السفينة ماري ميرسك .. محاولة لفهم ليه و ازاي .. أهم سؤالين في الهندسة.

اللي قدامك في الصورة دي تبقي من اكبر السفن علي مستوي العالم .. اسمها ماري ميرسك Marie MAERSK وزي ما هو باين من اسمها فهي ملك شركة الشحن الدانمركية ميرسك MAERSK .. انا مستعد اراهنك بالخمسين جنية اللي في جيبي انك يا اما لابس او ماسك او سايق او اكلت او بتستخدم حاجة جت البلد اللي انت عايش فيها عن طريق السفينة دي .. عشان بس تستوعب حجم السفينة دي فتخيل انها بتقدر تشيل 18,000 حاوية او Container من اللي انت بتشوف الترلات شايلاهم في طرق السفر .. دي سفينة طولها معدي 400 متر وعشان بس احطك في الصورة فارتفاع برج القاهرة 180 متر يعني تخيل سفينة طولها عبارة عن ضعف طول برج القاهرة .. بمعني اخر .. دي سفينة كأبعاد هي اكبر من حاملة الطائرات .. دي سفينة متقسمة 10 ادوار .. سفينة فيها سينما .. فيها جيم .. فيها حمام سباحة .. سفينة عشان تتصنع اتصرف عليها 190 مليون دولار و لو جيت في أي يوم تشوف قيمة البضاعة اللي هي شايلاها قد ايه فانت بتتكلم عن حوالي 400 مليون دولار مستريح.

زي ما في العربيات حتلاقي فئات زي يقولك دي سيدان ودي كوبيه و دي كابورليه فبرده في السفن فيه فئات .. الفئة اللي السفينة ماري ميرسك بتتحط فيها هي Triple-E ودي معناها ان السفينة دي بتحقق 3 اشتراطات اصعب من بعض .. الاولانية بيتقال عليها Economy of Scale يعني هي صحيح سفينة كبيرة اوي خالص جدا يعني بس هي متصممة صح اوي و بشكل اقتصادي جدا.. الثانية بيتقال عليها Environmentally Improved يعني مش بتلوث البيئة بشكل كبير مش زي سفن الرحلات Cruise Ships .. الثالثة بيتقال عليها Energy Efficient يعني مش بتحرق بنزين كتير وهي ماشية .. فئة Triple-E بدأت تشتغل سنة 2013 ودي تعتبر مستقبل سفن الشحن في العالم.

اللي عايزين نتكلم عنه النهاردة هو محاولة الاجابة عن سؤالين ملهمش ثالث .. ايه اللي يخلينا كبشر عموما نقول ان احنا محتاجين نعمل سفينة كبيرة اوي خالص زي دي؟ .. السؤال الثاني هو انت ازاي كمهندس اصلا لما يتقالك احنا عايزين نبني سفينة كبيرة اوي خالص جدا زي دي المفروض انك تعمل ايه و تفكر ازاي؟

خلينا نبدأ بالسؤال الاولاني .. ليه؟

الاجابة هي بمنتهي البساطة كلمة واحدة .. الفلوس .. دلوقتي انت عندك دول او خليني اقول دولة بتنتج بضايع بنفس المعدل اللي انت بتشتم بيه انت و صحابك لما تقعدوا تلعبوا بلاي ستيشن .. وفي نفس الوقت عندك دول بتستهلك البضايع دي بنفس المعدل اللي البنات بيقولوا لبعض يلا نتصور سيلفي اول ما يقابلوا بعض مع انهم ممكن يكونوا لسه شايفين بعض امبارح .. الفكرة ان البضايع دي عشان تروح من المنتج للمستهلك فأسهل طريقة انك ترصها في حاويات علي سفينة زي ماري ميرسك .. ده يفسرلك ليه خط الرحلة الرئيسي بتاع السفينة هو مسار طوله فوق 45,000 كيلومتر من اول مدينة شنغهاي الصينية واللي زي ما قلتلك البلد اللي بتنتج كتير لحد ميناء روتردام الهولندي اكبر موانيء اوروبا ودي البلد اللي بتستهلك كتير .. السفينة ماري ميرسك اتصممت و اتصنعت عشان تاخد الطريق ده رايح جاي لمدة 25 سنة.

خط السير الرئيسي للسفينة ماري ميرسك .. هي اتصممت انها تاخد السكة من شنغهاي الصينية لحد روتردام في هولندا رايح جاي لمدة 25 سنة.

ارجع و اقولك ان المشكلة كلها في الفلوس .. انت عشان تنقل بضاعة اتحطت في 18,000 حاوية علي قطر عشان توديهم من شنغهاي لحد روتردام فانت فكك من تكاليف انشاء خط السكة الحديد اللي حيقطع المسافة من الصين لهولندا .. مش دي المشكلة .. المشكلة ان البضاعة دي كلها عشان تتحط علي قطر فانت بتتكلم عن قطر بضاعة طوله عدي 112 كيلومتر.. ده يفسرلك ليه سفن الشحن اللي زي ماري ميرسك مسئولة عن نقل 90% من اجمالي البضايع في حركة التجارة العالمية .. بناء علي كلام منظمة التجارة العالمية سنة 2014 فكل سنة التجارة بين دول العالم بتكون سبب في نقل بضاعة تقريبا ثمنها بيوصل 13 ترليون دولار ولك ان تتخيل ان 70% منهم بيتنقل عن طريق سفن الشحن .. كفلوس و وقت سفن الشحن ارخص و أحسن بكتير من القطارات.

في نفس الوقت بناء السفن مش زي بناء الابراج .. تايوان ممكن تعمل ناطحة السحاب تايبية 101 وبعد كده تيجي دبي تعمل ناطحة السحاب برج خليفة و دلوقتي السعودية عايزة تعمل ناطحة سحاب اكبر منهم هم الاتنين .. الوضع مختلف شوية في السفن .. السفن محتاجة تركن في موانيء و تمشي في قنوات فلو انت بنيت سفينة ضخمة زيادة عن اللزوم فده معناه انها ممكن ميبقاش تنفع تدخل موانيء كتير .. فكر فيها علي اساس انك رجل معاك فلوس تشتري عربية H3 Hammer بس ساكن في شارع ضيق في اسكندرية .. انت معاك فلوس تشتريها بس مش حتعرف تركنها تحت بيتكوا .. ده يفسرلك برده ليه لحد دلوقتي سفن الشحن من فئة Triple-E مش بتعرف تخش اميركا عشان كتير من الموانئ الاميريكية اصغر من انها تستوعب حجمها .. بمعني اخر .. الموانيء الاميريكية معندهاش مكان يكفي ركنة سفينة زي ماري ميرسك.

بس زي ما حجم السفينة بيحكمه الهندسة و الابعاد بتاعة الموانيء ودي حاجة بتتقاس بالمتر فبرده اللي بيحكم حجم السفينة هو الاقتصاد وده بيتقاس بالفلوس .. لما حصلت الازمة المالية العالمية سنة 2008 ناس كتير توقعت ان دي حتكون نهاية التجارة العالمية خلاص .. بداية من 2008 و الطلب العالمي للبضايع قل اوي وعشان كده سنة 2011 شركة ميرسك صدمت العالم لما طلبت تشتري 20 سفينة من فئة Triple-E من ترسانة سفن دايو Daewoo الكورية الجنوبية .. ناس كتير قالت ان ده اغبي قرار يتعمل في البيزنس بعد قرار بيبسي انها تفجعنا كلنا بالاعلان بتاع (عمرو دياب) اللي بيورينا نفسه وهو صغير .. وقتها بان اوي الفرق بين انك تبص للبزنس كشركة و تبصله كواحد بيدرسه من بره .. انت كواحد بيدرس البيزنس من بره شايف ان السوق عرض و طلب .. انت شايف ان بعد الازمة المالية العالمية الناس بطلت تشتري يعني مبقاش فيه طلب و بالتالي سعر مكان الحاوية علي اي سفينة شحن اتخسف بيه الارض .. قصاد انك كشركة شحن شايف ان كل ما بقي عندي سفن اضخم تشيل حمولة اضخم فده احسنلي .. ليه عشان انقل كمية بضاعة من الصين لهولندا بدل ما استخدم سفينتين صغيرين و ادفع تكاليف بنزين و صيانة و مرتبات سفينتين طب ما ادفع بنزين و صيانة و مرتبات سفينة واحدة كبيرة؟ .. الحقيقة ان انهيار سعر برميل البترول اللي حصل في 2018 اثبت ان شركة ميرسك كان عندها حق.

خلينا نتكلم دلوقتي عن السؤال الثاني .. ازاي؟

أي سفينة في الدنيا هي عبارة عن 3 حاجات .. موتور .. رفاص .. شاسيه .. في حالة السفينة ماري ميرسك فانت كمهندس مطلوب منك انك تضبط مقاديرك .. التصميم الهندسي خصوصا للسفن عامل زي عمايل الكيكة .. انت بيبقي قدامك مقادير و طريقة عمايل .. لو مقاديرك باظت فالكيكة حتترمي في الزبالة .. الكيكة اللي انت المفروض تعملها هي عبارة عن سفينة بتقدر تمشي في المياة بسرعة ممكن توصل 23 ميل بحري في الساعة اللي هو انت بتتكلم عن 42.6 كيلومتر في الساعة .. صحيح السرعة دي واطية اوي بالنسبة ليك وانت طاير بعربية هيونداي فيرنا او النعش الطاير زي ما بنسميها علي طريق مصر اسكندرية الصحراوي وانت كاسر 140 كيلومتر في الساعة بس حاول تستوعب انك بتتكلم عن سفينة وزنها بحمولتها معدي ربع مليون طن .. عشان كده السفينة دي مفيهاش فرامل.

ايوة زي ما قريت .. انت عشان توقف سفينة بالوزن ده فانت بتشيل رجلك من علي البنزين و بتطفي الموتور و بتسيب القصور الذاتي و احتكاك المياة مع جسم السفينة هو اللي يوقفها .. عشان السفينة دي تقف فمن اول ما القبطان بتاعها يبطل الموتور لحد ما تقف خالص فهي بتحتاج ما بين 6.4 كيلومتر لحد 8 كيلومتر .. تاني .. تخيل انك سايق الهيونداي فيرنا وانت طاير بيها وتكتشف ان مفيهاش فرامل وعشان توقفها انت بتشيل رجلك من علي البنزين وبتسيبها تهدي براحتها لحد ما تقف وبتحتاج ما بين 400-600 متر .. بدأت تستوعب الفكرة؟ .. فخلينا دلوقتي نرجع نتكلم عن المقادير الاساسية لاي سفينة في الدنيا .. الموتور و الرفاص و الشاسية و ناخدهم واحدة واحدة نتكلم عنهم.

الموتور .. ضخم لدرجة انك عشان تصلحه بتخش جواه:

السفينة دي فيها موتورين ديزل الواحد فيهم بيديك 43,000 حصان وحاول بس تستوعب الرقم ده قبل ما تكمل قراية .. الموتور الواحد فيهم عبارة عن 8 سلندر علي خط واحد بس Two-Stroke يعني حاجة شبه موتور الموتوسيكل بحيث ان في المعتاد الموتور ده الRPM بتاعه بيكون حوالي 25 .. مش بس دي الحاجة الوحيدة اللي تبهر .. انت عشان تشوف موتور عربيتك فانت كل اللي بتعمله انك تفتح الكابوت .. هنا انت محتاج تنزل في اسانسير 10 ادوار لحد اوضة المحركات Engine Room عشان تلاقي موتورين الواحد فيهم ارتفاعه 3 ادوار .. انت بتتكلم عن موتورين كل موتور فيهم له فريق المهندسين و الفنيين بتوعه المسئولين عن صيانته .. انت بتتكلم عن سفينة جواها ورشة متكاملة لاصلاح اي عطل يخطر علي بالك .. يعني مثلا .. يقدروا يغيروا البساتم .. يقدروا يغيروا الرشاشات و التاكيهات .. لو عايز تخرط الاسطوانة نفسها يقدروا يعملوها جوه السفينة وهي ماشية .. الرومان بلي بتاع عمود الكرانك يقدروا يغيروه لو باظ .. الحالة الوحيدة ان السفينة تحتاج تروح لاقرب ميناء هي لو الكرانك شافت نفسه اتكسر.

انت بتتكلم عن موتور كبير اوي .. موتور خزعبلي لدرجة انك عشان تكشف علي الشنابر او Oil Rings بتاعه البستم انت مش بتحتاج بس انك تشيل وش الموتور وتسحب البستم .. انت بتدخل بني ادم جوه الموتور من الAir Manifold والبني ادم ده بيمشي جوه الموتور في المسارات اللي الهواء بيمشي فيها .. ازمة الموتور ده في رأيي انك تستوعب فرق Scale بينه وبين موتور عربيتك ومش بس في الحجم .. في الشغل كمان .. خليني اديلك مثال .. في المتوسط يعني عربية اي حد فينا بتمشي 16,000 كيلومتر في السنة يعني حوالي 1,300 كيلومتر في الشهر .. ده المتوسط ممكن تبقي أقل من كده او اعلي من كده علي حسب .. عارف انت ال16,000 كيلومتر اللي انت بتمشيهم في السنة دول؟ اهو السفينة ماري ميرسك بتقطعهم في شهر .. ده معناه ان طاقم المهندسيين و الفنيين اللي علي السفينة بيغيروا زيت وفلاتر للموتور اكتر ما بيغيروا شراباتهم.

اللي قدامك ده يبقي بستم Piston من ضمن البساتم بتاعة الموتور للسفينة ماري ميرسك و عايزك تلاحظ الفرق في الحجم بينه وبين Piston اخوه اللي بيتركب في اي موتور موتوسيكل Two-Stroke.

الموتور الواحد للسفينة ماري ميرسك هو بيكون 8-Cylinder In-Line Two-Stroke Engine .. يعني موتور 8 سلندر علي خط واحد بس الموتور ده مش Four Stroke زي موتور عربيتك .. هو بيكون Two Stroke زي اللي بتلاقيه في الموتوسيكلات.

كل موتور من الموتورين بتوع السفينة بيكون ليهم طقم المهندسين و الفنيين بتوعهم واللي حتلاحظ ان اكتر شغلانة بيعملوها هي تغيير الزيت و الفلاتر.

لك ان تتخيل ان دي Air Manifold بتاعة موتور وفيه اتنين بني ادمين جواها .. دي المسارات اللي الهواء بيمشي فيها لحد ما يخش الاسطوانة عشان يتخلط بالسولار و يتحرق .. الموتور ده ضخم لدرجة انه عشان يتصلح او يتكشف عليه المهندسين بيخشوا جواه حرفيا.

مهندس بيكشف علي الشنابر Oil Rings بتاعة Piston من جوه المكنة .. هو بيخش بنفسه جوه Air Intake و بيتفرج علي الشنابر بعنيه.

الرفاص .. فكرته اتفه من التفاهة بس تصنيعة اصعب من عمايل الرز:

السفينة ماري ميرسك هي اول ناقلة حاويات في العالم تتصمم و تتصنع باتنين رفاصات جنب بعض .. الرفاص الواحد ثمنه مليون دولار .. الرفاص الواحد كتلته 70 طن و قطره معدي 10 متر من تصنيع شركة تصنيع الرفاصات الالمانية ميكلين-بيرجر ميتالجوس Mecklenburger Metallgus وبيتصنع من سبيكة من البرونز .. كل موتور متوصل علي حدافة ومنها علي الرفاص عن طريق عمود رفاصات Propeller Shaft يعني مفيش فتيس او Gear Box .. الرفاص بياخد حركته من الموتور دايركت.

الرفاص نفسه عشان تصنعه ففكرته تافهة جدا .. سر الصنعة اللي فيه هو مكونات السبيكة البرونز اللي هو بيتصنع منها .. انت بتصب السبيكة في قالب في عملية Casting تافهة جدا زي اللي خدتها في كلية هندسة قسم انتاج و بعد ما السبيكة تبرد بيتعملها شوية Finishing عن طريق مكنة تجليخ بنفس الفكرة اللي انت برده خدتها في كلية هندسة قسم انتاج .. هي الافكار تافهة .. التطبيق هو اللي مبهر .. انت بتجيب السبيكة تسيحها في فرن Induction Furnace عاملاه الشركة الالمانية اللي صنعت الرفاص وده يعتبر من اكبر افران الحث الكهربي اللي ممكن تلاقيها في العالم .. الفرن بيقدر يخلي معدن السبيكة يسيح علي درجة حرارة 1200 مئوية .. السبيكة بتتصب و بتتساب 10 ايام كاملة عشان تبرد .. وبعد كده بتخش مرحلة التجليخ .. عارف فيلم Avatar؟ .. فاكر الانسان الالي اللي متوصل بدراع شبه دراع الJoystick وبيحاكي حركة العسكري اللي سايقه؟ .. اهي دي نفس الفكرة .. مكنة التجليخ عبارة عن ذراع بيحاكي حركة ايد اللي بيشغله .. انت متقدرش تقول ان تجليخ الرفاص بيقوم بيه انسان الي لان ده مبيحصلش .. هي اقرب ما تكون للتجليخ اليدوي بورقة صنفرة بس بتتم بمعدل اسرع بكتير.

العمر الافتراضي للرفاص مش كبير يعني يدوبك 10 سنين لان من اول لحظة هو بيشتغل فيها فالرفاص بيطلع عينه و عين اللي خلفوه بسبب ظاهرة انت عارفها كويس لو انت مهندس ميكانيكا وهي Cavitation ودي كلمة ملهاش ترجمة عربي تعبر عنها اوي بس هي معناها ان لما الرفاص بيدور فانت بتشوف انه بيعمل فقاقيع هواء كتير .. الفقاقيع دي مش بتستحمل الضغط و بتخش في نفسها يعني بيحصلها Implode زي ما انت كده تطبق علبة الكانز بعد ما تشربها .. لما ده بيحصل ففقاعة الهواء دي بتبقي عاملة زي الطلقة بتجري علي الرفاص تضربة .. المشكلة انهم بيبقوا مليارات الفقاقيع اللي بيحصلها Implosion وبيضربوا الرفاص كانه مدفع رشاش مش عايز يقف .. بعد سنين من الشغل الرفاص بيتاكل و بيحتاج انه يتغير.

السفينة ماري ميرسك من سفن الشحن القليلة اوي في العالم الللي حتلاقيها بتمشي باتنين رفاصات جنب بعض زيها زي حاملات الطائرات.

ده رفاص من تصنيع شركة تصنيع الرفاصات الالمانية ميكلين-بيرجر ميتالجوس Mecklenburger Metallgus اللي صنعت الرفاص المستخدم علي السفينة ماري ميرسك .. ده مش هو هو الرفاص بتاع السفينة ماري ميرسك خلي بالك .. رفاص السفينة ماري ميرسك قطرة 10 متر بس الرفاص ده قطرة 9 متر .. هو الفرق مش كبير بس عايزك تشوف حجم الرفاص مقارنة بجسم البني ادم عامل ازاي.

ده القالب اللي بتتصب فيه السبيكة البرونز اللي بيتكون منها الرفاص .. القالب ده عشان يتعمل بيحتاج اسابيع شغل.

السائل الاحمر اللي انت فاكرة شربات ده يبقي ده يبقي السبيكة المنصهرة واللي درجة حرارتها وهي في حالتها دي 1200 درجة مئوية .. السبيكة المنصهرة بتتحط في البتاعة اللي شبه الكوباية دي اللي المهندسين بتوع مصنع ميكلين-بيرجر ميتالجوس Mecklenburger Metallgusبيسموها الحلة.

السبيكة المنصهرة بتتكب في القالب عشان يتشكل الرفاص اللي حيقعد 10 ايام كاملة عشان يبرد.

دي مكنة التجليخ اللي بتبقي مسئولة عن الSurface Finish للرفاص .. حضرتك بتقعد في الكابينة دي وبيبقي فيه دراع بJoystick زي بتاعة الاتاري او البلاي ستيشن عشان تتحكم في الدراع اللي متركب في طرفه ورقة صنفرا لونها اخضر.

الدراع ده زي ما انت شايف متركب فيه ورقة صنفرا بتلف وهي دي اللي بتعمل Surface Finish للرفاص .. هي فكرة تافهة جدا بس الفني اللي بيشتغل علي المكنة دي في رأيي الشخصي علي الاقل ده فنان .. ده بينحت في البرونز عشان يطلع رفاص بابعاد نسبة الError فيها جزء من المليمتر.

الشاسيه .. سفينة متفرقش كتير عن Lunch Box بتاع الاطفال:

في المعتاد السفينة دي بيكون وزنها وهي ماشية في المياه حوالي 250,000 طن .. وزنها وهي فاضية 63,000 طن بس .. ده معناه انك بتتكلم عن 18,000 حاوية وزنهم معدي 187,000 طن .. الليلة دي كلها بتتحط علي سفينة و الحل الوحيد قدام المهندسين انهم يرصوا العدد ده من الحاويات جوه السفينة هي انهم يعملوها من غير سطح .. حاول تتخيل انك بتتكلم عن سفينة بالضبط زي علبة الساندويتشات البلاستيك بس شيل غطاها .. علبة بتقدر ترص فيها 23 صف حاويات علي عرض السفينة و تقدر ترص 24 صف حاويات علي امتداد طولها .. عمود الحاويات الواحد المترصص فوق بعضه ممكن يوصل 21 حاوية .. حاول تبقي مستوعب ان 18,000 حاوية دول لو رصتهم فوق بعض انا ممكن اوصل للفضاء الخارجي.

نرجع تاني للسؤال المهم اللي لازم تسأله لنفسك لو انت مهندس بحري .. ازاي اصمم سفينة زي ما قلنا فكرتها انها عاملة زي علبة الساندوتشات او Lunch Box البلاستيك اللي من غير غطا وتكون تستحمل الوزن ده كله و كمان تستحمل انها تمشي في وسط عاصفة في البحر؟ .. الاجابة هي انك تبص علي Lunch Box و تركز عنيك علي الشفة البلاستيك اللي فيه .. الشفة البلاستيك دي انت حتشوفها في اي جردل .. حتشوفها في اي Lunch Box .. لو رحت Starbucks وطلبت كوباية فرابتشينو وايت توشكليت تشيب بالكريمة وانا عمري ما جربته انا بس بوريك انا قد ايه كول طحن اني عرفت انطق الاوردر ده قدامك وبصيت علي الكوباية اللي محطوطلك فيها البتاعة دي حتشوفها .. باختصار حتشوفها في اي وعاء متصمم انه يتحط فيه حاجة تقيلة مقارنة بكتلة الوعاء نفسه .. الشفة دي اسمها الهندسي Torsion Box يعني صندوق الالتواء .. الTorsion Box معمول عشان يمنع السفينة انها تتني تحت تأثير حركة الامواج في العواصف وفي حالة السفينة ماري ميرسك فهو كبير لدرجة انه بيؤدي وظيفة انه بقي الكوريدور اللي داير ما يدور جول جسم السفينة و بيوديك لاي حتة انت عايز تروحها.

السفينة ماري ميرسك بتقدر ترص فيها 24 صف حاويات علي امتداد طولها و 23 صف حاويات علي امتداد عرضها بارتفاع بيوصل 21 حاوية مترصصين فوق بعض .. زي ما انت شايف انت بتتكلم عن سفينة ملهاش سطح .. هي فعليا Lunch Box من غير غطا.

الTorsion Box هو صندوق الالتواء هو الشفة اللي انت بتشوفها في اي علبة بلاستيك او في اي جردل .. الشفة دي بتتحط في أي وعاء اتصنع عشان يتحط فيه حاجة وزنها تقيل مقارنة بوزن الوعاء نفسه .. الTorsion Box او الشفة دي محزنة السفينة كلها داير ما يدور عشان تمنعها انها تتلوي تحت تأثير وزنها وتحت تأثير العواصف و الامواج في البحار.

الTorsion Box في حالة السفينة ماري ميرسك كبيرلدرجة انه بيؤدي دور الكوريدور او الممر اللي بيحزم السفينة كلها و تقدر تستخدمه عشان توصل من مكان لمكان.

دي سفينة كلها علي بعضها شاكب راكب فيها 25 بني ادم بيمثلوا الطاقم بتاعها .. طاقم مطلوب منه انه ياخد باله من المحركات .. من البضاعة .. وكمان من الحريق .. كل شهر طاقم السفينة بيعمل مناورة حريق علي فكرة .. سفن الشحن عموما و بالذات السفينة ماري ميرسك هي تجسيد ان الهندسة مهما كانت تبان عملاقة و ضخمة و معقدة و كبيرة وكلها مشاكل الا انك لو بصيت ليها كمهندس واستهديت بالله كده و صليت ع النبي (عليه الصلاة و السلام) حتلاقيها عبارة عن شوية افكار تافهة انت خدتها في الكلية و معاك المعادلات اللي بتحكمها .. التطبيق و ازاي الافكار دي بتتنفذ هي اللي بتختلف.

المصادر:

حلقة من برنامج Richard Hammond’s Big: Mega Ship وده لينك الحلقة علي YouTube لو حبيت تتفرج عليها:
https://www.youtube.com/watch?v=zWzdlcdXhzg&list=PLpp6pYY-9DKiKK9wrCUnQD2at-NYJTE9K

مقالة بعنوان Abroad a Cargo Colossus نشرت في جريدة The New York Times الاميريكية ود لينك المقالة الاصلية:
https://www.nytimes.com/2014/10/05/business/international/aboard-a-cargo-colossus-maersks-new-container-ships.html