كورونا و السعودية و البورصة .. المعني الحقيقي للعالم بقي أوضة و صالة.

كل فين و فين في السياسة بتلاقي نفسك قدام وضع غريب جداً إن العالم إتقلب بقي أوضة و صالة .. كل الأحداث مسمعه مع بعضها .. علي فكرة الوضع ده مبيتكررش كتير و شبه نادر تقريباً بس يمكن اللي خلاه يظهر دلوقتي هو الوقت الصعب اللي إحنا عايشينه سوا كبني أدمين .. فيروس كورونا أو Covid-19 اللي طايح فينا تلطيش بقي عامل زي لما ماتش الأهلي و الزمالك لما يبقي متذاع علي التليفيزيون .. من وجهة نظرك كأب إنت فعلياً خلال الساعة و نص بتاعة الماتش إنت مبيبقاش فارق معاك إيه اللي يحصل .. خلال ساعة و نص مبيبقاش فارق معاك إن مراتك مبتعرفش تعمل محشي .. خلال ساعة و نص مبيبقاش فارق معاك إنك عايز تغير تيل الفرامل في عربيتك و مش عارف عشان معكش فلوس .. خلال ساعة و نص مش بيبقي مهم أوي إن إبنك عنده إمتحان بكره و مراتك جوه بتصوت عشان مش عارف يحل .. كل المشاكل دي اللي ممكن تبقي قارفاك في عيشتك في أي يوم تاني مش بتبقي مهمة قصاد ماتش الأهلي و الزمالك .. أهو Covid-19 هو ماتش الأهلي و الزمالك و النهاردة إحنا مش حنتكلم عنه قد ما حنتكلم عن المصايب التانية اللي بتحصل في الدنيا معاه.

فعلياً لو بكره الصبح ربنا أراد و فيروس كورونا ده إختفي من حياتنا فاللي حيحل محله كمصدر إهتمام للإعلام و لينا إحنا كمان هو بني أدم واحد بس .. الأمير (محمد بن سلمان) ولي عهد المملكة العربية السعودية .. حالياً الرجل ده داخل في خناقتين الله أعلم حيطلع منهم متشلفط إزاي .. بصوا من دلوقتي أنا متوقع إنه حيطلع منهم كسبان بس مش ده السؤال هو حيكسب ولا لا .. أنا بسأل هو حيطلع منهم خسران إيه بس قبل كل ده تعالوا نفهم الأول هي إيه الخناقتين اللي هو داخل فيهم و محدش بيتكلم عنهم عشان زي ما قلتلك ماتش الأهلي و الزمالك بيتذاع.

خناقة (محمد بن سلمان) الأولانية .. ولاد العم رافعين السكاكين لبعض:

خلينا نحسبها زي مسائل الهندسة اللي كنا بنحلها زمان .. بما إن الملك (سلمان بن عبدالعزيز) عنده 84 سنة .. و بما إن (محمد) هو ولي العهد بتاعه .. إذن إنت في أي يوم معرض إنك بكره الصبح تسمع خبر وفاة الملك (سلمان) اللي ربنا يديله طوله العمر طبعاً و إن (محمد) بقي هو ملك السعودية .. بس ده مش معناه إن (محمد) كبني أدم عنده وسواس قهري إنه يبص لقدام و يفكر إزاي حينط بإقتصاد المملكة .. يبقي إنت متعرفش مين هو (محمد) .. الرجل ده موسوس لدرجة إنه لحد دلوقتي خايف من اليوم اللي يتعمل عليه إنقلاب من جوه العيلة المالكة مع إن إحتمالات ده إنه يحصل زيها زي إن نادي الإتحاد السكندري في يوم من الأيام يكسب الإيجيبيشن بريميير لييج.

وسط هوجة فيروس كورونا محدش خد باله إن (محمد) أمر بإعتقال عمه الأمير (أحمد بن عبدالعزيز) و كمان أمر بإعتقال ابن عمه الأمير (محمد بن نايف) .. بالمناسبة .. (محمد بن نايف) كان المفروض إنه هو اللي حيمسك الحكم بعد الملك (سلمان) بس سنة 2017 الملك قرر إنه يقلشه و يجيب مكانه ابنه (محمد) عشان يبقي هو ولي العهد .. يمكن السؤال دلوقتي هو ليه؟ .. ليه بعد ما بقيت إنت رسمياً ولي العهد لسه خايف من (محمد بن نايف)؟ .. الفكره كلها إن زي ما قلتلك (محمد) شخصية موسوسة .. هو خايف إن يجي نوفمبر 2020 و الإنتخابات الرئاسية الأميريكية تتعمل و (دونالد ترامب) يخسرها و ساعتها مش حقول إن (محمد) حيبقي لبس في الحيط بس حيكون خسر واحد من أهم صحابه .. (ترامب) وقف في ظهر (محمد) لما قرر يخش الحرب ضد اليمن اللي مكنش ليها أي داعي في  2015 و كمان وقف وراه بعد جريمة قتل (جمال خاشقجي) في 2018 .. هل (محمد) عنده حق في مخاوفه؟ .. تقديري الشخصي أنا لا بس زي ما قلتلك إنت بتتعامل مع شخصية موسوسة .. الأهم من كده إن لو بكره الصبح (محمد) لم العيلة المالكة كلها و رماها في السجن محدش حيركز معاه .. ليه؟ .. ماتش الأهلي و الزمالك بيتذاع و محدش فاضي.

خناقة (محمد بن سلمان) الثانية .. خناقة تجار علي سعر البترول في السوق:

خلينا نحكي الموضوع من الأول .. كان يا مكان فيه حاجة اسمها أوبيك OPEC و دي إختصار Organization of the Petroleum Exporting Countries أو منظمة الدول المُصدره للنفط و دول علي بعض 15 دولة كبيرتهم تبقي السعودية و دول أكتر دول العالم اللي عندهم إحتياطي نفطي كبير .. دول كبارات السوق اللي بيحددوا قد إيه بترول يتباع و إيه هو سعر برميل النفط .. رغم إن روسيا واحدة من أكبر الدول اللي عندها إحتياطي نفطي و اللي بتصدر بترول بس فعلياً روسيا مش عضوة في OPEC .. لكن .. من 3 سنين إتعمل إتفاق اسمه OPEC+ خلي إن الروس بقي من حقهم يحضروا إجتماعات OPEC و يقولوا رأيهم مع العلم إن روسيا مش مُجبرة إنها تلتزم بأي قرار يطلع من المنظمة .. كده إنت فهمت الموضوع بسرعة أوي .. مشكلة فيروس كورونا اللي طايح في العالم و بدأ في أسيا إنه أثر جامد علي الطلب في السوق.

بسبب سياسات الحجر الصحي اللي إتطبقت في دول زي الصين و كوريا الجنوبية فالدول دي مبقتش تحتاج بترول زي زمان .. عندك بلد زي الصين مثلاً اللي منصات تكرير البترول بتاعتها قللت من إنتاجها بنسبة 20% .. و لإن البترول زيه زي الجبنة البراميلي عند البقال اللي بيحكم سعره في السوق هو العرض و الطلب فلما الطلب يقل علي سلعة فطبيعي إن سعرها هو كمان يقل .. إلا إذا إنت قررت تقلل من الإنتاج و ساعتها كمية البترول اللي في السوق حتقل و بكده إنت حافظت علي سعر السلعة ثابت في السوق رغم إن الطلب عليها بيقل و ده اللي السعوديين إقترحوه بصفتهم الكبير أوي بتاع OPEC .. السعوديين قالوا إحنا لازم نقلل شوية من إنتاجنا بحوالي مليون برميل يومياً بحيث اللي حيشيل الليلة هم السعوديين و الروس بصفتهم أكبر إتنين منتجين للنفط في العالم .. اللي السعودية إقترحته إن روسيا تقلل من إنتاجها بحوالي 500,000 برميل يومياً .. لحد دلوقتي الموضوع منطقي .. المعلمين الكبار هم اللي حيستحملوا عشان التجار الصغيرين زي إيران و العراق مثلاً إقتصادهم ميتداسش علي وشه .. هنا بقي تبان الدماغ الروسي أم جزمة قديمة.

الروس معجبهمش الكلام .. رغم إن بإعتراف الروس نفسهم ان اللي بيقولوه السعوديين ده عين العقل بس إحنا مش حننفذه لإن إحنا في موقف بيخلينا مُجبرين نعمل حاجة عكس ما المنطق بيقول .. هو الزمن الأغبر اللي إحنا عايشين فيه بيجبرنا نعمل كده .. لو بصيت علي الموضوع من وجهة نظر الروس فحتلاقيهم قرروا يخونوا السعوديين بسبب حاجتين:

• أول حاجة إن الروس عايزين شركات البترول الأميريكية تفلس و حنفهم النقطة دي بالذات كمان شوية .. فعلياً الروس قدروا يحققوا ده .. إنهيار سعر برميل البترول خلي أسهم شركات البترول الأميريكية في بورصة وول ستريت تخسر أكتر من 45% من قيمتها .. يقال أن الروس عايزين يخربوا بيت شركات البترول الأميريكية عشان يردوا الألم للأمريكان اللي لحد دلوقتي فارضين عقوبات إقتصادية علي واحدة من أكبر شركات البترول الروسية اللي هي روزنيفت Rosneft بسبب الصفقات اللي الشركة عملتها في فنزويلا .. فيه ناس بتقول إن الهدف ده مش منطقي أوي لسبب .. معاك إن إنهيار سعر برميل البترول حيخلي شركات البترول الأميريكية الصغيرة تفلس بس ده حيدي فرصة للشركات الكبيرة زي إيكسون موبيل Exxon Mobil إنها تسيطر علي السوق .. بدل ما كان عندك شركات كتير صغيرة حيبقي شركات قليلة بس كبيرة فكأنك معملتش حاجة.
• ثاني حاجة إن الروس عايزين يزودوا من حصتهم من السوق و شايفين إن بحكم موقعهم الجغرافي فهم أقرب لدول أسيا زي الصين فلما الروس يعرضوا البترول بتاعهم بسعر أقل من السعوديين فالصينيين حيشتروا البترول الروسي و بكده الروس زودوا من حصتهم من السوق أو Market Share حتي لو ده كان ثمنه إن إقتصاد دول تانية حيروح في ستين داهية زي مثلاً إيران و العراق.

السعوديين هم كمان معجبهمش الكلام .. السعوديين عملوا زي واحدة ست راكبه ميكروباص و السواق و هو بيزود عليها الأجرة قالها يا مدام .. هي كان ممكن تدفع الأجرة الزيادة لو كان فضل ساكت .. بس إنه يقولها يا مدام .. لاااااااااا .. السعوديين قرروا يخسفوا بسعر بيع برميل البترول الأرض و نزلوه السوق ب35 دولار بخسارة 11 دولار عن كل برميل بترول و ده كان أكبر خسف لسعر بيع برميل النفط من سنة 1991 و أنا بس حابب أفكرك إن دي كانت السنة اللي (صدام حسين) الله يرحمه قرر فيها إنه يغزو الكويت .. اللي عمله السعوديين ده خلاهم يضمنوا إنهم حياخدوا حصة السوق الزيادة اللي كان الروس باصين عليها بس في نفس الوقت فيه ناس كتير بيتها حيتخرب .. أكتر ناس إتخزوقت كانت شركات البترول الأميريكية و اللي بسبب خسايرها بورصة وول ستريت خسرت 7% من قيمتها .. يمكن الحاجة الكويسة إن إنهيار البورصة ده إتقال في الإعلام إن سببه هو ظهور حالات لفيروس كورونا في أميركا .. صحيح إن الإنهيار ده فعلياً سببه اه هو فيروس كورونا بس مش بالشكل اللي إنت ممكن تكون بتفكر فيه .. فيه ناس بتسأل نفسها هو إيه اللي حيحصل بعد كده؟ و ده سؤال منطقي و مهم بس أنا عايز أسأل سؤال تاني .. ليه؟ .. ليه السعوديين قرروا يتعاركوا بدل ما يتناقشوا؟ .. ليه (محمد بن سلمان) قرر ينشف دماغه قصاد (فلاديمير بوتين)؟

لو بصينا للأزمة من وجهة نظر السعوديين فدي مش أول مرة هم يتخزوقوا من الروس .. المرة دي لازم الروس يتعلموا الأدب و دي قصة لازم تتحكي عشان تبقي فاهم تنشيف الدماغ ده جه منين .. الروس و السعوديين بقالهم فترة في خناقة كبيرة مع الشركات الأميريكية اللي شغالة علي حاجة اسمها Shale Oil  بس خلينا نقولك خلاصة الموضوع عشان برده تبقي معانا في الصورة .. بداية من 2014 حصلت حاجة غريبة جداً و هي إن شركات البترول الأميريكية بعد ما كانت بتنتج يوميا 0.4 مليون برميل بقت بتنتج 4 مليون برميل يومياً بسبب إن الشركات دي بقت بتعتمد علي تكنولوجيا جديدة في التنقيب عن البترول اسمها Fracking .. ده كان معناه إن بعد ما لسنين و سنين أميركا كانت مستوردة للبترول هوبا بقت أميركا من أكبر مصدري البترول .. زي ما حضرتك متوقع الموضوع معداش بالساهل علي الروس و السعوديين .. عشان الشركات الأميريكية دي تحقق أي أرباح لازم سعر برميل البترول يفضل عالي .. لكن لو غرقنا السوق بترول في وقت السوق مش محتاج فيه البترول ده كله فكده الشركات الأميريكية دي حتشتغل بالخسارة و حتضطر تقفل.

كان المفروض إن السعوديين و الروس بينهم إتفاق .. إحنا عندنا إحتياطي نقدي كبير يقدر يخلينا نستحمل الصدمة بس الشركات الأميريكية لا .. كان المفروض إن السعوديين و الروس إتفقوا مع بعض إنهم حيغرقوا السوق بس ساعة الجد الروس خافوا .. السعودية بس هي اللي زودت من إنتاجها و الروس لا .. شركات البترول الأميريكية بقت بتحقق أرباح صحيح مش كبيرة بس بتخليها تكمل في السوق .. السعوديين خسروا مليارات الدولارات من الإحتياطي النقدي بتاعهم .. خلال سنة 2015 و 2016 السعوديين مكانش قدامهم حل غير إنهم يبيعوا البترول بتاعهم بسعر أرخص للصين اللي كان علي قلبها زي العسل إنها تشوف الروس و السعوديين و هم بينافسوا بعض مين يديها بترول بسعر أرخص.

أخيراً في أواخر 2016 السعودية و روسيا إتفقوا إنهم ينسقوا مع بعض إنتاجهم النفطي و بالتالي الإتنين مع بعض بقوا فعلياً المتحكمين في سعر برميل البترول .. خلال الفترة من 2017 لحد الأزمة بتاعة دلوقتي و التنسيق بين روسيا و دول OPEC اللي أخيراً تجسد في الحاجة اللي اسمها OPEC+ قدروا يقللوا من إنتاجهم بحوالي 4-5 مليون برميل يومياً .. خلال الفترة دي سعر برميل البترول في العالم مزادش و ده سببه إن شركات البترول الأميريكية فضلت تنتج بغباوه مش لسبب غير إنهم كانوا عايزين يحققوا هامش ربح يخليهم يكملوا شغل .. الإنتاج الغبي لشركات البترول الأميريكية خلي أميركا سنة 2018 تبقي أكبر منتج للبترول في العالم و الإنتاج النفطي الأميريكي عدي السعودية و روسيا .. فضل التنسيق السعودي الروسي مكمل لحد ما الروس قرروا ينشفوا دماغهم بعد موقف فيروس كورونا و ده خلي السعوديين يقلبوا عليهم.

بس فيه نقطه غالباً محدش من اللي حولين (محمد) قالوله عليها .. روسيا دلوقتي غير روسيا من خمس سنين .. لو حتتكلم عن إحتياطي نقدي فالروس عندهم إحتياطي نقدي أعلي من السعوديين .. إعتماد الروس علي عائدات بيع البترول أقل بكتير من السعوديين .. اللي يا عيني حيطلع ميتينه في الخناقة دي هم العراقيين و الإيرانيين .. إقتصاد البلدين شبه قايم علي بيع البترول خصوصاً إيران .. إيران مش بس عليها عقوبات إقتصادية أميريكية من بعد ما (ترامب) قرر يلغي الإتفاق النووي الإيراني إنما كمان البلد إتبهدلت جامد من فيروس كورونا.

في رأيي الشخصي إنك لو جيت تقيم سياسات (محمد بن سلمان) خلال الخمس سنين اللي هو بقي فيها الكل في الكل في المملكة مش حتلاقي وصف توصفه بيه غير إنه بني أدم هبيد .. تحس معاه بروح طيب الذكر (صدام حسين) الله يرحمه بتهفف في المكان .. سواء (محمد) أو (صدام) الإتنين كانوا موسوسين بشكل مرضي .. الإتنين دخلوا في مواجهة ملهاش أي معني مع إيران .. (صدام) دخل حرب 8 سنين مع إيران اللي هي حرب الخليج الأولي بهدلت إقتصاده حرفياً و (محمد) عمال يصعد خناقته مع إيران و هو اللي بيخسر مش هم و أخر دليل كان ضرب الإيرانيين لمنشأة نفطية في أبقيق في سبتمبر 2019 عن طريق طيارات بدون طيار Drones .. إذا كان (صدام) دخل في خناقة برده ملهاش أي معني في الكويت فبرده (محمد) بيعك الدنيا في اليمن .. الإتنين فيهم حاجة مشتركة كمان و هي إنهم محاوطين نفسهم بشوية مستشارين مبيقولوش غير حاضر و نعم .. هم وصلوا لمرحلة إنهم مش حابين يسمعوا حد من اللي حوليهم يقولهم كده غلط .. و إنت لو من الشلة اللي حوليهم مش حتلاقي طريقة تستمر فيها في منصبك غير إنك تزيط في الزيطة أو كمان تزايد علي الحاكم عشان بس تحسسه لما يقول إن كده كتير و إن ده رد فعل مبالغ فيه إنه هو كده بقي صوت العقل و الحكمة مع إنكوا كلكوا بتهبدوا سوا مع بعض.

فاضل بس نختم بإننا نتكلم شوية عن هو الموضوع ده واخدنا و رايحين علي فين .. الحقيقة إحنا رايحين في سكة مش كويسة خالص لإن في الوقت اللي السعودية بتستغبي في إنتاجها عشان تاكل السوق ففعلياً دول كتير مبقاش عندها مكان فاضي عشان تخزن فيه البترول الزيادة اللي فايض عن حاجتها لإن قطاعات صناعية كتير واقفة بسبب فيروس كورونا .. كندا هي أول دولة تقول إنها علي بعد أيام من إنها تكون ملت كل خزانات البترول بتاعتها لإن الوضع لو كمل علي كده فشركات البترول الكندية حتبقي مجبرة تقلل إنتاجها بحوالي 400,000 برميل يومياً علي أخر الشهر .. إنت مش متخيل إزاي شركات البترول إتخرب بيتها بسبب أزمة كورونا و اللي أدت للخناقة بين السعودية و روسيا .. قبل الأزمة يعني بتتكلم من كام أسبوع كان سعر برميل البترول وصل 65 دولار .. دلوقتي وصل 25 دولار و لو الوضع كمل علي كده فهو مرشح بقوة إنه يوصل 10 دولار .. مش بقولك الأزمة دي وريتنا إزاي العالم فعلاً بقي أوضة و صالة.

المصادر:

• مقالة بعنوان The battle for the Saudi crown is raging even if it is overshadowed by the coronavirus pandemic نشرت في جريدة The Independent و ده لينك المقالة الأصلية:
  https://www.independent.co.uk/voices/coronavirus-saudi-arabia-crown-prince-mohammed-bin-salman-trump-royal-family-a9401451.html
• مقالة بعنوان The Saudi Arabia-Russia oil war, explained نشرت في موقع Vox و ده لينك المقالة الأصلية:
  https://www.vox.com/2020/3/9/21171406/coronavirus-saudi-arabia-russia-oil-war-explained
• مقالة بعنوان Oil price may fall to $10 a barrel as world runs out of storage space نشرت في جريدة The Guardian و ده لينك المقالة الأصلية:
  https://www.theguardian.com/business/2020/mar/25/oil-price-may-fall-to-10-a-barrel-as-world-runs-out-of-storage-space