تعديل إتعمل يوم 18 فبراير 2021 .. (دونالد ترامب) خسر فعلاً الإنتخابات الرئاسية في 2020 قصاد (جو بايدن) و الحزب الجمهوري خسر أغلبيته في الكونجرس .. يوم 3 يناير 2020 إغتالت أميركا اللواء (قاسم سليماني) قائد الحرس الثوري الإيراني في مطار بغداد بغارة من طيارة بدون طيار.
لو عايز تفهم أنا ليه سميت المقالة دي بإننا رايحين في ستين داهية إنت بس محتاج تبص للي بيحصل في إسرائيل و إنت حتفهم كل حاجة .. إنت بتتكلم عن دولة تعتبر العدو الأزلي للعرب و المسلمين بس برده بتتكلم عن نفس الدولة اللي قدرت تحول نفسها لدولة صناعية محترمة قائمة علي اللي بيتسمي High-Tech Industry اللي هي صناعة تكنولوجيا المعلومات .. يعني أي حاجة داخل في تكوينها بوردة كومبيوتر .. بتتكلم عن دولة فيها شغل لدرجة إن تقريباً كل شبابها شغالين في شركات صغيرة شغالة في مجال High-Tech Industry و الشركات دي بتتسمي في الإقتصاد Start-ups .. حتي عرب إسرائيل أو عرب 48 زي ما يكونوا أتعدوا بنفس العدوي اللي إنتشرت بين الإسرائيليين لإن خلال السبع سنين اللي فاتوا عدد اللي بيدرسوا في الجامعات الإسرائيلية عشان ياخدوا شهادات بكاليريوس نط بنسبة 60% عشان يبقي 47,000 طالب .. ده لو حنتكلم جوه إسرائيل .. بره إسرائيل فالوضع فعلاً لينا بقي زي الزفت .. عمر ما العرب و المسلمين كانوا بالضعف اللي هم فيه دلوقتي .. عمر ما إسرائيل في تاريخها إتعاملت مع رئيس أميريكي حنين معاهم زي (دونالد ترامب Donald Trump) .. الرجل إعترفلهم بإن القدس هي عاصمة إسرائيل من غير ما حتي يطلب منهم حاجة في المقابل و العرب حطوا في بقهم جزمة قديمة و محدش فيهم قدر يعترض.
بس هل تفتكر الإسرائيليين يرضوا باللي هم فيه و يفخدوا كده و يحطوا في بطنهم بطيخة صيفي؟ ولا الهوا .. الوضع مخلي اليمين المتطرف الإسرائيلي و اللي بيقوده حزب الليكود اللي بيحكم إسرائيل حالياً زي ما يكونوا واخدين فياجرا و بيستقووا علي خلق الله .. لو صدقت التقرير اللي طلع من وكالة رويترز يوم 31 ديسمبر 2017 فالأمانة العامة للحزب قدمت طلب غير ملزم لأعضاء الحزب اللي جوه البرلمان الإسرائيلي اللي بيسموه الكنيست عشان يكتبوا مشروع قانون بيخلي من حق إسرائيل إنها تستولي علي الأرض اللي إتبنت عليها المستوطنات الإسرائيلية في الضفة الغربية .. خليني أفهمك النقطة دي براحة عشان تعرف المصيبة اللي بقينا فيها .. دلوقتي إسرائيل محتلة الضفة الغربية و دي مش أرضهم بس هم واخدينها وضع يد و بانيين عليها مستوطنات .. المفروض إن وفق القانون الأرض دي تبع الفلسطينيين و هي اللي حيبنوا عليها دولتهم لما إن شاء الله ربنا يسهل .. فلما إنت تعمل قانون بإن المستوطنات الغير قانونية دي اللي إنت بنيتها علي أرض بوضع اليد بقت بتاعتك فإنت بتقنن الغلط و الأهم إنك زي ما تكون بتقول للفلسطينيين إمشي ياض ملكش أرض عندي.
أنا ليه بقولك إحنا رايحين في ستين داهية؟ .. لو حصل فعلاً و الإسرائيليين قالوا إن أرض المستوطنات اللي في الضفة الغربية دي بتاعتنا فالعالم كله حيقولهم هو أنتوا إيه اللي بتعملوه ده؟ أنتوا بتعملوا في الفلسطينيين زي بالضبط ما نظام التفرقة العنصرية في جنوب أفريقيا كان بيعمل في السمر و المشكلة إن الإسرائيليين وقتها حيقولوا للعالم عادي بكره تتعودوا .. في الوقت اللي العرب (مش حكام العرب) حيقولوا أحييييه هو إيه اللي بيحصل ده تلاقي إن الإسرائيليين مش شاغلين بالهم أصلاً برد الفعل .. هم عارفين إن سفيرة أميركا في الأمم المتحدة (نيكي هايلي Nikki Haley) حتدافع عن القرار بحجة إنه لحماية الأمن القومي الإسرائيلي .. في الوقت اللي قلوب العرب و المسلمين حتكون بتغلي و ماليين الSocial Media ببوستات و كومنتات عن دعمنا لفلسطين حيكون الإسرائيليين معتمدين علي إن واحد زي (شيلدون أديلسون Sheldon Adelson) اللي يعتبر أهم شخصية في اللوبي الصهيوني في أميركا اللي زي ما يكون محفظ (دونالد ترامب) و كل الأمانة العامة للحزب الجمهوري الحاكم في أميركا يقولوا إيه عن طريق فلوسه و نفوذه .. في الوقت اللي لو الشباب العربي فكر إنه يعمل مظاهرات أو يعترض حيلاقي إن الأمن في بلده بيعتقله و يرميه في السجون تلاقي إن الإسرائيليين حيكونوا عاملين حسابهم إن الأنظمة العربية محتاجة إسرائيل لمواجهة إيران و بالتالي حيتصرفوا ولا كأنهم داريين باللي بيحصل.
فكر فيها من وجهة نظر الإسرائيليين أو خلينا نبقي منقيين كلامنا كويس و نسأل حط نفسك في مكان التيار اليميني المتطرف في إسرائيل .. إيه اللي يخليني أستني؟ .. بناء علي اللي قلته من شوية العرب في أضعف حالاتهم و إحنا عمرنا ما كنا بالقوة دي .. إيه اللي يخلينا منقررش إننا نستولي علي أرض المستوطنات و نطرد الفلسطينيين منها؟
بس عشان خاطري قبل ما تستسلم لإحساس اليأس و إن مفيش فايدة و تدخل في مود الإكتئاب إفتكر إن اللي بيحصل دلوقتي حصل هو هو بس من 35 سنة .. يوم 17 مايو 1983 من حوالي 35 سنة كان عدي سنة علي الحرب الإسرائيلية علي لبنان و في اليوم ده لبنان وقعت علي إتفاقية سلام مع إسرائيل بعد سنة كاملة من الحرب .. الحقيقة إن ده مش وصف دقيق للي حصل لإن الحكومة اللبنانية موقعتش برضاها إنما فعلياً إتلوي دراعها و أُجبرت علي التوقيع علي إتفاقية ضمنت كل طلبات إسرائيل و زي اللي بيحصل دلوقتي الدعم الأميريكي لإسرائيل كان قوي بشكل إسمحلي إني أوصفه بإنه كان وسخ .. صدقني حتستغرب من قد إيه الوضع دلوقتي في 2018 كان هو هو الوضع في 1983 .. زي ما دلوقتي إسرائيل بيحكمها التيار اليميني المتشدد متمثلاً في (بنيامين نتنياهو) وقتها برده إسرائيل كان بيحكمها حزب الليكود اللي كان بيتزعمه (مناحم بيجن) .. زي ما دلوقتي (دونالد ترامب) بيتمني لإسرائيل الرضا ترضي فبرده وقتها الرئيس الأميريكي (رونالد ريجان Ronald Reagan) كان بيتعامل مع إسرائيل كأنها عيل من عياله .. زي ما دلوقتي الرئيس (عبدالفتاح السيسي) بيعتبر إسرائيل شريك إستراتيجي مش عدو أزلي كان وقتها برده الرئيس (حسني مبارك) الله يرحمه كان بيقود دولة لسه خارجة من حرب مع إسرائيل و موقعة إتفاق سلام معاها و مش ناوي يدخل في أي مواجهة جديدة مع الإسرائيليين .. زي ما دلوقتي حكام العرب بيعتبروا إسرائيل حليف ليهم ضد إيران وقتها برده كان فيه ناس أقل ما يتوصفوا بيه إنهم كانوا ناس وسخة زي أمير الحرب اللبناني المسيحي (بشير جِمّيل) اللي دعي إسرائيل إنها تقف معاه عشان يسحقوا الفلسطينيين سوا و يطهروا الشرق الأوسط منهم.
زي ما إنت دلوقتي محبط و مكتئب و شايف إن مفيش فايدة فيه وقتها ناس كانت شايفة إن اللي بيحصل ده غلط و كان منهم صحفي أميريكي اسمه (جوناثان راندال Jonathan Randal) شغال في جريدة The Washington Post كان شغال في مكتب الجرنان في بيروت و وقتها كتب كتاب كسر الدنيا سماه Going All The Way: Christian Warlords, Israeli Adventures and The War in Lebanon .. الكتاب ده لما تقراه تحس إن الكاتب كان عايز يصرخ في وش الإسرائيليين و الأمريكان و يقولهم فوقوا من اللي أنتوا فيه أنتوا بتودوا المنطقة كلها في ستين داهية و تدابير ربنا مش حتسكت و ربنا حيبتليكوا بمصيبة مش حتعرفوا جاتلكوا منين .. و زي ما يكون (جوناثان راندال) كان معاه بلورة سحرية يشوف بيها المستقبل .. معداش أكثر من 10 شهور علي توقيع معاهدة 17 مايو كان فيه بعبع طلع فجأة محدش عارف طلع منين اسمه حزب الله جاب الإتفاقية و قال للإسرائيليين بلوها و أشربوا ميتها .. فجأة في أقل من 10 شهور الحلم الإسرائيلي الجميل إتحول لكابوس و رجعت لبنان تحت سيطرة سوريا.
بص حوليك في العالم كله و حتلاقي ناس بتفكر زي ما التيار اليميني المتطرف في إسرائيل بيفكر .. اللي هم ناس ربنا عطاهم شوية سُلطة فتخيلوا إنهم يقدروا يغيروا موازين الكون و نسوا إن ربنا خلق الكون بميزان لو لعبت فيه حيطلع ميتين أهلك .. فكر في الأمثلة اللي حقولها دي كده:
- عندك الحزب الجمهوري الحاكم في أميركا .. ربنا كرمهم و بقوا مسيطرين علي الكونجرس و علي الرئاسة و بدل ما يحكموا عِدل زي ما ربنا عايز تلاقيهم دلوقتي بيدمروا نفسهم و بيدمروا الأساس اللي أميركا إتبنت عليه بإن الحزب دخل نفسه في مواجهة ملهاش أي لازمة مع وزارة العدل و مع مكتب التحقيقات الفيدرالي FBI لمجرد إن المؤسستين دول مش عايزين يبقوا عرايس في إيد (دونالد ترامب) يحركهم زي ما هو عايز .. مش إني زعلان علي اللي بيحصل .. تولع أميركا باللي فيها .. الفكرة إن لما رئيس أقوي دولة في العالم يبدأ يتعامل مع المؤسسات بتاعته زي ما يكون ديكتاتور دولة في أفريقيا فإيه اللي يمنع فعلاً أي ديكتاتور في أفريقيا إنه يقول لشعبه شايفين رئيس أميركا بيعمل إيه .. شايفين اللي بتستنجدوا بيه يحميكوا من ظلمي بيعمل إيه.
- عندك إيران ربنا عطاها شوية فلوس و نفوذ و إذا بيها عايزة تغير موازين ربنا .. الإيرانيين فعلياً مسيطرين علي 4 دول عربية سُنية اللي هم سوريا و اليمن و العراق و لبنان .. مفيش قرار حكومة أي دولة من الدول الأربعة تقدر تاخده من غير ما تاخد موافقة إيران الأول .. نفوذ زي ده مينفعش دولة واحدة تمتلكه علي حكومات أربع دول تانية خصوصاً لو كان بينهم إختلافات مذهبية بس تقول إيه لجشع البشر للسلطة و النفوذ.
- عندك حركة حماس اللي شايفه إن الحبل عمال يتلف حول رقبتها و تلاقيها برده عمالة تصرف فلوس كتير أوي علي بناء أنفاق تهريب بدل ما الفلوس دي تتصرف علي بناء مدارس أو مستشفيات أو حتي تخفيف معاناة الحصار علي أهل قطاع غزة .. محدش قال إن الحصار المفروض علي القطاع ده عدل بس نفس الوقت متقدرش تنكر إن كون حركة حماس بتحكم القطاع لوحدها من غير ما حد يقدر يفتح بقه فهي مدية لنفسها صلاحيات إنها تهدر في الفلوس اللي حيلتها زي ما هي عايزة .. اه اللي بيحصل في غزة من إسرائيل و مصر ميرضيش ربنا بس في نفس الوقت حماس متهمة بإنها مش عارفة تدير الأزمة و مش عارفه تحكم القطاع.
- عندك واحد زي (محمد بن سلمان) ولي العهد السعودي اللي ربنا إداله فرصة يكتب اسمه بحروف من ذهب في التاريخ .. إنت ربنا إدالك فرصة إنك تحكم واحدة من أقوي إقتصاديات العالم و بدل ما تحكم بما يرضي الله إذا به بإيده اليمين يبدأ يعيد تشكيل المجتمع السعودي بإنه عطي للمرأة السعودية حق سواقة العربيات في الشارع و بالإيد التانية بياخد قرارات في منتهي الغباء زي إنه يحبس (سعد الحريري) رئيس الوزراء البناني عشان يجبره يقدم استقالته .. فيه حد يعمل كده؟ .. أو إنه يستولي علي فلوس أمراء في العائلة المالكة باسم محاربة الفساد يقوم واخد الفلوس مشتري بيها لوح فنية أو يشتري بيها قصور في فرنسا .. ده واحد فاكر نفسه يقدر يلعب في موازيين ربنا و مش مصدق إن ربنا مش حيسيبه.
- عندك حركة طالبان اللي وصل بيها الفجر بإنها جابت عربية إسعاف لغمتها و بعتتها في سوق و فجرتها و قتلت 103 بني أدم .. اللي هو بتقول لنفسك أنتوا كفرة يا جدعان؟ .. فيه حد مؤمن بربنا يعمل اللي أنتوا بتعملوه ده؟
- عندك اللي بيحصل في اليمن .. يعني إيه ألاقي الحوثيين و القبائل و الإيرانيين و السعوديين و الإماراتيين كل واحد فيهم ماسك سكينة و بيغرزها في جسم اليمن و المصيبة إن ولا واحد فيهم فاهم هو بيعمل إيه ليه؟ و إزاي؟ .. كل واحد فيهم بيفكرني بشخصية الجوكر في فيلم The Dark Knight لما بيوصف نفسه بإنه I Just Do Things .. هم فعلاً كده عاملين يدمروا في اليمن ولا واحد فيهم عارف هو بيعمل كده ليه أو حيستفيد إيه؟
- عندك واحد زي (رجب طيب أردوغان) اللي كان فعلاً لازم يحترم نفسه و يتقاعد عن الحكم من سنين بس لسه متبت في الكرسي زي ما يكون بنطلونه ملزوق فيه بغرا و عمال يسجن أي صحفي معارض في البلد .. عندك واحد زي (السيسي) اللي تقريباً عايز يدخل الإنتخابات لوحده أو علي الأقل يجيبوله مرشح تفصيل علي مقاسه و ده اللي حصل فعلاً لما جابوله عروسة المولد اللي نازل قدامه الإنتخابات.
- عندك واحد زي (بنيامين نتنياهو) اللي فعلاً بقي عندي إعتقاد إن إبليس شخصياً بياخد عنده درس خصوصي .. الرجل ده حاسس إن النيابة في إسرائيل بتلف الحبل حول رقبته و في أي لحظة حيعتقلوه بتهم فساد فعشان ينقذ نفسه بيحاول علي قد ما يقدر إنه يدمر مؤسسة القضاء في إسرائيل .. مش إني زعلان من اللي هو بيعمله .. تولع إسرائيل باللي فيها .. الفكرة إن (نتنياهو) بني أدم ضلالي بس لما ألاقي الرئيس الأميريكي واخده مثل أعلي و بيقلده فساعتها حبدأ اقلق.
هل فيه أمل؟ .. اه فيه أمل .. فيه ناس بتسمي الأمل ده الطبيعة و فيه ناس بتسميه طبيعة البشر و فيه ناس بتسميه طبيعة الإقتصاد و تقلبات السوق .. بس أنا شخصياً بسميه التدخل الإلهي أو إن ربنا مبيرضاش إن حد يلعب في الموازين اللي هو حطها للخلق .. و لما ربنا بيلاقي العك كتر بيتدخل عشان التوازن يرجع للكون تاني .. خليني أديلك أمثلة بسيطة أوي أنا قصدي إيه عشان بس تعرف إن تدابير ربنا بتبقي صعب أوي إنك تلقطها و هي جاية .. إنت بس بتحس فجأة إن ربنا إتدخل بس مبتقدرش تفهم هو ده حصل إمتي أو إزاي:
- دلوقتي قطاع غزة مفروض عليه حصار خانق و ظالم من إسرائيل بتواطؤ من مصر و ساعد في إن أثاره تبقي كارثية أوي هو سوء إدارة حركة حماس للأزمة .. ده الجزء اللي إحنا عارفينه .. الجزء اللي إحنا مش عارفينه إن من النتائج المترتبة علي ده إن البنزين اللي بيدخل للقطاع مش بيكفي إن تفضل الكهرباء شغالة طول اليوم .. ده معناه إن محطات الصرف الصحي بتاعة القطاع هي كمان مش بتشتغل طول اليوم و بالتالي جزء كبير من الصرف الصحي لسكان القطاع اللي بفكرك بس إنهم حوالي مليون و نص بني أدم بيترمي في البحر المتوسط من غير ما يتعالج .. فكر فيها بس إن بيبي مليون و نص بني أدم بيترموا في مياه البحر المتوسط .. تيار المياه بياخد البيبي ده كله يوديه فوق بإتجاه عسقلان و دي مدينة إسرائيلية لازقه في قطاع غزة و بتقع علي البحر المتوسط برده بس عسقلان فيها أكبر محطة تحلية مياه بحر في إسرائيل و لوحدها مسئولة عن توفير حوالي 15% من إحتياجات إسرائيل اليومية من المياه الصالحة للشرب .. حصل مرتين في 2016 و 2017 إن محطة تحلية الشرب في عسقلان طلعت بره الخدمة عشان فلاتر المياه إتسدت من الصرف الصحي اللي جاي من قطاع غزة .. دي تدابير ربنا اللي بتشوفها عشان يفكر البشر أعقلوا و بلاش تستقووا علي خلق الله.
- عندك واحد زي (قاسم سليماني) قائد الحرس الثوري الإيراني .. ده رجل وصل به الغرور إنه فعلاً إقتنع و أمن بإنه أهم شخصية في إيران و الحقيقة إن له حق يقول علي نفسه كده .. الرجل ده له رجالته اللي ممشيين أربع عواصم عربية اللي هم دمشق و صنعاء و بغداد و بيروت .. فجأة و متفهمش حصل إزاي إشتعلت شوارع إيران بمظاهرات قامت ضد الرجل ده بالذات .. المتظاهرين زي ما يكونوا قاصدين إنهم يقولوا إنت السبب .. إنت السبب في إن ملايين الدولارات بتتدفع في الحرب في سوريا و في اليمن و في غزة و الملايين دي كان ممكن تتصرف علينا و علي تعليمنا و علي صحتنا .. فجأة أهم صورة طلعت من اللي بيحصل في إيران هي صورة بنت قلعت حجابها و معلقاها علي خشبة رافعاها بإيدها .. تدابير ربنا بتفكر (قاسم سليماني) و اللي زيه إن ربنا لسه موجود و إن لو إنت كملت في ظلمك فإنت أول واحد حتدفع الثمن بس يا تري هل هو حيفهم ده؟
نصيحة لكل حد فاكر نفسه قوي و إنه أُوتي من السلطة و النفوذ ما لو يؤت أحد من قبله و بدأ يستغل نفوذه و سلطته و فلوسه بإنه يلعب في موازيين ربنا بإن خلي بالك من تدابير ربنا .. تدابير ربنا إنت حتشوفها و هي بتحرك تيار البحر المتوسط عشان تخلي الصرف الصحي بتاع القطاع يروح يسد فلاتر محطة تحلية مياه و يخليها تطلع بره الخدمة و إسرائيل يتقطع عنها المياه بالأيام عشان ربنا يفكرهم بإن الحصار اللي هم فارضينه علي القطاع ده ظلم بين .. تدابير ربنا حتشوفها في ثورة قامت فجأة بدون مقدمات زي ما حصل في إيران عشان تفكر واحد زي (قاسم سليماني) خلي بالك إنت عديت حدودك مع ربنا .. تدابير ربنا حتشوفها بإن البورصة في يوم و ليلة تقع في أميركا عشان تفكر واحد زي (ترامب) بإن اللي بيعمله ده غلط .. تدابير ربنا محدش في البشر بيتحكم فيها ولا يقدر يسيطر عليها .. إنك تتخيل إنك تقدر تقف قدام تدابير ربنا كأنك يا عيني بتقنع نفسك إنك تقدر تقف قدام قواعد الأحياء و الفيزياء و الكيمياء .. إنك بجهل وكبرياء أعمي تتخيل إنك تقدر تقف قدام تدابير ربنا فإنت زيك زي واحد جاهل متخيل إنه يقدر يتحكم في الميزان الحساس اللي بين الجشع و الخوف .. سواء كنت رئيس دولة أو كنت موظف صغير في شركة إياك تتخيل إنك تقدر تقف قدام تدابير ربنا.
المصدر:
مقالة بعنوان Everyone Is Going All The Way كتبها الصحفي الأميريكي (توماس فريدمان Thomas Friedman) في جريدة The New York Times الأميريكية و ده لينك المقالة الأصلية:
https://www.nytimes.com/2018/02/06/opinion/israel-jerusalem-trump.html
