و (جمال خاشقجي) الله يرحمه هو البني أدم اللي راسه إتقطعت لمجرد إنه إقترح ما تيجي نعيش في تبات و نبات و نخلف صبيان و بنات.
في أغسطس 2018 (جمال) كتب مقالة في جريدة The Washington Post الأميريكية و اللي تعتبر واحدة من أشهر الجرايد علي مستوي العالم قال فيها إن العالم العربي لا حيشوف سلام ولا حيشوف ديموقراطية إلا لما الإسلام السياسي يرجع يلعب تاني .. الرجل كان رأيه إن اللي بيحصل ده سببه إن الإدارة الأميريكية بتاعة كيس الشيتوس اللي بيحكم دلوقتي (دونالد ترامب Donald Trump) ماشية ورا السعودية في إنها ترفض أي كلام يتقال فيه سيرة جماعة الإخوان المسلمين .. في رأي (جمال) إن الموقف الأميريكي ده يعتبر ضد مبدأ الديموقراطية و طالما ده هو موقف الإدارة الأميريكية فالعالم العربي حيفضل طول حياته يحكمه حكومات ديكتاتورية فاسدة.
فيه منكوا دلوقتي بيصرخوا أووووو ماااااي جاااااد ده (جمال) ده بني أدم شجاع أوي بس الحقيقة إن ده كان رأي (جمال) في الإدارة الأميريكية من سنة 2005 .. عشان أبسطهالك خالص .. رأي (جمال خاشقجي) هو الأتي .. الإسلاميين حاجتين .. إسلاميين معترفين إن فيه حاجة اسمها دستور و حاجة اسمها إنتخابات و أحزاب سياسية زي جماعة الإخوان المسلمين .. و إسلاميين مش معترفين غير إننا نلبس حزام ناسف و نروح نفجر نفسنا وسط سوق أو جامع أو كنيسة زي القاعدة و داعش .. المشكلة إن الأمريكان مش فاهمين الفرق بين الإتنين و عندهم فوبيا من كلمة إسلام لدرجة إنهم معتبرين الاتنين حاجة واحدة .. ده معناه إن الأمريكان شايفين الحد الوحيد اللي ينفع نتصاحب عليه في الشرق الأوسط هم يا إما العسكر أو أمراء الخليج .. فهمت دماغ الرجل؟ .. لو لسه مفهمتش فهو بمنتهي البساطة عايز (روبيرت باراثيان) ينهي حالة الحرب الأهلية و يسمح لعيلة (تارجاريان) يرجعوا تاني و مش بعيد لو طلع منهم حد كويس يحكموا كمان .. و عشان كده هو إتقتل.
يحكي أن زمان كان بيحكم بريطانيا ملك مفتري حبتين اسمه (هنري الثاني Henry II) و كان فيه قسيس عامله صداع في دماغه اسمه (توماس بيكيت Thomas Becket) .. الفكرة إن (هنري الثاني) ده كان بني ابن تيييييت بس (توماس بيكيت) كان بني أدم حقاني مبيرضاش بالظلم .. في مرة الملك كان قاعد وسط حاشيته فقالهم مين فيكوا يقدر يريحني من القسيس اللي واجع دماغي ده؟ .. تاني يوم كان (توماس بيكيت) إتقتل .. قد يكون الملك قال كده بيهزر .. قد يكون كان بيتكلم جد .. الله أعلم .. بس اللي إحنا متؤكدين منه إن فيه ناس وسط حاشيته مكنش عندها أي مانع إنها تقتل النفس التي حرم الله قتلها إلا بالحق لمجرد إنهم يرضوا الحاكم .. غالباً ده نفس الموقف اللي حصل مع (جمال) .. (محمد بن سلمان) ممكن يكون قال لحاشيته بعد المقالة اللي كتبها (جمال) أنا عايز البني أدم ده عايش أو ميت .. ممكن ميكونش قالها صراحة إقتلوه .. ممكن يكون قالها و هو متعصب بس حاشيته إفتكروه بيتكلم جد .. الله أعلم .. بس اللي إحنا عارفينه إن فيه فريق إتبعت إسطنبول و عارفين إن الفريق ده هو المسئول عن مقتل (جمال) و هم اللي تخلصوا من جثته .. إحنا عارفين إن واحد من الفريق ده بعدها بكام يوم إتقتل في حادثة عربية و الله أعلم مصير باقي الفريق ده إيه؟
كل ده سببه الخوف .. لا خوف إيه قول الفوبيا اللي عند السعوديين من حاجة اسمها الإخوان المسلمين .. لو حنكمل في تشبيهات Game of Thrones فكراهية السعوديين للإخوان المسلمين شبه كراهيه (رامزي بولتون Ramsey Bolton) لعيلة (ستارك Stark) .. أو شبه كراهية (سيرسي لانيستر) لأي حد غير (سيرسي لانيستر).
فيه منكوا لحد دلوقتي مش فاهم ليه؟ .. إيه اللي يخلي السعوديين يكرههوا الإخوان المسلمين أوي كده لدرجة إنهم يقتلوا صحفي كتب مقالة غالباً محدش في العالم العربي كله قراها عن إن الحل الوحيد للعالم العربي إنه يستقر هو إن الإخوان المسلمين يرجعوا للعبة السياسية؟ .. عشان تفهم الإجابة خليني أخدك في رحلة سريعة أوي لتاريخ العلاقة بين الإتنين و حسيبك لوحدك تستنج السبب:
الإخوان المسلمين مش ملايكة و في نفس الوقت مش شياطين .. هم بني أدمين بيعملوا حاجات كويسة و حاجات أحياناً تخليك تستغرب إزاي بني أدم يعمل كده؟ .. حاول تفكر فيهم كأنهم (نيد ستارك) .. هو بني أدم كويس في المجمل بس عمال يرتكب أخطاء ودت عيلته و السبع ممالك كلها في ستين داهية لدرجة إنك تحسه أهبل في نفسه كده .. مهم تفهم إن الإخوان المسلمين بدأوا أيام ما الإنجليز كانوا محتلين مصر و كان الملك لعبة في إيديهم (أقصد لعبة في إيد الإنجليز) .. وقتها إنت لو شاب في الجامعة و شايف إن الوضع في البلد مينفعش يتسكت عليه فإنت قدامك كذا إختيار .. يا إما تبقي فاشي يعني تقف في صف الطليان و الألمان أيام ما الحرب العالمية الثانية كانت مولعة و ساعتها لو الإنجليز شموا خبر فإنت حتروح ورا الشمس .. يا إما تبقي شيوعي بتعشق حاجة اسمها الإتحاد السوفيتي لدرجة إنك كل ما تشوف علم لونه أحمر تحس إنك سوري في الكلمة عايز تروح تحضنه و تبوسه و تاخده معاك الشقة و ساعتها برده لو الإنجليز شموا خبر حيودوك ورا الشمس .. خدت بالك إن الإختيارين كانوا علمانيين يعني ملهمش علاقة بالدين؟
وقتها كلمة سياسة كانت معناها إنك تسيب ربنا بره تفكيرك خالص لإن قراراتك بتبقي مبنية علي أفكار سياسية ملهاش علاقة بالدين زي إن الحكومة هي اللي تقرر إنت تاكل إيه؟ و تشرب إيه؟ و مصلحتك إيه؟ .. الإخوان المسلمين بدأوا كإختيار ثالث اللي هو طب إيه رأيكوا نشوف الدين بيقول إيه في القضايا اللي الشيوعية و الفاشية ليهم رأي معين فيها؟ .. لإن تاني إنت بتتكلم عن مصر تحت الإحتلال الإنجليزي في وقت الحرب العالمية الثانية فسواء إنت كشاب في الجامعة قررت تبقي فاشي أو تبقي شيوعي فإنت عارف إنك حيتقبض عليك فإنت و زمايلك بتشتغلوا و بتنشروا أفكاركوا بشكل سري و الأهم إنكوا منظمين نفسكوا بهيكل معين شبه الهيكل بتاع الشركات إن فيه جونيور و فوقه سينيور و فوقه مدير إدارة و هكذا .. الإخوان المسلمين إتعلموا نفس التفكير و بالتالي لزقت فيهم كلمة التنظيم و دي كلمة تحسها شتيمة متفهمش ليه .. هي كلمة تخوف و خلاص.
لما حصلت ثورة 1952 دخل في اللعبة إختيار رابع .. إنت كان ممكن تبقي فاشي بس الإختيار ده تقريباً إنتهي بعد ما الطليان و الألمان خسروا الحرب العالمية الثانية .. كان ممكن تبقي شيوعي خصوصاً إن بعد الحرب العالمية الثانية ما خلصت بقت القوتين العظمتين اللي بيحكموا العالم وقتها أميركا و الإتحاد السوفيتي .. و كان ممكن تبقي إخوان و ساعتها حتبقي ماشي زي ما الدين بيقول أو علي الأقل حسب ما إنت شايف الدين بيقول إيه .. و ظهر عندك إختيار رابع اللي هو القومية العربية .. الحقيقة إن القومية العربية متفرقش كتير عن الفاشية .. زي ما إنت لو كنت فاشي فإنت بتقوم الصبح تسبح بنعم زعيم الأمة الإيطالية (موسوليني) و قبل ما تنام تتمني إن حامي حمي الأمة (موسوليني) يرضي عنك .. فإنت لو قررت تبقي قومي فإنت بتقوم الصبح تمجد في شخص زعيم الأمة (جمال عبد الناصر) الله يرحمه و قبل ما تنام تبوس صورته و تاخدها في حضنك .. مشكلة القوميين إنهم زي الفريك مبيحبوش شريك .. هم ميقدروش ييجوا جنب الشيوعيين لإنهم معتمدين علي دعم السوفييت .. فزي ما بنقول اللي ميقدرش علي الحمار يتشطر علي البردعة .. و في تشبيهنا ده الإخوان المسلمين كانوا هم البردعة .. (جمال عبد الناصر) فعلياً كان بيدوس علي وش الإخوان المسلمين لإنه كان شايفهم تهديد لسلطته .. هو رجل كان شايف إنه الوحيد اللي بيفهم و إن أي حد يقوله إنت غلطان يبقي عميل و يستحق الموت .. الغريب إن السند الوحيد للإخوان المسلمين كانوا الخلايجة .. اوووووووووو ماااااااي جاااااااد مكنتش متوقع انت الPlot Twist دي أنا عارف.
حط نفسك مكان حد زي الملك السعودي مثلاً .. إنت رجل بتسمي نفسك خادم الحرمين الشريفين بس فيه عندك طوفان اسمه الشيوعية شايف إن الدين مش بس حاجة وحشة ده شايفه مرض معدي بيقتل الدولة و إنت مش عارف تعمل فيه إيه؟ .. للجيل الجديد اللي مش فاهم يعني إيه شيوعية؟ و قد إيه الخلايجة كانوا خايفين منها؟ خليني أشرحلك النقطة دي بسرعة .. عارف كده الخناقة بين الأهلي و بيراميدز؟ .. أنا عارف إن فيه ناس بدأت تتضايق من تشبيهات الكورة الكتير بس أنا بس بدي تشبيه عشان تفهم .. أهو السعودية كانت زي بيراميدز ده .. ده كيان جديد ملوش تاريخ بس قدامه طوفان له ناس مقتنعه به إقتناع أعمي عمال يشيل أي حد قدامه اللي هو الأهلي أو في حالتنا الشيوعية .. زي ما بيراميدز بيلجاً ل(مرتضي منصور) عشان يفرمل الأهلي .. السعودية كمان لجأت للإخوان المسلمين عشان يفرملوا الشيوعيين.
من الثمانينات و إنت طالع و الإخوان المسلمين لعبة في إيد الحكام عشان كل حاكم يستخدمهم علي حسب مصلحته .. (أنور السادات) الله يرحمه كان مستخدمهم عشان يضرب بيهم الشيوعيين يعني هو عجبته أوي الحركة بتاعة الخلايجة بس هو دفع ثمن ده حياته لإن (خالد الإسلامبولي) اللي خطط و نفذ عمليه إغتياله في مرحلة من حياته كان منتمي للإخوان المسلمين .. (حسني مبارك) الله يرحمه كان سايبهم يدخلوا البرلمان عشان يبان قدام العالم إن أنا أهو عندي برلمان و فيه معارضة لا و كمان بينتقدوني قدام الناس و سايبهم و اللهم كتر من أمثالي و باركلي و طول في عمري .. الملك (حسين) ملك الأردن الله يرحمه بقي اللي كان معدي الصراحة .. الرجل ده كان مخلي المخابرات الأردنية تدي سلاح و فلوس للإخوان المسلمين في سوريا لإنه وقتها كان متخانق مع (حافظ الأسد) الله يرحمه برده لحد ما أخو (حافظ الأسد) قدر يحبط التمرد ده بإنه قتل عشرات الالاف من المدنيين اللي كانوا عايشين في مدينة حما السورية معقل الإخوان المسلمين هناك .. يا رجل ده حتي الإسرائيليين نالهم من الحب جانب .. زمان كان قائد الفلسطينيين واحد اسمه (ياسر عرفات) الله يرحمه المهم إن الرجل ده كان قائد حاجة اسمها منظمة التحرير الفلسطينية و كان صداع مزمن في دماغ الإسرائيليين و علي فكرة (ياسر عرفات) إتعلم في مصر و كانت له علاقة كويسة أوي بجماعة الإخوان المسلمين في مصر .. جم الإسرائيليين عشان يضعفوا مركزه و اسمه بين الفلسطينيين قدموا مساعدات مش قليلة لحركة حماس اللي هي فرع جماعة الإخوان المسلمين في فلسطين عشان تبقي هي المعارضة لحكم (ياسر عرفات) و ده يوريك قد إيه السياسة دي لعبة نجسة بنت ستين كلب.
الإخوان المسلمين لإني شبهتم بإنهم شبه عيلة (ستارك) فكل واحد فيهم بدماغ .. زي ما إنت عندك (روب ستارك Rob Stark) كان عايز يعلم علي اللانيسترز فيه عندك (أريا Arya) اللي مشت في سكة إنها تبقي قتالة قتلة و فيه عندك (سانسا Sansa) السهتانة علي نفسها .. فكمان الإخوان المسلمين في كل بلد مشيوا كل واحد بدماغ .. حركة حماس كانت عنيفة حبتين سواء ضد إسرائيل أو ضد الفلسطينيين نفسهم و اللي عملوه في 2007 لما طردوا حركة فتح من قطاع غزة دليل علي كده .. حركة النهضة في تونس مشت في سكة تانية خالص و يمكن سبب الإستقرار النسبي في تونس حالياً هو إن حركة النهضة كانت فعلاً مثال يحتزي به في الوعي السياسي مع إن الحركة دي كانت بتتهم بإنها إرهابية أيام ما (زين العابدين بن علي) الله يرحمه كان بيحكم تونس .. عارف إن أنا لحد دلوقتي متكلمتش عن سر الكراهية الشديدة للإخوان المسلمين في نفوس السعوديين و ده حيودينا لثورات الربيع العربي.
مشكلة السعوديين مع الإخوان المسلمين بدأت مع يناير 2011 .. زي ما عيلة (لانيسترز) بيكرههوا عيلة (ستارك) عشان شايفينهم عايزين الكرسي فكمان الخلايجة شايفين إن الإخوان المسلمين عايزين يقعدوا علي الكراسي و قد يكون عندهم حق بس ده جزء من لعبه السياسة إنك تحكم و تيجي إنتخابات تخسرها و حد غيرك يحكم و بعد كده تيجي إنتخابات فتحكم إنت تاني .. بس الخلايجة معندهمش الكلام ده .. إنتخابات إيه و بتاع إيه.
لما ثورة يناير حصلت ده بالضبط كان عامل زي في Game of Thrones الملك (جيوفري) مات .. لو تفتكر في المسلسل ده قلب كل حاجة .. فجأة كل الناس طمعت في الكرسي .. الإخوان المسلمين مكانوش من ضمن أول الناس اللي راحت التحرير .. دي حقيقة محدش يقدر ينكرها .. ليه هم مكانوش أول ناس في التحرير ده ممكن نتكلم فيه بعدين .. بداية إن الإخوان المسلمين يطلعلهم صوت هو لما بدأت مصر تعيش جو الإنتخابات و الإستفتاءات الحرة .. فاكرين الأيام دي؟ .. ساعتها سنين خبرتهم في الشغل بتاع السياسة و إزاي تدخل إنتخابات مع كمان اللوجو السيكسي أوي اللي هم استخدموه بتاع الإسلام هو الحل خلاهم زي الولد في الكوتشينة اللي ينزل يكش كل حاجة .. كل ده ساعدهم إنهم في الأخر يحطوا (محمد مرسي) الله يرحمه علي الكرسي .. مش ملاحظ إن كل الحكام اللي جبت اساميها في المقالة ماتوا خلاص .. فجأة كل أفرع الجماعة في الدول المختلفة حست إن دي اللحظة اللي يسيطروا فيها علي الحكم .. في مصر و في تونس و في ليبيا و في فلسطين و حتي الأردن .. طبعاً السعوديين يشوفوا ده و قلبهم يقع بين رجليهم .. فيه في السياسة حاجة بيسموها Feel Good Factor إنك تحس إن الدنيا ماشية معاك زي السكينة في التورتة و تبدأ تغني الدنيا وردي و إنت بتستحمي .. الإحساس ده لإنه في وقتها كان جامد حبتين حتي (باراك أوباما) شخصياً لقي نفسه مجبر إنه يمشي مع التيار .. هنا السعوديين عملوا الدخول المفاجيء بتاع (دينيريس تارجاريان) .. صاربرايز ماذر فاكرز.
كلنا عرفنا إن الإخوان المسلمين معرفوش يحكموا و ده خلي كتير من المصريين يقولوا لنفسهم بلا إسلام هو الحل بلا بتاع .. من المعلومات اللي بهرتني أوي إن الرئيس (عبدالفتاح السيسي) كان ملحق عسكري في سفارة مصر في الرياض .. هنا أنا اللي حقول اووووووه ماااااااي جااااااد .. إذا كانت خطة السعوديين إنهم يخلصوا من الإخوان المسلمين في مصر مشت زي ما هم عايزين فالموضوع فرقع في وشهم في سوريا .. دلوقتي الأتراك و القطريين وقفوا في صف الإخوان المسلمين في سوريا بس طبعاً السعوديين عمرهم ما حيقفوا ورا الإخوان المسلمين ولا حيقفوا مع الأتراك في حاجة ولا حتي في جنازة .. بس في نفس الوقت السعوديين لازم يبقي ليهم دور في سوريا و معلش يعني خادم الحرمين الشريفين مش علي أخر الزمن حيدي فلوس لأحزاب علمانية .. السعوديين قعدوا يهرشوا في راسهم حبة حلوين لحد ما أخيراً لقوا الحل .. إحنا ندعم الأصوليين الإسلاميين قال يعني الناس دول حيبقي السيطرة عليهم أسهل من السيطرة علي الإخوان المسلمين .. شفتوا أكل الكبسة الكتير بيعمل إيه .. السعوديين وقفوا ورا حاجة اسمها جبهة النصرة اللي هم عشان أقربهالك أوي عارف تنظيم القاعدة بتاع (اسامه بن لادن) الله يرحمه؟ أهو جبهة النصرة دي فرع القاعدة في سوريا .. وسط كل الهبد اللي بيحصل في سوريا ده طلعلنا خازوق كبير أوي اسمه داعش.
في يناير 2015 يشاء القدر إن الملك (عبدالله) يتوفاه الله و يجي مكانه الملك (سلمان بن عبدالعزيز) .. (سلمان) مهم تكون فاهم إنه رجل كبير في السن .. ده رجل في سن جدك و هل إنت عمر شفت جدك بيعمل حاجة غير إنه ياكل و ينام و يصلي و يتفرج علي التليفيزيون؟ .. رجل في سن (سلمان) ده مينفعش يحكم عشان كده ابنه (محمد) بدأ واحدة واحدة يمسك شغل أبوه لحد ما بقي هو الكل في الكل في المملكة .. اللي (جمال خاشقجي) مكنش فاهمه أو يمكن كان فاهمه بس مكنش قادر يستوعبه أوي هو إن الأمريكان مش فارق معاهم الديموقراطية و الكلام الفاضي ده .. دي ناس بتاعة مصلحتها و لو مصحلتها معاك حتقف معاك حتي لو إنت ظالم و مفتري و ابن ستين كلب .. عندك (جورج بوش الإبن) ما هو دخل العراق بحجة إيه؟ مش عشان قال إيه يحررها من إيد (صدام حسين) الله يرحمه الديكتاتور الوحش قتال القتلة الظالم؟ سو كيوووت الحقيقة .. معاك والله إن (صدام حسين) كان ظالم و مفتري و حسابه عند ربنا بس إحتلال العراق مخلاهاش سويسرا العالم العربي .. عندك (باراك أوباما) لما طلع بعد ثورة يناير يقولنا أنا في ظهركوا و أنا سندكوا و عمل فيها (محمد حماقي) في نفسه و في أغسطس 2013 فيه أكتر من ألف بني أدم إتقتلوا بدم بارد و هو بص الناحية الثانية كأنه مش معانا علي الخط .. الTrend ده كمل مع (ترامب) .. (جمال) مكنش فاهم إن مفيش حاجة بتوقف صفقات السلاح .. كل المباديء بتسكت قصاد الدولارات.
فاكرين الصورة اللي إتصورت يوم 21 مايو 2017 لما (ترامب) و (السيسي) و الملك (سلمان) إفتتحوا المركز العالمي لمكافحة إيدوليجات التطرف و الثلاثة إتصوروا حاطين إيديهم علي كورة منورة .. فاكرين الصورة دي؟ .. فكك من الصورة و الكوميكسات الكتير اللي تهلك من الضحك عليها .. فيه قصة حلوة أوي حصلت في كواليس اليوم ده عشان بس تعرفوا إن اللي بيحصل ده ولا كأنه حلقة فعلاً من Game of Thrones .. يحكي أن وسط اللي قاعدين كان (جاريد كوشنر Jared Kushner) جوز بنت (ترامب) و اللي يعتبر دراعه اليمين و هو رئيس دلوقتي و كمان من ضمن الناس اللي حضرت الأمير (محمد بن نايف) .. في الوقت ده (محمد بن نايف) كان وزير الداخلية و كان هو ولي العهد و هو علي فكرة يبقي ابن أخو الملك (سلمان) .. يعني الملك يبقي عمه .. العلاقة بين (سلمان) و ابنه (محمد) و ابن اخوه (محمد بن نايف) تقدر تشبهها بالمثل الشعبي يا داخل بين البصلة و قشرتها ما ينوبك إلا صنتها .. في رمضان 2017 (محمد بن نايف) إتقاله إنت حتفطر النهاردة في القصر الملكي و فعلاً راح و بعد الفطار إتقاله إنت حتقابل الملك دلوقتي .. قام مشي ورا شوية ناس المفروض يعني انهم أمن و دخلوه أوضة و خدوا منه موبايلاته و كانوا عايزينه يمضي علي ورقة تنحيه من منصبه كوزير داخلية و ولي عهد المملكة .. لما (محمد بن نايف) رفض سابوه في الأوضة مع إنه أولاً عنده السكر يعني لازم ياخد أدويته و ثانياً سنة 2009 هو إتعرض لمحاولة إغتيال فكان بياخد أدوية كتير عشان حالته الصحية .. في الوقت ده بدأ رجاله (محمد بن سلمان) ينشروا إشاعة إن (محمد بن نايف) مدمن و مينفعش منصب خادم الحرمين الشريفين يمسكه مدمن .. يا عيني (محمد بن نايف) فضل محبوس في الأوضة دي لحد ما مضي فعلاً علي ورقة تنحيه بعد ما حالته الصحية باظت خالص.
دي دماغ (محمد بن سلمان) إنه يلوي دراعك لحد ما ياخد اللي هو عايزه .. هو عمل كده مع (محمد بن نايف) ابن عمه و عمل كده مع بقية عيلته لما حبس أغلب الأمراء في فندق ريتز كارلتون الرياض لحد ما أولاً يتعهدوا بالولاء له و ثانياً كل واحد يشخلل جيبه عشان يعدي.
اللي كان عايزه (محمد بن سلمان) من (جمال) هو إنه يتعهدله بالولاء .. من حقك تسأل نفسك طب هو (جمال) عنده إيه؟ ده لا هو أمير ولا هو رجل أعمال عنده مليارات .. مشكلة (جمال) مع (محمد بن سلمان) في حاجتين:
- (جمال) محسوب عليه إنه من صحاب واحد اسمه (تركي أل فيصل) .. (تركي) ده يبقي ابن الملك (فيصل) الله يرحمه و لسنين كان هو اللي ماسك المخابرات السعودية و كان سفير للسعودية في أميركا و بريطانيا .. هو من حقه يبقي ملك بس هو قال قبل كده كتير إنه عليا الطلاق ما عايز أبقي ملك .. بس الكلام ده ميفرقش مع (محمد بن سلمان) .. أي حد يتعرف عنه إنه مصاحب (تركي ال فيصل) فعلياً بيتداس علي وشه.
- (جمال) كان صحفي بيكتب في جرنان محترم و أي حد عايز يفهم أي حاجة عن السعودية بيروحله يقعد معاه .. هو مكنش عايز (أل سعود) يمشوا إنما كان عنده مشكلة حقيقية مع الطريقة اللي (محمد بن سلمان) بيحكم بيها.
(جمال) الله يرحمه كان سوري في الكلمة أهبل لإنه معرفش يقيم شخصية (محمد بن سلمان) صح .. ده شاب ربنا عطاله النفوذ و الفلوس بس للأسف مبيعرفش يستخدمهم كويس .. ده شخص غلاوي أوي في خصومته و محاوط نفسه بشلة محدش فيهم بيستجري يقوله لا .. الميكس ده بيخلق شخصية خطر أوي زود علي كده إنه حيبقي قائد فعلياً أقوي دولة في العالم العربي فتلاقي نفسك قدام حد في سكته انه يبقي (صدام حسين) الجديد .. بزمتك يا شيخ هو كان فيه حد بيعرف يهزر مع (صدام)؟
المصادر:
- مقالة بعنوان Why Jamal Khashoggi was Killed .. نشرت في موقع The American Conservative و ده لينك المقالة الأصلية:
https://www.theamericanconservative.com/articles/why-jamal-khashoggi-was-killed/ - مقالة بعنوان The Real Reasons Saudi Crown Prince Mohammed bin Salman Wanted Khashoggi ‘Dead or Alive’ .. نشرت في موقع The Daily Beast و ده لينك المقالة الأصلية:
ttps://www.thedailybeast.com/the-real-reasons-saudi-crown-prince-mohammed-bin-salman-wanted-khashoggi-dead
