عشان تبقي أديب أو كاتب إنت مش محتاج تبقي دارس حاجة معينة .. إنك تبقي أديب مش زي إنك تبقي دكتور لازم تتسحل في كلية الطب .. عشان تبقي أديب و خصوصاً في حتة أدب الخيال العلمي بالذات لازم يبقي عندك الحاجة اللي جايه من إسم القصة اللي إنت حتكتبها .. خيال .. مثال علي كده دكتور (أحمد خالد توفيق) الله يرحمه و اللي شكل وعي جيل كامل بكتاباته و كان طبيب صيدلي .. مثال تاني علي ده هو (إسحاق عظيموف Isaac Asimov) اللي هو أساساً يعني كان دكتور في جامعة بوسطن الأميريكية بيدرس كيمياء عضوية Biochemistry بس الرجل ده في وقت فراغه كان بيعشق حاجة إسمها تاريخ و كلمة بيعشق هنا مش معناها بس إنه بيحب يقرأ و يتعلم من كتب التاريخ إنما كمان بيحب يفهم هي الأحداث التاريخية دي حصلت كده ليه؟ .. يمكن ده السبب اللي خلاه يقع في غرام كتاب إسمه The History of the Decline and Fall of the Roman Empire يعني قصة إنحدار و سقوط الإمبراطورية الرومانية كتبه واحد إسمه (إيدوارد جيبون Edward Gibbon) و كمان تعجبه أوي نظرية إسمها Cycles of History اللي حطها واحد إسمه (أرنولد توينبي Arnold Toynbee) و دي تقدر تقول عليها تطبيق الأية الكريمة بتاعة و تلك الأيام نداولها بين الناس.
بإختصار شديد (إسحاق) كان دايماً بيحاول يفهم هي الإمبراطوريات بتقع ليه؟ .. و لما بتقع إيه اللي بيحصل لتراثها و للإنجازات اللي هي حققتها في السنين اللي هي عاشت فيها؟ .. محاولة (إسحاق) إنه يجاوب علي السؤالين دول خلوه يكتب شوية قصص قصيرة نشرها في مجلة Astounding Science Fiction في الفترة من 1942 لحد 1950 بس خلال السنتين من 1951 لحد 1953 جمع كل القصص القصيرة دي كلها في سلسلة من 3 روايات سماها القاعدة Foundation .. سنة 1981 كتب روايتين كمان يعتبروا بيحكوا الحكاية قبل الأحداث الأصلية و سنة 1988 كتب روايتين كمان بيحكوا اللي حصل بعد أحداث الروايات الأصلية .. يعني بسم الله ما شاء الله بتتكلم عن 7 روايات بتحكي قصة أحداثها إستمرت أكتر من 500 سنة .. زي ما إنت شايف أو حاسس فالأحداث بتاعة الروايات كتير و داخله في بعضها بشكل أحياناً بيكون مستفز بس أصل الحكاية بسيط و عشان أشرحولك إنت محتاج ترجع للسؤال اللي (إسحاق) كان بيحاول يجاوب عليه .. هي الإمبراطوريات بتقع ليه؟
الإمبراطورية اللي (إسحاق عظيموف) بيحكي حكايتها هي الإمبراطورية المجرّية Galactic Empire و كلمة مجرّية هنا جاية من المجرات Galaxies مش من دولة المجر اللي في شرق أوروبا .. دي إمبراطورية من إسمها بتحكم عدد من المجرات و تحت سيطرتها شعوب كتير و كواكب كتير فضلوا تحت إرادتها لأكثر من 1200 سنة لحد ما جه عالم رياضيات إسمه (هاري سيلدون Hari Seldon) قالهم أنتوا حتاخدوا أحلي خازوق في حياتكوا .. الإمبراطورية اللي أنتوا فرحانين بيها دي و فضلتوا تبنوا فيها بقالكوا 1200 سنة حتقع و حتنهار خلال أقل من 500 سنة .. تعالي إنت رايح فين .. بعد إنهيار الإمبراطورية حتحصل فترة فوضي في الكون حتستمر لأكثر من 30,000 سنة .. لحد هنا إنت غالباً بتهرش في شعرك لإن ده فعلاً اللي حصل بعد إنهيار الإمبراطورية الرومانية بس إستني لسه الحلو مجاش .. (هاري) قال إن السقوط جاي جاي و مفيش أمل إنه ميحصلش بس اللي ممكن يخفف شوية من الصدمة إن لو إتعملت قاعدة أو Foundation بحيث تبقي كيان غير مركزي يعني مينفعش تبقي مبني معين الناس كلها عارفه مكانه و القاعدة دي يتحط فيها كل العلوم و الأدب و التراث الإنساني بحيث لما المصيبة تحصل فالبشر يقدروا ياخدوا العلم ده يبنوا بيه الدولة الجديدة عشان بدل ما فترة الفوضي تبقي 30,000 سنة نقدر نخليها 1,000 سنة بس علي أمل إن اللي يبنوا الدولة الجديدة يتعلموا من الأخطاء اللي في الأخر أدت لإنهيار الإمبراطورية القديمة.
فيه سؤال ممكن يكون بيحوم في دماغك دلوقتي اللي هو يا تري (هاري سيلدون) عرف مصير الإمبراطورية منين؟ .. هل مثلاً كان بيشم علي ظهر إيده ولا بيضرب الودع؟ .. الحقيقة لا عشان هو بتاع رياضيات فهو عمل نموذج رياضي Mathematical Model سماها سايكو-كيميستري Psychohistory و دي عبارة عن كلمة ميكس من كلمتين اللي هم التاريخ و علم النفس .. بإختصار هو عمل شوية معادلات عشان تتنبأ بمستقبل التجمعات الكبيرة من البشر زي مثلاً إمبراطورية عايش فيها مليارات البشر و النموذج الرياضي بتاعه هو اللي تنبأ بإنهيار الإمبراطورية .. مش بس كده .. في الروايات فيه بنت واحدة بس في الإمبراطورية هي اللي ربنا عطالها قدرة إنها تفهم و تستوعب المعادلات الرياضية اللي (هاري) عمل بيها النموذج الرياضي بتاعه إسمها (جيل دورنيك Gaal Dornick) و البنت دي حتكون هي الدراع اليمين ل(هاري) في خطته لحماية التراث الإنساني من الضياع.
طبيعي إن الإمبراطورية ميعجبهاش الكلام .. طبيعي إنهم يقولوا معلش يعني إحنا عايشين زي الفل بقالنا 1200 سنة و مش حتيجي إنت يا بتاع الحساب و الجمع و الطرح تقولنا إن إحنا غلطانين .. الإمبراطورية بتتهم (هاري) و (جيل) إنهم شوية إرهابيين و عايزين يقلبوا نظام الحكم و يعكروا صفو المناخ العام و بتقرر تنفيهم لكوكب في أخر بلاد المسلمين إسمه تيرمينوس Terminus بعيد خالص عن كوكب ترانتور Trantor اللي إنت تقدر تقول عليه عاصمة الإمبراطورية عشان بالقرار ده تبدأ الحرب اللي إستمرت 500 سنة بين الإمبراطورية و بين (هاري سيلدون).
اللي أنا عايزك تبقي فاهمه هو إزاي سلسلة روايات Foundation كان ليها تأثير كبير علي كل ما له علاقة بالخيال العلمي من ساعة ما إتنشرت .. السلسلة دي كانت هي الأساس اللي طلعت منه سلسلة أفلام Star Wars اللي لسه مكملة معانا لحد دلوقتي .. بسببها طلع لينا مسلسل Star Trek .. (إيلون ماسك Elon Musk) الملياردير و مؤسس شركتي Tesla و SpaceX كان معجب بيها جدأً و هو صغير لدرجة إنه لما قرر يجيب عربيته Tesla Roadster يحطها علي صاروخ Falcon Heavy اللي بتعمله شركته SpaceX و يبعتها المريخ حط في صندوق التابلوه بتاع العربية نسخة من سلسلة روايات Foundation .. عالم إقتصاد و معاه جايزة نوبل زي (بول كروجمان Paul Krugman) دايماً يقول مينفعش تقول علي نفسك بتاع إقتصاد من غير ما تكون قريت سلسلة روايات Foundation.
علي الناحية الثانية برده الروايات دي عشان سألت سؤال مش كل الناس بتسأله بس كتير منهم بيفكروا فيه اللي هو إزاي الإمبراطوريات بتقع فتنظيم إرهابي زي أوم شينريكيو Aum Shinrikyo الياباني و اللي كان مسئول عن الهجوم الإرهابي المخيف ضد محطة مترو طوكيو سنة 1995 و اللي كان السبب في وفاة 13 بني أدم لما إتحقق معاهم قالوا إنهم زيهم زي (إسحاق عظيموف) شايفين إن الإمبراطورية البشرية الحالية بوظت الدنيا بما فيه الكفاية و جه الوقت إنها تقع و إنهم شايفين نفسهم مجرد بيسرعوا من سقوطها عشان تتبني الدولة الجديدة علي نظافة .. يقال برده إن (أسامة بن لادن) الله يرحمه سمي تنظيم القاعدة بالإسم ده بسبب إعجابة بفكرة الرواية و متنساش إن كلمة Foundation في العربي هي القاعدة أو الأساس.
بس بعيد عن التنظيمات الإرهابية و رغبة ناس معاها فلوس إنها تاخد اللقطة فسلسلة روايات Foundation كان ليها تأثير علي بني أدمين طبيعيين زيك زيهم و من ضمنهم واحد إسمه (ديفيد إس جوير David S. Goyer) .. (ديفيد) زيه زي ولاد كتير علاقاتهم بأباتهم مش مثالية أوي بس في عيد ميلاده ال13 باباه إداله هدية عبارة عن نسخة من ثلاثية روايات Foundation اللي (ديفيد) قراها و زي ما تقول كده فيه لمبة نورت في دماغه .. (جوير) كبر و بقي السيناريست اللي كتب سيناريوهات أفلام زي Batman Begins و The Dark Knight و The Dark Knight Rises اللي هم الثلاثية اللي أخرجها (كريستوفر نولان Christopher Nolan) عن شخصية باتمان .. (ديفيد) برده هو اللي كتب السيناريو بتاع فيلمي Man of Steel و Batman V Superman: Dawn of Justice و اللي أخرجهم (زاك سنايدر Zack Snyder).
في يوم من أيام 2017 (ديفيد) كان شغال سيناريست بيكتب سيناريو فيلم Terminator: Dark Fate و كان اللي شغال معاه وقتها بيشرف علي كتابة السيناريو المنتج (جيمس كاميرون James Cameron) .. وسط القعدة (ديفيد) بيجيله تليفون و بيرد .. اللي إتصل بيه كان بيبلغه خبر إن حق تحويل سلسلة روايات Foundation لعمل فني بقي متاح للي عايز لو (ديفيد) مهتم يعني .. (ديفيد) قفل السكة و بلغ (جيمس) بالخبر و (جيمس) زي ما يكون فهم من نظرة عين (ديفيد) هو كان بيفكر في إيه فقاله بس إفتكر إني قلتلك بلاش .. لما (جيمس كاميرون) شخصياً اللي رعبنا كلنا لما قدملنا فيلم Alien و خلي البنات تعيط في فيلم Titanic و خلي الولاد تعيط في فيلم Avatar يقولك بلاش فإنت محتاج تفهم إن الرجل ده أولاً دايس في سكة أفلام الخيال العلمي و ثانياً هو عارف إن قصة بتعقيد Foundation فعلاً حيبقي صعب تتعمل فيلم .. بس هي دي الفكرة .. مين قال إنها تتعمل فيلم؟
بعدها بكام يوم (ديفيد) كان في إجتماع مع الناس اللي ماسكة شركة Apple TV+ عشان يقنعهم يعملوا سلسلة روايات Foundation لعمل فني بس خلي بالك .. (ديفيد) في الشغلانة دي بقاله كتير و هو عارف إن أستوديوهات إنتاج كتير بتدور علي الحاجة اللي تملا الفراغ اللي سابه مسلسل Game of Thrones فهو لما عرض فكرته علي الناس بتاعة Apple TV+ مقالهمش أنا عايز أعمل فيلم ولا حتي سلسلة أفلام إنما قالهم أنا عايز أعمل مسلسل من 8 مواسم كل موسم 10 حلقات بحيث يغطوا أحداث بتمتمد لأكثر من 1000 سنة مش مجرد 500 زي ما الروايات الأصلية بتقول .. خليك فاكر إن مسلسل Game of Thrones لما إتعرض الموسم الأول بتاعه محدش كان متخيل إنه حيستمر لحد ما يبقي مسلسل من 73 حلقة علي مدي 8 مواسم.
بس في نفس الوقت عشان يتفادي أخطاء Game of Thrones فإنت الأساس بتاع الأحداث كله متاح .. (ديفيد) مقرر من دلوقتي هو حيبدأ القصة منين و حينتهي فين .. كمان هو لعب شوية في الفكرة بتاعة القصة .. الإمبراطورية بيحكمها 3 نسخ من نفس الشخص اللي هو بيسميها السلالة الجينية Genetic Dynasty بحيث إن الإمبراطورية فعلياً صحيح بقالها 1200 سنة عايشة بس اللي بيحكمها هي نفس الدماغ اللي مبتغيرش .. برده إنك تدخل شوية من الحاضر في القصة يعني مثلاً شخصية (جيل دورنيك) و هي صغيرة علي الكوكب بتاعها سيناكس Synaxx عملت نموذج رياضي تنبأ بإن مستوي سطح البحر في الكوكب حيعلي بشكل يهدد حياة الناس بس عشان هو كوكب متدين بزيادة و ضد فكرة إن العلم يقول للناس يعملوا إيه و ميعملوش إيه فأهل الكوكب نبذوها و فعلياً محدش بقي عايز يتكلم معاها ولا يسمع تحذيرها.
الحقيقة إن فيه نقطتين عاجبني أنا شخصياً في طريقة (ديفيد إس جوير) إنه يعمل المسلسل بتاعه بصفته المنتج التنفيذي .. الأولي هي المعيار اللي هو بني عليه إختيار الممثلين .. الثاني هو إزاي تصوير مسلسل زي ده يعتبر تحدي لوجيستي لأي منتج و خليني أتكلم معاك في النقطتين دول بشوية تعمق صغيرين:
إختيار الممثلين .. في تقديري الشخصي إختيار الممثلين اللي يجسدوا البطل و الشرير في المسلسل ده ضربة معلم من (ديفيد) .. (جاريد هاريس Jared Harris) اللي إنت يمكن تعرفه من أدواره في مسلسل Chernobyl و فيلم Sherlock Holmes: A Game of Shadows إختيار مفيش حد يقدر يعترض عليه .. (جاريد هاريس) من الممثلين الشاطرين أوي في شغلتهم لدرجة إنه ممكن يجسد شخصية أي حد .. نفس الكلام علي (لي بايس Lee Pace) في دور الإمبراطور اللي كفاية تسمع صوته بس و ده كفيل إنه يخليك تخاف منه .. بس الأدوار التانية هي اللي بصراحة داخله دماغي لإنها إتبنت علي فكرة تجارب الأداب Auditions .. شخصية (جيل دورنيك) اللي جسدتها الممثلة الإسبانية (لو لوبيل Lou Llobell) تم إختيارها من ضمن 500 ممثلة قدموا علي تجارب الأداء عشان يجسدوا الدور .. ممثلة زي (ليا هارفي Leah Harvey) اللي جسدت شخصية (سالفور هاردين Salvor Hardin) حاكمة كوكب تيرمينوس اللي بيتنفي ليه (هاري سيلدون) و (جيل دورنيك) عمرها ما قدمت أي عمل سينمائي أو تليفيزوني و كل شغلها اللي قبل كده كان في المسرح.
الكابوس اللوجيستي .. إنت بتتكلم عن مسلسل فيه 100 شخصية عشان تختارهم إنت عملت جلسات تجارب أداء في 17 مدينة حول العالم بس إنت الحمد لله ربنا كرمك و إخترتهم خلاص .. التصوير أغلبه تم في أستوديوهات شركة تروي ستوديوز Troy Studios في مدينة ليميريك Limerick الأيرلندية و عشان كده مسلسل Foundation هو أضخم مسلسل يتصور في أيرلندا .. ده مسلسل شغال فيه 500 بني أدم غير الممثلين .. بتتكلم عن 170 موقع تصوير خارجي و داخلي شغال فيهم 50 مهندس ديكور .. مهندسين الديكور دول كمان حيصممولك 13 سفينة فضائية كمان يعملولك التصميم بتاع 6 كواكب مختلفة .. كل كوكب بلغته و تضاريسه و حياته .. كل مهندس شغال تحت منه نجارين و بتوع موكيت و نحاتين و صنايعية و ليلة كبيرة أوي سعادتك .. اه نسيت أقولك .. المسلسل إتصور وقت فيروس Covid-19 فإنت محتاج معمل تحاليل في كل لوكيشن تصوير و محتاج تعمل نظام بحيث كل بني أدم شغال في المشروع ده يتعمله تحليل 3 مرات في الإسبوع.
أنا بس عايز أختم إن من الحاجات الغريبة لو فكرت فيها شوية إن (إسحاق عظيموف) لما كتب روايته Foundation هو صحيح كتبها و حط فيها حبه للتاريخ و كمان حط فيها تجربته الشخصية .. ده رجل شاف بعنيه الحرب العالمية الثانية .. أبوه و أمه كانوا مهاجرين يهود روس جم أميركا فهو شاف بعنيه إزاي الرايخ الألماني الثاني بدأ و إزاي إنتهي .. إزاي العنصرية ضد اليهود تجسدت في الهولوكوست .. كمان شاف الحرب الباردة و تدخل دول عظمي زي أميركا و الإتحاد السوفيتي في مصير دول صغيرة زي فييتنام و أفغانستان .. كل ده (إسحاق) حطه في روايته و اللي لو فكرت فيها شوية حتلاقي روايته تنفع هي هي عشان تحكي قصة البشر بعد سبعين سنة من نشر الرواية .. ده التحدي اللي كان و حيبقي قدام (ديفيد إس جوير) إنه يعمل مسلسل بيحكي عن الهيمنة الأميريكية و حقوق الأقليات و التغيرات المناخية و الصراع اللي مش عايز يخلص حول السيطرة علي موارد الأرض و الخناقة بين الدين و السياسة و العلم و قضايا كتير متحلتش من وقت (إسحاق عظيموف) لحد دلوقتي.
المصدر:
مقالة بعنوان Foundation: The ‘unfilmable’ sci-fi epic now on our screens نشرت في موقع هيئة الإذاعة البريطانية BBC و ده لينك المقالة الأصلية:
https://www.bbc.com/culture/article/20210920-foundation-the-unfilmable-sci-fi-epic-now-on-our-screens
ماشاء الله أشكرك على الإبداع الخطي في السرد والإفهام أتمنى أشوف هالإبداع في قناة يوتيوب خاصه فيك مستقبلا وأتشرف أكون من متابعينها