كارلوس غصن .. قصة هروب ولا أفلام (جيمس بوند).

لينك التسجيل الصوتي علي ساوند كلاود:
https://on.soundcloud.com/Hqccw

النهاردة حنحكي مع بعض قصة و علي أخر القصة دي حتلاقي نفسك بتقول لفظ خارج من 3 حروف .. أديني بحذر من دلوقتي أهو .. إحنا داخلين علي أيام مفترجة و ربنا يكرمنا إن شاء الله .. المهم إن قصة النهاردة بتدور حول شخصين و الشخصين دول تقريبأ مشافوش بعض غير مرة واحدة بس أثروا في حياة بعض بشكل إنت لا تتخيله .. قصة النهاردة لما أخلصها حتحس إنها سيناريو فيلم أمريكاني مش حاجة حصلت بحق و حقيقي بس صدقني لو قلتلك إنها قصة حقيقية رغم إن حيجيلك إحساس إني بهبد أو بسرح بيك بس ده مش حقيقي .. قصة النهاردة عن إزاي واحد إسمه (مايكل تايلور Michael Taylor) كان ضابط سابق في القوات الخاصة الأميريكية قدر يهرب (كارلوس غصن) المدير التنفيذي لشركة نيسان اليابانية بتاعة العربيات من البيت اللي كان محبوس فيه بأمر قضائي من اليابان لحد لبنان جوه صندوق مكبر صوت من بتوع الأفراح .. مش قلتلك حتحس إنها قصة فيلم أمريكاني.

يناير 2004 .. اللي تشتغل معاه و يعجبك كمل معاه:

(مايكل تايلور) زيه زي ضباط كتير بيطلعوا بره الخدمة من القوات المسلحة الأميريكية خصوصاً لو كانوا في القوات الخاصة بيشتغلوا في القطاع الخاص .. فيه منهم اللي بيروح في سكة الحراسات الخاصة .. فيه اللي بيفتح شركة بيع أسلحة .. (مايكل) أسس شركة إسمها American International Security Corporation و لو عايز تسأل هي الشركة دي شغالة في إيه فعلي الورق بتاع السجل التجاري للشركة دي هي شغالة في حاجة إسمها تقييم الأخطار Risk Assessment .. (مايكل) كان الشخص اللي لو إنت رجل معاك فلوس واقع في مشكلة مش عارف تطلع منها إزاي فهو بيلحقك .. أحياناً اللي كان بيجيبله شغل هم صحابه اللي شغالين في مكتب التحقيقات الفيدرالي F.B.I أو حتي جوه وزارة الخارجية.

لنفترض إن إنتي ست أميريكية إتجوزتي رجل أعمل لبناني و لما حصلت بينكوا مشاكل و حتطلقوا قام خد عيالك و هرب بيهم علي بيروت .. حضرتك بتتصلي ب(مايكل) و هو اللي بيرجعلك عيالك .. لو إنت شاب من عيلة معاها فلوس رحت مثلاً بنما تقضي أجازة و كنت سكران و حالتك كرب و سقت عربيتك و خبطت حد قتلته و إتحبست .. أبوك بيكلم (مايكل) هو اللي يطلعك من السجن .. لأكتر من عشرين سنة و (مايكل) شغال في البيزنس ده بياخد علي الشغلانة الواحدة ما بين 20,000 لحد 2 مليون دولار علي حسب صعوبة الشغلانة .. ده حقيقي علي فكرة إن سمعته في السوق بقت إن بيتقال عليه Captain America.

سنة 2004 (مايكل) كان في بغداد شغال في تأمين الأجانب اللي شغالين في العراق بعد الغزو الأميريكي .. غزو العراق ده أكل شركات الحراسات الخاصة الأمريكاني الشهد و الله .. رجال أعمال ماشي .. محققين تبع الأمم المتحدة في جرايم الإبادة الجماعية اللي كان متهم فيها (صدام حسين) الله يرحمه ماشي .. من ضمن زباينه كان رجل أعمال لبناني إسمه (علي) .. الحقيقة (مايكل) مكنش يعرف (علي) شخصياً بس إنت عارف في البيزنس الدنيا أوضة و صالة .. (علي) جه بغداد عشان يبيع بوليصات تأمين سواء علي الحياة أو علي الممتلكات و وظيفة (مايكل تايلور) كانت إنه يستقبل (علي) من مطار بغداد يحطه في عربية مصحفة و يجري بيه علي طريق مطار بغداد الدولي اللي كان وقتها أخطر طريق سريع في العالم من كتر العبوات الناسفة اللي كانت بتفرقع فيه لحد ما يوصله للمنطقة الخضراء Green Zone في قلب بغداد .. كانت شغلانة واحدة جمعت بينهم بس جري الشريط لحد سنة 2019 لما (مايكل تايلور) جاله تليفون من (علي).

مارس 2019 .. فيه واحد صاحبي واقع في مشكلة عايزين نلحقه:

في مارس 2019 (مايكل) اللي وقتها كان عنده 59 سنة كان قاعد في أمان الله في بيته لما جاله تليفون من (علي) .. في المكالمة دي (علي) قال ل(مايكل) إن فيه واحد صاحبه هو يعرفه واقع في مشكلة في اليابان و عايزين نلحقه .. طب مين اللي إنت عايز تلحقه ده؟ .. واحد صاحبي إسمه (كارلوس غصن) .. (علي) كان عايز يعرف الشغلانة دي حتاخد وقت قد إيه؟ و حتكلف كام؟ بس هي المشكلة اللي (مايكل) حاول يشرحاله في التليفون إن اليابان مش العراق ولا بنما .. اليابان بلد متقدمة .. بلد فيها قوانين .. الدنيا مش حتبقي سهلة كده .. المهم إن المكالمة قفلت علي إن (مايكل) بيقول ل(علي) سبني أفكر.

بمجرد ما (مايكل) دخل علي النت و كتب إسم (كارلوس غصن) إتخض .. تاني يوم هو كلم (علي) عشان بس يتأكد منه إنه كان بيتكلم إمبارح عن (كارلوس غصن) بتاع شركة نيسان و (علي) قاله أيوه هو ده .. مع كل كلمة (مايكل) بيقراها عن (كارلوس غصن) كان المفروض يقول لنفسه بلاش تاخد الشغلانة دي .. كل ما بيذاكر أكتر كل ما صعوبة الشغلانة بتزيد و الحقيقة إن اللي (مايكل) عرفه عن (كارلوس غصن) كان يخض أي حد.

(كارلوس غصن) البوستات علي السوشيال ميديا اللي إتكتبت عنه كانت بتقول إنه الرجل بتاع نيسان Nissan بس ده مش الحقيقة الكاملة .. الرجل ده كان ماسك 3 شركات اللي هم نيسان و ميتسوبيشي و رينو .. بس يمكن أهم حاجة تعرفها عن الناس اللي زيه هو إنهم مينفعش تقولهم متسافروش .. إنت لو رجل معاك فلوس تشتري شاليه في هايسندا و شاليه في بورتو السخنة فإنت فعلياً كل وييك إيند حتسافر و مش حتقعد في بيتكوا .. تخيل نفسك  بقي معاك فلوس في Level حد زي (أحمد أبوهشيمة) مثلاً .. (كارلوس غصن) كان عنده بيت في ريو دي جانيرو في البرازيل .. كان عنده قصر في بيروت .. عنده فيلا في باريس .. عنده فيلا في العاصمة الهولندية أمستردام .. إنك تقول لرجل زي ده إنت حتفضل محبوس في بيتك في العاصمة اليابانية طوكيو فإنت كده كأنك بتقتله .. بتمنع عنه الهواء .. وقت ما (علي) كلم (مايكل) كان (كارلوس) اللي كان وقتها عنده 66 سنة كان بقاله 4 شهور كاملة في بيته مبيخرجش تحت الإقامة الجبرية بأمر من النيابة اليابانية.

الحراسة اللي عليه مكنتش سهلة .. 3 كاميرات مراقبة إتركبوا علي ال3 مخارج بتوع بيته .. الباسبورين بتوعه البرازيلي و اللبناني إتاخدوا منه و إتحطوا في مكتب المحامي بتاعه .. في حالة إنه بأي صورة كانت كسر شروط الإقامة الجبرية بتاعته فهو حيدفع غرامة كاش 9 مليون دولار .. له بس الحق يخرج كل يوم مرة يروح يتغدي في مطعم فندق جراند حياة اللي جنب بيته أو لما يحب يروح للمحامي بتاعه .. ليه ده كله؟ .. هبب إيه يعني (كارلوس) في عيشته عشان اليابانيين يعاملوه زي ما يكونوا قبضوا علي (هانيبال ليكتر Hannibal Lekter)؟ .. علي رأي الشيف (شربيني) ورقة و قلم و إكتبي ورايا يا ست الكل .. الباشمهندس علي حسب كلام النيابة اليابانية أخفي عن الضرائب أرباح وصلت 80 مليون دولار علي مدي 8 سنين .. البيه خسر 16 مليون دولار من فلوسه الشخصية في كذا بيزنس خاص بيه بس عشان رصيده في البنك ميتأثرش خد الفلوس دي من حساب الشركة .. مصاريفه الشخصية كلها كانت علي حساب شركة نيسان و عشان بس أحطك في الصورة يعني إيه مصاريفه الشخصية فعايزك تعرف إن قصره في بيروت إتصرف علي إعادة فرشه أكتر من 15 مليون دولار كلهم شركة نيسان هي اللي دفعتهم.

لحد دلوقتي إنت ممكن يبقي ليك كذا رأي في اللي أنا قلته .. ممكن يكون رأيك هو ياختي كميلة مش قادرة تستحملي تفضلي قاعدة في بيتك يا بطة؟ .. أومال لو كنتي أعتقلتي في سجن العقرب كنتي عملتي إيه با بطوطة؟ .. و ممكن يكون رأيك إن دي مؤامرة عاملاها اليابان عشان يوقفوا صفقة إستحواذ شركة رينو الفرنسية علي شركة نيسان اليابانية و اللي كان (كارلوس) بيسعي فيها و إن إحتمال كبير يكون (كارلوس غصن) بريء براءة الذئب من دم سيدنا (يوسف) عليه السلام .. بس أيا كان رأيك لازم نبقي عارفين إن بعد 4 شهور من الإقامة الجبرية كان (كارلوس) دخل في مرحلة إكتئاب .. صحابه بقوا قلقانين عليه و هنا يجي دور (علي).

(علي) هو اللي عرف (كارلوس) علي مراته (كارول)  .. الإتنين إتجوزوا في 2016 .. (علي) كلم (كارول) و قالها إنه يعرف حد كان إشتغل معاه في العراق زمان حيعرف يطلع (كارلوس) من المشكلة دي .. (مايكل) سافر بيروت عشان يقابل (كارول) .. قعدوا مع بعض بالساعات .. طبعاً هي كانت بتبالغ شوية في وصف ظروف الإقامة الجبرية اللي عايش فيها جوزها بس ده منطقي عشان هي مراته .. و طبعاً في رأيها جوزها بريء و إن ده جزء من مؤامرة ضده عشان اليابانيين مش عايزين الفرنسيين يسيطروا علي شركة كبيرة زي نيسان .. (مايكل) رجع تاني علي أميركا و هو من جواه مقسوم نصين .. نص بيقوله إجري يا ولد الشغلانة دي حتوديك في داهية .. نص تاني جواه بيقوله إن لو إنت ملحقتش (كارلوس) مين حيلحقه؟

و (مايكل) في الطيارة راجع أميركا من بيروت بدأ يقرأ شوية عن النظام القضائي الياباني و مع كل كلمة يقرأها بيبقي عامل زي شخصية (حزلقوم) لما كان بيقول هاااااااار أسود .. اليابان بلد النظام القضائي فيها علي حسب وصف لجنة التعذيب التابعة للأمم المتحدة فهو نظام ملوش مكان في التاريخ غير العصور الوسطي أيام الحروب الصليبية كده .. في كوكب اليابان الشقيق من حق البوليس يعتقلك من غير تهمة و يحقق معاك من غير ما يكون معاك محامي .. اليابان بلد معدل الجريمة فيها قليل لإن الناس عارفه إنك لو إتمسكت في حاجة فإنت غالباً حتشيل أوبح .. اليابان بلد النيابة فيها بتجيب سكور إدانة 99.4% يعني اللي لو النيابة إتهمتك بأي تهمة أيا كانت هي إيه فإنت لابسها لابسها .. كوريا الشمالية النيابة عندها مش بتجيب السكور ده .. اللي قرأه (مايكل) خلي النص الثاني اللي جواه هو اللي يكسب .. لو هو ملحقش (كارلوس) مين حيلحقه؟

مهم تبقي فاهم إن دور الجدعنة اللي قرر (مايكل) يعمله زي ما يكون بيحاول يعلي علي (أحمد السقا) مش سببه إنه أمريكاني بقي و الأمريكان أصل الجدعنة .. لا خالص .. الفكرة إن (مايكل) زمان إتحط في نفس موقف (كارلوس) ده .. دلوقتي أنا حطلعك بره الأحداث شوية بس أنا لازم أحكيلك حاجة حصلت في حياة (مايكل) هي اللي خلته يقرر يساعد (كارلوس) و من غير الحكاية دي إنت مش حتقدر تستوعب و تحس بالقصة.

سنة 2007 (مايكل) كان قاعد في أمان الله في مكتبه في الشركة بتاعته لما جاله تليفون من واحد صاحبه كانوا بيخدموا سوا في القوات الخاصة .. صاحبه وقتها كان شغال في أفغانستان و قاله إن وزارة الدفاع الأميريكية عايزة تطلع شغلانة من الباطن لشركة قطاع خاص تاخد عقد تدريب العساكر الأفغان و قاله قدم و اللي فيه الخير يقدمه ربنا .. الزهر لعب مع (مايكل) و العرض بتاعه هو اللي كسب و مضي عقد ب54 مليون دولار علي مدي 5 سنين .. سنة 2012 بعد ما العقد خلص و (مايكل) خلص الشغلانة كان شغال مع إدرة مباحث المخدرات DEA في أميركا علي كمين كان حيسجل إسمه في تاريخ الباد بويز بحروف من نور .. كان المفروض إن فيه سبايك دهب بقيمة 3 مليار دولار كانوا مملوكين ل(معمر القذافي) الله يرحمه إتهربوا بره ليبيا و كانوا حيتباعوا لحزب الله .. الشغلانة اللي (مايكل) كان المفروض يعملها هو إنه يعترض الشحنة و هي رايحة من طرابلس لميناء طرطوس في سوريا علي البحر المتوسط و قبل العملية بيوم إكتشف إن مكتب التحقيقات الفيدرالي F.B.I طلع قرار إعتقال ضده .. ليه كفا الله الشر؟

قالك أصل إنت خدت العقد بتاع تدريب العساكر الأفغان من واحد كان صاحبك في الجيش و كان شغال لحسابنا في أفغانستان .. و مش بس كده .. إنت بعد ما المناقصة رسيت عليك إديته عمولته فده كده معناه إنك حتتنفخ .. النيابة الأميريكية قالت إن (مايكل) يعتبر شخص خطر مينفعش يتساب حر كده عشان هو يقدر يهرب لأي بلد في العالم فأترفضت كفالته و فضل محبوس في السجن 14 شهر مستني محاكمته و لما فلوسه خلصت و مبقاش عارف يوكل محامي قبل إنه يعترف بإنه مذنب و إتحكم عليه من غير محاكمة و كجزء من إتفاق مع النيابة بالسجن 19 شهر .. حاول بس تفهم إحساس (مايكل) لما خرج من السجن .. أنا خدمت بلدي في القوات الخاصة .. طلعت بره الخدمة فتحت بزنس إتفحت فيه 17 سنة لحد ما كبر و بقي ليا اسمي في السوق لحد ما جت النيابة دمرتلي حياتي .. (مايكل) بسبب اللي النظام القضائي الأميريكي عمله فيه تحول من بني أدم كان شغال معاه 2000 بني ادم أغلبهم كانوا ضباط قوات خاصة لبياع بيلف علي صالات الجيم يبيع مكملات غذائية فعلياً الرجل ده الدنيا رجعت بظهرها حطت عليه .. لحد ما جاتله مكالمة (علي) .. (مايكل) مكنش بيكره في حياته قد 3 كلمات .. محامي .. وكيل نيابة .. قاضي .. ده خلاه بمجرد ما يوصل أميركا يرفع سماعة التليفون و يكلم (علي) يبلغه إنه موافق ينقذ (كارلوس غصن).

31 ديسمبر 2019 .. تسمع عن فيلم Ocean’s 13؟

(مايكل) بدأ يذاكر .. خطوة رقم واحد إنه يأمن نفسه .. هو كلم صحابه اللي شغالين في القانون الدولي و قالهم لنفترض يعني إني سافرت اليابان هربت واحد من هناك وديته علي بيروت فهل كده أنا بعمل حاجة غلط وفق القانون الأمريكاني و بمجرد ما إتقاله لا إنت زي الفل فبدأ يشتغل:

• معلومة رقم واحد .. النيابة اليابانية مأجبرتش (كارلوس) إنه يلبس Ankle Monitor و ده البتاعة اللي بيتركب في كعب الرجل عشان البوليس يعرف إذا ما كنت طلعت بره بيتك من غير إذن أو لا .. الناس اللي بتتفرج علي أفلام أمريكاني كتير عارفاه كويس و دي كانت حاجة كويسة.
• معلومة رقم إتنين .. النيابة اليابانية سحبت من (كارلوس) باسبوره اللبناني و البرازيلي بس سابوله باسبوره الفرنساوي و ده يعلمك إن اللي له ظهر مبيضربش علي بطنه حتي في اليابان.
• معلومة رقم ثلاثة .. بيت كارلوس متراقب بكاميرات مراقبة بس الكاميرات مش بتنقل بث مباشر .. الكاميرات بتسجل اللي بيحصل و في يوم في الأسبوع بيجي البوليس ياخد الشرايط و اليوم ده بيكون يا إثنين يا ثلاثاء يا أربعاء.
• معلومة رقم أربعة .. عشان كاميرات المراقبة مش بتصور Live فهم بيعوضوا ده بإن شركة نيسان دافعة لاثنين بتوع أمن مسلحين يفضلوا قاعدين قدام بيت (كارلوس) يراقبوه.

حط كل المعلومات دي قدامك و إبدأ إسأل نفسك حنهرب (كارلوس) من بيته إزاي؟ .. هنا إنت محتاج تحاول تجاوب علي السؤال ده من ورا لقدام .. بمعني .. إنت عشان توصل بيروت من طوكيو إنت عندك طريقتين .. الطريقة الأولانية هي المركب .. ده حيتطلب إن بمجرد ما (مايكل) يطلع من باب البيت بتاع (كارلوس) في طوكيو حيبدأ رحلة جوه اليابان مسافتها 4160 كيلومتر عشان يوصل لساحل اليابان و بعد كده ياخد مركب لتايلاند و من تايلاند ياخد طيارة لبيروت و ده بيحطك قدام رحلة ما بين إسبوعين لثلاثة و دي حاجة لا سن ولا صحة (كارلوس) يسمحوا بيها .. ده معناه إن مفيش غير الطيران .. لكن مينفعش (مايكل) ياخد (كارلوس) يركب معاه طيارة مصر للطيران مثلاً زي البني أدمين .. ده معناه إنه محتاج يلاقي طيارة خاصة.

(مايكل) كان جمع فريق من ناس كل واحد فيهم بيفهم في حتته .. فيه واحد شاطر في الكومبيوترات و شغل Hacking .. واحد وظيفته أمن المطارات و يعرف يدخل أي حد و يطلع أي حد من أجدعها مطار .. واحد وظيفته البوليس .. و الأهم واحد وظيفته المواصلات .. ده اللي كان دوره يلاقي شركة طيران خاصة مستعدة تنقل حد من طوكيو لبيروت من غير ما يكونوا محتاجين يعرفوا مين الحد ده .. بعد تدوير أستمر أيام لقوا شركة طيران تركي اسمها Bombardier Global Express عملت اسم لنفسها بإنها كانت بتهرب الذهب من و إلي فنزويلا رغم إن الحكومة الأميريكية فارضة عقوبات إقتصادية علي فنزويلا .. كده إنت عرفت إزاي حتنقل (كارلوس) من طوكيو لحد بيروت .. دولقتي جه دور إنك تلاقي إجابة عن سؤال إزاي تعديه من المطار عشان يركب الطيارة؟

الحل المنطقي هو إنك تحط (كارلوس) في صندوق بس الفكرة كلها هي بالصلاة علي النبي إيه هي أبعاد الصندوق ده يعني هو كام في كام؟ .. و الأهم تهربه من أي مطار؟ .. إجابة السؤال الأولاني حسمها باب طلوع الطيارة الخاصة اللي حيركبها (مايكل) بالصندوق اللي حيبقي جواه (كارلوس) .. إنت عايز صندوق يخش بسهولة من الباب من غير مشاكل .. ده خلاه يروح لشركة تصنيع صناديق من اللي بتحط فيها مكبرات الصوت بتاعة الأفراح و دخل علي النت دور علي ماركة مكبر صوت يكون وزنه فوق 75 كيلوجرام اللي هو وقتها كان وزن (كارلوس) و لقي واحد فعلاً وزنه 50 كيلوجرام .. يعني هم قريبين من بعض بشكل ميخليش اللي بيصنع الصندوق يسأل إنت عايز الصندوق يشيل الوزن ده كله ليه؟ .. (مايكل) طلب من الشركة اللبناني تصنعله صندوق عرضة أقل ب2 سنتيمتر من عرض باب الطيارة .. صندوق الحواف بتاعته مدعومة بالصلب زيها زي أي صندوق Standard من اللي بيتحط فيه مكبرات الصوت دي بس طلب منهم يتركبه عجل في الأربع أركان بتوعه و كمان يتفتح فيه أخرام من تحت للتهوية .. طبعاً هو إتقال للشركة ده عشان تهوية مكبرات الصوت مش تهوية بني أدم.

فاضل نعرف أنهي مطار؟ .. طوكيو حوليها 5 مطارات و الفريق بتاع (مايكل) ذاكروهم كلهم و ملقوش غير مطار كنساي هو المناسب .. إشمعني؟ .. عشان المطار ده مفيهوش مكنة كشف عن الشنط و البضاعة كبيرة بما يكفي إنها تستوعب صندوق بحجم اللي بيتحط فيه مكبر الصوت و بالتالي اللي حيكون محطوط فيه (كارلوس).

كده إحنا عرفنا إزاي نطلعه بره طوكيو .. عرفنا إزاي ندخله المطار .. و عرفنا أنهي مطار .. فاضل نعرف أنهي يوم .. حرجع هنا لحتة كاميرات المراقبة .. بما إن البوليس بيجي ياخد شرايط الكاميرات يا إما الأثنين أو الثلاثاء أو الأربعاء فلو العملية تمت يوم الخميس أو الجمعة ففعلياً البوليس مش حيعرف إن (كارلوس) هرب إلا يوم الأثنين اللي وراه بس للأسف الطيارة مكانتش حتبقي فاضية إلا يوم السبت .. يوم الجمعة 27 ديسمبر 2019 (كارلوس) صحي من النوم علي مكالمة تليفون جاتله من (مايكل) بيبلغه فيها إن بكره هو يوم العملية و قفل السكة.

يوم السبت الصبح (مايكل) و معاه دراعه اليمين في العملية دي و كان اسمه (جورج أنتوان الزايك) و ده لبناني الجنسية بالمناسبة كانوا في مطار دبي .. طيارتهم إتاخرت ساعة و نص .. يوم 29 ديسمبر الساعة 10:30 الصبح بتوقيت طوكيو طيارتهم وصلت مطار أوساكا .. هناك كانت فيه عربية فان مستنياهم و الاثنين ركبوها و معاهم صندوقين مكبرات الصوت و طلعوا علي فندق اسمه ستار جيت Star Gate جنب المطار .. (مايكل) و (جورج) غيروا هدومهم و ركبوا القطر الطلقة Bullet Train باتجاه طوكيو .. الساعة 2:30 العصر كان (كارلوس) بيخرج من بيته في طريقة لفندق جراند حياة عشان يتغدي و ده كان روتينه اليومي الطبيعي بس (كارلوس) بعد ما دخل الفندق بدل ما يروح المطعم راح للأوضة رقم 933 اللي كانت محجوزة باسم (بيتر) ابن (مايكل) و لما دخل لقي إن فيه هدوم متحضراله علي مقاسه عشان يلبسها .. الساعة 4 (جورج) و (مايكل) وصلوا للأوضة و الساعة 4:30 الثلاثة كانوا خرجوا من الفندق ركبوا القطر الطلقة علي أوساكا و وصلوا الساعة 8 بليل .. (كارلوس) و (جورج) راحوا للأوضة اللي حاجزينها في فندق ستار جيت بس (مايكل) راح علي مطار كنساي.

و هو في المطار راح قابل اللي ماسك أمن المطار و قاله إنه رجل أعمال و هو و احد صاحبه جايين يحضروا حفلة موسيقية في أوساكا بس إحتمال الحفلة تتأخر و هم عندهم إجتماع مهم في إسطنبول بكره الصبح فلو ممكن يعني لما نيجي بليل علي الساعة 10 كده نطلع الطيارة الخاصة بتاعتنا علي طول من غير ما نتفتش وإداله ظرف فيه 10,000 ين ياباني .. الغريب إن اللي ماسك أمن المطار لما بص للفلوس لقاهم كتير فقال ل(مايكل) أنا حاخد نصهم بس و إداله الباقي.

(مايكل) رجع الفندق تاني و أشرف علي إزاي (كارلوس) دخل في واحد من الصندوقين و قفله عليه و ركبوا العربية الفان و كانوا قدام ضابط الجوازات في المطار الساعة 10:10 بليل .. مدير أمن المطار اللي خد الرشوة عداهم من غير ما حد يفتشهم و الساعة 10:30 الثلاثة كانوا جوه الطيارة و هي بتطلع .. الساعة 5:26 صباح يوم 30 ديسمبر الطيارة هبطت في مطار إسطنبول .. بمجرد ما طيارته هبطت كانت فيه طيارة خاصة تانية مستنية عشان يركبها و يطلع علي بيروت .. وتوتا توتا خلصت الحدوتة.

أه فيه معلومتين في الأخر صدموني الحقيقة .. (كارلوس) مدفعش فلوس ل(مايكل) .. هو دفعله تكاليف العملية اللي كانت حوالي مليون دولار بس مدفعلوش أتعابه .. تاني معلومة إن لما اليابان قدمت طلب رسمي لوزارة العدل الأميريكية عشان تعتقل (مايكل) و تسلمه ليها فاللي أنقذ (مايكل) كان (روجر ويكر Roger Wicker) وده كان نائب في الكونجرس عن ولاية ميسيسيبي و اللي حصل إن سنة 2003 (كارلوس) بصفته مدير شركة نيسان فتح مصنع في الولاية فالنائب حب يرد دور الجدعنة و أصر علي إن (مايكل) ميتسلمش لليابان و هو اللي طلعه من القضية زي الشعرة من العجين .. في يناير 2021 طلع أمر قضائي في اليابان بإن (مايكل) يتحبس سنتين و إبنه (بيتر) يتحبس سنة و 8 شهور و فضلت اليابان تزن فوق دماغ الأمريكان عشان يسلموه علي أساس إن اليابان و أميركا ماضيين مع بعض إتفاقية تبادل مجرمين بس اليابان مش ماضية إتفاقية زي دي مع لبنان و عشان (كارلوس) معاه باسبور لبناني فاليابانيين طول ما هو قاعد في لبنان ميقدروش يلمسوه.

المهم عشان الزن علي الودان أمر من السحر في مايو 2020 البوليس الأمريكاني قبض علي (مايكل) و كان المفروض يترحل علي اليابان في مارس 2021 .. طبعاً المحامي بتاع (مايكل) طعن في قرار الترحيل و من هنا لهنا إتقال طب خليه يقضي فترة سجنه في أميركا و هو طلع فعلاً من السجن في يناير 2023.

المصدر:

مقالة بعنوان How Carlos Ghosn Escaped Japan, According to the Ex-Green Beret Who Snuck Him Out نشرت في مجلة Vanity Fair وده لينك المقالة الأصلية:
https://www.vanityfair.com/news/2020/07/how-carlos-ghosn-escaped-japan