البنادق الألية .. بين الحقيقة وبين هبد PUBG.

لينك التسجيل الصوتي علي ساوند كلاود:
https://on.soundcloud.com/L69KJ

وسط الكلام الكتير عن الأسلحة ومين أقوي جيوش العالم وياتري تصنيف جيش مصر عامل إزاي حتلاقي ناس عماله تتكلم عن الطيارات المقاتلة وناس تانية كل همها إنها تقارن عدد الدبابات اللي عند دولة فلانية بعدد الدبابات اللي عند الدولة العلانية .. وسط كل الهري ده كله الناس بتنسي إن أهم سلاح في إيد أي جيش في العالم هو البنادق الألية اللي في إيد الجندي أو العسكري .. اللي بيكسب أي حرب هو اللي بيقدر يكسب المعارك البرية وعشان تكسب المعارك البرية إنت محتاج بنادق ألية تقدر تعتمد عليها وجنود عارفين إزاي يستخدموا البنادق دي .. عشان كده في المقالة دي حنتكلم عن أشهر البنادق الألية في العالم دلوقتي .. اللي منكوا بيلعب Call of Duty أو Medal of Honor وحالياً PUBG حيقدر يميز شوية منهم .. بس حنحاول نتكلم بشوية وضوح عشان حتي اللي عمره ما قرأ أي حاجة عن السلاح يقدر يفهم أنا بقول إيه.

البندقية الألية كلاشينكوف أو AK-47:

سيد معلمين البنادق الألية في العالم .. النامبر وان علي رأي (محمد رمضان) .. إسمها بالكامل Avtomat Kalashnikova 47 ودي مش حبالغ لو قلت إن زي ما إنت شايف إن الست والدتك هي أكتر حد تقدر تعتمد عليه في حياتك فلو إنت عسكري في حرب فالAK-47 هي أكتر بندقية ألية تقدر تعتمد عليها .. بإختصار دي تبقي الست الوالدة .. الحقيقة إن AK-47 بقت حتة من ثقافة البشر دلوقتي .. حتلاقي مغنيين Rap في أميركا بيقولوا إسمها وحتشوفها علي علم دولة زي موزمبيق وعلي شعار منظمة مسلحة زي حزب الله .. مش حبالغ لو قلت إن مفيش صراع مسلح في العالم دلوقتي مش بتستخدم فيه البندقية الألية دي.

الدماغ العالية اللي إخترعت البندقية دي كانت بتاعة واحد إسمه (ميخائيل كلاشنيكوف Mikhail T. Kalashnikov) وده كان عسكري سوفيتي شارك في الحرب العالمية الثانية في سلاح المدرعات .. وهو في المستشفي بيتعالج ولإنه فاضي موراهوش حاجة بدأ يفكر في تصميم بندقية ألية تنفع للقوات السوفيتية في المستقبل .. هو شاف بنفسه إزاي الألمان عملوا البندقية الألية Stg44  واللي صممها المهندس الألماني (هيوجو شمايسر Hugo Schmeisser) واللي دخلت الخدمة سنه 1942 في عز الحرب ما كانت مولعة .. (أدولف هتلر Adolf Hitler) شخصياً كان معجب أوي بStg44 لدرجة إنه أصر يسميها إسم جديد غير الإسم اللي (هيوجو شمايسر) إختاره واللي كان ماشين-بيستول Machinepistol ودي كلمة ألماني ترجمتها Submachine Gun أو مدفع رشاش خفيف .. (هتلر) قال إنه عايز يسميها شتورم-جفير Sturmgewehr ودي كلمة ألماني ترجمتها Assault Weapon ومن ساعتها والمدافع الألية في العالم بقت تتسمي Assault Weapons أو Assault Rifles.

الأخ (كلاشينكوف) عجبه أوي التصميم بتاع Stg44 ولعب فيه شوية لحد ما طلع الAK-47 واللي دخلت الخدمة في القوات المسلحة السوفيتية سنة 1947 .. هنا إنت مهم تفهم شوية ليه (ميخائيل كلاشنيكوف) كان معجب أوي بالStg44 وخدها كأساس بني عليه الAK-47.

الألمان في الحرب العالمية الثانية كانت البندقية الأساسية بتاعتهم هي Karabiner 98K ودي كانت بندقية تقيلة وطويلة فشخ .. صحيح كانت بتستخدم طلقة عيار 7.98 مليمتر يعني لو جت فيك حتموتك بس إنك تمسك بندقية طولها يعدي متر وتقيلة فكانت مأساة .. الStg44 كانت بتستخدم نفس عيار الطلقات بس حاطين فيها نسبة بارود أقل فده خلي تأثير الطلقة وهي طالعة من البندقية أضعف بس في مقابل إن خزنة الذخيرة بتاعتها بتشيل 30 طلقة ودي حاجة محدش عملها قبل كده وكانت بتقدر تضرب 600 طلقة في الدقيقة وده كان وقت الحرب العالمية الثانية خيال علمي .. عايزك تفهم إن أغلب جيوش العالم كانت معاها بنادق Semi-Automatic يعني بتضرب طلقة طلقة مع كل ضغطة زناد والخزنة بتاعة الذخيرة أخرها تشيل 5 طلقات.

الAK-47 كانت النامبر وان في حاجات كتير .. كانت أول بندقية ألية تبقي سلاح رسمي لقوات برية لدولة .. كانت أول بندقية تستخدم طلقات عيار 7.62 مليمتر ودي كانت طلقة أخف من الطلقات المستخدمة في البنادق الManual القديمة اللي كنت محتاج تشد الإبرة بتاعتها عشان تطرد المظروف قبل ما تضرب الطلقة الثانية وعشان كده طلقات الAK-47 كان رد فعلها علي كتف العسكري اللي بيستخدمها قليل .. كانت أول بندقية ألية تنزل بOption اللي هو Automatic Firing إنك طول ما إنت ضاغط علي الزناد البندقية حتفضل تضرب طلقاتها بس بسبب زي ما قلتلك إن طلقات AK-47 عيار 7.62 مليمتر كانت خفيفة فإنت كعسكري مكنتش بتعاني عشان تسيطر علي البندقية وهي شغالة بAutomatic Mode.

سبب شهرة الAK-47 إنها في رأيي زيها زي أفلام (محمد رمضان) بالضبط معمولة لعامة الشعب مش للناس اللي بتفكر .. عشان تستخدمها مش محتاج تتدرب عليها كتير .. إستخدامها سهل وبسيط ومش بتحتاج صيانة تقريباً .. إنت عشان تفكها وتركبها عامل زي ما إنت بتفك وتركب حجر بطارية الريموت بتاع التليفيزيون ومش محتاج حد متعلم عشان يعملها .. بإختصار البندقية دي معمولة عشان العساكر اللي مش متعلمة اللي مبتعرفش تقرأ وتكتب .. ده يفسرلك ليه لحد دلوقتي فيه أكتر من 100 مليون بندقية من النوع ده إتصنعت علي مستوي العالم وفيه دول كتير خدت رخصة تصنيعها من روسيا زي الصين وكوريا الشمالية ومصر ويوغوسلافيا .. حتي دول زي إسرائيل وفنلندا بتصنع بنادق ألية شبه الAK-47 .. حالياً القوات المسلحة الروسية بتستخدم بندقية إسمها AK-74M ودي تبقي حفيدة الAK-47 بس بتستخدم طلقات عيار 5.45 مليمتر.

البندقية الألية M-16 وأخواتها:

في الحرب العالمية الثانية الأمريكان كانوا معتمدين علي بندقية حلوة أوي إسمها M-1 Grand كانت بتضرب طلقات عيار 7.62X51 مليمتر والأمريكان شافوا إن بما إنهم كسبوا الحرب بالبندقية دي فده معناه إن البندقية دي هي أحسن بندقية في العالم واللي عنده معزة يربطها .. في الخمسينات بدأت تظهر ملامح خناقة جوه الجيش الأميريكي حول إن جه الوقت إننا نرمي الM-1 Grand في الزبالة هي والطلقة الكبيرة فشخ بتاعتها .. اللي كان واخد الموضوع بجد كانوا لجنتين .. الأولي إسمها ORO ودي إختصار Operations Research Office أو مكتب أبحاث العمليات والثانية إسمها BRL ودي إختصار Ballistic Research Laboratory أو معمل أبحاث المقذوفات .. اللجنتين دول قعدوا  يدرسوا اللي حصل في الحرب العالمية الثانية وفي الحرب الكورية وفي الأخر وصلوا لشوية نتايج:

• في الحروب مفيش عسكري بيبقي عنده وقت ينشن .. مع ضرب النار والفوضي اللي بتحصل العساكر بيفضلوا ضاغطين علي الزناد ومحدش بيبقي شايف هو بيضرب فين.
• لو عايز تعمل بندقية جامدة فشخ فإنت لازم تهتم إن الطلقة اللي إنت بتضربها تبقي سريعة مش تقيلة .. لو إنت قارنت طلقتين واحدة خفيفة زي عيار 0.22 بوصة (5.56 مليمتر) بس بتطير بسرعة عالية قصاد طلقة تقيلة زي ال7.62X51 مليمتر بتاعة البندقية M-1 Grand فحتكتشف إن الطلقة الخفيفة تأثيرها أقوي بس زي ما قلتلك بشرط إنها تطير بسرعة.

هل تفتكر إن الضباط الكبار يفهموا الكلام ده؟ يبقي إنت متعرفش ضباط الجيش كويس .. الأمريكان نشفوا دماغهم وعملوا البندقية M-14 ودي كانت أخت البندقية M-1 Grand بس خزنتها بتشيل 20 طلقة وينفع تضرب بيها Automatic Mode يعني طول ما إنت ضاغط علي الزناد الطلقات بتطلع بس طبعاً إبقي قابلني لو عسكري عرف يتحكم فيها .. تفتكر الناس بتوع ORO و BRL يسكتوا؟ .. تبقي إنت متعرفش المهندسين كويس .. سنة 1958 جابوا مهندس مدني إسمه (إيوجين ستونر Eugene Stoner) إخترع بندقية سماها AR-15 ودي كانت بندقية بتستخدم طلقات عيار 0.223 بوصة أو (5.56X45 مليمتر) وخلوه يعمل عرض لبندقيته ويقارنها بالبندقية M-14 اللي الضباط الكبار كانوا فرحانين بيها فشخ .. تفتكر إيه اللي حصل؟

الAR-15 مسحت بكرامة الM-14 الأرض .. طلقتها كانت أسرع بتطير بسرعة بتعدي 945 متر في الثانية .. بتعرف تسيطر عليها وإنت بتضرب بيها Automatic Mode .. أسهل في تنظيفها وفكها وتركيبها .. الخزنة بتاعتها فيها 30 طلقة عكس ال20 بتوع الM-14 .. يمكن الحاجة الوحيدة اللي M-14 تفوقت فيها هي إنها بتقدر تجيب أهداف من علي مسافات أبعد .. رغم كل ده الضباط الكبار في وزارة الدفاع قرروا يكملوا مع M-14 وودوها تخدم مع القوات الأميريكية في حرب فيتنام وهناك البندقية دي إتداس علي وشها قصاد الAK-47 .. سنة 1962 القوات الجوية الأميريكية قررت إنها تستخدم AR-15 كبندقية ألية رسمية عندها .. فين وفين سنة 1965 لما القوات البرية الأميريكية إقتنعت إن الAR-15 أحسن بكتير من الM-14 .. سنة 1968 وزير الدفاع الأميريكي (روبيرت ماكنمارا Robert McNamara) شخصياً إتدخل عشان يطلع الM-14 بره الخدمة ويخلي الAR-15 هي السلاح الرسمي للقوات البرية الأميريكية بعد ما إتغير إسمها لM-16.

مع الإستخدام بدأت مشاكل M16 تظهر .. لسبب ما أنا الحقيقة مش فاهمه حد أقنع العساكر الأمريكان إن البنادق الألية دي مش بتحتاج تتنظف وده خلي مع كتر الإستخدام وقلة التنظيف البنادق بقي بيحصلها Jamming أو إن الطلقات تتحشر فيها كتير .. سنة 1967 دخل للخدمة أول Upgrade لM-16 وكانت M16A1  بس كانت خلاص السمعة اللي بنادق M16 خدتها بين الجنود إنها سلاح لا يعتمد عليه .. سنة 1986 نزلت الM16A2  واللي فيها خلوا سمك الماسورة أكبر شوية وعلموا فيها إختراع لطيف إن إنت عندك في أي بندقية ألية فيه Modes أو أنظمة إطلاق نار اللي هو نظام الأمان إنك لو ضغطت علي الزناد البندقية متضربش .. ونظام الطلقة طلقة أو Semi-Automatic إن مع كل ضغطة علي الزناد البندقية تضرب طلقة .. النظام الثالث هو الألي Automatic إنك طالما ضاغط علي الزناد البندقية بتضرب نار .. مشكلة الAutomatic Mode إنه بيضرب نار كتير بس مش دقيقة وبيخلي البندقية تترج منك جامد وفعلياً مبتعرفش تنشن خالص .. الحل إنهم خلوا الAutomatic Mode ده يضرب 3 طلقات في 3 طلقات .. ده حل كويس إنك تضرب طلقات بشكل شبه مستمر بس بمعدل تقدر تنشن به بسهولة .. بعد كده نزلت الM16A3 ودي كانت نسخة معمولة مخصوص لفرع من القوات الخاصة الأميريكية اللي هم Navy SEALs وأحدث نسخة نزلت من M-16 إسمها M16A4 وهي تبقي البندقية الرسمية لقوات US Marines أو مشاة البحرية ودي بندقية وزنها 4 كيلوجرام بس وخزنتها بتقدر تشيل 30 طلقة وبتقدر تجيب أي هدف بدقة لحد مسافة 550 متر وبتضرب طلقات بمعدل 120-150 طلقة في الدقيقة.

فيه بندقية تبقي بنت عم الM-16 إسمها M4A1 Carbine بتستخدم نفس عيار الطلقات ودي تبقي حالياً البندقية الألية الرسمية لكل القوات البرية في القوات المسلحة الأميريكية .. أنا مش ببالغ لو قلت إن البندقية M4 Carbine هي بندقية ألية عبقرية .. دي بندقية بتشتغل في أي حتة وفي أي وضع و مبتقولش لا .. شكلها حلو وسهلة في الإستخدام وخفيفة ودقيقة .. اه فيها عيوب زي أي سلاح في الدنيا بس تظل البندقية الألية دي من أحسن البنادق الألي اللي البشر إخترعوها و اللي الحقيقة سهل تفهم ليه:

• هم لقوا بندقية ألية الكعب بتاعها بيتطبق ومش ثابت في مكانه زي M16 أو حتي شبه AK-47.
• كمان الماسورة بتاعتها طولها 36 سنتيمتر وده أقصر بكتير من M16 اللي طول الماسورة بتاعها كان 50 سنتيمتر .. ده معناه إن لو أنا ضابط قوات خاصة بطلع سلم في عمارة وأنا شايل M4 فأنا حتحرك بسهولة في الأماكن الضيقة أو لو أنا مثلاً راكب طيارة هليكوبتر او قاعد جوه مدرعة في مكان ضيق البندقية بتاعتي مش حتعملي صداع في دماغي اللي هو ياتري حشيلها إزاي في مكان ضيق أوي زي ده.
• البندقية كمان خفيفة أوي وزنها علي بعضها 3 كيلوجرام لو زودت عليها الإكسسوارات اللي بتتركب زي عدسة التنشين والعدسة المكبرة والمقبض والتوجيه بالليزر وقاذف القنابل فالوزن الإجمالي ممكن يوصل 4 كيلوجرام.

حربي العراق وأفغانستان سرعت أوي من إستخدام M4 في القوات البرية الأميريكية بس في نفس الوقت خلت ناس تقول إن ليها عيوب كتير والحقيقة هم بيتكلموا عن عيبين أساسيين .. أول عيب هو إن سواء M4 أو M16 بيتقال عليهم Gas Powered Rifles يعني بنادق ألية شغالة بالغاز وده معناه إن تصميمها بيخليها تستخدم غازات الإحتراق الناتجة عن إحتراق البارود في إنها تروح تمشي في مسارات جوه البندقية عشان ترفع الطلقات ورا بعضها من الخزنة لحد الماسورة وده معناه إنك بتمشي العادم جوه البندقية وده معناه إنك زي ما بنقول في الهندسة بتهببب المواسير وبتزود من إحتمالية إن مع الإستخدام يحصلها Jamming .. العيب الثاني هو إن فيه ناس شايفة إن عيار 5.56 مليمتر اللي هو العيار الStandard للطلقات بتاعة حلف شمال الأطلسي NATO ضعيفة مش زي طلقات عيار 7.62 مليمتر المستخدمة في بنادق AK-47 .. بإختصار شديد لو أنا معايا بندقية M4 وزميلي معاه بندقية AK-47 بنضرب علي واحد مستخبي ورا مثلاً باب عربية فلو زميلي ضرب عليه طلقة واحدة حيعرف يموته بس أنا ححتاج علي الأقل 3 طلقات لإن القدرة التدميرية للطلقات بتاعتي أضعف من بتاعته .. صحيح طلقتي أسرع ودقتها أعلي يعني لو إحنا الإتنين بننشن علي هدف بعيد عننا فإحتمالية إني أعرف أصطاده أعلي بكتير من زميلي.

بس حتي العيوب دي مخلتش سمعة M4 تتهز بين الجنود الأمريكان .. سنة 2006 شركة CNA نشرت تقرير عن رأي الجنود الأمريكان في العراق وأفغانستان في البندقية وكان رأي 89% منهم إن الM4 سلاح يعتمد عليه و 19% بس حصل معاهم مشاكل في المعارك و 80% عبروا عن ثقتهم فيها .. ده في الوقت اللي وزارة الدفاع الأميريكية شغالة علي علاج المشاكل بتاعه الM4:

• الطلقات زمان كانت مصممة بحيث تقدر تخترق الدروع الروسية الصنع فالمهندسين وهم بيصمموها مكانوش مركزين أوي علي إنهم يعملوا طلقة بتقتل قد ما كان همهم إنهم يعملوا طلقة خارقة للدروع .. دلوقتي نزلت طلقات جديدة إسمها M855A1 ودي طلقة مصممة بحيث تقتل بسرعة.
• هم دلوقتي شغالين إنهم يبدلوا بنادق M4 Carbine ببنادق أحدث هي M4A1 بحيث إنهم حيشيلوا نظام ضرب النار بتاع 3 طلقات في 3 طلقات وحيخلوه نظام الي Automatic ده غير إن ماسورة البندقية حتتعدل عشان متسخنش أوي مع ضرب النار المستمر.

المدفع الرشاش M240 Machine Gun:

ده يا سيدي يبقي المدفع الرشاش الأساسي المستخدم في القوات البرية الأميريكية وقوات مشاة البحرية ده غير إن فيه أكتر من 68 دولة علي مستوي العالم شارياه .. فعلياً هو مش سلاح أميريكي الصنع لإن الM240 يبقي النسخة اللي الأمريكان إستخدموها من مدفع رشاش إسمه FN-MAG إتصنع في الخمسينات علي يد شركة سلاح بلجيكية إسمها Fabrique Nationale وإختصاراً بتتسمي FN وحتي دلوقتي العساكر الأمريكان بيسموا المدفع الرشاش ده MAG مش M240  .. عموماً إنت محتاج تفهم إن فكرة المدافع الرشاشة أو المتعدد زي ما بنسميه بدأت تحلو في عين العساكر من بعد الحرب العالمية الثانية .. الحرب دي أثبتت إن مينفعش أي شوية عساكر في فصيلة واحدة ميبقاش معاهم واحد ماسك مدفع رشاش .. في الخمسينات الأمريكان طلعلولنا مدفع إسمه M1918 Browning وجه وراه M60 .. بس الأمريكان إكتشفوا إنهم فاشلين في الموضوع ده ومش عارفين يعملوه فراحوا يشتروا من بره ودي كانت بداية تعارفهم مع FN-MAG اللي هم خدوه وحبوه وغيروا إسمه لM240.

لو حنشبه الMAG بحاجة فأنا شايف إن أقرب تشبيه له هو (أحمد مكي) .. ده ممثل ومغني ومنتج ومخرج .. بيعمل كل حاجة .. الMAG كده برده .. رغم إنه مدفع رشاش بس لو ركبتله عدسة زي ما عندك في الصور ممكن ينفع كبندقية قناصة .. تقدر تستخدمه عشان تصطاد جنود مشاة أو تنسف عربية مدرعة .. تقدر تستخدمه عشان تغطي إنسحاب أو هجوم قوات برية .. ممكن توقع به طيارة هليكوبتر لو حبيت .. الMAG بيستخدم طلقة عيار 7.62 مليمتر وده بيخليها دقيقة لحد مسافة 1800 متر .. وزن المدفع الرشاش صافي لوحده حوالي 12 كيلوجرام بس لو زودتله الإكسسوارات بتاعته والمسند الثلاثي بتاعه فممكن وزنه يوصل 21 كيلوجرام فهو مش خفيف .. بس في المقابل بيقدر يضرب 100 طلقة في الدقيقة علي طول يعني مهما قعدت تستخدمه مش حيسخن ولا حيحصله Overheating .. فيه Option إنك تحطله Mode كده بيخليه يضرب 650 طلقة في الدقيقة بس مشكلة الMode ده إنه بيسّخن المدفع الرشاش بسرعة .. اللي إنت إحتمال تكون بتشوفه في PUPG هو النسخه الأخف منه شوية M249 واللي الإسم الكامل بتاعه Squad Automatic Weapon بس العساكر الأمريكان بيسموه إختصاراً SAW .. فكرة SAW إنه بيستخدم طلقات عيار 5.56 مليمتر بتاعة البندقية M16 و M4 Carbine وبتقدر تستخدم معاه يا إما شريط طلقات بيبقي فيه 100 طلقة أو علبة ذخيرة.

المدفع الرشاش PK Machine Gun:

إسمه بالكامل Pulemyot Klashnikova وزي ما إنت احتمال تكون أخدت بالك فده يبقي الأخ الكبير للبندقية الألية AK-47 .. فكرته إنه هو هو الAK-47 بس بيضرب طلقات أسرع وأكتر .. ولإنه أخو الAK-47 الكبير فلو إنت لقيت ناس شايلة AK-47 فإنت غالباً حتشوفهم شايلين PK .. زيه زي AK-47 إخترعهم (ميخائيل كلاشنيكوف) .. المدفع الرشاش ده مش معمول عشان عساكر عادية تشيله .. نقول تاني .. المدفع ده مش معمول عشان أي حد يشيله .. ده مدفع يا إما بيتركب علي مدرعات يا إما بيبقي عسكري ثابت في مكانه بيستخدمه عشان يغطي به إنسحاب أو هجوم زمايله .. ليه بقولك كده .. لو إنت جندي خصوصاً في القوات الخاصة فإنت عارف كويس إن الطلقات غالية وميتفرطش فيها بسهولة .. عشان كده إنت نادراً ما بتستخدم بندقيتك الألية في وضع Automatic Firing لإنه أولاً مش دقيق وطلقات كتير مش بتصيب هدفها وثانياً بيبعزق طلقاتك علي الفاضي .. الPK و الM240 متصممين عشان يعالجوا المشكلة دي .. حتلاقي إن الإتنين ليهم مسند ثلاثي عشان يعلي جودة التصويب وعلي فكرة الPK دقيق جداً في إصابة الأهداف علي بعد ممكن يوصل 800 متر.

عشان موضوع السخونية اللي ممكن تخلي الPK يتسد وميشتغلش فالماسورة بتاعته تقيلة حبتين ومعمولها Frame أو إطار معدني عشان يسرب الحرارة بشكل أحسن .. زي ما قلتلك الPK يبقي الأخ الكبير بتاع البندقية AK-47 وحتي ليهم نفس سن الدبانة بتاع النشان .. يمكن الفرق الأساسي بينهم إن الPK بيستخدم طلقة عيار 7.64×54 ودي طلقة أتقل شوية من الطلقات المستخدمة في البنادق AK-47.

البندقية الألية QBZ-95:

دي البندقية اللي مستخدمة في القوات المسلحة الصينية .. مفيش فيكي يا صين عسكري إلا ومعاه البندقية دي .. الQBZ-95 الصينيين عملوها عشان تحل محل النسخة الصيني من بنادق AK-47 .. زي ما إنت شايف هي بندقية غريبة في شكلها حبتين .. أكيد أخدت بالك إن خزنة الذخيرة موجودة ورا الزناد .. ده ميزته إنه بيخلي طول البندقية علي بعضها قصير .. زي ما إنت شايف برده فيه حامل فوق البندقية عشان تمسكها بايدك زي شنطة السفر كده .. المشكلة في الحامل ده إنه بيصعب أوي من إنك تحط إكسسوارات علي البندقية زي عدسات رؤية وكشافات وتوجيه بالليزر.

الصينيين عملوا نسخ مختلفة كتير من الQBZ-95 .. يعني عندك منها نسخة أقصر منها ودي بيوفروها لعساكر سلاح المدرعات وللقوات الخاصة .. القوات البرية بينزلها نسخة تانية ماسورتها تقيلة حبتين عشان تضرب طلقات بمعدل أسرع .. من الحاجات المميزة أوي في QBZ-95 إنها بتستخدم نوع مخصوص من الطلقات عيار 5.8 مليمتر وده عيار طلقات مش بيتباع ولا بيتصنع في أي حتة بره الصين .. الحقيقة هو محدش فاهم هم الصينيين كانوا بيفكروا في إيه لما قرروا يعملوا ده بس يمكن التفسير المنطقي الوحيد إنهم مش عايزين البندقية بتاعتهم تشتغل علي أي نوع ذخيرة تاني غير اللي هم بيصنعوه .. ده مجرد فتي لإن الله أعلم بصراحة بنيتهم.

البندقية الألية OTs-14 Groza:

دي واحدة من أكتر البنادق الألية اللي الناس اللي بتلعب PUPG بتحبها بس الغريب إنها من أكتر البنادق الألية اللي لما الروس قرروا يطلعوها من الخدمة كل اللي إستخدمها في الحقيقة كان حيرحب أوي بفكرة إنه يروح يتف علي قبرها .. الروس كان نفسهم إن البندقية دي تحل محل عيلة الكلاشينكوف سواء بقي AK-47 أو AKM أو AK-74M بس يمكن أقرب تشبيه لGroza إنها شبه فيلم اللمبي 8 جيجا اللي هو فيلم قبله جزئين ناجحين بس هو شخصياً فيلم ميتشفش فهو إتعمل علي حسهم بس هو نفسه فيلم يترمي في الزبالة.

الروس لما جم يعملوا الGroza قالك بااااااس وصلت البندقية الألية أم حركات .. كان ينفع يتركب عليها كاتم صوت عكس كل عيلة الكلاشينكوف .. كان ينفع يتركب عليها Grenade Launcher أو قاذفة قنابل يدوية عكس برده كل عيلة الكلاشينكوف .. ينفع يتركب عليها موجهات بالليزر وعدسات والإكسسوارات اللي بتتركب علي البنادق الأمريكاني .. فوق ده كله أكتر من 70% من مكوناتها هي هي اللي موجوده في نفس عيلة الكلاشينكوف فإنت خطوط الإنتاج بتاعة مصانع السلاح اللي بتصنع الكلاشينكوف هي هي اللي إنت حتستخدمها عشان تصنع الGroza .. علي الورق الGroza دي أحسن إختراع عملته روسيا من بعد العربية اللادا بس لما جت يجربوها علي الأرض قالوا لنفسهم هو إيه الخرا اللي إحنا عملناه ده.

الروس مبيعرفوش يصنعوا حاجة بتشتغل في صمت .. صوت موتور العربية اللادا نفسه تحس إن السليندرات بتتخانق مع عمود الكرانك والعربية كلها بتترج وهي شغاله .. الكلاشينكوف هي كمان كده .. الكلاشينكوف طريقة شغله عنيفة ولما بتيجي تستخدمه رد فعله أعنف من البنادق الأمريكاني وده سبب أساسي فيه هو إن الكلاشينكوف متصنع من الصلب في حين إن البنادق الأمريكاني زي M4 Carbine متصنعه من ألياف الكربون .. المهم إن الفتحة اللي مظروف الطلقة بيطلع منها في الكلاشينكوف تقريباً في نص البندقية وإنت وشك بيبقي بعيد عنها .. في الGroza متفهمش المهندس اللي صممها كان سكران ولا إيه بس هو عمل الفتحة دي ورا الخزنة قصاد وشك فإنت بقيت وإنت بتضرب نار حتتعمي من كتر الغازات السخنة اللي عماله تطلع في وشك .. قلنا مش مشكلة حنخلي اللي يستخدمها يلبس ماسك ونظارات عشان تحميه وبعدين أسد يلا فيه إيه إنت في الجيش .. إكتشفوا إن التصميم بتاع Groza فيه مشكله إنه مخلي الماسورة بتاعتها قصيرة وبالتالي النشان بتاعها مش مضبوط أوي فلازم يبقي عندك شوية سنس أو إحساس وإنت بتستخدمها .. قلنا ماشي محدش بياكلها بالساهل .. إكتشفوا إن التصميم بتاعها فيه مصيبة سودا تالتة وهي إنه تقيل أوي من ورا علي عكس الكلاشينكوف اللي تقلها كله في النص فتحس إنها بندقية متوازنة .. فلو إنت مش مركب كاتم صوت ولا Grenade Launcher عشان تضبط وزن الGroza فحتلاقي البندقية و إنت بتضرب بيها بتطير منك.

أزيدك من الشعر بيت .. زرار الأمان وزرار تغيير الخزنة في Groza محطوط في نفس المكان بتاع بنادق الكلاشينكوف اللي هو ورا الخزنة فأنا لو عسكري ماسك Groza فعشان أغير الخزنة فلازم أنزلها لحد وسطي عشان أعرف أتك علي الزرار وأغير الخزنة .. مع إن أي بني أدم بيفهم ناوي يعمل بندقية ألية خزنتها ورا زي دي فلازم يعمل زي ما الإسرائيليين عملوا في بندقيتهم Tavor X95 وزي ما الصينيين عملوا في بندقيتهم QBZ-95 إنهم حطوا الزرار ده قدام .. حاجة كمان كانت مصيبة من مصايب الGroza إنك يا بتاخد البندقية اللي تناسبك لو إنت أيمن أو إنت أشول .. لكن لو إنت أيمن وخدت بندقية تناسب إنك بتضرب بإيدك اليمين وجيت في موقف إنك طالع علي سلم مثلاً أو مستخبي ورا حاجة وحبيت تمسك البندقية بإيدك الشمال فإنت مش حتعرف لإن مظروف الطلقة حيضرب في وشك يعورك .. ده غير إن الGroza عشان تنظفها إنت محتاج تبقي جراح مش عسكري .. كم الأجزاء اللي حجمها صغير محتاج يبقي معاك ملقاط ومعدات يمكن مفيش غير الجراحين في أوضة العمليات بس هم اللي بيحتاجوها وده طبعاً هري لو إنت عسكري في حرب .. لو إنت بتلعب PUPG وفرحان أوي بالGroza فإعرف إن فيه عساكر وضباط جيش كل ما يشوفوها يتفوا عليها ويسبولها مية ملة.

المصادر:

• مقالة بعنوان These are the 5 most dangerous guns of modern war on the planet يعني دي أخطر 5 أسلحة مستخدمة في الحروب الحديثة في العالم .. نشرت في مجلة The National Interest وده لينك المقالة الأصلية:
  https://nationalinterest.org/blog/the-buzz/these-are-the-5-most-dangerous-guns-modern-war-the-planet-250
• مقالة بعنوان A brief history of the assault rifle .. تاريخ مختصر للبنادق الألية .. نشرت في مجلة The Atlantic وده لينك المقالة الأصلية:
  https://www.theatlantic.com/technology/archive/2016/06/a-brief-history-of-the-assault-rifle/489428/
• مقالة بعنوان Meet the 5 worst Russian rifles of all time .. إتعرفوا معانا علي أسوأ 5 أسلحة روسية إتعملوا في التاريخ .. إتنشرت في مجلة The National Interest وده لينك المقالة الأصلية:
  https://nationalinterest.org/blog/buzz/meet-5-worst-russian-rifles-all-time-36767
• مقالة بعنوان M4: The Gun The Army Loves to Go to War With .. الM4: السلاح اللي الجيش الأميريكي بيحب ياخده معاه الحرب .. إتنشرت في مجلة The National Interest وده لينك المقالة الأصلية:
  http://nationalinterest.org/blog/the-buzz/m4-the-gun-the-army-loves-go-war-24890