في فيلم التجربة الدانمركية كان فيه مشهد يضحك أوي لما (عادل إمام) كان بيطلع الناس من أوضة (نيكول سابا) فمن ضمن الناس دي كان الخدام بتاعه اللي جسده الله يرحمه (سامي سرحان) و كان اسم الشخصية (بدوي) .. (عادل إمام) بيسأله و هو بيضحك إنت بتعمل إيه هنا يا (بدوي)؟ فرد عليه بكل تلقائية أصل الدكتور قالي أقف في حتة طراوة .. الحقيقة أنا مش شايف أي مبرر تاني للوجود العسكري الفرنساوي في مالي غير إن الدكتور قالهم أقفوا في حتة طراوة .. الحقيقه إن الوضع مأساوي و معقد لدرجة إنك عشان تفهمه لازم أحاول معاك أجاوب علي كذا سؤال و من خلال الإجابات دي حتقدر تجمع فكرة كويسة عن هو فرنسا بتهبب إيه بالضبط في مالي؟ .. الحقيقة هم سؤالين بس محتاجين نعرف إجابتهم:
- إيه اللي ودي فرنسا مالي من الأساس يعني؟
- هل التدخل العسكري الفرنساوي في مالي جاب نتيجة؟
خلينا نبدأ بالسؤال الأولاني .. إنت بتعمل إيه هنا يا (بدوي)؟
مبدأياً لازم تكون مستوعب نقطة و هي إن الوضع في مالي معقد بشكل إنت لا تتخيله .. حنحاول نبسطلك الأمور قدر الإمكان بس أبقي بكذب عليك لو قلتلك إن التبسيط ده حيديك صورة دقيقة 100% عن الأحداث .. الحكاية بدأت سنة 2012 .. في السنة دي حصل تمرد مفتوح لقبيلة اسمها الطوارق عايشة في شمال مالي .. حاول تتخيل إن الطوارق دول هم شباب ثورة يناير .. ناس عايزة تستقل أو علي الأقل تاخد حق الحكم الذاتي لشمال مالي بعيد بقي عن إيد الحكومة المركزية في العاصمة باماكو .. زي أي تمرد في الدنيا فيه ناس بتركب الموجة و بعد شوية بتسحب البساط من الناس اللي بدأت الثورة .. إحنا شفنا ده بعنينا فالوضع مش حيبقي غريب عليك .. اللي ركب الموجة مع الطوارق كانت الجماعات الإسلامية .. حاول تستهدي بالله و تفهم النقط دي كويس .. في يوم و ليلة نص دولة مالي خرج بره إيد الحكومة .. الطوارق مهما كان رأيك فيهم عمرهم ما حيعرفوا يسيطروا علي نص البلد لوحدهم .. الجماعات الإسلامية حلمها إن مالي تبقي زيها زي سوريا و زيها زي العراق جزء من الكيان الكبير بتاع داعش .. العنف ضد القوات الحكومية بقي بيزيد بشكل رهيب في الوقت اللي الطوارق في أغلب الأحيان مكنش ليهم أي يد .. شوية بشوية و بدأوا يتهمشوا .. قدام الناس الخناقة بقت بين طرفين اللي هم الحكومة المالية و المسلحين الإسلاميين.
في يناير سنة 2013 فرنسا قررت تتدخل عسكرياً عشان تلحق حكومة مالي تحت مسمي عملية سيرفال Operation Serval و الهدف كان في الأول محدد .. إحنا عايزين نطلع المسلحين الإسلاميين من المدن المالية اللي هم سيطروا عليها بس ده مش معناه إن هدفنا بالضرورة إننا نخلص منهم بشكل نهائي .. العملية مشيت كويس و بعد ما الفرنسيين طلعوا الإسلاميين من المدن اللي هم سيطروا عليها إتشكلت قوة حفظ سلام تابعة للأمم المتحدة اتسمت مينسوما MINUSMA .. من 2013 لحد 2015 و المسلحين الإسلاميين بيجمعوا نفسهم تاني و بدأوا يشنوا هجمات ضد كله .. ضربوا القوات الفرنسية .. إستهدفوا قوات حفظ السلام .. القوات الحكومية مسلمتش منهم .. حتي المدنيين و الطوارق كمان .. في يونيو 2015 إتمضت إتفاقية سلام في الجزائر محققتش أي حاجة .. كل يوم بيعدي و الوضع بيزداد سوء .. عشان بس تستوعب مدي العك اللي بيحصل في مالي خدلك بصة علي الأطراف اللي مضت إتفاقية السلام بتاعة الجزائر دي:
- الحكومة المالية و دي حاجة مفهومة.
- تحالف من مليشيات مسلحة ولاءها للحكومة .. التحالف ده اسم الدلع بتاعه البلاتفورم Plateforme بس اسمهم بالكامل Plateforme des Mouvements du 14 Juin 2014 d’Alger .. هو اسم فرنساوي بس فكك منه بس أقف قدام فكرة إن الحكومة بتمضي و كمان المليشيات التابعة ليها بتمضي ككيان مستقل.
- حركة اسمها حركة تنسيق أزواد Coordination of Azawad Movement و إختصاراً بتتسمي CMA و ده تحالف كبير جواه العرب و الطوارق اللي عايشين في شمال مالي.
طبعاً خدت بالك إن إتفاقية السلام دي مشملتش الإسلاميين و مجرد إنها مجابتش سيرتهم فالإتفاقية دي حق ربنا يعني تبلها و تشرب ميتها و ده اللي حصل علي الأرض فعلاً .. الإتفاقية دي ميزتها إن فيها حاجة حلوة أوي اسمها DDR و دي إختصار Disarmament, Demobilization and Reintegration و دي بتقول إن أي شوية مسلحين أيا كانوا هم مين لو وافقوا إنهم يرموا سلاحهم و يبطلوا يضربوا الحكومة و القوات الفرنسية و يطلعوا يجروا فحيتم إعادة دمجهم في المجتمع عن طريق برامج تمويل و تنمية مجتمعية و كمان إحتمالية دمجهم في القوات المسلحة المالية .. بسبب المزايا دي ففيه جماعات مسلحة ثانية مكنتش إتعزمت إنها تمضي الإتفاقية إعترضت و عملوا زي الناس اللي قالت عايزين نقرا عايزين نقرا لما شافوا (نيكول سابا) في المكتبة .. واحدة من الجماعات المسلحة دي اسمها CME و دي إختصار Coordination des Mouvements de l’Entente و جماعة مسلحة تانية اسمها MSA و دي إختصار Mouvement pour le Salute de l’Azawad .. وسط كل العك ده كله بقي بيضرب في كله .. كل الجماعات المسلحة بقوا يتخانقوا مع بعض مين ياخد أكتر حصة من الفلوس اللي حطتها فرنسا لإعادة إعمار مالي .. مين أكتر جماعة حيبقي ليها ناس رتب كبيرة في القوات المسلحة .. كله بقي بيخزوق في كله .. وسط كل ده طلع الخازوق الكبير .. الإسلاميين اللي لسبب ما محدش سأل نفسه هي الناس دي حنعمل معاها إيه؟ .. كل ده حماده .. و فكرة إن الحكومة المالية نفسها بتماطل و مش عاجبها إنها تدي للناس حقوقها ده حماده تاني.
أساساً حكومة مالي كانت مش موافقة علي فكرة DDR دي و شايفين إن الجماعات المسلحة مكانهم حبل المشنقة مش إنهم ياخدوا مكافأت من ضمنها إنهم ينضموا للقوات المسلحة .. لو تسأل أي حد من الحكومة الفرنسية يقولك إن إحنا طالع ميتينا في حرب أنتوا مش عارفين عنها حاجة .. إحنا خط الدفاع الأول و الأخير للديموقراطية ضد وحشية تنظيم اسمه الدولة الإسلامية في الصحراء الكبري أو Islamic State in the Greater Sahara و إختصاراً بيسموه ISGS و واضح من الاسم إن التنظيم له علاقة بداعش.
أظن دلوقتي جه وقت إن إحنا نفهم هل وقوف (بدوي) في أوضة (نيكول سابا) جاب نتيجة؟
الإجابة هي كلا لا خالص أبداً بتاتًا محصلش و كل إجابات النفي اللي في اللغة العربية اللي خدناها في النحو و اللي مخدنهاش .. إذا كان الفرنساويين دخلوا مالي و في دماغهم إنهم يعيدوا ليها الإستقرار تاني فأحب أقولك إن الدنيا باااظت باظت خاااااالص .. أعمال العنف اللي للأسف إتلزقت في الإرهاب الإسلامي طلعت برا مالي و شملت حتت كتير من منطقة الساحل و دي حضرتك تبقي الحتة من أفريقيا اللي تحت الصحراء الكبري و بتمتمد من موريتانيا اللي علي فكرة تبقي دولة عربية و بتطل علي المحيط الأطلنطي لحد أريتريا اللي هي بتطل علي البحر الأحمر .. يعني بتتكلم عن شريط ماسك قارة أفريقيا كله بالعرض .. خلال 7 سنين من الوجود العسكري الفرنسي في مالي مات 10,000 مواطن أفريقي .. أكتر من مليون بني أدم إتهجروا من بيوتهم .. بعد سبع سنين لسه تنظيم الدولة الإسلامية في الصحراء الكبري بيعرف يعمل هجمات مسلحة مش بس جوه مالي لا دول كمان طلعوا براها للنيجر و بوركينا فاسو .. خلال 4 شهور اللي فاتوا بس إتقتل 300 عسكري من نيجر و من مالي .. كل ده قصاد إن من سنة 2015 متقتلش من المسلحين الإسلاميين إلا 770 بس .. وخلي بالك .. الفرنساويين من 2013 مات ليهم 44 عسكري منهم 13 ماتوا مرة واحدة في حادثة طيارة هليكوبتر في 2019 .. دول مالي و النيجر و بوركينا فاسو مات ليهم الالافات من العساكر و محدش عايز يوجع دماغه و يحدد هم كام واحد بالضبط.
مشكلة تانية وهي إن الفرنساويين نفسهم هم مش عارفين هم عايزين إيه .. في يناير 2020 الرئيس الفرنساوي (إيمانويل ماكرون Emmanuel Macron) هدد رؤساء دول غرب أفريقيا إنه حيسحب قواته من مالي .. شوية و رجع في كلامه وتعهد إنه حيبعت 600 عسكري إضافي زيادة علي ال4,500 عسكري فرنساوي اللي فعلياً هناك و كمان قالهم حقكوا عليا وليكوا عندي إني حبقي متعاون معاكوا أكتر و أديكوا اللي انتوا عايزينه .. اللي هو انت عايز تقوله انت جوزائي يلا ولا إيه .. الإتحاد الأفريقي قال من ناحيته إنه حيبعت 3000 عسكري لدول الساحل و فرنسا من ناحيتها بتحاول تقنع حلفاءها الأوروبيين زي أستونيا و جمهورية التشيك و السويد و فنلندا و النرويج إنهم يبعتوا قوات.
طبيعي إنك في موقف زي ده تحاول تسأل نفسك طب هي المشكلة فين؟ إيه اللي مخلي فرنسا مش عارفه لأكتر من سبع سنين إنها توصل للي هي عايزاه في مالي؟ .. لو انت بتسأل نفسك السؤال ده فعلي رأي الشيف (شربيني) ورقة و قلم و إكتبي ورايا يا ست الكل .. يحكي أن الفرنساويين حبوا يدربوا عناصر من الجيش المالي في المعسكر الرئيسي بتاع القوات الفرنسية بره مدينة جاو .. الفرنساويين جابوا 15 عسكري مالي عشان يدربوهم علي حاجة بسيطة أوي .. العساكر الفرنساويين شاوروا للعساكر الماليين علي بيت قديم و قالولهم لنفترض إن البيت ده جواه مسلحين إرهابين .. حلو .. و شاورلهم علي طيارة هليكوبتر طايرة في الجو و قالولهم الطيار ده معاه صواريخ تدمر البيت .. حلو أوي .. وظيفتكوا بقي إنكوا تتخيلوا إنكوا محاصرين البيت و تفتحوا الراديو تكلموا الطيار تشرحوله بالضبط إحداثيات البيت فين عشان الطيار يجي بالهليكوبتر بتاعه يضربه .. جميل .. يلا ورونا شطارتكوا .. دي الأسئلة اللي العساكر الماليين سألوها للعساكر الفرنساويين اللي بيدربوهم .. يعني إيه بوصلة؟ .. يعني إيه خريطه؟ .. يعني إيه إحداثيات؟ .. يعني إيه راديو؟ .. يعني إيه تردد موجه راديو؟ .. الغدا إمتي؟ .. معكوش علبة سجاير؟
فيه فرق ثقافات و فرق تعليم انت لا تتخيله بين العساكر الفرنساويين و العساكر الماليين .. وعلي فكرة متفتكرش إن المسلحين بتوع الدولة الإسلامية اسم النبي حارسهم يعني فالحين أوي هم كمان .. من كام أسبوع هم خطفوا واحد من قيادات المعارضة المالية .. يعني ده رجل المفروض يعني إنه ضد حكومة مالي اللي انتوا بتحاربوها تقوموا خاطفينه؟ .. أنتوا مجانين؟ .. زود علي كده إن السند اللي فرنسا كانت معتمدة عليه اللي هو أميركا باعها .. إستكمالا لمسلسل الهبل اللي بيحصل في الساحل فبعد ما الأمريكان عملوا قاعدة جوية كبيرة في النيجر دفعوا فيها 110 مليون دولار ففيه كلام علي إن كيس الشيتوس الحجم العائلي حيقفل القاعدة دي .. ليه يا أهطل انت كمان؟ .. أصل إستراتيجية الأمن القومي الأميريكية بقت شايفه إن روسيا و الصين تهديد لينا أكتر من شوية مسلحين مش عارفين يقروا ولا يكتبوا في مالي .. انت فعلياً مش متخيل إزاي الفرنساويين كانوا مسنودين علي الوجود الأميريكي في النيجر .. الدعم الجوي الأمريكاني سواء بقي بتتكلم عن طيارات تزويد بالوقود أو طيارات نقل أو طيارات بدون طيار Drones كان بيوفر علي الفرنساويين كل سنة 45 مليون دولار وده كان حمل كبير الأمريكان شايلينه لإن الوجود العسكري الفرنسي في مالي واقف علي الميزانية العسكرية الفرنسية بحوالي مليار دولار في السنة .. عشان كده في يناير 2020 وزير الدفاع الفرنساوي (فلورينس بارلي Florence Parly) راح أميركا يحاول ينقعهم إنهم ميقفلوش القاعدة الجوية بتاعتهم في النيجر .. فعلياً انا مش عارف هل ده حيحصل فعلاً أو لا؟ .. الحجة اللي الفرنساويين بيحاولوا يقنعوا بيها الأمريكان هي إن هزيمة الدولة الإسلامية في مالي أسهل بكتير من سوريا و العراق .. هل الأمريكان حيقتنعوا؟ أبقي بهبد لو قلتلك إجابة.
فعلياً فرنسا حالها في مالي مبقاش يفرق كتير عن حال أميركا في فيتنام أو في أفغانستان .. حرب بقالها سنين و محدش عارف حتخلص إمتي .. حرب بيتصرف عليها مليارات كل سنة قصاد عدو انت مش حتعرف تهزمه لا و كمان بتحاربه علي أرضه اللي هي أساساً بيئة و طبيعة غريبة عليك .. فوق ده كله إن الإستراتيجية اللي فرنسا شغالة بيها في مالي عقيمة أوي .. هم زي ما يكونوا عاملين زي ويندوز إكسبلورر كده بيفوقوا بعد الهنا بسنة .. سنة إيه قول 15 سنة .. الفرنساويين في مالي بيطبقوا نفس التكتيكات الفاشلة اللي الأمريكان جربوها هي هي في العراق و أفغانستان .. يمكن عشان كده الفرنساويين مش عارفين يوصلوا لحاجة .. و يمكن عشان كده الأمريكان شافوا إن مالي معركة خسرانة ومفيش أي داعي إنهم يكملوا هناك .. تسأل الجنرالات الفرنساويين طب أنتوا بتواجههوا المسلحين إزاي يقولك إحنا بنمشي قوافل مسلحة تمشط الصحراء .. تقولهم طب ما كده المسلحين حيهربوا ومش حتقبضوا عليهم .. يقولك ما إحنا مش عايزين نقبض عليهم إحنا مش عايزين يتجمعوا في حتة واحدة .. تحسهم بيتعاملوا مع المسلحين دول كأنهم دبان مش عايزين غير إنهم يهشوهم بعيد .. حكومة مالي نفسها كمان مش مساعدة .. دي حكومة أولاً لا عارفه تحكم ولا عارفه تبطل فساد ولا عارفه تبطل قمع .. المسلحين الإسلاميين بيستغلوا ده إنهم يجندوا عناصر ليهم .. الفرنساويين عشان واقفين في صف الحكومة ومش بيحاولوا يقولولها تتعدل فمن وجهة نظر المواطن المالي انت فاسد و قاتل و حرامي زيك زي الحكومة بالضبط فالمطلوب مني أساعدك ليه؟
الوضع في مالي محدش عندنا بيتكلم عنه ولا بيجيب سيرته .. يمكن انا عارف إن إحنا في مصر منعرفش حاجة عن مالي غير إن كان بيلعب في منتخبها (سيدو كايتا) و (سيدريك عمر كانوتيه) ولو انت من جيل الألفينات ومش عارف مين دول فاعتبرني ولا كأني قلت حاجة .. بس اللي بيحصل في مالي لازم تقف قدامه وتكون فاهمه حتي لو من باب العلم بالشيء.
المصادر:
مقالة بعنوان Crises in the Sahel becoming France’s forever war نشرت في جريدة The New York Times وده لينك المقالة الأصلية:
tps://www.nytimes.com/2020/03/29/world/africa/france-sahel-west-africa-.html
مقالة بعنوان Mali: France pledges ‘short’ campaign against islamists نشرت علي الموقع الرسمي لهيئة الإذاعة البريطانية BBC وده لينك المقالة الأصلية:
ttps://www.bbc.com/news/world-europe-21007517
مقالة بعنوان Mapping armed groups in Mali and the Sahel نشرت علي الموقع بتاع المجلس الأوروبي للعلاقات الخارجية European Council on Foreign Relations وده لينك المقالة الأصلية:
ttps://www.ecfr.eu/mena/sahel_mapping#
