أنا شخصياً مكنتش متوقع إن الغزو يحصل بس حصل .. رهاني كان علي إن القيادة العسكرية الروسية يبقي عندها من الحكمة ما يكفي إنها تتعلم من دروس الغزو الأميريكي للعراق و أفغانستان بس ده محصلش .. يمكن لإن القيادة السياسية متمثلة في الرئيس الروسي (فلاديمير بوتين) كانت متخيلة إن الدنيا سهلة .. بعد كده قلت إن فيه 3 إحتمالات عشان الحرب دي تخلص .. أول إحتمال إن (بوتين) يوصل للي هو عايزه .. ثاني إحتمال إن المفاوضات توصل لحل يرضي جميع الأطراف .. ثالث إحتمال إن تحصل ثورة شعبية في روسيا تخلي (بوتين) يتنحي عن السلطة .. طبعاً مش محتاج أعيد إن الإحتمال الثالث هو أضعف الإحتمالات لإن الفكرة إن الناس دلوقتي علي السوشيال ميديا مقسومة نصين و كل نص عايز يا الإحتمال الأولاني يا الإحتمال الثاني يحصلوا و ده علي حسب إنت واقف في مدرجات مين عشان تشجعه .. لو إنت شايف إن (بوتين) عنده حق فإنت غالباً نفسك تصحي الصبح علي خبر إن العاصمة الأوكرانية كييف إتسوت بالأرض و لو إنت مع الأمريكان فإنت نفسك تصحي علي خبر إن (بوتين) غار في ستين داهية .. كل ده علي عيني و علي رأسي بس يمكن النهاردة أنا عايز أتكلم في نقطة تانية خالص .. هي ليه أوكرانيا مخدتش في إيد الروس غلوة؟
ليه الغزو الروسي لأوكرانيا بدأ يوم 24 فبراير 2022 و أدينا هو وصلنا لنص مارس و الروس محققوش اللي هم عايزينه؟ .. أصل ده معناه إن يا إما الروس مش جامدين زحليقة زي ما كان بيتقالنا أو إن الأوكرانيين هم اللي جاحدين و الروس متوقعوش منهم الأداء البطولي ده في الدفاع عن أرضهم .. في الحالتين إحنا محتاجين نفهم هو إيه اللي حصل غلط؟ و أول نقطة في طريق فهم ده إنك تبقي عارف إن الجيوش زيها زي البني أدمين بيمشوا بمبدأ هذا ما وجدنا عليه أباؤنا و أجدادنا.
حضرتك لما تيجي تتجوز بيتقالك إن فيه قايمة لازم تمضي عليها و إن في كل مناسبة (أو موسم زي ما بيتسمي في مصر) لازم تجيب هدية لحماتك .. ليه لازم؟ .. مفيش إجابة محددة .. هو فيه حد زمان عمل كده و الناس قررت تقلده .. الجيوش كده برده .. اللي بيحصل إن جيش يخش حرب و يستخدم تكتيك أو خطة معينة و تمشي معاه و يكسب الحرب و هوبا التكتيك ده بقي هو هو المتبع في كل الحروب اللي يخشها الجيش ده بغض النظر هي الحرب دي إمتي و مع مين .. أصلها نفعت مرة فأكيد يعني حتنفع في كل مرة .. تبان حاجة غريبة إن مؤسسة عسكرية تمشي بالطريقة دي بس صدقني مش معني إن شخص معلق سيفين و نسر علي كتفه إنه بيفكر بطريقة مختلفة عن أي حد عايش في المجتمع .. متنساش إن ضباط الجيش زيهم زي أي مواطن هو نتاج التربية و التعليم بتاع المجتمع اللي هم عايشين فيه .. في حالة الروس فالطريقة اللي جربوها و نفعت و بقت هي القماشة اللي بتتعمل بيها كل حروبهم هو اللي حصل في الحرب العالمية الثانية .. اللي حصل إن من بعد معركة كورسك و التكتيك بتاع الفيلدمارشال (جيورجي زوكوف) قائد القوات البرية السوفيتية هو عبارة عن فكرة بمنتهي البساطة .. إحنا نرص المدافع بتاعتنا قدامنا عشان تسوي أي حاجة بالأرض و بعد كده نطلق القوات البرية عشان يا تقتل أي عسكري يا تغتصب أي ست ألمانية يشوفوها قدامهم .. تكتيك يبان أهبل بس متقدرش تنكر إنه كسبهم الحرب و من ساعتها و هو هو التكتيك اللي بيستخدموه في أي حاجة .. من الشيشان لجيورجيا لسوريا .. مش مهم كام مدني يموت .. المهم نوصل للي إحنا عايزينه.
يبقي السؤال .. ليه التكتيك ده مجابش نتيجة في أوكرانيا؟ .. ده حيخلينا الأول نفهمك هي القوات الروسية دخلت أوكرانيا إزاي؟ .. دلوقتي إحنا حنمسك أول 3 أيام من الحرب نتكلم عنه بشوية تفصيل لإن اللي حصل في الأيام دي هو اللي حتفهم منه هي المشكلة فين:
اليوم الأول للغزو البري:
القوات البرية الروسية اللي دخلت أوكرانيا إتقسمت علي 4 مجموعات بحيث ساعة الصفر كانت الساعة 4 فجر يوم الخميس 24 فبراير 2022 و المجموعات الأربعة كانوا كالاتي:
- مجموعة رقم واحد .. دي كانت أكبر مجموعة و بتتكون من 17 كتيبة قتالية بإجمالي 24,000 مقاتل حتتبدأ تتحرك بإتجاه العاصمة الأوكرانية كييف من إتجاهين .. الأول من الحدود بين أوكرانيا و بيلاروسيا بحيث المسافة بين كييف و الحدود دي يدوبك 112 كيلومتر بس .. الثاني من جوه الأرضي الروسية بحيث القوتين يتقابلوا عند كييف اللي هي تبقي أكبر مدينة أوكرانية و عايش فيها 2.5 مليون بني أدم.
- مجموعة رقم إتنين .. القوات البرية الروسية حتتحرك بإتجاه مدينة خاركيف تاني أكبر مدينة أوكرانية و اللي عايش فيها 1.4 مليون بني أدم بحيث المسافة اللي حتتحركها القوات الروسية من أول الحدود لحد خاركيف يدوبك 32 كيلومتر بس.
- مجموعة رقم ثلاثة .. القوات البرية الروسية حتخش أوكرانيا من شبه جزيرة القرم في الجنوب بحيث القوات دي حيبقي مطلوب منها تخش مدينة أوديسا اللي هي ثالث أكبر مدينة في أوكرانيا و عايش فيها مليون بني أدم.
- مجموعة رقم أربعة .. المجموعة دي كانت بتتكون من 12 كتيبة قتالية بإجمالي 11,000 مقاتل حتبدأ تخش من جوه الأراضي الروسية لإقليمي لوهانسك و دونتسك اللي قبل الغزو الحكومة الروسية أعلنت إنهم جمهوريات مستقلة و المجموعة دي متحطلهاش هدف معين قد ما كان المطلوب منها تخش قدر الإمكان جوه الأراضي الأوكرانية.
اللي المفروض دورهم إنهم يمهدوا تقدم القوات دي كلها كان 160 صاروخ كروز و 80 قاذفة و طيارة مقاتلة روسية بحيث إتقسمت الضربة الجوية علي موجتين عشان الضربة الجوية في أول يوم شملت 400 غارة جوية .. في أول 24 ساعة سلاح الجو الروسي قدر يدمر مراكز قيادة و 18 بطارية دفاع جوي و 11 مطار و 6 قواعد عسكرية أوكرانية .. و شوف رغم كل ده بس الطيارات الروسية اللي شاركت في الضربة الجوية دي ولا حاجة من قدرة سلاح الجو الروسي ككل .. و دي كانت أول غلطة .. ليه كانت أول غلطة؟ .. بص علي اللي حققته القوات الروسية مع نهاية يوم الخميس:
- وحدات من القوات الخاصة و المظلات الروسية كانت وصلت فعلاً للداونتاون بتاع العاصمة كييف بس القوات دي كانت بعيد جداً عن القوات البرية اللي ملحقتش توصل كييف في أول 24 ساعة مع إن زي ما قلت المسافة من الحدود البيلاروسية الأوكرانية يدوبك 112 كيلومتر بس.
- وحدات من المظلات تم إنزالها عند مطار هوستوميل Hostomel الحربي علي ضواحي كييف .. القوات دي كان المفروض إنها تسيطر علي المطار بحيث لما القوات البرية توصل لكييف فالمطار ده يبقي هو المحطة اللي القوات الروسية تنقل بيها أكلها و شربها و ذخيرتها و بنزينها .. القوات دي كان لازم تنجح في مهمتها مهما كان الثمن و مهما كانت التضحيات .. و ده محصلش .. مع نهاية اليوم الأول مطار هوستوميل فضل تحت سيطرة الأوكرانيين.
- المشكلة الحقيقية كانت المجموعة الأولي اللي بفكرك دورها كان دخول كييف .. عشان سلاح الجو الروسي معملش نفس اللي عملته القوات الجوية الإسرائيلية معانا في نكسة يونيو 1967 و دمرت سلاح الجو الأوكراني أو علي الأقل طلعته بره الخدمة فالطيارات الأوكرانية عرفت تعطل تقدم المجموعة الأولي اللي وقفت علي بعد 30 كيلومتر بره كييف و هي دي النقطة .. العامل النفسي .. مع نهاية اليوم الأول بقي واضح للأوكرانيين إن فيه أمل .. الروس مش حيدوسوا علي وشنا زي ما ناس كتير توقعت و أخطر حاجة بالنسبة لقوات غازية إنك تدي للقوات اللي بتدافع عن أرضها أمل إن ممكن الغزو يفشل.
- مع نهاية اليوم الأول سلاح الجو الأوكراني مكنش خرج بره الخدمة .. مش كل الدفاع الجوي شال أوبح .. مش كل المطارات الحربية إتدمرت .. حتي القوات الخاصة الروسية اللي إترمت خلف خطوط العدو معرفتش تقابل القوات البرية و فشلت في مهمتها .. الأهم من كل ده إن فيه أسلحة ضمن الأفرع الرئيسية للقوات المسلحة الروسية زي ما يكون مجالهاش خبر إن الحرب قامت .. سلاح الحرب الأليكترونية ولا أكنه جه اليوم ده .. يعني إيه الكهرباء تفضل شغاله في المدن الأوكرانية؟ .. إزاي خدمة الإنترنت تفضل شغالة عادي كده؟
اليومين الثاني و الثالث للغزو البري:
اللي الدنيا كانت ماشية معاهم زي السكينة في الجاتوه كانت المجموعة الرابعة يمكن لإن القوات دي كانت بتتقدم في شرق أوكرانيا اللي هو أساساً عايش فيها سكان كتير بيتكلموا روسي و مرحبين بإن أرضهم تبقي جزء من التراب الروسي .. القوات دي وصلت لحد مدينة أوختيركا Okhtyrka اللي بينها و بين كييف 160 كيلومتر .. المجموعة الثانية اللي كان دورها إنها تسيطر علي مدينة خاركيف بدأت تخش المدينة بس معرفتش تسيطر عليها .. المجموعة الأولي فضلت علي حالها مش بتتقدم و مش عارفه تخش كييف.
بعد أول 72 ساعة القيادة العسكرية الروسية بدأت تفهم المشكلة اللي هم وقعوا نفسهم فيها بسبب فشل سلاح الجو إنه ينفذ اللي كان المفروض يتعمل من الأول خالص .. بناء علي كلام وزارة الدفاع الأوكرانية فخلال أول 72 ساعة تم تدمير 700 مركبة روسية من ضمنهم 150 دبابة .. تم إسقاط 40 طيارة .. مع نهاية اليوم الثالث بدأت الأوامر تروح لسلاح الجو إن إبدأ شوف شغلك بقي .. مع نهاية ثالث يوم لستة الأهداف اللي بقي مطلوب من سلاح الجو الروسي يدمرها جوه أوكرانيا نطت بقت 820 من ضمنهم 14 مطار و 48 بطارية دفاع جوي اللي هو عايز تقولهم طب ما كان من بدري يا ولاد التيييت .. علي حسب تقديرات المخابرات الأميريكية فخساير الروس خلال أول 3 أيام كانت 3000 ما بين قتيل و جريح قصاد تقريباً نفس العدد من القتلي و الجرحي الأوكرانيين.
تبقي المشكلة في رأيي هي شعرة معاوية بين الحرب و الغزو .. فيه فرق كبير أوي بين الإتنين .. لو إحنا مثلاً حاربنا إسرائيل دلوقتي فإحنا مش فارق معانا ندمرلهم البنية التحتية بتاعتهم كلها .. إياكش حتي في الضربة الجوية سلاح الجو المصري يدمر كل محطات الكهرباء و السدود في إسرائيل و نقطع عنهم مياه و نور .. في الأخر اللي إنت عايزه إنك تكسب الحرب لإنك مش مخطط إنك تحتل إسرائيل .. العكس في الغزو .. إنت لما بتغزو بلد مش بتبقي عايز ترجعها للعصر الحجري لإن لما قواتك تسيطر علي البلد فإنت اللي حتبقي مطالب توفر الكهرباء و مياه الشرب و الغاز الطبيعي و الإنترنت لأهل البلد اللي إنت إحتلتها .. دي صدقني معضلة كبيرة مش سهل إنك تحلها .. في كلامي قلتلك إزاي يعدي اليوم الأول من غير ما الغارات الجوية الروسية تشمل محطات إنتاج الكهرباء في أوكرانيا بس في نفس الوقت لو الروس كانوا بيخططوا لإحتلال البلد فمن مصلحتهم إن المحطات دي تفضل شغالة عشان ميتحملوش هم تكلفة إعادة تشغيلها .. قيس ده علي كل مرافق البنية التحتية من مياه شرب و غاز طبيعي و إتصالات و إنترنت.
ده يفسرلك العدد القليل من القتلي المدنيين اللي ماتوا لحد دلوقتي .. في أول 24 ساعة من الحرب و علي حسب كلام الحكومة الأوكرانية فعدد المدنيين اللي ماتوا وصل 32 ضحية و مع كل تقديري إن دي أرواح ناس ملهاش ذنب ماتت بس عدد 32 ده قليل أوي علي عملية غزو بري لبلد .. مع نهاية الأسبوع الأول عدد الضحايا من المدنيين كان وصل 300 و 1000 جريح .. تاني .. دي أرواح ناس و حاجة لازم نزعل عليها بس برده دي أرقام قليلة .. مينفعش الحقيقة نقول إن القوات الروسية تعمدت تضرب مدنيين لإن حتي الغارات الجوية اللي إستهدفت مدنيين كتير منها إن لم يكن أغلبها حصل بالغلط.
نقطة تانية ناس كتير بتنساها هو إن صحيح القوات الروسية اللي دخلت أوكرانيا وصلت 150,000 مقاتل و ده رقم يخض الحقيقة بس إنت محتاج تفهم نقطة وهي إن القوات دي دخلت أوكرانيا من 15 مكان مختلف .. بمعني أخر .. لو إفترضنا إن القوات دي إتقسمت بالتساوي فإنت كل مكان دخلت منه القوات الروسية لأوكرانيا كان عدد القوات الروسية يدوبك 10,000 مقاتل بس .. إنت صحيح دخلت البلد بقوات كتير لكن قسمتهم علي حتت كتير برده فكأنك ولا عملت حاجة.
تبقي في رأيي أهم نقطة لازم نقف قدامها كتير الحقيقة هي دور سلاح الجو .. أنا من الناس اللي شايفة إن الغارات الجوية لوحدها من غير قوات برية علي الأرض ده هراء مش بيجيب نتيجة .. لكن .. إن يبقي عندك قوات برية علي الأرض تقوم إنت محجم شغل سلاح الجو فدي غلطة غريبة الحقيقة .. مع نهاية اليوم الثالث عدد الأهداف اللي ضربها سلاح الجو الروسي في أوكرانيا كانت وصلت 820 و اللي الناس بتوع القوات الجوية بيحبوا يسموها Aim-points ده قصاد إن خلال الغزو الأميريكي للعراق سنة 2003 مع نهاية اليوم الثالث برده عدد الأهداف اللي سلاح الجو الأميريكي ضربها في العراق وصلت 3,200 .. شايف الفرق؟
تقديري الشخصي إن منطق (بوتين) في أوكرانيا حيبقي شبه منطق الرئيس (محمد أنور السادات) الله يرحمه في حرب أكتوبر إنه عايز ياخد من أوكرانيا أكبر جزء ممكن عشان لو دخول كييف فشل و إضطر يقعد علي طرابيزة مفاوضات مع الأوكرانيين فحيكون طلبه واضح .. عايزين تاخدوا الأرض اللي تحت سيطرتي؟ .. يبقي تسيبوا فكرة الإنضمام لحلف شمال الأطلنطي دي و ترجعوا في حضني.
المصدر:
مقالة بعنوان Shocking Lessons U.S. Military Leaders Learned by Watching Putin’s Invasion نشرت في مجلة Newsweek و ده لينك المقالة الأصلية:
