اعتماد حلف شمال الأطلنطي علي أمريكا .. الحق المكتسب في العلاقات التوكسيك.

لينك التسجيل الصوتي علي ساوند كلاود:
https://on.soundcloud.com/XNC0Jh6YIPjl16hm2e

من أكتر الحاجات اللي بتوجع القلب في العلاقات بين البشر إن طرف من أطراف العلاقة يعتبر حاجة معينة بيقدمها الطرف الثاني حق مكتسب من غير وجه حق .. وجود حاجة زي دي في أي علاقة ممكن بسهولة جداً يحولها لعلاقة توكسيك وناس تانية ممكن توصفها إنها علاقة Abusive يعني الطرف اللي واخد الدنيا حق مكتسب ده بييجي جامد علي مشاعر الطرف الثاني .. ولإن زي ما بقول دايماً الشعوب هي عبارة عن بني أدمين فاللي يمشي علي العلاقات بين البني أدمين يمشي علي الشعوب وحكوماتها والنهاردة عايزين نتكلم عن علاقة توكسيك أوي الكلام في الإعلام بدأ يزيد عليها مؤخراً وهي العلاقة بين أمريكا باعتبارها القوة العظمي الأولي في العالم وبين الدول اللي المفروض إنهم صحابها و أهلها وعشيرتها اللي أعضاء في ما يسمي حلف شمال الأطنطي NATO.

السبب اللي أنا كنت في الأول حابب اتكلم عن الموضوع ده هو الخناقة اللي طلعت فجأة كده لما كيس الشيتوس الحجم العائلي طلع من غير لا احم ولا دستور يقولك أنا عايز اخد جزيرة جرينلاد وضع يد .. الفكرة بمنتهي البساطة إن فيه بلد اسمها الدانمرك .. عارفها انت البلد للي دايماً بتحط علينا في اخر ثانية في ماتشات كرة اليد دي .. البلد دي تحت ايدها جزيرة عبارة عن لوح تلج عايم علي وش المياه فوق خالص عند القطب الشمالي مش عايش فيها غير شوية صيادين سمك اسمها جرينلاد .. الدانمرك بلد أوروبية .. الدانمرك بلد عضوة في حلف شمال الأطلنطي .. بلد هي في المركز الثاني بعد أمريكا كأكتر بلد أوروبي قدمت قتلي من ولادها كمقاتلين في الحرب العالمية علي الإرهاب اللي انت عارفها أكتر بمأساة أفغانستان و كذبة غزو العراق .. رغم كل ده الرئيس الأمريكاني (دونالد ترامب) زي ما يكون واخد رضا الدانمرك كحق مكتسب وعايزها توافق طواعية كده إنها تتنازل عن جزء من أرضها ليه .. موقف الدول الأوروبية سواء الأعضاء في NATO أو اللي مش أعضاء في وقفتهم جنب الدانمرك كانت السبب في رغبتي إني أكتب عن الموضوع لحد ما أبوحنان دخل العالم كله في حرب ملهاش أي ستين لازمة مع إيران ودلوقتي إيران قفلت مضيق هرموز وسبحان الله (ترامب) بعد ما كان عامل فيها سبع رجاله في بعض دلوقتي راجع تاني علي رأي الست (شفيقة) الله يرحمها يقول لدول NATO انتوا لازم تقفوا جنبي في محنتي وللمرة الثانية في كام شهر دول NATO بتقول حيجيلي موجوع دموعه في عينه تاعباه علي رأي (تامر عاشور).

اللي عايزين نتكلم عنه النهاردة هو محاولة الإجابة عن 3 أسئلة:

• إيه هو أصلاً NATO؟ بيعمل ايه؟ واتعمل ليه؟
• دلوقتي احنا بيتقال دايماً في الإعلام إن أمريكا هي اللي شايله حلف شمال الأطلنطي علي كتافها .. هل ده حقيقي؟
• يا تري ايه مستقبل NATO في الوقت اللي أبوحنان حرفياً ماسك أجنة وشاكوش وعمال يكسر طوبة طوبة في النظام العالمي اللي فضل يحكم الدنيا من سنة 1990 لحد دلوقتي؟

خلينا نبدأ بالسؤال الأولاني .. يطلع إيه NATO ده؟

كلمة NATO دي اختصار North Atlantic Treaty Organization اللي هي حلف شمال الأطلنطي وده عبارة عن شله صحاب مكونة من 32 دولة .. منهم دولتين بره أوروبا اللي هم أمريكا وكندا .. ومعاهم تركيا اللي هي جغرافياً علي الأقل تحسها بترقص علي السلم اللي هي لا احنا عارفين هي بلد أوروبية ولا بلد أسيوية ولا بلد شرق أوسطية .. بلد بتستعبط من الاخر سواء جغرافياً أو سياسياً بس ده مش موضوعنا دلوقتي .. اللي يهمك تعرفه عن الناس دي إنها كاتبه لايحه زي لايحة الدوري الممتاز كده وأهم فقرة في اللايحة دي هي ما يسمي Article 5 اللي بتقول إن أي هجوم خارجي علي أي بلد من الدول الأعضاء في الحلف هو يعتبر هجوم علي كل أعضاء الحلف .. اللايحة دي فيه ناس بتحب تسميها Collective Defense اللي هو الدفاع المشترك .. اللايحة دي اتفعلت مرة واحدة في تاريخ الحلف لما امريكا اتضربت في هجمات 11 سبتمبر 2001 وده السبب اللي دول كتير من الحلف بعتت قوات تشارك في حربي العراق وأفغانستان واللي من ضمنهم الدانمرك زي ما حكيت في المقدمة.

الحتة بتاعة Article 5 دي برده بالمناسبة كانت هي السبب ورا إن قبل الحرب الأخرانية بتاعة الغزو الروسي لأوكرانيا الأوكرانيين كانوا عايزين وحيموتوا ينضموا للحلف عشان كانوا خايفين من إن يجي اليوم اللي روسيا تقول لأوكرانيا زي ما الفنان (علاء ولي الدين) الله يرحمه كان بيقول في فيلم الناظر .. هذه لي .. اللايحة دي برده هي هي السبب في إن بعد ما الروس ضربوا أوكرانيا فدول أوروبية كتير كانت زمان بتقول علي نفسها حد الله بيني وبين إني أترمي في حضن حد بقت بتجري بايديها وسنانها عشان تنضم للحلف زي السويد وفنلندا .. باختصار فArticle 5 دي هي (أسماء جلال) في فيلم السلم والثعبان .. إنت مش داخل الفيلم عشان ده حيترشح للأوسكار .. إنت داخله عشانها .. إنتي كدولة أوروبية بتخشي NATO مش عشان سواد عيونه .. إنتي بتخشي عشان لو الفاس وقعت في الراس حتلاقي 32 بلد شايلين سلاحهم وجايين يلحقوكي .. 32 بلد من ضمنهم القوة العظمي الأولي في العالم.

مهم بالنسبة لي نفهم نقطة .. الكيان اللي اسمه NATO ده اتكون سنة 1949 يعني يدوبك بعد نهاية الحرب العالمية الثانية بكام سنة عشان هدف واحد بس فقط لا غير ميعرفوش غيره .. إنه يواجه خطر الإتحاد السوفيتي اللي هو في حالة إنك من جين زي متعرفش يطلع ايه ده فده يبقي Prequel اللي هو الجزء الأولاني أو الفيلم اللي بيحكي القصة الأصلية من الفيلم بتاع روسيا .. فضل NATO مش شايف قدامه غير الإتحاد السوفيتي لحد سنة 1989 ودي السنة اللي الإتحاد السوفيتي انهار فيها .. يسكتوا؟ .. لا ازاي والفلوس اللي بتتصرف علي التسليح دي تروح فين .. قالك يبقي هدفنا هو حماية أوروبا من الخطر اللي بتمثله روسيا .. ايه هو يعني الخطر الروسي ده؟ محدش عارف ومش مهم نعرف .. المهم يبقي فيه شماعة نعلق عليها مصاريفنا العسكرية .. فضلنا كده نبعزق فلوس علي الفاضية لحد ما جت المليانة سنة 2014 لما روسيا خدت شبه جزيرة القرم من أوكرانيا وضع يد .. ساعتها الناس بتاعة NATO بصولنا وقالولنا شفتوا احنا كنا شايفين اللي انتوا مكنتوش شايفينه .. لما الغزو الروسي لأوكرانيا حصل الأمريكان بعتوا كمية سلاح وذخيرة لأوكرانيا صعب إن مخي انا أحياناً يستوعب هي الناس بترمي فلوسها علي الأرض كده ازاي .. جري بقي الشريط لحد اللحظة اللي احنا فيها دلوقتي تلاقي أمريكا بتقول لدول NATO عايزاكوا في طلعة ضد إيران وهم بصوا لبعض وبصوا لأمريكا وقالولها معلش والله عاملين بس Day-Use في دهب فمش فاضيين لما نرجع حنبقي نشوف نعمل معاكوا إيه.

إنت بتتكلم عن كيان بقاله أكتر من 75 سنة عدي عليه 14 رئيس أمريكاني من ضمنهم فترتين رئاسيتين لأبوحنان فضلت أمريكا هي البيج بوص بتاع الحلف .. 75 سنة اللي كانت عايزاه أمريكا بيحصل .. خشوا معايا حرب في العراق مبنية علي كذبة يتقالها حاضر .. أرموا ولادكوا في التهلكة في خازوق أفغانستان اللي خلصت بإن طالبان رجعت تاني للحكم يتقالها عينيا .. تعالوا نشيل (معمر القذافي) الله يرحمه من ليبيا ونحول البلد اللي كانت الناس بتروح تستلقط زرقها فيها لبلد مش عارفه تأكل نفسها يتقالها بس كده غالي والطلب رخيص ..لحد ما جت اللحظة الحاسمة اللي إحنا بنعيشها دلوقتي .. ناس كتير تخيلت إن بداية الشرخ في العلاقة بين أمريكا و دول NATO كانت في المؤتمر الصحفي الكارثي اللي اتعمل في المكتب البيضاوي بين أبوحنان و النائب بتاعه (جاي د فانز) والرئيس الأوكراني (فولاديمير زيلينسكي) .. للناس اللي مش عارفه اللي حصل فبعد ما كانت أمريكا هي أكتر بلد بتبعت مساعدات عسكرية لأوكرانيا وقت ما كان ماسك البلد جدو (بايدن) فأول ما (ترامب) مسك قام قافل المحبس بتاع المساعدات .. مش كده وبس .. هو حاول يجبر أوكرانيا تقبل بوقف إطلاق نار بشروط الأوكرانيين شافوها مش عادلة .. ولما (زيلينسكي) راح البيت الأبيض يتكلم مع (ترامب) اتقاله قوم اقف وانت بتكلمني وقبل ما تفتح بقك تقول متشكرين يا سيد المعلمين يا حامي حمي أوروبا .. شوية وجت أزمة جرينلاند .. بس الحرب الإيرانية غالباً حتكون هي القشة اللي قصمت ظهر البعير.

هنا يجي دور السؤال الثاني .. هو مين بيصرف علي NATO؟

السؤال ده مهم لسبب إن (ترامب) من نوعية الرجاله اللي علي رأي (عمرو دياب) الكلام منه بيطلع اوام و بيتنسي .. لو سهل عليك تقول كلام ملوش حلول فانا سهل اسيب اللي يسيب .. معلش مش عارف ليه عمال استعير كلام اغاني كتير في المقالة دي .. المهم في يناير 2026 في مؤتمر دافوس الإقتصادي طلع (ترامب) بشكل غريب جداً قال إن أمريكا بتتحمل 100% من مصاريف NATO .. الحقيقة إن الكلام ده فيه كمية هبد محتاجة إنك تبقي عارفها وفاهمها لإن فهمك للهبد ده حيخليك تعرف هو ليه الدول الأعضاء في NATO قرروا إنهم يكرفوا لأبوحنان .. مبدأياً كيان زي NATO إنت لازم تبصله من حيث المصاريف اللي بيحتاجها من وجهتين نظر مختلفتين:

• أولاً فيه المصاريف الإدارية زي المرتبات و صيانة مقرات الإدارة وتكاليف التشغيل واللي ذي منه فحتلاقي إن أمريكا بتتحمل يدوبك 15% بس من تكاليف تشغيل الحلف ودي نفس النسبة اللي بتشيلها بلد زي المانيا بالمناسبة.
• ثانياً بقي فيه المصاريف الدفاعية اللي تكاليف الذخيرة والتسليح والتدريب وده أنا معاك وخدامك أنا والعربية إن أمريكا بتتحمل نصيب الأسد منها.

مصاريف الحلف بشقيها الإداري والدفاعي بتتدفع من حاجة اسمها صندوق تمويل الحلف وده ميزانيته للسنة المالية 2026 وصلت 5.3 مليار يورو .. الفلوس دي هي اللي بتدفع تكاليف صيانة مقرات الحلف .. العمليات العسكرية في كل حتة في العالم .. إدارة القواعد الجوية والبحرية وأنظمة الإتصالات والتحكم .. حاول تبصلها علي إن الدول الأعضاء في الحلف عاملين جمعية مع بعض والجمعية دي بتتحط في صندوق عشان يصرف علي الحلف .. كل بلد بتحط نسبة من ميزانيتها في الصندوق ده و النسبة دي بتتحدد علي حسب حجم اقتصاد البلد .. عشان بس اديلك ارقام تخليك تحس بحقيقة الوضع علي الأرض .. في السنة المالية بتاعة 2026 زي ما قلتلك فصندوق تمويل أنشطة الحلف ميزانيته 5.3 مليار دولار .. سواء أمريكا أو ألمانيا كل بلد بتشيل 14.9% من الرقم ده .. بريطانيا مثلاً داخله الجمعية دي ب10.3% .. ده كده المصاريف الخاصة بالحلف .. ده مش معناه إن كل بلد لوحدها مش بتصرف فلوس تانية علي قواتها المسلحة المستقلة.

يعني مثلاً .. في السنة المالية بتاعة 2025 الميزانية العسكرية الأمريكية بلعت 3.22% من الناتج الوطني الإجمالي اللي هو Gross Domestic Product أو GDP .. كلمة GDP معناها كل الفلوس اللي بتخش للإقتصاد الأمريكي قبل ما نشيل منه المصاريف بتاعة البلد يعني مثلاً بتجمع كل فلوس الضرايب علي فلوس التصدير علي لو مثلاً أمريكا كانت مسلفة حد فلوس وردها .. بتاخد كل الفلوس دي كلها وبفكرك إن ده قبل ما تطرح منه أي مصاريف وبتسميه الناتج الوطني الإجمالي .. النقطة في النسبة والتناسب .. بلد زي بولندا في السنة المالية بتاعة 2025 برده خصصت 4.48% من GDP بتاعها للميزانية العسكرية .. بلد زي ليتوانيا حجزت 4% .. يعني كنسبة مئوية من GDP فيه دول بتصرف علي ميزانيتها العسكرية أكتر من أمريكا بس عشان الإقتصاد الأمريكي خزعبلي فحتلاقي 3.22% بتاعتها لما تيجي تترجمها لفلوس حتطلع 980 مليار دولار .. لما تيجي تشوف في  NATO  مين تاني أكتر بلد بتصرف علي ميزانيتها العسكرية حتلاقيها بريطانيا اللي بتبعزقلها 90.5 مليار دولار اللي هو حرفياً شيل صفر من اللي بتصرفه أمريكا.

تعالي بقي نعمل Zoom-out ونشوف هي دول NATO بتصرف قد ايه علي ميزاينتها العسكرية .. بناء علي ارقام السنة المالية بتاعة 2025 فالدول ال32 الأعضاء في NATO صارفين شاكب راكب علي ميزانيتهم العسكرية 1.404 ترليون دلار .. أقف بقي هنا .. أنا من شوية قايلك إن أمريكا في نفس السنة مالية صارفالها 980 مليار دولار .. معني كده إن ال31 دولة اللي فاضلين كلهم علي بعض بسلطاتهم وباباغنوجهم صارفين 424 مليار دولار .. حضرتك أمريكا بتصرف علي قواتها المسلحة ضعف اللي بتصرفه دول NATO كلهم علي بعض .. وبعد ده كله وبسبب تكاليف الحرب ضد إيران بيطلع وزير الدفاع (بيت هاجسيث) يطلع يطلب من البرلمان زيادة الميزانية العسكرية ب200 مليار دولار عشان يغطوا تكاليف الهطل اللي بيحصل .. ده ملوش اسم غير إنه سفه .. وعلي فكرة عايز أقولك علي معلومة يعني ليك .. انت دلوقتي في 2026 بيحكم أمريكا أبو حنان .. قبيله كان جدو (بايدن) و قبله كانت الفترة الأولي بتاعة (أبوحنان) .. يعني من 2017 لحد دلوقتي بيحكم أمريكا واحد من اتنين .. واحد فيهم بايع اسمه في التاريخ علي إنه الرئيس اللي أنهي حرب أفغانستان والثاني في كل حملة انتخابية يطلع يقول إنه هو حيبقي الرئيس اللي ميورطش أمريكا في أي حروب خارجية وإن مفيش داعي لبعزقة فلوس علي الفاضي .. وسبحان الله من 2017 الفجوة بين الإنفاق العسكري بين أمريكا وبين ال31 دولة بتوع NATO نطت من إن أمريكا كانت بتصرف 73% زيادة عن اجمالي اللي بيصرفوه ودلوقتي عدينا 100% .. لكن تاني .. كمصاريف إدارية عشان NATO يشتغل فأمريكا بتدفع زيها زي ألمانيا مثلاً .. الفرق إن أمريكا كبلد قررت من زمان إن يبقي عندها قوات مسلحة جامدة زحليقة بيتصرف عليها مال قارون .. هل ده بلد زي ليتوانيا ولا بلد زي السويد ليها ذنب فيه؟ .. أكيد لا .. هل أنا كمواطن فنلندي أو كمواطن تركي مطلوب مني إني أشيل مع المواطن الأمريكاني فواتير حرب بلده اللي ملهاش معني ضد بلد تانية من غير ما حد ياخد رأيي في الحرب؟ .. أكيد برده لا.

مش كده وبس .. أنا لو مواطن أسباني أو برتغالي بلدي عضوة في NATO فانا مش دوري إني أصرف علي مرتبات وزارة الدفاع الأمريكية .. من سنة 2006 ودول NATO قعدوا قعدة عرب اتفقوا فيها إن الإنفاق العسكري لكل بلد فيهم مش حيقل عن 2% من GDP بتاع البلد ومن 2006 لحد دلوقتي ومفيش بلد أخلت بكلمتها في الإتفاق .. السؤال بقي .. أبوحنان زعلان ليه .. مش كده وبس .. الناس دي اتفقت إن من أول 2035 وإنت طالع النسبة بتاعة 2% من GDP اللي حتروح في الإنفاق العسكري حتزيد تبقي 5% .. البلدين الوحيدين اللي بره الاتفاق ده كانوا إسبانيا اللي أزمتها الإقتصادية مش حتخلي الكلام ده ياكل معاها و معاها أيسلندا اللي هي أصلاً معندهاش قوات مسلحة .. يمكن ده السبب اللي أبوحنان عشانه شايل أوي من الإسبان إنهم رفضوا يقفوا معاه في حربه اللي ملهاش معني ضد إيران.

وده حيحطنا قدام السؤال الثالث والمهم .. هو المستقبل مخبي لينا إيه؟

هو الحقيقة ده مش توقع أو رؤية للمستقبل قد ما انا بتكلم عن واقع علي الأرض دلوقتي زي ما وصفه رئيس وزراء بولندا (دونالد تاسك) والحقيقة اللي محدش يقدر ينكرها إن لو باقي دول NATO قررت تطرد أمريكا بره الحلف فهم يقدروا علي الأقل يدافعوا عن نفسهم .. حاول تستهدي بالله وتبص للأرقام .. عارف إن الأرقام لوحدها مش بترسم الصورة الكاملة بس خليك معايا:

• الجيوش ما هي إلا بني أدمين وسلاح .. لو حنتكلم عن البني أدمين فتركيا هي صاحبة ثاني أكبر قوات مسلحة في الحلف بعد أمريكا بحوالي 202,200 مقاتل نظامي يعني ضباط وعساكر بياخدوا مرتب من وزارة الدفاع وفي الأرقام اللي حقولها دلوقتي أنا مش واخد في حسابي قوات الإحتياط .. ألمانيا تحت ايدها 179,850 مقاتل نظامي .. بولندا معاها 164,100 .. إيطاليا تقدر تديلك 161,850 مقاتل .. بريطانيا بتتكلم عن 141,000 .. يا رجل دي دول قدراتها العسكرية علي الله حكايتها زي اليونان عندها 132,000 و إسبانيا معاها 122,200 مقاتل نظامي .. طب هل تعلم يا سيدي القاريء إن أمريكا اللي فرحانة بنفسها علي إنها هي اللي بتصرف علي NATO معندهاش غير يدوبك 80,000 مقاتل متوزعين في القواعد العسكرية اللي جوه الدول الأعضاء في الحلف .. من 80 الف دول حتلاقي منهم 35,000 في قاعدة رامشتاين في المانيا.
• نيجي بقي للسلاح .. تاني انا بكلمك من وجهة نظر إن الحلف ده اتعمل اساساً عشان خاطر مواجهة الخطر الروسي .. روسيا بجلالة قدرها معندهاش غير حاملة طائرات عرة اللي هي الأدميرال كوزينتسوف بتعطل أكتر ما بتشتغل شبه عربيتي اللوجان القديمة .. بريطانيا عندها حاملتي طائرات كل واحدة فيهم بتقدر تشيل طيارات مقاتلة F-35B اللي هي أصلاً طيارات جيل خامس يعني ليها القدرة علي التخفي من الرادارات .. فرنسا عندها حاملة طائرات .. إيطاليا عندها حاملة طائرات هليكوبتر .. إسبانيا عندها سفن برمائية تقدر تشيل طيارات هليكوبتر .. بريطانيا وفرنسا الاتنين عندهم ترسانة سلاح نووي والاتنين عندهم غواصات نووية .. ال31 دولة في NATO غير أمريكا تحت ايدهم شاكب راكب علي بعض فوق 2000 طيارة مقاتلة .. عندهم دبابات تصنيع محلي سواء ليوبارد الألماني أو تشالنجر البريطاني .. عندهم صواريخ كروز تصنيع محلي هي صواريخ SCALP و صواريخ Storm Shadow والاتنين اثبتوا نفسهم في الحرب الروسية الأوكرانية.

اللي انا عايز أقوله إن الإنطباع العام عند الدول الأوروبية بالذات ومعاهم كندا لو بكره الصبح أمريكا انسحبت من NATO فدي مش حتكون نهاية الكون .. الناس دي نظرياً تقدر تعتمد علي نفسها وتقدر تدافع عن نفسها كويس أوي ضد أي تهديد ليهم وهنا الناس دي مش بتتكلم غير عن التهديد الروسي .. واللي انا عايز اقوله برده إن زي ما ذكرت في المقدمة فالشعوب في الأخر هي بني أدمين .. ربنا قالها في سورة الحجرات .. يا أيها الناس إنا خلقناكم من ذكر و أنثي و جعلناكم شعوباً و قبائل لتعارفوا إن أكرمكم عند الله أتقاكم إن الله عليم خبير .. وهي يمكن المشكلة في حتة أكرمكم عند الله أتقاكم دي لإن العلاقات الإنسانية في الأخر بتعتمد علي الإجابة علي سؤال هو الطرف اللي معايا في العلاقة ده أنا قادر استحمل قرفه ولا لا .. اللي انا شايفه دلوقتي إن حتي حلفاء أمريكا القريبين وأخص بالذكر الأنجليز وصلوا لمرحلة إنهم مبقوش مستحملين قرف أبوحنان .. فكر فيها كده .. لو شلنا كيس الشيتوس وحطينا جدو (بايدن) أو (باراك أوباما) أو حتي سيئة السمعة (هيلاري كلينتون) أنا شخصياً مستبعدش إن دول NATO وقتها كانت شمرت ونزلت الغيط مع الأمريكان حتي لو كان الأمريكان ضاحكين عليهم و إن إيران لا بتشكل تهديد واضح وصريح للأمن القومي العالمي ولا نيلة .. انت حرفياً دلوقتي قدام حالة مش بتحصل كتير في الدنيا وهي إن تحالفات قديمة وعلاقات محفورة بقالها سنين بتنتهي مش لسبب غير إن البني أدمين اللي في العلاقة مبقوش طايقين بعض.

المصادر:

• مقالة بعنوان How much does the US contribute to NATO? نشرت في موقع Full Facts وده لينك المقالة الأصلية:
  How much does the US contribute to NATO? – Full Fact
• مقالة بعنوان Can NATO survive without the United States? نشرت علي موقع وكالة أنباء CNN وده لينك المقالة الأصلية:
  Can NATO survive without the United States? | CNN
• مقالة بعنوان Why the United States needs NATO – 3 things to know نشرت في موقع The Conversation وده لينك المقالة الأصلية:
  Why the United States needs NATO – 3 things to know