اللي قدامك في الصورة دي تبقي من أكبر السفن علي مستوي العالم .. اسمها ماري ميرسك Marie MAERSK وزي ما هو باين من اسمها فهي ملك شركة الشحن الدانمركية ميرسك MAERSK .. انا مستعد اراهنك بالخمسين جنية اللي في جيبي إنك يا إما لابس أو ماسك أو سايق أو أكلت أو بتستخدم حاجة جت البلد اللي انت عايش فيها عن طريق السفينة دي .. عشان بس تستوعب حجم السفينة دي فتخيل إنها بتقدر تشيل 18,000 حاوية أو Container من اللي انت بتشوف الترلات شايلاهم في طرق السفر .. دي سفينة طولها معدي 400 متر وعشان بس احطك في الصورة فارتفاع برج القاهرة 180 متر يعني تخيل سفينة طولها عبارة عن ضعف طول برج القاهرة .. بمعني أخر .. دي سفينة كأبعاد هي أكبر من حاملة الطائرات .. دي سفينة متقسمة 10 أدوار .. سفينة فيها سينما .. فيها جيم .. فيها حمام سباحة .. سفينة عشان تتصنع اتصرف عليها 190 مليون دولار ولو جيت في أي يوم تشوف قيمة البضاعة اللي هي شايلاها قد إيه فإنت بتتكلم عن حوالي 400 مليون دولار مستريح.
زي ما في العربيات حتلاقي فئات زي يقولك دي سيدان ودي كوبيه ودي كابورليه فبرده في السفن فيه فئات .. الفئة اللي السفينة ماري ميرسك بتتحط فيها هي Triple-E ودي معناها إن السفينة دي بتحقق 3 اشتراطات أصعب من بعض .. الأولانية بيتقال عليها Economy of Scale يعني هي صحيح سفينة كبيرة أوي خالص جداً يعني بس هي متصممة صح أوي وبشكل اقتصادي جداً .. الثانية بيتقال عليها Environmentally Improved يعني مش بتلوث البيئة بشكل كبير مش زي سفن الرحلات Cruise Ships .. الثالثة بيتقال عليها Energy Efficient يعني مش بتحرق بنزين كتير وهي ماشية .. فئة Triple-E بدأت تشتغل سنة 2013 ودي تعتبر مستقبل سفن الشحن في العالم.
اللي عايزين نتكلم عنه النهاردة هو محاولة الاجابة عن سؤالين ملهمش ثالث .. إيه اللي يخلينا كبشر عموماً نقول إن إحنا محتاجين نعمل سفينة كبيرة أوي خالص زي دي؟ .. السؤال الثاني هو إنت إزاي كمهندس أصلاً لما يتقالك احنا عايزين نبني سفينة كبيرة أوي خالص جداً زي دي المفروض إنك تعمل إيه وتفكر إزاي؟
خلينا نبدأ بالسؤال الأولاني .. ليه؟
الإجابة هي بمنتهي البساطة كلمة واحدة .. الفلوس .. دلوقتي إنت عندك دول أو خليني أقول دولة بتنتج بضايع بنفس المعدل اللي إنت بتشتم بيه إنت وصحابك لما تقعدوا تلعبوا بلاي ستيشن .. وفي نفس الوقت عندك دول بتستهلك البضايع دي بنفس المعدل اللي البنات بيقولوا لبعض يلا نتصور سيلفي أول ما يقابلوا بعض مع إنهم ممكن يكونوا لسه شايفين بعض امبارح .. الفكرة إن البضايع دي عشان تروح من المُنتج للمستهلك فأسهل طريقة إنك ترصها في حاويات علي سفينة زي ماري ميرسك .. ده يفسرلك ليه خط الرحلة الرئيسي بتاع السفينة هو مسار طوله فوق 45,000 كيلومتر من أول مدينة شنغهاي الصينية واللي زي ما قلتلك دي البلد اللي بتنتج كتير لحد ميناء روتردام الهولندي أكبر موانيء أوروبا ودي البلاد اللي بتستهلك كتير .. السفينة ماري ميرسك اتصممت واتصنعت عشان تاخد الطريق ده رايح جاي لمدة 25 سنة.
أرجع وأقولك إن المشكلة كلها في الفلوس .. إنت عشان تنقل بضاعة اتحطت في 18,000 حاوية علي قطر عشان توديهم من شنغهاي لحد روتردام فإنت فكك من تكاليف إنشاء خط السكة الحديد اللي حيقطع المسافة من الصين لهولندا .. مش دي المشكلة .. المشكلة إن البضاعة دي كلها عشان تتحط علي قطر فإنت بتتكلم عن قطر بضاعة طوله عدي 112 كيلومتر .. ده يفسرلك ليه سفن الشحن اللي زي ماري ميرسك مسئولة عن نقل 90% من إجمالي البضايع في حركة التجارة العالمية .. بناء علي كلام منظمة التجارة العالمية سنة 2014 فكل سنة التجارة بين دول العالم بتكون سبب في نقل بضاعة تقريباً ثمنها بيوصل 13 ترليون دولار ولك أن تتخيل إن 70% منهم بيتنقل عن طريق سفن الشحن .. كفلوس ووقت سفن الشحن أرخص وأحسن بكتير من القطارات.
في نفس الوقت بناء السفن مش زي بناء الأبراج .. تايوان ممكن تعمل ناطحة السحاب تايبية 101 وبعد كده تيجي دبي تعمل ناطحة السحاب برج خليفة ودلوقتي السعودية عايزة تعمل ناطحة سحاب أكبر منهم هم الإتنين .. الوضع مختلف شوية في السفن .. السفن محتاجة تركن في موانيء وتمشي في قنوات فلو إنت بنيت سفينة ضخمة زيادة عن اللزوم فده معناه إنها ممكن ميبقاش تنفع تدخل موانيء كتير .. فكر فيها علي أساس إنك رجل معاك فلوس تشتري عربية H3 Hammer بس ساكن في شارع ضيق في إسكندرية .. إنت معاك فلوس تشتريها بس مش حتعرف تركنها تحت بيتكوا .. ده يفسرلك برده ليه لحد دلوقتي سفن الشحن من فئة Triple-E مش بتعرف تخش أميركا عشان كتير من الموانئ الأمريكية أصغر من إنها تستوعب حجمها .. بمعني أخر .. الموانيء الأمريكية معندهاش مكان يكفي ركنة سفينة زي ماري ميرسك.
بس زي ما حجم السفينة بيحكمه الهندسة والأبعاد بتاعة الموانيء ودي حاجة بتتقاس بالمتر فبرده اللي بيحكم حجم السفينة هو الإقتصاد وده بيتقاس بالفلوس .. لما حصلت الأزمة المالية العالمية سنة 2008 ناس كتير توقعت إن دي حتكون نهاية التجارة العالمية خلاص .. بداية من 2008 والطلب العالمي للبضايع قل أوي وعشان كده سنة 2011 شركة ميرسك صدمت العالم لما طلبت تشتري 20 سفينة من فئة Triple-E من ترسانة سفن دايو Daewoo الكورية الجنوبية .. ناس كتير قالت إن ده أغبي قرار يتعمل في البيزنس بعد قرار بيبسي إنها تفجعنا كلنا بالإعلان بتاع (عمرو دياب) اللي بيورينا نفسه وهو صغير .. وقتها بان أوي الفرق بين إنك تبص للبزنس كشركة وتبصله كواحد بيدرسه من بره .. إنت كواحد بيدرس البيزنس من بره شايف إن السوق عرض وطلب .. إنت شايف إن بعد الازمة المالية العالمية الناس بطلت تشتري يعني مبقاش فيه طلب وبالتالي سعر مكان الحاوية علي أي سفينة شحن اتخسف بيه الأرض .. قصاد إنك كشركة شحن شايف إن كل ما بقي عندي سفن اضخم تشيل حمولة اضخم فده احسنلي .. ليه عشان انقل كمية بضاعة من الصين لهولندا بدل ما استخدم سفينتين صغيرين وأدفع تكاليف بنزين وصيانة ومرتبات سفينتين طب ما أدفع بنزين وصيانة ومرتبات سفينة واحدة كبيرة؟ .. الحقيقة إن انهيار سعر برميل البترول اللي حصل في 2018 أثبت إن شركة ميرسك كان عندها حق.
خلينا نتكلم دلوقتي عن السؤال الثاني .. إزاي؟
أي سفينة في الدنيا هي عبارة عن 3 حاجات .. موتور .. رفاص .. شاسيه .. في حالة السفينة ماري ميرسك فإنت كمهندس مطلوب منك إنك تضبط مقاديرك .. التصميم الهندسي خصوصاً للسفن عامل زي عمايل الكيكة .. إنت بيبقي قدامك مقادير وطريقة عمايل .. لو مقاديرك باظت فالكيكة حتترمي في الزبالة .. الكيكة اللي إنت المفروض تعملها هي عبارة عن سفينة بتقدر تمشي في المياة بسرعة ممكن توصل 23 ميل بحري في الساعة اللي هو إنت بتتكلم عن 42.6 كيلومتر في الساعة .. صحيح السرعة دي واطية اوي بالنسبة ليك وإنت طاير بعربية هيونداي فيرنا أو النعش الطاير زي ما بنسميها علي طريق مصر إسكندرية الصحراوي وإنت كاسر 140 كيلومتر في الساعة بس حاول تستوعب إنك بتتكلم عن سفينة وزنها بحمولتها معدي ربع مليون طن .. عشان كده السفينة دي مفيهاش فرامل.
أيوة زي ما قريت .. إنت عشان توقف سفينة بالوزن ده فإنت بتشيل رجلك من علي البنزين وبتطفي الموتور وبتسيب القصور الذاتي واحتكاك المياة مع جسم السفينة هو اللي يوقفها .. عشان السفينة دي تقف فمن أول ما القبطان بتاعها يبطل الموتور لحد ما تقف خالص فهي بتحتاج ما بين 6.4 كيلومتر لحد 8 كيلومتر .. تاني .. تخيل إنك سايق الهيونداي فيرنا وإنت طاير بيها وتكتشف إن مفيهاش فرامل وعشان توقفها إنت بتشيل رجلك من علي البنزين وبتسيبها تهدي براحتها لحد ما تقف وبتحتاج ما بين 400-600 متر .. بدأت تستوعب الفكرة؟ .. فخلينا دلوقتي نرجع نتكلم عن المقادير الأساسية لأي سفينة في الدنيا .. الموتور والرفاص والشاسية وناخدهم واحدة واحدة نتكلم عنهم.
الموتور .. ضخم لدرجة إنك عشان تصلحه بتخش جواه:
السفينة دي فيها موتورين ديزل الواحد فيهم بيديك 43,000 حصان وحاول بس تستوعب الرقم ده قبل ما تكمل قراية .. الموتور الواحد فيهم عبارة عن 8 سلندر علي خط واحد بس Two-Stroke يعني حاجة شبه موتور الموتوسيكل بحيث إن في المعتاد الموتور ده الRPM بتاعه بيكون حوالي 25 .. مش بس دي الحاجة الوحيدة اللي تبهر .. إنت عشان تشوف موتور عربيتك فإنت كل اللي بتعمله إنك تفتح الكابوت .. هنا إنت محتاج تنزل في أسانسير 10 أدوار لحد أوضة المحركات Engine Room عشان تلاقي موتورين الواحد فيهم إرتفاعه 3 أدوار .. إنت بتتكلم عن موتورين كل موتور فيهم له فريق المهندسين والفنيين بتوعه المسئولين عن صيانته .. إنت بتتكلم عن سفينة جواها ورشة متكاملة لإصلاح أي عطل يخطر علي بالك .. يعني مثلاً .. يقدروا يغيروا البساتم .. يقدروا يغيروا الرشاشات والتاكيهات .. لو عايز تخرط الأسطوانة نفسها يقدروا يعملوها جوه السفينة وهي ماشية .. الرومان بلي بتاع عمود الكرانك يقدروا يغيروه لو باظ .. الحالة الوحيدة إن السفينة تحتاج تروح لأقرب ميناء هي لو الكرانك شافت نفسه اتكسر.
إنت بتتكلم عن موتور كبير أوي .. موتور خزعبلي لدرجة إنك عشان تكشف علي الشنابر أو Oil Rings بتاعه البستم إنت مش بتحتاج بس إنك تشيل وش الموتور وتسحب البستم .. إنت بتدخل بني أدم جوه الموتور من الAir Manifold والبني أدم ده بيمشي جوه الموتور في المسارات اللي الهواء بيمشي فيها .. أزمة الموتور ده في رأيي إنك تستوعب فرق Scale بينه وبين موتور عربيتك ومش بس في الحجم .. في الشغل كمان .. خليني أديلك مثال .. في المتوسط يعني عربية أي حد فينا بتمشي 16,000 كيلومتر في السنة يعني حوالي 1,300 كيلومتر في الشهر .. ده المتوسط ممكن تبقي أقل من كده أو أعلي من كده علي حسب .. عارف إنت ال16,000 كيلومتر اللي إنت بتمشيهم في السنة دول؟ أهو السفينة ماري ميرسك بتقطعهم في شهر .. ده معناه إن طاقم المهندسيين والفنيين اللي علي السفينة بيغيروا زيت وفلاتر للموتور أكتر ما بيغيروا شراباتهم.
الرفاص .. فكرته أتفه من التفاهة بس تصنيعة أصعب من عمايل الرز:
السفينة ماري ميرسك هي أول ناقلة حاويات في العالم تتصمم وتتصنع بإتنين رفاصات جنب بعض .. الرفاص الواحد ثمنه مليون دولار .. الرفاص الواحد كتلته 70 طن وقطره معدي 10 متر من تصنيع شركة تصنيع الرفاصات الألمانية ميكلين-بيرجر ميتالجوس Mecklenburger Metallgus وبيتصنع من سبيكة من البرونز .. كل موتور متوصل علي حدافة ومنها علي الرفاص عن طريق عمود رفاصات Propeller Shaft يعني مفيش فتيس أو Gear Box .. الرفاص بياخد حركته من الموتور دايركت.
الرفاص نفسه عشان تصنعه ففكرته تافهة جداً .. سر الصنعة اللي فيه هو مكونات السبيكة البرونز اللي هو بيتصنع منها .. إنت بتصب السبيكة في قالب في عملية Casting تافهة جداً زي اللي خدتها في كلية هندسة قسم إنتاج وبعد ما السبيكة تبرد بيتعملها شوية Finishing عن طريق مكنة تجليخ بنفس الفكرة اللي إنت برده خدتها في كلية هندسة قسم إنتاج .. هي الأفكار تافهة .. التطبيق هو اللي مبهر .. إنت بتجيب السبيكة تسيحها في فرن Induction Furnace عاملاه الشركة الألمانية اللي صنعت الرفاص وده يعتبر من أكبر أفران الحث الكهربي اللي ممكن تلاقيها في العالم .. الفرن بيقدر يخلي معدن السبيكة يسيح علي درجة حرارة 1200 مئوية .. السبيكة بتتصب وبتتساب 10 أيام كاملة عشان تبرد .. وبعد كده بتخش مرحلة التجليخ .. عارف فيلم Avatar؟ .. فاكر الإنسان الألي اللي متوصل بدراع شبه دراع الJoystick وبيحاكي حركة العسكري اللي سايقه؟ .. أهي دي نفس الفكرة .. مكنة التجليخ عبارة عن ذراع بيحاكي حركة إيد اللي بيشغله .. إنت متقدرش تقول إن تجليخ الرفاص بيقوم بيه إنسان ألي لإن ده مبيحصلش .. هي أقرب ما تكون للتجليخ اليدوي بورقة صنفرة بس بتتم بمعدل أسرع بكتير.
العمر الإفتراضي للرفاص مش كبير يعني يدوبك 10 سنين لإن من أول لحظة هو بيشتغل فيها فالرفاص بيطلع عينه وعين اللي خلفوه بسبب ظاهرة إنت عارفها كويس لو إنت مهندس ميكانيكا وهي Cavitation ودي كلمة ملهاش ترجمة عربي تعبر عنها أوي بس هي معناها إن لما الرفاص بيدور فإنت بتشوف إنه بيعمل فقاقيع هواء كتير .. الفقاقيع دي مش بتستحمل الضغط وبتخش في نفسها يعني بيحصلها Implode زي ما إنت كده تطبق علبة الكانز بعد ما تشربها .. لما ده بيحصل ففقاعة الهواء دي بتبقي عاملة زي الطلقة بتجري علي الرفاص تضربة .. المشكلة إنهم بيبقوا مليارات الفقاقيع اللي بيحصلها Implosion وبيضربوا الرفاص كإنه مدفع رشاش مش عايز يقف .. بعد سنين من الشغل الرفاص بيتاكل وبيحتاج إنه يتغير.
الشاسيه .. سفينة متفرقش كتير عن Lunch Box بتاع الأطفال:
في المعتاد السفينة دي بيكون وزنها وهي ماشية في المياه حوالي 250,000 طن .. وزنها وهي فاضية 63,000 طن بس .. ده معناه إنك بتتكلم عن 18,000 حاوية وزنهم معدي 187,000 طن .. الليلة دي كلها بتتحط علي سفينة والحل الوحيد قدام المهندسين إنهم يرصوا العدد ده من الحاويات جوه السفينة هي إنهم يعملوها من غير سطح .. حاول تتخيل انك بتتكلم عن سفينة بالضبط زي علبة الساندويتشات البلاستيك بس شيل غطاها .. علبة بتقدر ترص فيها 23 صف حاويات علي عرض السفينة وتقدر ترص 24 صف حاويات علي امتداد طولها .. عمود الحاويات الواحد المترصص فوق بعضه ممكن يوصل 21 حاوية .. حاول تبقي مستوعب إن 18,000 حاوية دول لو رصتهم فوق بعض أنا ممكن اوصل للفضاء الخارجي.
نرجع تاني للسؤال المهم اللي لازم تسأله لنفسك لو إنت مهندس بحري .. إزاي أصمم سفينة زي ما قلنا فكرتها إنها عاملة زي علبة الساندوتشات أو Lunch Box البلاستيك اللي من غير غطا وتكون تستحمل الوزن ده كله وكمان تستحمل إنها تمشي في وسط عاصفة في البحر؟ .. الإجابة هي إنك تبص علي Lunch Box وتركز عنيك علي الشفة البلاستيك اللي فيه .. الشفة البلاستيك دي إنت حتشوفها في أي جردل .. حتشوفها في أي Lunch Box .. لو رحت Starbucks وطلبت كوباية فرابتشينو وايت توشكليت تشيب بالكريمة وأنا عمري ما جربته أنا بس بوريك أنا قد إيه كول طحن إني عرفت أنطق الأوردر ده قدامك وبصيت علي الكوباية اللي محطوطلك فيها البتاعة دي حتشوفها .. بإختصار حتشوفها في أي وعاء متصمم إنه يتحط فيه حاجة تقيلة مقارنة بكتلة الوعاء نفسه .. الشفة دي اسمها الهندسي Torsion Box يعني صندوق الإلتواء .. الTorsion Box معمول عشان يمنع السفينة إنها تتني تحت تأثير حركة الامواج في العواصف وفي حالة السفينة ماري ميرسك فهو كبير لدرجة انه بيؤدي وظيفة إنه بقي الكوريدور اللي داير ما يدور جول جسم السفينة وبيوديك لأي حتة إنت عايز تروحها.
دي سفينة كلها علي بعضها شاكب راكب فيها 25 بني أدم بيمثلوا الطاقم بتاعها .. طاقم مطلوب منه إنه ياخد باله من المحركات .. من البضاعة .. وكمان من الحريق .. كل شهر طاقم السفينة بيعمل مناورة حريق علي فكرة .. سفن الشحن عموماً وبالذات السفينة ماري ميرسك هي تجسيد إن الهندسة مهما كانت تبان عملاقة وضخمة ومعقدة وكبيرة وكلها مشاكل إلا إنك لو بصيت ليها كمهندس واستهديت بالله كده وصليت علي سيدنا النبي (عليه الصلاة و السلام) حتلاقيها عبارة عن شوية أفكار تافهة إنت خدتها في الكلية ومعاك المعادلات اللي بتحكمها .. التطبيق وازاي الأفكار دي بتتنفذ هي اللي بتختلف.
المصادر:
- حلقة من برنامج Richard Hammond’s Big: Mega Ship وده لينك الحلقة علي YouTube لو حبيت تتفرج عليها:
https://www.youtube.com/watch?v=zWzdlcdXhzg&list=PLpp6pYY-9DKiKK9wrCUnQD2at-NYJTE9K
- مقالة بعنوان Abroad a Cargo Colossus نشرت في جريدة The New York Times الأمريكية وده لينك المقالة الأصلية:
https://www.nytimes.com/2014/10/05/business/international/aboard-a-cargo-colossus-maersks-new-container-ships.html
