فيه سر عارفه تسعين مليون بني أدم إن لو إنت تاجر مخدرات أو تاجر سلاح ليك وضعك في عالم الإجرام فأحسن طريقة عشان تغسل أموالك أو زي ما ممكن تكون بتسمع المصطلح ده بالإنجليزي Money Laundering إنك تودي فلوسك دبي .. وهنا مش بتكلم إنك تجيب صابون سايل وتغسل فلوسك .. أنا بتكلم إنك تجيب فلوسك اللي إنت جايبها بالحرام تدخلها في Business شرعي يجيبلك أرباح صحيح بتبقي أقل شوية من الأرباح اللي بتيجي من المشي البطّال بس بتبقي فلوس جاية من مصدر شرعي عشان لما يجي البوليس يحقق معاك ويقولك من أين لك هذا؟ تطلعله ورق الBusiness تحطه في عنيه .. المهم نرجع تاني إن السر اللي ناس كتير عارفاه إن أحسن طريقة لغسيل الأموال إنك تجيب فلوسك الحرام تستثمرها في العقارات في دبي .. الفكرة إن دبي بتسمح لأي أجنبي معاه فلوس إنه يجي يشتري عقارات زي ما هو عايز بسرية مطلقة .. حاجة كده زي ما تلاقي حد عامل أكونت Fake علي Facebook يقولك فيه للتعارف الجاد وبسرية كاملة .. فوق ده كله إن المنطقة الحرة في دبي بتسمح إنك تقدر تشتري عقارات هناك مش بس عن طريق إنك تدفع فلوس إنما ممكن تدفع بالذهب أو الماس ودي حاجة مخلية الأمريكان بالذات يشدوا في شعرهم لإن ممكن مثلاً الFBI اللي هو عامل زي مباحث أمن الدولة في أميركا يبقي عايز يجمد أرصدة تاجر مخدرات مكسيكي بس يكتشفوا إن برده بيجيله فلوس كافية لتمويل أنشطته الإجرامية من الفلوس اللي بتجيله من أرباح Business العقارات اللي هو عامله في دبي.
فيه تقرير نشره مركز إسمه مركز الدراسات الدفاعية المتقدمة Center for Advanced Defense Studies بس إختصاراً بيتسمي C4ADS ومقره في العاصمة الأميريكية واشنطن والتقرير ده إتكتب بناء علي ورق إتسرب من مكاتب الشهر العقاري في دبي .. التقرير بيقول إن فيه أكتر من 100 مليون دولار مشكوك في مصدرها ومعني كده إنها غالباً جاية بطرق مش مشروعة إتصرفت في شراء عقارات في دبي .. إنت هنا بتتكلم عن كوكتيل محترم من الشقق والمحلات للفيلات لأدوار كاملة في ناطحات سحاب .. من فيلات معمولة علي أرخبيل نخيل الجميرة اللي ممكن تعرفه أكتر بإسم Palm Jumeirah ودي عبارة عن جزر صناعية عاملة شكل نخيل جوه المياه لشقق في برج خليفة اللي هو أطول برج في العالم لمجرد شقق أوضة وصالة.
لحد دلوقتي التقرير مقالش حاجة جديدة .. الجديد اللي في رأيي بيميز التقرير بتاع C4ADS ده إنه قال أسامي ناس قتالين قتله وتجار سلاح ومخدرات معروفين وشاريين عقارات في دبي .. عايزك بقي تجيب فشارك ولبك وسودانيك وإزازة البيبسي الإتنين لتر المشبره من الثلاجة وتتفرج علي الأسامي:
- عندك واحد زي (رامي مخلوف) .. ده يا سيدي يبقي إبن خالة الرئيس السوري (بشار الأسد) و يعتبر من أثري أثرياء سوريا وهو صاحب شركة الإتصالات السورية Syriatel .. بإختصار ده يبقي (نجيب ساويرس) بتاع سوريا .. الرجل ده الحكومة الأميريكية محرمة علي أي شركة أميريكية إنها تتعامل معاه ولو سافر أميركا حيتقبض عليه ومش لوحده ده هو وأخوه .. الرجل ده وفق التقرير بيملك فيلات في Palm Jumeirah والتقرير كمان قايل إن لحد اللحظة اللي إنت بتقرا فيها المقالة دي شركاته ليها Business بالملايين مع شركات إماراتية رغم إن قدام الناس الإمارات واقفه ضد (بشار الأسد).
- فيه إتنين إخوات إسمهم (كامل أمحاز) و(عصام أمحاز) دول إتنين Businessmen لبنانيين بس معروف بإن ليهم صلات قوية بحزب الله .. سنة 2014 الحكومة الأميريكية فرضت عقوبات علي كل الشركات المملوكة للإتنين الأخوات دول بسبب دورهم في تهريب معدات أليكترونية متقدمة بتتركب علي الطائرات بدون طيار اللي حزب الله بيستخدمها .. التقرير بيقول إن الإتنين دول بيملكوا عقارات في دبي ثمنها شاكب راكب علي بعضه حوالي 70 مليون دولار.
- فيه منظمة غسيل وتهريب أموال باكستانية معروفة أوي إسمها ألتاف خاناني Altaf Khanani .. المنظمة دي كانت شغالة زي ما تقول كده شركة صرافة لتجار المخدرات في باكستان وأفغانستان ولتنظيم القاعدة .. التقرير بيقول إن فيه أفراد معروف بإنهم أعضاء في المنظمة دي ليهم عقارات في دبي ثمنها بيعدي 21 مليون دولار.
- من الشخصيات المسلية أوي اللي برده بتملك عقارات كتير فشخ في دبي واحد إسمه (حسين إدواردو فيجوروا جوميز Hassein Eduardo Figueroa Gomez) وده رجل مكسيكي الأمريكان عايزين يقبضوا عليه بتهمة تهريب كميات كبيرة من المواد الكيميائية اللي بتستخدم في تصنيع نوع من المخدرات إسمه ميثامفيتامين Methamphetamine وإختصارا بيتسمي ميث Meth وده لو تفتكر اللي شخصية (والتر وايت Walter White) في مسلسل Breaking Bad كان بيصنعه.
قرار إمارة دبي سنة 2002 إنها تسمح للأجانب بتملك عقارات زي ما هم عايزين خلي سوق العقارات و Business التمويل العقاري عموماً في دبي ينط نطة إنت ممكن متتخيلهاش .. خليني أديلك مثال .. عارف (دونالد ترامب) رئيس أميركا؟ .. الرجل ده بيملك شخصياً فيلات وملعبين جولف كبار أوي في دبي إسمه مكتوب عليهم .. الوضع بقي إن أي حد شغال في الحرام ومعاه فلوس بس مش عارف يصرفها يروح يجري علي دبي يشتري عقارات ومحدش هناك بيسأله إنت جبت الفلوس دي منين .. سنة 2002 فيه منظمة إسمها Federation of American Scientists أو إتحاد علماء أميركا طلعت تقرير قالت فيه إن Business غسيل الأموال في دبي وبس بفكرك إن الكلام دم كان سنة 2002 بيعدي المليار دولار سنوياً .. سنة 2003 حربي العراق و أفغانستان فتحوا باب فلوس حرام محدش بقي عارف يقفله .. فيه بس شوية حالات ححطهملك ورا بعض عشان تستوعب حجم الفلوس اللي بيتلعب بيها:
- في أكتوبر 2009 إتنشر علي موقع WikiLeaks وثايق سرية خاصة بوزارة الخارجية الأميريكية قالت إن سنة 2009 وعلي مدي 3 شهور تم نقل 190 مليون دولار فلوس كاش في شنط إتحملت علي طيارات مدنية من العاصمة الأفغانية كابول لحد دبي .. الفلوس دي بتاعة إيه؟ محدش عارف .. إزاي أصلاً إتنقل مبلغ زي ده كاش؟ برده محدش عارف .. ودي مكنتش المرة الأولي .. سنة 2008 وبنفس الطريقة إتنقل 600 مليون دولار 100 مليون يورو و 80 مليون جنيه إسترليني كلهم كاش وكلهم إتنقلوا في شنط وعلي متن طيارات مدنية من كابول لدبي.
- سنة 2010 في أفغانستان برده حصلت فضيحة كبيرة أوي إتورط فيها أخو الرئيس الأفغاني وقتها (حامد قرزاي) إنه إختلس فلوس إشتري بيها 18 فيلا في Palm Jumeirah متفهمش ليه أي حد جايب فلوس بالحرام بيحط فلوسه هناك مش فاهم أنا .. لدرجة إن البرلمان الأفغاني طلب من البنك اللي كان وسيط في العملية يدي الفيلات دي تاني للدولة .. كله طمعان في الفيلات.
- سنة 2017 الحكومة الباكستانية قالت إن خلال 4 سنين بس المواطنين الباكستانيين إشتروا عقارات في دبي بحوالي 8 مليار دولار .. والمصحف دي مش غلطة مطبعية .. قال إيه عشان الباكستانيين إستغلوا ثغرة في قانون الضرايب بقي إي حد معاه فلوس ومش عايز يدفع ضرايب عليها يحطها في عقارات في دبي.
الأمريكان بالذات حيتجنوا من اللي بيحصل لإن زي ما قلتلك سوق العقارات في دبي بيدي فرصة لناس زي تجار المخدرات إنهم يلاقوا طريقة شرعية لتمويل شغلهم .. حتي لو FBI قدر إنه يجمد أرصدة تاجر مخدرات أو تاجر سلاح معين فبرده العقارات اللي بيملكها في دبي تقدر تمول شغله بسهولة .. من ناحيتهم إمارة دبي بتقول إنها إن شاء الله في المستقبل حتبقي تسأل أي حد عايز يشتري عقار في دبي من أين لك هذا؟ بس شخصياً أنا شايف إنهم عمرهم ما حيعملوا كده لإن ده أكل عيشهم .. سوق العقارات في دبي وصل لمرحلة من الضخامة إنه بقي أكبر من القدرة الشرائية للمواطن الإماراتي نفسه بسبب إنه إتفتح علي البحري للمستثمرين الأجانب .. فيه ناس كانت بتتكلم أرجوك إتكلم عن المصريين اللي عندهم عقارات في دبي بس الواقع أسوأ من كده بكتير.
المصدر:
- مقالة بعنوان Report describes Dubai real estate as money-laundering haven يعني تقرير بيوصف سوق العقارات في دبي علي إنه جنة لغسيل الأموال .. نشرت في مجلة Bloomberg وده لينك المقالة الأصلية:
https://www.bloomberg.com/news/articles/2018-06-12/report-describes-dubai-real-estate-as-money-laundering-haven
