إيه أحسن سلسلة أفلام إنت شفتها في حياتك؟ .. أرجوك متتسرعش في الإجابة .. خد نفس عميق و فكر شوية قبلما تتكلم .. عبل ما تقرر خليني أقولك أنا رأيي إيه .. رأيي إن سلسلة أفلام Mission:Impossible و أيوه دي الطريقة الصح إنك تكتب الإسم بتحط Mission و بعدها نقطتين فوق بعض و بعد كده Impossible هي أحسن سلسلة أفلام في العشرين سنة اللي فاتوا و صدقني لو قلتلك إن أنا شخصياً مستغرب من إختياري .. فكر فيها كده .. هم 6 أفلام كلهم تقريباً ليهم نفس القصة .. الأفكار اللي حتشوفها في Mission: Impossible حتشوف زيها في سلاسل The Bourne و James Bond يا راجل ده حتي قصة كل جزء من السلسلة شبه التاني .. طب إيه المميز في Mission: Impossible؟ .. الحقيقة اللي وصلتلها بعد شوية تفكير هي حاجات كتير الصراحة يمكن أهمها إن السلسلة عامله زي مطعم (صبحي كابر) كده .. الإتنين بدأوا يشتغلوا سنة 1996 و الإتنين محافظين علي جودتهم لحد دلوقتي .. تحس إن (توم كروز TomCruise) هو الموزة الضاني بتاعة السلسلة أو يمكن هو الطرب بص هو أنا معرفش بس إحنا غالباً موضوعنا مش المنيو بتاعة (صبحي كابر) .. إحنا عايزين نتكلم عن أوجه الشبه بينهم.
مفيش سلسلة أفلام كملت الفترة دي كلها من غير ما يتعملها Reboot يعني تتعاد من الأول بممثل جديد .. سلسلة (جيمس بوند James Bond) بتغير الممثل الأساسي بتاعها مرة كل 10سنين علي الأقل .. مفيش ممثل عمل شخصية Batman لأكثر من 3 أفلام .. سلسلة The Bourne مستحملتش تكمل من غير (مات دايمون Matt Damon) و حتي لما رجع للسلسلة معرفش ينقذها .. سلسلة Transformers عمالة تغير في الممثلين اللي فيها أكتر ما إنت بتغير في الPlaylist بتاعة الأغاني اللي علي موبايلك .. سلاسل Harry Potter و Lord of the Rings خلصوا و إتعملهم السلاسل اللي بتحكي القصة من الأول من غير ما يبقي فيها ولا ممثل ثابت في الأفلام كلها .. حتي سلسلة أفلام Marvel مفيهاش الممثل أو الشخصية اللي لازم تظهر و يبقي هو البطل في كل أفلامها .. يمكن السلسلة الوحيدة اللي ينفع تقارنها من الناحية دي بسلسلة Mission: Impossible هي سلسلة The Fast and Furious و خلينا نكون صرحا مع بعض دي سلسلة زبالة متتشافش أنا شخصياً مشفتش أخر جزئين و مش عايز أشوفهم و مش حاسس إن فاتني كتير في الدنيا إني مشفتهمش.
إنت عشان تلاقي سلسلة أفلام شبه Mission: Impossible لازم ترجع بالذاكرة لورا أيام الثمانينات و التسعينات .. جيل الألفينات هنا أنتوا محتاجين تفتحوا Google لإني حقول أسماء بالنسبة ليكوا مكانها كتب التاريخ لإن أنتوا جيل مش قصدي حاجة وحشة بس أنتوا محدثين نعمة .. أقرب حاجة لMission: Impossible كسلسلة هي سلاسل Rocky مثلاً لإنها كانت قايمة كلها علي كتف البطل اللي هو (سليفستر ستالون Sylvester Stallone) .. أو سلسلة Indiana Jones لإن برده الواجهة بتاعتها كان (هاريسون فورد Harrison Ford).. و ممكن تعتبر معاهم سلسلة Die Hard بتاعة (بروس ويليسBruce Willis) .. ساعتها إنت ممكن تكتشف إن سلسلة Mission: Impossible مش جامدة فشخ أوي كده بس شفت إنت قد إيه إحتجت ترجع بالزمن لورا أوي عشان تلاقي حاجة ينفع تقارنها بيها؟ .. اللي بيخليني أقول إن سلسلة Mission: Impossible هي أحلي سلسلة في التاريخ هي إن في ال22 سنة اللي فاتوا مستوي الأفلام بتاعة السلسلة في الطالع مش في النازل .. أخر جزئين بالذات سواء النقاد أو المشاهدين كانوا طايرين بيهم و دي حاجة إنت متقدرش تقول إن سلسلة زي Die Hard عرفت تحققها.
يبقي (توم كروز) هو الموزة الضاني بتاعة السلسلة و أه أنا مُصر علي موقفي إن الموزة الضاني هي أحسن حاجة في المنيو بتاعة (صبحي كابر) .. فكك من إنه هو اللي بيعمل كل المشاهد الخطيرة بتاعته .. و فكك كمان من إنه هو فعلاً اللي كان متعلق بره برج خليفة في دبي في Mission: Impossible-Ghost Protocol .. و فكك من إنه هو فعلاً اللي كان متشعبط علي باب الطيارة AC-130 و هي بتطلع في الجو في فيلم Mission: Impossible- Rogue Nation .. (توم كروز) من غيره كل حاجة بتقف .. خليني أديلك مثال في فيلمه الأخير Mission: Impossible-Fallout و هي إنه في مشهد من المشاهد و هو بيجري فوق أسطح لندن نط نطة طويلة شوية من سطوح لسطوح و كسر كعب رجله و بسبب ده التصوير عطل لمدة أسابيع لحد ما حالته إتحسنت و قدر يمشي علي رجله تاني .. أقولك علي حاجة فكك من دي كمان .. هل تعلم سيدي القاريء إن (توم كروز) هو المنتج بتاع السلسلة؟ .. دوره إنه هو اللي يجيب السيناريست اللي حيكتب السيناريو و هواللي بينقي المخرج و هو اللي بيصرف علي التصوير و بيدفع المرتبات .. نقطة إختياره للمخرج دي بالذات إنت محتاج تقف عندها شوية و تستوعب الكلمتين اللي أنا لسه قايلهم دول.
سلسلة Mission: Impossible إتعمل منها 6 أفلام أشرف عليهم 5 مخرجين مختلفين .. 5 مخرجين كل واحد برؤيته و بدماغه و بطبيعة شغله .. طب أزيدك من الشعر بيت .. عارف Mission: Impossible 3؟ الفيلم ده في رأيي واحد من أحلي أفلام السلسلة أخرجه (جيه جيه إبرامز JJ Abrams) اللي كان وقتها أول مره يخرج فيلم سينمائي لإن لحد اللحظة دي كانت كل خبرته في التليفيزيون و المسلسلات و (توم كروز) هو اللي جابه و هو اللي إختاره .. فيلم Mission: Impossible-Ghost Protocol اللي في رأي ناس كتير فعلياً هو أحلي أفلام السلسلة أخرجه (براد بيرد BradBird) و زيه زي (جيه جيه إبرامز) كان أول مره يخرج فيلم سينمائي لإن الCareer بتاعته كلها كانت في أفلام الكرتون بتاعة Pixar .. بلاش دي خالص .. (كريستوفر ماكري Christopher McQuarrie) اللي أخرج Mission: Impossible-Rogue Nation و Mission: Impossible-Fallout كان بقاله أكتر من 10 سنين مش لاقي شغل لحد ما (توم كروز) إختاره يخرج فيلم Jack Reacher .. طب إنت كمشاهد إستفدت إيه من كل الهري ده؟ .. إنت إستفدت إنك بتتفرج علي سلسلة تقريباً كلها ليها نفس القصة و نفس السيناريو بس تحس إن كل فيلم له شخصيته المستقلة و ده اللي بيخلي السلسلة ممتعة جداً و مبتزهقش منها و مكملة لحد دلوقتي.
أنا بس حابب أرجعك بالزمن شوية لسنة 2006 عشان أوريك إن الدنيا كانت بايظة خالص فوق دماغ (توم كروز) .. في السنة دي نزل فيلم Mission: Impossible 3 و رغم إني تاني شايفه من أحلي أجزاء السلسلة إلا إن الفيلم محققش النجاح التجاري المطلوب و حتي النقاد معجبهمش أوي .. المشكلة مكنتش كده .. المشكلة إن سمعة (توم كروز) وقتها كانت زي الزفت .. هو كان لسه طالع من فضيحة إنه قعد يتنطط علي الكنبة بتاعة الأستوديو في حلقة عملها مع (أوبرا وينفري OprahWinfrey) عشان يعترف بحبه للممثلة (كايتي هولمز Katie Holmes).. فضيحة تانية أثرت فيه جامد هي الإشاعة اللي طلعت إنه إستغل نفوذه عشان يلغي بث حلقة من برنامج كوميدي إسمه ساوث بارك South Park عشان كانت بتتريق عليه و علي الديانة اللي هو بيعتنقها اللي إسمها ساينتولوجي Scientology .. بإختصارشديد سمعة (توم كروز) في هوليوود أيامها إنه بني أدم مجنون و لاسع و فيه سلك في دماغه ضرب و المفروض إنه يحمد ربنا و يبوس إيده وش و ظهر إن الكلام ده كله محصلش اليومين دول لإن مع Twitter و Facebook كان زمان الCareer بتاعته إتنسفت .. جري الشريط من 2006 لحد 2011 لما فعلاً الCareer بتاعة (توم كروز) إتعملها عمرة كاملة بMission: Impossible-Ghost Protocol.
الفيلم ده بالذات يعتبر من أحلي أفلام الأكشن اللي إتعملت في ال20 سنة اللي فاتوا .. اللي بيميز الفيلم أوي هو رؤية المخرج بتاعه (براد بيرد) اللي زي ما قلتلك قضي حياته كلها بيعمل أفلام كرتون زي The Incredibles و ده يحسسك إن الفيلم و إنت بتتفرج عليه زي مايكون فيلم صامت و (توم كروز) بيمثل بتعبيرات وشه أكتر ما بيتكلم لإن أساساً الفيلم مفيهوش حوار كتير .. أكبر مثال علي كده المشهد الإفتتاحي لما كان بيحاول يهرب من السجن .. (براد بيرد) عملنا فيلم أكشن المشاهد الخطيرة فيه معمولة صح أوي و في نفس الوقت فيلم شبه صامت و فيه كوميديا لدرجة إنك ممكن لو حبيت تعتبره فيلم كرتون و دي الميزة اللي كنت بكلمك عنها من شوية إن كل مخرج بيجي برؤيته و دماغه ففي الأخر إنت بتتفرج علي 6 أجزاء فعلياً مختلفين عن بعض.
حتي لما (كريستوفر ماكري) إستلم السلسلة في Rogue Nation جه بدماغه و رؤيته اللي كملت في Fallout و تعتبر تكملة للرؤية اللي عملها (براد بيرد) في Ghost Protocol و علي فكرة معلومة ناس كتير متعرفهاش إن (كريستوفر ماكري) كان هو السيناريست بتاع Ghost Protocol و إنه هو و (براد بيرد) كتبوا السيناريو مع بعض .. ده بيخليك تقول إن ال6 أجزاء بتوع السلسلة تقدر تقسمهم نصين: أول 3 اجزاء اللي كان فيهم شوية عك لإن السلسلة مكنتش لاقيه نفسها .. و ال3 أجزاء الأخيرة اللي بدأت السلسلة تفهم هي عايزه إيه .. (كريستوفر ماكري) عرف يلاقي الوصفة السحرية و هي إن فيلم Mission: Impossible لازم يبقي حول سرقة حاجة معينة سواء كانت سلاح أو قائمة أسامي أو برنامج كومبيوتر معين بيقوم بيها شوية ضباط مخابرات و معاهم شوية أجهزة أليكترونية حديثة و ماسكات وش و الممثل (سايمون بيج Simon Pegg) يبقي هو حتة الشيكولاتة اللي بيضحك الناس و الممثل (فينج ريميس Ving Rhames) يبقي هو قاصف الجبهات و أخيراً في الجزئين الأخيرين (أليك بولدوين Alec Baldwin) يبقي هو المثقف اللي كل ما يفتح بقه يتكلم تحس إنه بينقط حكمة زي لما قال جملة عجبتني أوي Ethan Hunt is the living manifestation of destiny في المشهد ده من فيلم Rogue Nation.
المصدر:
مقالة بعنوان Mission: Impossible is the best film franchise of the last 20 years.. سلسلة Mission: Impossibleهي أحسن سلسلة أفلام في العشرين سنة اللي فاتوا .. نشرت علي موقع Vice و ده لينك المقالة الأصلية:
https://www.vice.com/en_ca/article/ywkvy7/mission-impossible-is-the-best-film-franchise-of-the-last-20-years
