إنت ممكن تبص علي الصورة اللي في المقالة دي وتتريق .. حقك .. بنوتة شقرا بتتمرن علي ضرب النار بس منستش إنها بنوتة وحاطة مونوكير حنتخانق سوا علي لونه اسمه إيه بس لون المونوكير مش هو القضية .. القضية إن بعد ما تخلص تريقة لازم تفهم هو إيه الحكاية ورا الصورة دي لإن صدقني لو قلتلك إنها حكاية كلها دراما ولا الدراما بتاعة مسلسلات شاهد اللي محدش بيتفرج عليها دي .. اللي حصل إن في إبريل 2022 إدارة قوات الإحتياط في القوات المسلحة الفنلندية أعلنت إنها حتعمل كورس عن حرب المدن مخصوص للبنات في مدينة هاميلينا Haemeelinna .. الكورس حيشمل تدريب علي ضرب النار والنسف والتدمير والحرب الأليكترونية بحيث العدد المتاح للكورس يدوبك 400 بس .. عايزك تعرف إن خلال ساعة كانت الإشتراكات خلصت وكان لسه فيه 500 بنت مقدمة وإتحطوا في قايمة الإنتظار Waiting List بتاعة الكورس .. السؤال دلوقتي وحاول تفكر قبل ما تجاوب .. لنفترض إن القوات المسلحة المصرية عملت كورس زي ده للبنات لتدريبهم علي حرب المدن يا تري فيه كام بنت حتقدم؟ .. إيه السر ورا إن البنات في فنلندا جريوا يقدموا علي كورس زي ده؟
الفكرة كلها في العقلية أو Mentality بتاعة المواطن الفنلندي البسيط وأنا عارف إن كلمة Mentality بقت كلمة سمعتها وحشة بسبب (محمد صلاح) بس إنت برده لازم تفهم إن الكلمة دي هي اللي بتشرح دماغ الفنلنديين .. فنلندا دي بلد فوق خالص بينها وبين القطب الشمالي فردة كعب .. هي بلد ضمن الدول الإسكندنافية وحتي علمها شبههم .. أبيض بصليب لونه أزرق .. بلد عايش فيها 5.5 مليون بني أدم فهي بلد إلي حد ما صغيرة بس ربنا إبتلاها بحدود علي إمتداد 1333 كيلومتر مع روسيا وصدقني لو قلتلك إن تاريخ العلاقة بين روسيا وبين فلنلندا يوريك إنها علاقة توكسيك بنت كلب عايز ألخصهالك في الكام نقطة الجايين دول:
- سنة 1809 حصلت حرب بين الإمبراطورية الروسية والمملكة السويدية خسرتها السويد وكان من نتايجها إن روسيا خدت فنلندا وضع يد لإن فنلندا زمان كانت جزء من المملكة السويدية.
- سنة 1917 وفي عز ما الثورة البلشفية كانت مولعة تقوم فنلندا تعلن إستقلالها عن الإمبراطورية الروسية .. بس ترجع تاني روسيا تحت إسمها الجديد اللي هو الإتحاد السوفيتي تغزو فنلندا سنة 1939 ضمن الإتفاق السري اللي عمله السوفييت مع النازيين وبتبدأ الحرب العالمية الثانية.
- شوية والنازيين قلبوا علي السوفييت وبدأت عملية بارباروسا وفنلندا تقع في إيد النازيين .. شوية وتحصل معركة ستالينجراد والسوفييت يكنسوا النازيين زي ما إنت بتكنس التراب من فوق السيراميك .. السوفييت حاولوا يستعيدوا فنلندا تاني بس في مرتين القوات المسلحة الفنلندية قدرت تصمد اللي هو سبحان الله النازيين خستعوا بس الفنلنديين أسد يلا فيه إيه.
- سنة 1944 السوفييت والفنلنديين بيوصلوا لإتفاق سلام قال إن فنلندا حتفضل دولة مستقلة قصاد إنها تتنازل عن 10% من أراضيها للإتحاد السوفيتي.
- عايزك تعرف برده إن محدش بيقول للرزق لا .. من ضمن كل دول العالم فنلندا كانت أكبر شريك تجاري للسوفييت .. بفكرك إن ده نفس الإتحاد السوفيتي اللي واخد 10% من أرضهم بدون وجه حق .. يا مؤمن ده سلاح الجو الفنلندي كان معتمد علي الطيارات السوفيتية موديل ميج-21.
- إنهيار الإتحاد السوفيتي خلي العلاقة بين فلنلندا وروسيا علاقة هادية بس متوترة من تحت لتحت .. إحنا بنلعن سلسفين بعض بس قدام الناس إحنا صحاب وحبايب لحد ما جه فبراير 2022.
- عشان كده لما الغزو الروسي لأوكرانيا في فبراير 2022 بدأ الفنلنديين بدأوا يفكروا في الخطوة اللي عمرهم ما راحولها قبل كده .. ليه لا ننضم لحلف شمال الأطلنطي NATO ويمكن بمجرد ما فنلندا فكرت بصوت عالي وقالت إن الإنضمام للحلف بقي من ضمن الأوراق المحطوطة علي الطرابيزة طلع الرئيس الروسي (فلاديمير بوتين) عشان يهدد فنلندا بعمل عسكري لو ده فعلاً حصل.
ده يفسرلك ليه في مارس 2022 جرنان إلتا سانومات الفنلندي عمل إستطلاع رأي للقراء عشان يشوفوا هو المواطن الفنلندي شايف مين أكبر بلد بتمثل تهديد واضح وصريح للأمن القومي بتاع بلده وطلعت الإجابة إن 74% من الشعب الفلنلندي شايف إن روسيا هي أكبر تهديد ليه قصاد إن في نفس الشهر السنة اللي قبلها كان النسبة يدوبك 15% بس من الفنلنديين اللي شايفين كده .. سنة 2017 كانت نسبة الفنلنديين اللي شايفين إن بلدهم لازم تنضم لNATO كانت 19% بس دلوقتي النسبة بقت 68% .. الفكرة إن لحد دلوقتي رئيسة الوزراء (سانا مارين Sanna Marin) لسه مترددة بس لو هي خدت القرار فكتير من المحللين شايفين إن لو ده حصل فنسبة الفنلنديين اللي بيؤيدوا الإنضمام لNATO ممكن تنط تبقي 80% .. بس خلي بالك .. مش معني كده إن لو رئيسة الوزراء قالت يلا ننضم للحلف فبكره الصبح ده حيحصل .. لازم الأول البرلمان الفلنلندي يوافق ويقدم طلب للحلف ولازم كل أعضاء الحلف الثلاثين يوافقوا عشان في الأخر فنلندا تبقي محمية بالفقرة رقم 5 من لايحة الحلف واللي بتقول إن أي إعتداء خارجي علي أي دولة من دول الحلف يعتبر إعتداء علي كل الدول الأعضاء في الحلف.
المصدر:
- مقالة بعنوان As Finland considers NATO membership, citizens mobilize for an invasion by Russia نشرت في جريدة Los Angeles Times و ده لينك المقالة الأصلية:
https://www.latimes.com/world-nation/story/2022-04-24/as-finland-considers-nato-membership-citizens-mobilize-for-an-invasion-by-russia
