موضوعنا النهاردة اللي حنتكلم عنه هو إيه اللي بيحصل في بالضبط في السعودية دلوقتي؟ .. أنا عارف كويس أوي إن الأخبار عمالة تيجي بسرعة وفيه تخبط رهيب وتقريباً محدش فاهم هو إيه اللي بيحصل؟ .. اللي حنحاول نعمله في المقالة دي إننا نحاول نوضحلك شوية الصورة عشان نفهم هو فيه إيه؟ .. عشان تبدأ تفهم هو إيه اللي بيحصل في المملكة العربية السعودية لازم تفهم أهم حقيقة سياسية عن المملكة .. القرار السياسي السعودي لسنين طويلة كان بيصنعه حاجة واحدة والحاجة دي مش الإسلام ولا الأصولية الإسلامية ولا الديموقراطية ولا رأس المال ولا البترول ولا كل الكلام الفاضي ده .. ده حقيقي .. طول السنين اللي فاتت صنع القرار السياسي في السعودية كان بتعمله حاجة واحدة والحاجة دي هي الشيخوخة.
فكر فيها كده .. ملك السعودية حالياً هو الملك (سلمان بن عبدالعزيز) اللي عنده دلوقتي 84 سنة .. يا سيدي عارف إنك بتقولي ربنا يديله الصحة وطولة العمر وأنا مش معترض وبدعيله زيك بس الرجل ده إستلم الحكم بعد ما وفاة أخوه الملك (عبدالله بن عبدالعزيز) الله يرحمه اللي مات وهو عنده 90 سنة .. اللي كان ملك السعودية قبلهم هم الإتنين كان الملك (فهد بن عبدالعزيز) اللي مات وهو عنده 84 سنة .. المشكلة مكانتش إن الثلاثة مكانوش رجالة محترمين ولا كانت المشكلة إنهم كانوا كبار في السن ولا حتي المشكلة إن كل واحد فيهم محاولش قدر الإمكان إنه يعمل إصلاحات إقتصادية وسياسية في المملكة .. الفكرة إن في السنين اللي فاتت وفي الوقت اللي العالم كان بينط فيه لقدام والتطور التكنولوجي عمال ياخدنا وبيجري بينا والله أعلم حيودينا علي فين كان ملوك السعودية متخيلين إن والله لا يكلف الله نفسا إلا وسعها .. إيه المشكلة يعني إن العالم يكون بيتطور كأنه عربية فيراري بتجري علي 200 كيلومتر في الساعة وإحنا راكبين فيات 128 علي 10 كيلومتر في الساعة؟ .. مسيرنا يعني نوصل إحنا كمان .. فكر الرجالة الثلاثة كان الأتي .. اللي الإصلاح السياسي ميلحقش يعمله في السعودية نعوضه بفلوس البترول.
المشكلة إن الفكر ده مبقاش ينفع خلاص .. لو بصيت علي السعودية دلوقتي لازم تقف قدام كذا نقطة .. دي دولة زي ما قلتلك لسنين وسنين بيحكمها رجالة عدوا ال80 سنة في حين إن 70% من تعداد سكان المملكة متوسط أعمارهم أقل من 30 سنة .. من ال70% دول فيهم 25% مبيشتغلوش .. الأسوأ من كده .. السعودية ليها حالياً 200,000 مواطن بيتعلموا بره ولاد وبنات .. من ال200,000 دول فيه منهم سنوياً 35,000 بيرجعوا السعودية تاني معاهم شهادات إما بكالريوس أو ماجستير أو حتي دكتوراه واخدينها من جامعات أجنبية .. كل واحد فيهم بيحلم إنه يرجع المملكة يشتغل في حاجة ليها معني من اللي درسها بره .. بيحلم إنه يغير حاجة في بلده .. بيحلم إنه لما يحب يتفسح يلاقي خروجة غير إنه إما يروح الجامع أو يروح المول .. في مرحلة من المراحل لازم حد جوه البلاط الملكي يبص للبلد ويقول لنفسه إحنا لو مبدأناش نخلق فرص عمل بره مجال البترول فإحنا كده حنروح في داهية .. الفلوس اللي كانت بتخش للسعودية من الببترول مبقتش زي زمان والمملكة وصلت لمرحلة إنها مبقاش ينفع تصرف من الإحتياطي النقدي بتاعها عشان تسكت الشعب .. مينفعش تفهم اللي بيحصل في السعودية دلوقتي من غير ما تكون فاهم الكلام ده كويس لإن الكلام ده حيوصلنا لبطل المسلسل اللي بيحصل دلوقتي اللي هو (محمد بن سلمان) .. أيا كان اللي إنت تعرفه عن الرجل ده أو أيا كان الكلام اللي إنت سمعته في الإعلام عنه إنسي خالص كل اللي تعرفه وركز معايا شوية .. في المقالة دي حنحاول نجاوب علي سؤالين مهمين أوي:
- مين هو (محمد بن سلمان)؟ ومش قصدي إني أقولك إنه إبن الملك والكلام ده .. كل ده إحنا عارفينه .. إحنا عايزين نكلمك عن شخصيته.
- إيه اللي بيعمله (محمد بن سلمان) دلوقتي بالضبط؟
نيجي للسؤال الأول: مين هو (محمد بن سلمان)؟
شخصية (محمد بن سلمان) لو حبيت تفهمها فده شاب عنده 35 سنة .. فعلياً الCV بتاعه مفيهوش حاجة غير إنه يبقي إبن الملك .. كشخصية الرجل ده متسرع جداً .. ده الطالب اللي بيرفع إيده في الفصل عشان يجاوب قبل ما المدرس يخلص السؤال .. ده زميلك الرخم في الفصل اللي كان دايماً أول واحد بيخلص الإمتحان ويقوم .. يحل صح أو غلط مش دي القضية دلوقتي .. هو فعلاً عايز يغير حاجات كتير هو شايفها غلط في المملكة .. بس لإنه متسرع فهو عايز يغير كل حاجة مرة واحدة .. هو له شعبية كبيرة بين الشباب السعودي بس هل ده لوحده كفاية؟ .. (محمد بن سلمان) بني أدم مش كل ما تيجي تكلمه حيقولك قال الله وقال الرسول .. إعتبرها حاجة حلوة أو وحشة ده شيء يرجعلك ومليش دخل فيه .. صدقني لو قلتلك إن (محمد بن سلمان) ده حالة .. حتي لو الشخص نفسه مكنش موجود فالوضع السياسي في السعودية كان مسيره يطلعلك حد زيه أيا كان إسمه .. الوضع وصل لمرحلة إن لازم حد يهد كل حاجة ويبدأ من أول وجديد بس شاءت الظروف المهببة إن الحد ده يطلع (محمد بن سلمان).
أنا قلت ظروف مهببة لإن أهم عيب في شخصية (محمد بن سلمان) هي التسرع .. إمتي حيوصل لمرحلة إنه يبدأ يشوف نفسه في المراية ويقول هو أنا إيه اللي أنا بعمله ده؟ .. هل هو عاقل وحكيم بما يكفي إنه لما يلاقي نفسه بيتحول لديكتاتور فيفرمل نفسه عشان ميلاقيش نفسه بدل ما كان عايز يعيش دور Batman يلاقي نفسه بقي الجوكر؟ .. السؤال المهم .. هل إنت تثق في واحد زيه إنه يقود المملكة لبر الأمان؟ .. متنساش إن ده شاب سنة 2016 عمل فضيحة في بلده لما كان في أجازة في فرنسا وشاف يخت عجبه أوي وقرر في لحظتها إنه يشتريه .. اليخت ده كان بيملكه رجل أعمال روسي لما شاف (محمد بن سلمان) حيموت علي اليخت عشان يشتريه فهو طلب 550 مليون دولار .. هنا بقي مش (محمد بن سلمان) يبصله ويقوله إنت بتستعبط وياخد بعضه ويمشي .. لا طلع دفتر الشيكات ودفعله الفلوس .. يخت ب550 مليون دولار شبط فيه زي ما العيل الصغير بيشبط في لعبة .. هل ده شخص إنت تثق في إنه يدير الحرب السياسية اللي هو بدأها دي ومش بس داخلياً لا و خارجياً كمان ويطلع منها منتصر؟
أنا ليه بسأل السؤال ده؟ .. مشكلة الإصلاح المفاجيء والمتسرع إنه بيخلق أعداء والأعداء دول بيبدأوا يتحالفوا مع بعض ضدك .. عشان تبدأ تنتصر عليهم لازم تبقي سمعتك قدام الناس تبقي أنظف من الماس .. الناس لازم تقتنع وتصدق إنك بني أدم نظيف ومش حرامي ومش عايز حاجة غير مصلحة البلد .. هو سجن أو خلينا نقول حط أفراد العائلة المالكة اللي هو شايفهم أعداء ليه تحت الإقامة الجبرية بتهم فساد .. بس إيه اللي حيحصل لو الإعلام بدأ يتسربله قصص عن فساد (محمد بن سلمان) نفسه؟ .. ومتقوليش شاب مطيور زي ده إشتري يخت ب550 مليون دولار عشان شبط فيه ملوش فضايح هو مش عايز حد يعرفها.
أما السؤال الثاني بتاع هو إيه اللي بيعمله (محمد بن سلمان)؟
هنا أنا مش عايزك تبص لأسامي الناس اللي إعتقلها .. فكك من ده مش حنتكلم فيه .. أنا عايزك تبص للصورة الكبيرة .. اللي بيعمله (محمد بن سلمان) في السعودية دلوقتي تقدر تحطه في 3 نقط:
- أولاً هو مش عاجبه طريقة صنع القرار في البلاط الملكي فهو قرر إنه يعمل زي الإعلان بتاع السيراميك القديم اللي بيقول تخلص من حمامك القديم .. الأخ ده قرر إنه يعيد تشكيل الدولة السعودية من أول وجديد .. بإختصار هو عمل Format للدولة .. لو البلاط الملكي السعودي هو فلاشة أو USB Drive فاللي عمله (محمد بن سلمان) إنه فرمط الفلاشة دي .. عايزك تبص علي الصورة اللي بتوريك سلالة أل سعود .. زمان كان صنع القرار بيمشي بإجماع الأراء بين الناس الكبيرة اللي لسه عايشة من نسل الملك (عبدالعزيز بن سعود) .. اللي عمله (محمد بن سلمان) إنه خلي إتخاذ القرار بإيد أولاد الملك (سلمان بن عبدالعزيز) بس .. الرجل ده دلوقتي فعلياً يقدر يغير إسم البلد من المملكه العربية السعودية للمملكة العربية السلمانية .. الأهم من إنه إعتقل أفراد عيلته اللي بيتحسبوا علي إنهم خصومه السياسيين فهو سجن كمان رؤساء أكبر 3 قنوات فضائية سعودية اللي هم MBC و ART و Rotana.
- اللي أهم من كده إنه بيغير الحاجة اللي شرعية حكم أل (سعود) مبنية عليها .. معرفش إنت تفتكر أو لا بس في نوفمبر 1979 حصل هجوم إرهابي إستهدف الحرم المكي .. اللي نفذوا الهجوم الإرهابي ده كان مبررهم غير إنهم إدعوا ظهور المهدي المُنتظر هو إن في رأيهم أل(سعود) زي ما تقول كده مش مسلمين أوي .. مسلمين نص نص .. رد فعل أل (سعود) إنهم بدأوا حملة عشان يبينوا قدام السعوديين وقدام العالم إن لا بقي إحنا مسلمين أوي .. سميها إنهم نشروا الفكر الوهابي .. سميها إنهم نشروا الفكر المتطرف .. سميه زي ما تسميه .. اللي متقدرش تنكره إن السعودية دفعت ملايين عشان تبني مدارس إسلامية ومساجد في كل حتة في العالم من لندن لحد أندونيسيا .. الحل ده صحيح خلي مظهر أل(سعود) حلو في السعودية بس النتائج المترتبة عليه كانت كارثية .. من ضمنها مثلاً ظهور تنظيم القاعدة ووراه تنظيم داعش .. بس الأهم من ده إن الحملة دي مشي معاها علي نفس الخط إتجاه لتقييد حرية المرأة السعودية .. الأخ (محمد بن سلمان) بيقول إن كل ده حيتلغي .. هو بيقول إنه بيدعو لميلاد اللي ناس بتسميه الإسلام الوسطي .. يعني إيه الكلام ده؟ .. فيه ناس شايفه إن ده كان نتيجته إنه حل هيئة الأمر بالمعروف والنهي عن المنكر .. بس الأهم إن من دلوقتي وإنت طالع كل ما (محمد بن سلمان) حيتكلم مع السعوديين مش حتلاقيه بيقول أنا بحكم بما قال الله وقال الرسول .. حتلاقيه من دلوقتي وإنت طالع بيقولهم لو عايزين تحاسبوني محدش يقولي الشريعة بتقول إيه .. اللي عايز يتكلم معايا يتكلم معايا بالأرقام وبالإحصائيات وبمعدلات النمو الإقتصادي.
- ثالث حاجة هو بيعملها إنه بدل ما الفكر الوهابي كان هو المسامير اللي مربطة المجتمع السعودي في بعضه هو عايز يخلي الفكر القومي العلماني هو اللي يبقي المسامير اللي بتربط المجتمع السعودي في بعضه .. الفكر القومي ده معناه إن حكم (محمد بن سلمان) حيبقي معادي جداً لكل ما هو إيراني وشيعي وهنا تبدأ المشكلة الكبيرة تظهر .. لو عايز تفهم المشكلة دي بص علي لبنان.
لبنان بالنسبة للعرب كلهم عاملة زي اللغز اللي محدش عارف يفهمه .. إسأل أي حد تعرفه مين اللي بيحكم لبنان مش حيعرف .. لبنان بلد سياستها الداخلية مش بتتفهم ومتحاوش تفهمها لإن اللبنانين أساساً مش فاهمين بلدهم .. المهم إن (محمد بن سلمان) تقريباً أجبر رئيس الوزراء اللبناني (سعد الحريري) إنه يقدم إستقالته وخلاه يطلع في مؤتمر صحفي يقول إن إيران هي السبب في كل مصايب لبنان وإن إيران هي السبب إن لبنان بقت دولة مش بتتحكم .. قال يعني لبنان كانت بتتحكم زمان .. بس مش دي القضية .. القضية إن (محمد بن سلمان) إما إنه كاره إيران أوي أو إنه عايز يحسسنا إنه هو اللي بيحمي أهل السُنة والجماعة من إيران لدرجة إنه مستعد يخلي لبنان تقع في الحرب الأهلية تاني ومستعد يحاصر قطر لمجرد إن علاقاتها كويسة مع إيران ومستعد يخلي بلده تحارب حرب ملهاش أي ستين لازمة ضد الحوثيين في اليمن وبالمرة يخرب اليمن أكثر ما هي خربانة .. المشكلة إنك تحس إن تقريباً مفيش حد من اللي حوليه بيقوله ما تهدي كده يا حمادة وتصلي علي النبي.
علي الورق السعودية كانت عايشة في الإنعاش .. بتموت بالبطيء .. و(محمد بن سلمان) قرر إنه يدخلها العمليات يعمل عملية جراحية جريئة أوي عشان ينقذها بس المشكلة إن تسرعه ده يخلي السعودية بدل ما كانت بتموت بالبطيء تموت فجأة .. إما إنه هو محتاج يبطل يمشي ورا دماغه شوية ويسمع رأي اللي حوليه أو إن اللي حوليه مطلوب منهم يفوقوه من اللي هو بيعمله .. كويس إنه بيحاول يغير كل حاجة بتحصل بس لو هو فضل يسمع كلام الناس اللي بتشجعه علي التطرف ده زي الإمارات العربية المتحدة والرئيس الأميريكي (دونالد ترامب) وجوز بنته (جاريد كوشنر Jared Kushner) وحتي رئيس الوزراء الإسرائيلي (بنيامين نتنياهو) فالناس دي فرحانة أوي بإنه واقف لإيران بس معندهمش أي مشكلة إن السعودية تقع وحتلاقيهم بيسقفوا وفرحانين جداً بيها وهي بتقع .. أنا فعلياً قلقان علي المملكة.
المصدر:
- مقالة بعنوان Attention: Saudi Prince in a Hurry نشرت في جريدة The New York Times الأميريكية وكتبها الصحفي (توماس فريدمان Thomas L. Friedman) وده لينك المقالة الأصلية:
https://www.nytimes.com/2017/11/07/opinion/saudi-prince-reform-coup.html?rref=collection%2Fcolumn%2Fthomas-l-friedman
