لما الحرب الباردة خلصت و الإتحاد السوفيتي إنهار و أميركا بقت شيكا بيكا حصل حاجتين غيروا كل حاجة في هندسة الطيران .. أول حاجة كانت تكنولوجيا التخفي من الرادار أو Stealth و كانت بدايتها بالطيارة F-117 Nighthawk و اللي كانت فعلاً طيارة جاحدة و جت وراها الطيارة B-2 Spirit اللي انت عارفها بإسم الشبح .. تاني حاجة كانت فكرة جامدة زحليقة إسمها صواريخ الجو-جو اللي شغالة بتكنولوجيا Active Radar Homing أو ARH و دي اللي انا عايز أكلمك عنها النهاردة.
زمان اللي هو من أول الحرب الكورية لحد حرب أكتوبر كنت لو انت طيار مقاتل فبيتركب في طيارتك صواريخ جو-جو عشان توقع بيها الطيارات الثانية كانت بتتسمي Semi-Active Radar Homing و إختصاراً بتتسمي SARH و البتاع ده فكرته عشان تفهمها حاول تتخيل إنك ماسك طوبة و بتحدفها علي حد .. الطوبة دي عبارة عن جماد مفيهاش مخ ولا بتعرف تتصرف من نفسها و بتعتمد عليك بشكل كلي عشان تنشن صح و كمان ترمي الطوبة بالقوة الكافية عشان توصل لدماغ صاحبك اللي انت بترميها عليه عشان تعوره .. نفس الكلام في الصواريخ .. الصاروخ بيبقي عليه مستقبل Receiver عشان ياخد منك المعلومة بتاعة انت عايزني أوقعلك أنهي طيارة .. انت كطيار بيبقي معاك علي طيارتك رادار بتشوف عليه الطيارة اللي انت عايز توقعها و بتبعت المعلومة دي لReceiver بتاع الصاروخ و بتقوله روح وقعها .. أكنك مربي كلب و بتطلقه علي حد عشان يجري وراه يعضه .. طب إيه مشكلة الطريقة دي؟
مبدأياً زي ما قلتلك الصاروخ ده كائن مبيفهمش بناء عليه طول ما هو طاير في السكة لازم تفضل انت مشاورله علي الطيارة اللي انت عايزه يوقعها .. ده بيحصل إن الطيار لازم يفضل منشن علي الطيارة اللي هو عايز يوقعها بالرادار بتاعه عشان Receiver بتاع الصاروخ طول ما هو ماشي يجري ورا الإشارة المبعوتة منك .. ده معناه إن من أول ما انت كطيار تتك علي الزرار بتاع الإطلاق لحد ما الصاروخ بتاعك يوقع الطيارة المعادية فانت فعلياً يعني انت و الصاورخ بتجروا ورا الطيارة اللي انت عايز توقعها .. متنساش إني بتكلم عن فترة السبعينات يعني تكنولوجيا الرادارات مكنتش أحسن حاجة في الدنيا فمدي الرادار كان علي قده .. لو الطيار اللي انا عايز أوقعه شاطر و جري من الصاروخ اللي انا ضربته عليه فانا كمان لازم أفضل أجري وراه عشان أفضل منشن الرادار بتاعي عليه.
طب إفرض يعني وانا بضرب الصاروخ بتاعي و بنشن الرادار بتاعي علي الطيارة اللي انا عايز أوقعها فأذا بطيار زميل الطيار اللي انا عايز أوقعه ضرب عليا صاروخ .. ساعتها انا بسيب اللي في إيدي و بجري من الصاروخ اللي إتضرب عليا و لو ده حصل فالصاروخ اللي انا ضربته مبقاش فيه حد بيوجهه و بيقع زي ما هو كده بعد ما البنزين اللي فيه يتحرق كله .. بعد سنين من النكد نزل السوق صواريخ SARH بس ليها خاصية Lock-On After Launch و إختصاراً بتتسمي LOAL و دي فكرتها إني بتك علي الزرار بتاع الإطلاق و الصاروخ بيطير من غير ما أكون شاورتله علي هدف يوقعه و بعد ما يطير شوية أبدأ أوجهه علي أساس إن الحل ده حيقضي علي شوية المشاكل بتاعة SARH بس طبعاً ده محصلش.
الجديد بقي اللي بدأ ينزل السوق من أول الثمانينات كان تكنولوجيا ARH و دي صواريخ جو-جو و فكرتها بمنتهي البساطة إن الصاروخ نفسه إتركبله رادار و مبقاش معتمد علي إشارة الرادار بتاعة الطيار اللي ضربه .. عشان شبهتلك ضرب الصواريخ الجو-جو علي الطيارات المعادية بكأنك مربي كلب و بتطلقه علي حد عشان يعضه فمهندسين الطيران عاملين نوعين من التوجيه للصواريخ الجو-جو:
- النوع الأول إسمه Pitbull Mode و إتسمي كده علي إسم فصيلة الكلاب البيتبول و ده فكرته إنك كطيار بتدي إشارة الرادار بتاعة الطيارة اللي انت عايز توقعها للرادار بتاع الصاروخ اللي ضربته و بتقول للصاروخ شايف إشارة الرادار دي؟ .. خليك وراها بقي عشان توقعها .. كأنك مربي كلب بيتبول و بتقوله شايف عمو اللي هناك ده روح عضه.
- النوع الثاني إسمه Mad Dog Mode يعني الكلب السعران و ده انت بتقول للصاروخ بتاعك أول ما تلقط إشارة رادار في سكتك إجري وراها لحد ما توقعها.
في الحالتين انت كطيار بقيت بتتك علي الزرار بتاع الإطلاق و تطفي دماغك .. انت لا بقيت تفضل تجري ورا الطيارة اللي انت عايز توقعها .. ولا بقيت خايف حد يضرب عليك صاروخ وانت بتنشن علي حد زي ما تكون مش عايز كلب يجري عليك و انت بتعمل بيبي .. أول صاروخ جو-جو بتكنولوجيا ARH ينزل السوق كان AIM-54 Phoenix اللي لسنين فضل يخدم في أسطول الطيارات الأمريكاني اللي بتشتغل علي حاملات الطائرات و رغم إنه كان سلاح إتصمم عشان يخدم في القوات البحرية الأميريكية إلا إن الإستخدام الوحيد ليه في ميادين المعارك كان في حرب الخليج الأولي بين العراق و إيران .. قبل الثورة الإسلامية الإيرانية سنة 1979 أميركا باعت لإيران طيارات F-14A Tomcat و الإيرانيين وقعوا بيه شوية طيارات عراقية في الحرب اللي إستمرت 8 سنين .. اللي جه بعد AIM-54 Phoenix كان صاروخ AIM-120 Advanced Medium Range Air-to-Air Missile و اللي الناس كلها بتسميه AMRAAM اللي أول تجربة عملية ليه كانت في حرب الخليج الثانية و بعد كده في حرب البوسنة و حرب الخليج الثالثة لحد التدخل الأميريكي في سوريا سنة 2014 ولسه مكمل معانا لحد دلوقتي.
المصدر:
مقالة بعنوان Aerial Dogfighting Was Changed Forever by This Missile نشرت في مجلة The National Interest وده لينك المقالة الأصلية:
https://nationalinterest.org/blog/reboot/aerial-dogfighting-was-changed-forever-missile-191259
